Bisi nuan berati, mayuh ari agama deka ngulihka penguntung ari ke meri iring ba pengarap? Sida ngaga iklan lalu bejualka pengawa sereta barang sida. Mayuh tuai pengarap nerima gaji ti tinggi sereta idup nyamai. Peratika sekeda chunto tu:

•   Nitihka siti tasat, lebih ari 13 taun, seiku bishop Katolik ngena duit gerija nepan bilun diri empu kira-kira 150 kali, lalu ngena kerita limusin (kerita panjai ke mar rega) 200 kali. Iya mega ngabiska empat juta dolar kena ngelawaka rumah ke alai iya diau, ti disediaka piak gerija.

•   Seiku penginjil ba menua Afrika suah ngaga pengerami sembiang. Lalu bepuluh ribu iku orang deka datai. Ba gerija iya ke besai nya, iya nyual mayuh bengkah barang, baka “minyak ajih”, kain mandi, enggau baju T-shirt ke bisi gamal iya. Mayuh ari orang ke datai nya seranta, tang iya, amat kaya.

•   Ba menua China, dua ari empat iti buah gunung kudus pengarap Buddha dipegai syarikat awam. Kuih Shaolin ke tebilang mayuh bekaul enggau mayuh projek pengawa dagang. Nyentukka tuai sami ba kuil nya dikumbai “sami CEO.”

•   Ba Amerika Serikat, mayuh kompeni berengkah ngaji penasihat tauka orang ke meri buah runding, kena ngaga pengawa sembiang, lalu meri iring ba pengarap ngagai pekereja sida.

 Kati asai nuan, lebuh nuan nemu agama nya bisi kaul enggau pengawa dagang? Kala nuan berunding, nama asai ati Petara lebuh iya meda, mensia ngena agama kena ngulihka duit?

 Petara enda rindu meda agama dichampurka enggau pengawa dagang. Dalam Bup Kudus bisi ngerikut, jeman kelia Petara amat ringat enggau tuai pengarap ke ngaku diri ngarika Petara, lalu ngajar orang kena “minta upah.” (Mikah 3:11) Pia mega, Petara kala ringat lebuh meda rumah Iya nyadi “alai perumpak belalai.”—Jeremiah 7:11.

 Sama baka Petara, Jesus pan ringat enggau orang ke champurka agama enggau pengawa dagang. Maya jeman Jesus, tuai pengarap ngemendarka orang ke bedagang bejual ba Rumah Petara di Jerusalem, lalu ngulihka penguntung ari sida. Orang bedagang ke amu nya, ngambi ulih ngagai orang ke datai meri sembah ngagai Petara. Enggau berani Jesus muru semua orang bedagang nya ari Rumah Petara. Ku Jesus, ‘Badu agi ngaga rumah Apai aku nyadi rumah kedai!’—John 2:14-16.

 Maya Jesus ngereja pengawa iya ba bumi, iya mandangka runding Petara. (John 8:28, 29) Iya enda kala minta bayar lebuh iya ngajar pasal Petara, tauka lebuh iya ngereja pengawa ajih, meri makai ngagai beribu iku orang, ngeraika orang sakit, sereta ngidupka orang mati. Jesus enda kala ngena kuasa iya nyadi kaya. Indah, Jesus nadai rumah kediri empu.—Luke 9:58.

 Jesus ngajar bala murid iya, anang ngena pengawa ba agama nyadika pengawa dagang. Ku iya, “Kita udah nerima ngena chara pechuma, nya alai beri ngena chara pechuma.” (Matthew 10:8) Bala murid Jesus, ningaka pesan Jesus. Peratika chunto tu:

•   Rasul Peter kala gawa begulai enggau Jesus. Bisi sekali, seiku lelaki ke benama Simon ka meri iya duit, kena ngulihka kuasa sereta penuduk. Enggau lengkas Peter nulak pemeri nya lalu nangkan iya. Ku Peter, ‘Awakka duit nuan enggau nuan empu sama mati, laban nuan ngumbai diri ulih meli pemeri Petara ngena duit!’—Surat Kereja Rasul 8:18-20.

•   Rasul Paul nya baka tuai ti ngabas, ke ngelawa mayuh eklisia. Betaun-taun iya ngereja pengawa nya, nadai kala iya nyadika nya jalai ngulihka pengaya. Iya enggau orang ke sama pengarap enggau iya, enda ‘bejualka jaku Petara baka mayuh orang bukai.’ (2 Korint 2:17) Tang Paul nulis, ‘Kami gawa siang malam, ngambika kami enda nating kita lebuh kami nusui Berita Manah Petara ngagai kita.—1 Tesalonika 2:9.

 Amat, sida pan begunaka duit kena nyukung pengawa nginjil sereta pengawa nulung orang bukai. Tang sida enda kala minta bayar ari tulung ke diberi sida. Sida semina nerima duit ke diberi enggau sukarela bepelasarka prinsip ba baruh:

•   2 Korint 8:12: “Laban enti pengeransing nya bisi, pemeri kita nya deka diterima, beduduk ba utai ti dikemisi kita, ukai beduduk ba utai ti nadai ba jari kita.”

   Reti: Ati orang ke meri nya beguna agi ari penyampau.

•   2 Korint 9:7: ‘Genap iku kita patut meri nitihka pemutus runding diri, ukai enggau ati ti lembau, tauka ari pejal, laban Petara rinduka orang ke meri enggau ati ti gaga.’

   Reti: Petara enggai orang ke meri nya dipejal. Iya gaga nerima pemeri ke datai ari ati.

 Dalam Bup Kudus terang madahka, ukai semua agama tauka chara sembah diterima Petara. (Matthew 7:21-23) Nitihka utai ke ditulis dalam Bup Kudus, semua pengarap pelesu disempamaka baka indu sundal, laban sida bekerejasama enggau pemerintah mensia. (Pemandang 17:1-3; 18:3) Ari utai ke ditulis nya nunjukka, Petara deka ngukum semua pengarap pelesu.—Pemandang 17:15-17; 18:7.

 Petara enggai pengawa jai ke datai ari pengarap pelesu nesatka orang, tauka nagang orang mayuh semak Iya. (Matthew 24:11, 12) Iya meransang orang ke lurus ati belajarka chara nyembah iya, enggau chara ti betul sereta nyeliahka diri ari pengarap pelesu.—2 Korint 6:16, 17.