Mayuh orang irau laban sida pechaya pengawa mensia, benung ngerusak bumi enggau utai ke idup ba dia. Nitihka sekeda pakar alam sekitar, pengawa mensia ngujungka mayuh bansa jelu enggau utai tumbuh rusak, nyentukka sekeda nya nyau deka punas. Ke diatu, pengerusak alam sekitar nya ke pemadu balat nyadi dalam sejarah mensia.

 Kati mensia deka ngerusak bumi? Tauka ulih sida idup enggau chara ti enda ngerusak alam semula jadi?

 Mayuh pakar andal, mensia ulih nyaga bumi sereta idup enggau chara ti enda ngerusak alam semula jadi. Sekeda pemansik madahka, ngambika mujur mensia patut ngaga beberapa ubah ba maya ti sama. Tu sekeda ubah nya:

•   Nyaga tanah, utan, tanah embap enggau tasik.

•   Ngena chara betanam sereta sumber tenaga bukai.

•   Ngubah sistem ngasilka pemakai ngambika orang ulih makai mayuh agi pemakai ti datai ari utai tumbuh, sereta kurang agi dagin enggau ikan aja. Tu ngurangka pengawa masau pemakai.

•   Nemu pengidup ti manah agi ukai bepanggai ba reta tengkira.

 Nama runding nuan? Kati kitai ulih andalka tiap iku orang, pengawa dagang, enggau perintah ngambika bekerejasama ngaga ubah baka nya? Kati pengawa tu enda ulih dijapai, ketegal sekeda orang ke amu, berundingka diri empu sereta enda berunding panjai?—2 Timoti 3:1-5.

 Bup Kudus madahka bumi enda dipunaska. Bup Kudus mega nerangka, pengawa mensia enda chukup kena nyelamatka bumi. Kelimpah ari nya, Bup Kudus madahka kitai pasal ubah ti bendar ke patut digaga, sereta baka ni ubah tu deka nyadi.

 Nama kebuah pengawa mensia deka nyelamatka bumi enda chukup. Petara Jehovah a nempa bumi sereta meri mensia tanggung pengawa nyaga iya. (Pemungkal 1:28; 2:15) Sida semina ulih mujur enti sida bepanggai ba iring Penempa sida, sereta nitihka pesan Iya. (Jaku Dalam 20:24) Tang sayau amat, sida nulak Jehovah sereta milih deka nitihka chara diri empu. (Pengajar 7:29) Enti nadai iring Jehovah, mensia enda ulih nyaga bumi, sereta pengawa sida semina deka meri asil ti mimit.—Jaku Dalam 21:30; Jeremiah 10:23.

 Ubah ke patut digaga. Petara deka nagang mensia ari terus ngerusak bumi. (Pemandang 11:18) Petara enda nyukung pengawa perintah enggau orang ke ngerusak bumi. Indah Iya deka nganti sida. (Pemandang 21:1) Nya kebuah Jehovah bejaku: “Peda nuan, diatu Aku ngaga semua utai nyadi baru magang!”—Pemandang 21:5.

 Baka ni ubah nya deka nyadi. Jehovah deka nganti perintah mensia enggau siti perintah ba serega, ke dikumbai Perintah Petara. Raja ba perintah nya, iya nya Jesus Kristus. Perintah nya deka merintah bumi.—Daniel 2:44; Matthew 6:10.

 Perintah Petara deka ngajar mensia idup sejalai enggau standard Petara. Lebuh mensia nerima Jehovah nyadi Penempa sida, sereta nitihka pesan Iya, sida deka nyaga alam semula jadi. (Isaiah 11:9) Bup Kudus nerangka baka ni Perintah Petara deka ngasuh rayat Iya ngasaika pengidup ti pemadu manah, enggau chara ti enda ngerusakka bumi. Perintah tu deka ngereja sekeda pengawa tu:

•   Nyediaka pemakai ngagai semua orang.—Masmur 72:16.

•   Ngemanahka sumber semula jadi.—Isaiah 35:1, 2, 6, 7.

•   Nentuka mensia enggau jelu ulih begulai enggau pangan diri.—Isaiah 11:6-8; Hosea 2:18.

•   Ngemaduka pengerusak alam.—Mark 4:37-41.

 Perintah Petara deka ngaga semua ubah tu enda lama da agi. Penerang ti silik agi, bacha meh artikel “Kemaya Perintah Petara Deka Merintah Dunya?”