Ba mata orang ke meda, semengat sukarela orang ke mangku kereja ba projek nirika bengunan ba Warwick amat ngalitka ati. Seiku director ari kompeni ke masang lif madahka ngagai seiku pekereja: “Tim nuan nembuka pengawa tu enggau manah amat. Mayuh orang enda sanggup ngena awak sida enggau sukarela.”

Lebuh iya enggau orang bukai keterubah iya ninga pasal orang ke gawa ba bengunan indu opis Saksi-Saksi Jehovah ba Warwick, New York, ti nyengkaum orang ke sukarela, sida ngumbai Saksi-Saksi tu semina gawa ba hujung minggu aja. Sida alit ati lebuh betemu enggau orang ke ninggalka pengawa sida iya sereta datai ari bengkah menua ngereja pengawa ti begunaka awak bebulan sereta betaun.

Ba ujung taun 2015, sekeda 23,000 Saksi-Saksi ke sukarela udah gawa ba Warwick enggau bala menyadi ke gawa ba Betel Amerika Serikat. Pia mega, sekeda 750 orang ke bekereja nirika bengunan ke ukai Saksi-Saksi Jehovah mega nulung ba projek nya ngambika ulih tembu nitihka jadual ti udah ditetapka. Ketegal suah bekereja enggau Saksi-Saksi Jehovah, bala ke bedagang bisi runding ti manah pasal sida.

Seiku manager ba siti kompeni ke ngeluarka jenila enggau perengka sistem dinding nulis: “Semua orang ke enggau projek tu ke ari kompeni kami alit ati meda ulah orang ke enggau sida gawa. Mayuh ari kami deka ngereja projek tu ketegal nya.”

Siti da agi kompeni nganjung pekereja iya kena nulung ngaga langkar bengunan endur orang diau. Udah kontrak kompeni nya abis, tiga iku ari pekereja iya keran deka terus gawa ba Warwick. Sida badu gawa ba kompeni nya lalu nitihka kompeni bukai ke agi bekereja ba endur nya.

Kualiti Kristian ke ditunjukka bala Saksi meri asil ti manah ngagai sekeda pekereja. Seiku lelaki gawa enggau kompeni masang langkar bengunan.Udah bebulan iya gawa ba Warwick bini iya meda iya mayuh berubah ba ulah sereta jaku iya ba rumah. Enggau lantang ati iya madah, “Aku nyau enda ngelala iya agi!”

Mayuh bala Saksi ke gawa ba endur nya orang indu. Sida ukai semina deribaka bas, meresika bilik, enggau ngereja pengawa sekretari tang sida mega nyaga pejalai rengka pengangkut, ngena perengka berat, nyambung kabel fiber-optic, malut paip, masang sereta plaster dinding, masang paip enggau nuangka semin. Sida bebendar gawa.

Seiku orang ke ukai Saksi ke ngaduka atap meda laki bini nurun ari bas, sekeda sida iya bepegai jari bejalai ngagai endur gawa. Tu negu ati iya. Iya mega meda bala indu bagas gawa ba projek nya. “Nuan engka ngumbai bala bini semina nitihka laki sida aja,” iya madah. “Tang maya gawa, sida nembuka pengawa nya! Aku udah gawa ba pengawa nirika bengunan serata Bandar New York, tang aku enda kala meda utai baka tu.”

Musin chelap ba taun 2014/2015 amat balat, lalu ketegal tu manah agi diau ba rumah ari ke gawa ba luar sepanjai hari ba gaya hari ti amat chelap. Jeremy, seiku Saksi ke ngemataka pengawa nirika bengunan, madah: “Ba sekeda hari ke amat chelap, seiku mandur ari siti kompeni nirika bengunan kekadang nanya aku, ‘Kati bala indu datai gawa pagila?’

Lebih ari 35 deriba bas diambi gawa kena nganjung bala menyadi ke gawa ba Warwick pulai masang ari endur sida diau.

Sebedau berangkat, seiku deriba bas bediri lalu meda penumpang iya. Ku iya, “Aku rindu nganjung kita bala Saksi. Tulung nulis emel ngagai bos aku ngambika aku terus nganjung kita. Aku udah belajar mayuh pasal Bup Kudus ari kita. Sebedau aku betemu enggau kita, aku enda nemu nama Petara tauka deka bisi dunya paradais. Aku enda agi takutka pemati. Tu pengalaman ke amat manah ba aku. Nuan deka meda aku ba Palan Gempuru lebuh hari chuti aku.”

Damiana, seiku Saksi ke gawa ba Warwick, madahka: “Bisi sekali, udah kami niki bas, deriba kami bisi jaku gerah ke kami. Iya madah diri kala nganjung 4,000 Saksi pulai mansang ari bengkah endur kami gawa ba New York. Ku iya, ‘Semua orang bisi pengurang, tang kita semua enda meda pengurang nya lalu ulih gawa enggau pangan diri. Tu utai ti amat manah.’ Iya mega madah, iya rindu bejaku enggau kitai.

“Udah iya badu bejaku, seiku ari Saksi lalu nanya iya, ‘Kati nuan rindu ninga kami belagu?’

“Iya nyaut lalu ketawa, ‘Au! Ulih kitai belagu lagu lumur 134?’” a