“Maya aku agi mit, ninting hari, abang aku nyebut jaku ti jai ngagai aku sereta datai jari. Pengudah aku belaki, mentua indu aku mega ngemediska aku. Iya enggau laki iya ngaga aku baka ulun. Aku berunding deka munuh diri.”—Madhu, a India.

 Gerempung Pengerai Entarabansa (WHO) madahka “Ulah ti ganas ngagai orang indu selalu nyadi ba serata dunya.” Nitihka riput ari WHO mega, nyauka satu dalam tiga iku orang indu deka dijamah tauka dikemediska secara seksual dalam pengidup.

 Enti nuan kala napi utai tu, nuan engka takut enda ngira dini alai nuan, laban nuan irau nuan deka diberi jaku ti jai tauka dikemediska ari segi fizikal tauka seksual. Lebuh nuan dikemediska sereta dilayan enggau enda manah, semina ketegal nuan orang indu, nuan engka ngasaika mayuh orang berunding ‘Orang indu nadai guna.’ Tang, nama runding Petara pasal orang indu?

 Ayat Bup Kudus: “[Petara] ngaga lelaki enggau indu.” —Pemungkal 1:27.

 Reti iya: Petara nempa lelaki enggau indu. Iya ngumbai dua-dua bela patut dipebasa. Nambahka nya, Petara ngarapka laki “rinduka bini diri baka [iya] ke rinduka diri empu.” Iya enggai laki nguasa bini ngena jaku ti kasar sereta ulah ti mangah. (Epesus 5:33; Kolosi 3:19) Endang amat, Petara ibuhka pasal pengelikun orang indu.

 “Ari mit aku nyadi mansa seksual bala kaban belayan. Lebuh aku beumur 17 taun, tuke aku madah iya deka muai aku kereja enti aku enggai dibai iya ngereja pengawa seks enggau iya. Lebuh aku udah besai tuai, laki aku, apai indai sereta bala jiran ngemaruhka aku. Tang nyau kelama aku berengkah belajar pasal Jehovah, b Petara ke ngaga semua utai. Iya bebasaka orang indu. Tu nulung aku andal, Iya sayauka aku sereta ngumbai aku berega.”—Maria, Argentina.

 Ayat Bup Kudus: “Sekeda pangan taluk agi ari menyadi diri.”—Jaku-Dalam 18:24.

 Reti iya: Kaban ti bendar ulih nulung nuan. Enti ulih, bantaika meh asai ati nuan ngagai orang ke ulih dipechayaka nuan.

 “Pengelama 20 taun aku nadai kala madahka orang aku kala dikemediska ngena chara seksual. Tu ngujungka aku berasai balat tusah ati sereta balat irau. Tang nyau kelama aku bekunsika utai ke ditapi aku enggau siku kaban ke deka ninga. Nya ngasuh aku berasai nyamai baru.”—Elif, Turki.

 Ayat Bup Kudus: “Buai semua pengirau kita ngagai Petara laban Iya ibuhka kita.”—1 Peter 5:7.

 Reti iya: Lebuh nuan besampi, Petara mendingka nuan. (Masmur 55:22; 65:2) Ketegal Iya balat ibuhka nuan, Iya deka nulung nuan nemu nuan amat berega.

 “Ati aku balat telih. Tang belajar pasal Jehovah ngasuh ati aku berengkah suman. Diatu aku ulih besampi sereta madahka semua asai ati aku ngagai Petara. Iya baka siku kaban ke meretika asai ati aku.”—Ana, Belize.

 Ayat Bup Kudus: “[Jehovah] endang deka ningaka sabak orang ke kena tekan, enggau orang ke nadai apai indai. [Iya] deka meri atur ti manah ngagai sida, ngambika orang badu agi ngemba sida.” —Masmur 10:18.

 Reti iya: Enda lama da agi, Petara deka ngujungka semua ulah ti enda adil nyengkaum ulah ti jai sereta mangah ngagai sida ke indu.

 “Ati aku ti telih berengkah suman lebuh aku nemu Jehovah deka ngujungka semua ulah ke jai ngagai orang indu. Nya ngelantangka ati aku.”—Roberta, Mexico.

 Kena nemu mayuh agi pasal baka ni Bup Kudus meri kitai harapan, kebuah nuan ulih arapka semaya Bup Kudus, sereta baka ni Saksi-Saksi Jehovah ngena Bup Kudus kena nulung orang, pinta meh orang datai ngabas nuan.

 Download fail artikel tu ke ulih dichelak.