Osman enggau bini sereta anak indu iya, benung nginjil ngena kad semak pendam ba Chile. Enda mukai-mukai, bisi seraban orang ke baru kena penusah tama ngagai pendam nya, lalu bepasangka musik enggau inggar. Beberapa ari sida ngumbai Osman tuai pengarap ke dikangauka sida. Sida mansang semak lalu merap iya sereta madah, “Terima kasih laban datai. Kami amat ngelaluka penatai nuan!”

 Osman nguji madah ngagai sida, iya ukai tuai pengarap sida. Tang ketegal endur nya kelalu inggar, sida enda ulih ningaka iya. Enda lama pengudah raban nya tama ngagai endur pendam, beberapa iku da agi orang datai ngagai Osman lalu madah, “Tuai, semua orang nganti nuan ba dalam.”

 Pengudah sida datai ba endur ti sunyi agi, baru meh Osman ulih madahka sapa iya ti bendar, enggau kebuah iya bisi ba dia. Sida amat tusah ati laban tuai pengarap sida enda datai. Udah nya sida nanya Osman, “Kati ulih nuan meri cheramah ari Bup Kudus ke kami?” Osman pan setuju.

 Maya bejalai nuju pendam, Osman nanya penerang pasal orang ke mati nya. Iya mega berengkah berundingka beberapa ayat Bup Kudus ke ulih dikena iya. Pengudah datai ba pendam, iya madahka diri seiku ari Saksi Jehovah. Iya mega nerangka, Saksi Jehovah kesuah iya bekunsika Berita Manah ngagai orang bukai.

 Osman macha bup Pemandang 21:3, 4 enggau John 5:28, 29. Iya nerangka, iya ke bendar Petara enggai mensia mati. Iya mega madah, enda lama da agi, Petara deka ngidupka baru orang ke udah mati, lalu sida ulih idup belama iya ba dunya. Pengudah Osman abis meri cheramah, mayuh orang merap lalu beterima kasih ngagai Berita Manah ke dipadahka iya. Udah nya, Osman pan pulai baru ngagai endur iya nginjil tadi.

 Pengudah abis pengawa pemati, beberapa iku orang ke ditinggang penusah nya datai ngagai endur Osman nginjil. Sida nanya Osman sebilik pasal utai ke dipadahka dalam Bup Kudus. Sida berandau panjai, lalu ngambi nyauka semua litaricha ke ba kad nginjil.