Kati nuan ngasaika semua utai deka nyadi manah agi? Mayuh orang nguji berunding enggau positif, taja pan napi penguji ti berat. Tang, kati ulih kitai ngarapka semua utai nyadi manah agi? Ulih! Bup Kudus meri kitai pengadang ti bendar pasal jemah ila

•  Nama pengadang ke disemayaka ba Bup Kudus?

•  Kati semaya ba Bup Kudus ulih dipechaya?

•  Baka ni semaya ba Bup Kudus ulih nyadi nyata?

•  Ni maya semaya ba Bup Kudus nyadi nyata?

•  Baka ni semaya ba Bup Kudus meri penguntung ngagai nuan, indah diatu?

 Bup Kudus endang udah nulis, mensia deka napi mayuh penguji. Taja pia, bisi semaya ke madahka, semua penguji tu bisi pengujung. Peratika sekeda chunto ba baruh:

•   Penanggul: Nadai rumah

   Semaya Bup Kudus: “Orang deka ngaga rumah lalu diau dia.”—Isaiah 65:21.

   Pengadang: Semua orang deka ngembuan rumah diri empu.

•   Penanggul: Seranta sereta nadai kereja

   Semaya Bup Kudus: “Sida deka lantang ati bekenaka utai ti udah ulih sida.”—Isaiah 65:22.

   Pengadang: Semua orang deka bisi kereja ti ngelantangka ati.

•   Penanggul: Enda lurus

   Semaya Bup Kudus: “Jemah ila siku raja deka merintah enggau ati ti rentang.”—Isaiah 32:1.

   Pengadang: Semua orang deka lurus enggau pangan diri. Nadai orang bechiping pasal bansa, penuduk, tauka pasal ekonomi agi.

•   Penanggul: Lapar pungkang enggau kurang zat pemakai

   Semaya Bup Kudus: ‘Gandum seruran mayuh di menua; utai ti ditanam, ngelebat sida ke di menua Lebanon.’—Masmur 72:16.

   Pengadang: Semua orang deka bulih pemakai ti manah enggau mayuh. Nadai siku pan orang lapar tauka kurang zat ba pemakai agi.

•   Penanggul: Jenayah enggau pengganas

   Semaya Bup Kudus: “Semua orang deka diau bebaik enggau pangan diri ba sebelah kebun anggur enggau ba madang kayu ara sida, lalu nadai agi orang deka ngemba sida.”—Mikah 4:4.

   Pengadang: Semua orang deka berasai likun, laban nadai agi orang jai. Semina orang ke manah sereta ngasika Petara aja ba dunya.—Masmur 37:10, 29.

•   Penanggul: Perang

   Semaya Bup Kudus: “Semua bansa deka badu agi beperang, nadai agi nyendiaka diri beperang.”—Isaiah 2:4.

   Pengadang: Dunya penuh enggau pemaik. (Masmur 72:7) Nadai agi orang nyabak ketegal ditinggalka orang ti dikesayau sida ketegal perang, lalu nadai orang nyadi kampar agi.

•   Penanggul: Penyakit enggau sakit

   Semaya Bup Kudus: “Nadai orang ke diau dalam menua kitai deka mutap madahka diri sakit.’”—Isaiah 33:24.

   Pengadang: Nadai orang merinsa agi ketegal penimpang tauka sakit. (Isaiah 35:5, 6) Indah Bup Kudus pan besemaya, pemati deka dipunaska.—Pemandang 21:4.

•   Penanggul: Alam semula jadi rusak

   Semaya Bup Kudus: “Menua puang deka rami gaga, lalu bungai deka tumbuh di menua ti kusi.”—Isaiah 35:1.

   Semaya Bup Kudus: Bumi deka nyadi Paradais. Udah nya, mensia ke lurus ati deka diau dia, baka tuju asal Petara ke bumi enggau mensia.—Pemungkal 2:15; Isaiah 45:18.

 Engka tusah ba nuan ka pechaya. Tang kami meransang nuan, mansik enggau silik agi semaya Bup Kudus pasal jemah ila. Laban semua semaya tu datai ari Petara, lalu enda sebaka enggau jaku ke bedau temu betul enda ti datai ari mensia. Nama kebuah kitai munyi nya?

•   Petara ulih dipechaya. Petara “enda kala bula.” (Titus 1:2) Nambahka nya, semina Petara ke nemu utai ti deka nyadi jemah ila. (Isaiah 46:10) Dalam Bup Kudus, ngembuan mayuh chunto nyadika bukti, jaku Petara nya seruran dikeamatka. Sekeda bukti nya ulih dipeda ari video “Baka Ni Kitai Nemu Utai Ba Bup Kudus Nya Amat?”

•   Petara ulih mutarka penanggul kitai. Bup Kudus madahka, Petara nya bekuasa lalu ulih “ngereja sebarang utai ti dikedekaka Iya.” (Masmur 135:5, 6) Nadai utai ulih nagang Petara ari ngamatka semaya Iya. Nambahka nya, Petara amat sayauka kitai, nyadi Iya tentu ka nulung kitai.—John 3:16.

 Engka nuan berunding, “Enti Petara amat ka nulung lalu bisi kuasa, nama kebuah kitai napi pemerinsa deh?” Saut nya ulih dipeda ba video, “Nama Kebuah Petara Nejuka Pemerinsa Nyadi?”

 Nengah Perintah Iya ba serega, Petara deka ngamatka semua semaya. Iya milih Jesus Kristus nyadi Raja ba perintah nya, lalu meri iya kuasa nyaga bumi sereta semua mensia ke diau dia. Maya Jesus ba dunya suba, iya kala ngeraika orang sakit, nguasa alam, sereta ngidupka orang mati. (Mark 4:39; 6:41-44; Luke 4:40; John 11:43, 44) Tu nunjukka, Jesus deka ngereja utai ti sama lebuh iya nyadi Raja ba Perintah Petara.

 Kena nemu baka ni Perintah tu meri penguntung ngagai nuan, peda video “Nama Reti Perintah Petara?”

 Enda lama agi! Nama kebuah kitai andal? Bup Kudus udah nerangka tanda ti nunjukka Perintah Petara deka merintah bumi. (Luke 21:10, 11) Lalu diatu, kitai udah nyata amat meda semua utai ke ditulis dalam Bup Kudus nya benung nyadi.

 Penerang ti silik ulih dipeda ba artikel, “Kemaya Perintah Petara Deka Merintah Dunya?”

 Seiku penulis Bup Kudus nyempamaka semaya Bup Kudus nya “nyadika sauh ti tegap ke semengat kitai.” (Hebrew 6:19) Baka sauh ke ulih negapka kapal taja bisi ribut, semaya Bup Kudus ke jemah ila nulung kitai tan, napi utai ke benung nyadi. Pengadang nulung kitai stabil ba emosi sereta runding, lalu nyaga kitai ba pengarap.—1 Tesalonika 5:8.