Saut iya, enda. Tu kala disebut ba batang litaricha kami iya nya, Menara Jaga. Dalam majalah nya bisi madahka, “Pengawa mejal orang nukar pengarap sida nya salah.” a Ba baruh bisi madahka kebuah kami enda ngereja nya:

•   Jesus enda kala mejal orang nerima ajar iya. Iya nemu, ukai semua orang deka ninga. (Matthew 7:13, 14) Bisi sekali, beberapa iku murid Jesus berasai enda nyamai ninga jaku iya. Maya sida deka ninggalka Jesus, iya enda nagang tauka mejal sida nyadi murid iya.—John 6:60-62, 66-68.

•   Jesus enda ngajar bala murid iya mejal orang nukar pengarap sida. Tang sida deka ngiga orang ke deka ninga Berita Manah pasal Perintah Petara.—Matthew 10:7, 11-14.

•   Enti nukar pengarap ketegal dipejal, nya nadai guna. Laban Petara semina nerima sembah orang ke deka nyembah Iya enggau ati ti deka.—Ulang Adat 6:4, 5; Matthew 22:37, 38.

 Endang amat, kami nitihka pesan ari Bup Kudus ke ngasuh kami ngerembaika pesan Petara “ngagai ujung dunya.” (Kereja Rasul 1:8; 10:42; 20:20) Baka orang Kristian abad kesatu, kami mega dituduh ngena chara ti ngelanggar atur ke mejal orang nukar pengarap. (Kereja Rasul 18:12, 13) Tang, jaku tuduh ke baka tu enda betul. Kami enda mejal orang nitihka nerima pengarap kami. Iya ke bendar, kami setuju tiap iku orang patut diberi peluang ngulihka penemu ngambi sida ulih ngaga pemutus ti betul.

 Kami ukai semina enda mejal orang nukar pengarap, kami mega enda ngereja sebarang pengawa pengarap ke bekaul enggau politik, tauka meri mayuh macham semaya kena ngulihka mayuh sukung. Tang, sekeda orang ke ngaku diri Kristian ngereja semua utai tu, lalu ulah sida ulih bejai Kristus. b

 Au. Bup Kudus ngayanka, tiap iku orang bisi hak nentuka ni bagi pengarap ke deka sida. Mayuh utai ke nyadi nunjukka tu amat. Ngambika chunto, Abraham, Rut, sekeda orang Atena, sereta rasul Paul mutus deka nukar pengarap diri ari pengarap ke kala dipegai sida sebilik. Sida milih deka nyembah Petara ti bendar. (Josua 24:2; Rut 1:14-16; Kereja Rasul 17:22, 30-34; Galatia 1:14, 23) Nambahka nya, Bup Kudus mega ngaku, tiap iku orang bisi hak deka ninggalka pengarap ti ngerinduka ati Petara.—1 John 2:19.

 Hak nukar pengarap mega bisi disukung Universal Declaration of Human Rights tauka Perisytiharan Hak Asasi Manusia Sejagat. Nitihka Pertubuhan Bangsa-Bangsa Bersatu, tu ulih nulung seseiku orang ngetanka diri empu dalam milih pengarap ke deka dititih. Ba ditu bisi nerangka, tiap iku orang ngembuan “hak nukar pengarap sida” sereta “ngiga, ngulih, bekunsika penerang tauka penemu”, lalu tu mega nyengkaum utai ba pengarap. Taja pia, kitai patut bebasaka hak orang bukai. Sida mega bisi hak deka terus nitihka pengarap ke udah dipegai sida, lalu nulak sebarang ajar ke enda ngena ba runding sida.

 Ukai baka nya reti iya. Ajar Bup Kudus meransang semua kitai bebasaka orang bukai, enda ngira nama pengarap sida. (1 Peter 2:17) Nambahka nya, Saksi-Saksi Jehovah nitihka pesan dalam Bup Kudus ke ngasuh kitai bebasaka apai indai taja pan enda sama pengarap.—Epesus 6:2, 3.

 Tang sayau, ukai semua orang setuju enggau ajar Bup Kudus. Seiku indu ke dibesaika ba Zambia madah, “Nitihka adat kami, orang ke nukar pengarap dikumbai orang ke enda tetap ati ngagai diri sebilik sereta bansa kami.” Indu tu udah napi penanggul tu kenyau ari iya agi biak. Maya nya, iya berengkah belajarka Bup Kudus enggau Saksi-Saksi Jehovah, lalu enda lama udah nya, iya bisi ati deka nukar pengarap diri. Iya madahka, “Amat suah apai indai aku madahka diri ringat sereta asa ati enggau aku. Tu pan ngasuh aku berasai pedis ati. Aku deka sida bebasaka pemutus aku. Maya aku ngaga pemutus deka milih Jehovah, ukai adat ari pengarap kami sebilik, ukai reti iya aku enda sayauka kami sebilik tauka enda bebasaka adat sida.” c