Ó wɛ ɔdā ō kwiiye nɛhi, ku eko nɛ um lɛbɛɛka ihayi igwo ɛta (13) a, ɛma nɛ um lɛ mla Ujehofa a i lɔfu gɛ ŋ. Ayipɛ inɔkpa ku um lɛ ɛga ō ya ɔdā duuma néē dɔka, n kē dɔka ō lɛ ɛdɔ ɛga ɔɔma duu. Ó ya um bɛɛka íne nɛ apɔlɛ ku um le kwaajɛ, mla ɔwɛ nɛ Ukraist dɔka ku alɔ lā oyeeyi a wɛ ɔdā olɔnɔ nɛhi, n klla gbɔɔ ō gbɛla kóō gba Ujehofa ɛ̄gbā wɛ uklɔ olɔnɔ. N kpɔtuce ka Ujehofa yɔ, amáŋ ɛma nɛ um lɛ mla ɔ a i lɔfu ŋ.

Ń lɛ abɔ ci uklɔ ku ɔna ō ta a duudu ŋ, amáŋ n gē ceyitikwu tɔɔna ligii ligii kpɔ. Amáŋ eko duuma nɛ um gē gɛɛcɛ gáā tɔɔna, ń gē ya otutu ŋ. Ohigbu ɛnyā, ó gē lɔnɔ ta um ō gbɔɔ ɔka ō ka mla ācɛ, mla ō yɔ i ya ku ɔka ō ka kóō gɔbu ŋ. Ɛnyā ya, ń lɛ ɔcɛ duuma nɛ um géē cigbihi gáā má amāŋ ya oklɔcɛ ku Ubáyíbu mla ɔ ŋ, ń kē jɔɔnyɛ uklɔ ku ɔna ō ta a gɛ ŋ. Ɛnyā kē ya ku uklɔ ku ɔna ō ta ka ó i he um ɔtu gɛ ŋ duudu. N gē da iyi um ɔka kahinii: ‘Abɔ ó ya ɛɛ nɛ ɔcɛ géē yɔ i tɔɔna ŋma alaadi gā alaadi, mla ɔya gā ɔya a?’

Eko nɛ um le faajɛ ihayi igwaahapa (17) a, n dɔka ō yɔ ofoofu um. Ohigbu ɛnyā n le iyo ku um gwo, nyɛɛ ŋma ɔlɛ, le yɛ gā éwo ku Australia. Ó kwu  apɔlɛ ku um iyē nɛhi, abɔ um nyɛɛ ŋma ɔlɛ nɛ um lā mla uwa gɛ ŋ ma. É lɛ ɔtooplico nɛhi, amáŋ é gbɛla ku um géē yɔ i gba Ujehofa ɛ̄gbā gɔbu.

Abɔɔ um yɔ Australia a nɛ āhɔ̄ ku um kóō bɔbi tōōtɔ̄ɔ̄ fiyɛ a. Ń gē gā ōjila eko doodu gɛ ŋ. N gbɔɔ ō ya ɔya tu aɛdrɔ bɛɛka ami nōo gē gweeye ō gā ōjila éyi otu, amáŋ gē nyɔ gɛɛcɛ gáā gwa eje mla ō jiije upati ɛ̄cī ɔhá. Eko duuma nɛ um gbɛla kwu eko ɔɔma ipu oyeeyi ku um, n gáā le má ku um yɔ ipu ɔkwɛyi a klla gē ya ɔdā nɛ ācɛ nōó jé Ujehofa ŋ gē ya a. Amáŋ n lɛ ɔtu ɛbɔ ɛga duuma ŋ.

Igbihi nɛ ihayi ɛpa le gla a, n gáā lɛ ɔyinɛ nɔnya éyi má eko kpii nɛ ó jé ka ó ya ku um gbɛla lɛyikwu ɔwɛ nɛ um gē lā oyeeyi a ŋ. N lā ɔlɛ nɛ ayinɛ nɔnya ɛhɔ nōó lɛ ɔba ɛ ŋ la anu, alɔ kē lɛ ɔcɛ ō leyi kwu usɛkut mla ɔnyā nu Tamara higwu kē wa i yɔ ɔlɛ mla alɔ alaadi éyi. Eko duuma nɛ ɔba nu yɔ i yuklɔ kóō je otabɔ lɛ ujɔ, Tamara gē lɛ eko taajɛ gē yɔ tɔha mla alɔ nōo wɛ acɛnya a gē yɛhɛ tɔha mla alɔ. Ɛnyā he um ɔtu nɛhi. Ó wɛ ɔcɛ nōo lɛ ohilipu nɛhi, klla wɛ ɔcɛ nōo tɔɔtɛ ō kɛla lɛ ɔ. N má ɔ ka ó wɛ ɔdā ohidaago ku ɔcɛ nōo cika ō yɔ i lɛ ɔtu ku nu kwu ɛ̄gbā ō gba ku Ujehofa, kóō lɛ eko ku nu taajɛ ō yɔ tɔha mla alɔ.

Tamara wɛ ɔcɛ nōo lɛ ɔtu caca nɛɛnɛhi. Ihɔtu nɛ ó lɛ lɛ ɔkwɛyi mla uklɔ ku ɔna ō ta a wɛ ɔdā nōo lɔfu lɛ abɔ kwu ɔcɛ. Ó yɔ i gweeye ō je ofiyɛ duu ku nu lɛ Ujehofa, abɔ ami a kē yɔ i cɔnu abɔ um ō je ofiyɛ duu ku um lɛ Ujehofa ŋ ma. Uce olɔhi ku nu mla ɔwɛ nɛ ó gē gweeye a lɛ abɔ kwu oyeeyi ku um nɛhi. Ocabɔ ku nu ta um abɔ gbɛla lɛyikwu ɔkwɛyi ocɛgbá nɛhi éyi: Ó wɛ ɔtu ku Ujehofa ka oduudu alɔ kóō yɔ i gba ɔ ɛ̄gbā “ɔtū nɛ̄hɛ́” mla “ijē kú éeyē.”—Aíjē 100:2.

N dɔka ō lɛ ɛdɔ eeye nɛ Tamara lɛ a, amáŋ gbɔbu ɛɛ ka um lɛ eeye ɔɔma, n cɛgbá ō ya opiyabɔ nɛhi. Ń ya opiyabɔ a boobu nóó. Amáŋ, n gbɔɔ ō ya opiyabɔ ɛmɛɛma. N gbɔɔ ō ya otutu gbɔbu ɛɛ ku um gɛɛcɛ gáā tɔɔna, klla gbɔɔ ō yuklɔ ku ɔcɛ ō gbɔbu ɔna ō ta ŋma eko teeko. Ɛnyā ya ku um yuufi gɛ ŋ, n klla gbɔɔ ō lɛ ɔtu tōōtɔ̄ɔ̄. Ohigbu ku um gē bi Ubáyíbu yuklɔ ipu uklɔ ku ɔna ō ta igbalɛwa a, n gē  jɔɔnyɛ uklɔ ku ɔna ō ta a tōōtɔ̄ɔ̄. Ó gboji ŋ, n gbɔɔ ō yuklɔ ku ɔcɛ ō gbɔbu ɔna ō ta ŋma eko teeko ipu ɔya doodu.

N gbɔɔ ō wɛ ɔya ku ācɛ duuma nōo yɔ i je ofiyɛ duu ku uwa lɛ Ujehofa, nōo klla yɔ i jɔɔnyɛ uklɔ néē yɔ i ya ipu ɛ̄gbā ō gba ku Ujehofa a. Ocabɔ olɔhi ku uwa ta um abɔ ku um gbɛla lɛyikwu ɔdā nōo cɛgbá fiyɛ duu ipu oyeeyi ku um, mla ō gbɔɔ ō jé Ubáyíbu ɛ̄cī doodu. N gbɔɔ ō jɔɔnyɛ uklɔ ku ɔna ō ta a fiyɛ, igbihaajɛ n kwu piya ɔcɛ ō gbɔbu ɔna ō ta eko doodu. Ɔɔma wɛ eko aflɛyi ŋmifi ihayi alɛwa, nɛ ɔtu ku um waajɛ lɔɔlɔhi klla yɔ i gweeye ipu ōjila ku ujɔ a.

Igbihi nɛ ihayi éyi le gla a, n gáā lɛ Alex nōo wɛ ɔcɛ ogbonɛnɛ, ɔcɛ ɔkwɛyi nōo lɛ ihɔtu lɛ Ujehofa mla uklɔ ku ɔna ō ta a má. Ó wɛ ɔcɛ ō ta anyakwucɛ ku ujɔ abɔ, klla yɔ i yuklɔ ku ɔcɛ ō gbɔbu ɔna ō ta ihayi ɛhili ɛ. Alex klla yuklɔ ɛga nɛ ɛgbá ku ācɛ ō tɔɔna ɛlā Ɔwɔico yɔ ipu éwo ku Malawi gbɔbu duu ɛ. Abɔɔ a, ó piyatɔha mla ācɛ ō tɔɔna ipu éwo ɔhá nōo wɛ ɛnɛɛnɛ ocabɔ lɛ ɔ, nōo klla ta ɔ ɔtu kwu ɔtu kóō yɔ i je ɛ̄gbā ō gba ku Ujehofa ta aflɛyi ipu oyeeyi ku nu.

Ipu ihayi ku 2003, ami mla Alex kwu iyi alɔ u lɛ. Ŋma eko ɔɔma jaa kwu icɛ, alɔ yɔ ipu uklɔ ō ya lɛ Ujehofa eko doodu kpɔ. Alɔ lɛ aɔdā ocɛgbá alɛwa nwu ɛ, Ujehofa kē hɛ ɔ̄hā ce alɔ ɔwɛ alɛwa nɛ alɔ i kóō ka ɔ gla ŋ.

Ipu ihayi ku 2009, é lɛ alɔ higwu ku alɔ yuklɔ ku ācɛ ō tɔɔna ipu éwo ɔhá ipu Timor-Leste, éwo nɛŋcɛ nōo yɔ Indonesia nōo lɛ ígwu ku aidɔ a. Ɛnyā le hɛ alɔ idaado nɛhi, cɛ lɛ alɔ gweeye, klla ce ufi tu alɔ iyē igbeekponu. Igbihi nɛ ɔya ɛhɔ gáā le yɛ a, alɔ faajɛ Dili nōo wɛ ɔlɛ ɔtahɛ ku éwo ɔɔma a.

Oyeeyi ipu ɔlɛ ɛyipɛ ku alɔ a wɛ ɛyɛɛyi kpaana gwu oyeeyi ku alɔ gbɔbu a ta. Alɔ cɛgbá ō nwu ɔdā alɛwa bɛɛka ucolo ku uwa, uce ku uwa, ɔdole ku uwa, mla ɔwɛ néē gē lā oyeeyi a. Igbalɛwa ipu uklɔ ku ɔna ō ta, alɔ gē má ācɛ nōo gbɛha nɛhi, ācɛ nōo jé odee ligii amāŋ kóō jé ŋ duudu, mla ācɛ néē gē miya uwa owe nɛɛnɛhi. Alɔ klla má ācɛ alɛwa nōo lɛ agbe mla unwalu nōo lɛ abɔ kwu uwa iyē nɛhi, ohigbu ɛfú amāŋ unu néē nu abɔ a. *

 Ɛgɛ nɛ uklɔ ku ɔna ō ta a lɛ abɔ kwu ācɛ iyē abɔ a wɛ ɔdā ohidaago! Ocabɔ mafu, ó lɛ eko éyi nɛ um má u Maria nōo wɛ ihayi igwɛɛta (13) nɛ ɔtu biya lɛ ɔ nɛɛnɛhi a. * Ɛ́nɛ́ nu gekwu ihayi ōhī nōó gboji lɛ a ŋ, ó klla gē lɔnɔ kóō má adā nu. Bɛɛka ayi alɛwa nōo wɛ ɛgɔ ku nu a, Maria i jé ɔdā nɛ ó gáā ya ipu oyeeyi ku nu a ŋ. N blakwu eko éyi nɛ ó gbɔɔ ō jikwu, abɔ ó yɔ i ka ɛgɛ nɛ ɔtu ya ɔ lɛ gā um ma a. Amáŋ, ń jɛyi ɔdā nɛ ó yɔ i ka gā um ma ŋ, ohigbu ku um jé ō ka uce ku nu lɔɔlɔhi eko ɔɔma ŋ. N lɛ ɔkɔ gba lɛ Ujehofa, yɔ i da ɔ kóō ta um abɔ ō ta ɔ ɔtu kwu ɔtu, anu n gbɔɔ ō jé aɛga ku Ubáyíbu ō ta ɔtu kwu ɔtu lɛ ɔ a. Abɔɔ ihayi ōhī gáā le yɛ a, n má ku ɛlā ɔkwɛyi a lɛ ɛgɛ nɛ Maria gē ya uce, ō má eyī ku nu mla ɛjɛɛji oyeeyi ku nu piyabɔ duudu. Ó lɛ ubatisim ya, babanya ó lɛ ācɛ nɛ ó gē ya oklɔcɛ ku Ubáyíbu mɛmla uwa. Icɛ, Maria lɛ apɔlɛ nɛhi nōo wɛ ācɛ ō gba Ujehofa ɛ̄gbā nɛ ó jé ka é yihɔtu anuɔ.

Ujehofa yɔ i hɛ ɔ̄hā ce uklɔ ku ɔna ō ta ipu éwo ku Timor-Leste nɛhi. Naana nɛ ōhī ku uwa ya ubatisim odee bɛɛka ihayi igwo (10) nōo gáā yɛ a, ōhī ku uwa wɛ ācɛ ō gbɔbu ɔna ō ta, ācɛ ō ta anyakwɔcɛ ku ujɔ abɔ amāŋ anyakwɔcɛ ku ujɔ babanya. Ōhī ku uwa klla gē ta abɔ ce aɔkpá lɛyikwu Ubáyíbu ɔwɔ ipu uce nɛ ācɛ a gē ka a. Ó gē cɛ gā um gweeye nɛhi ō má uwa gwiije ipu ōjila ku ujɔ, ō má ɛgɛ nɛ ɛhɛ gē kwu uwa okonu, mla ɛgɛ néē yɔ i ceyitikwu ō wɛ ɔya ku Ujehofa a.

Ɔwɛ nɛ alɔ gē lā oyeeyi ipu éwo ku Timor-Leste a, wɛ ɛyɛɛyi kpaana gwu oyeeyi ipu éwo ku Australia ta. Amáŋ ó wɛ oyeeyi nɛ alɔ jɔɔnyɛ nu nɛhi. Ekoohi, alɔ gē yɛ ŋma ɛga éyi gā ɛga ɔhá ipu umoto nɛŋcɛ nōo le mu mla ācɛ, nōo klla bi ebeenyi nōo le ŋmo mla aepu alɛwa néē lá ŋma olihi a. Ó lɛ aɛ̄cī ōhī nɛ alɔ gē klɔcɛ ku Ubáyíbu mla ācɛ ipu ɔlɛ nōo le ligii, nɛ owu i gē bu iyē lɔɔlɔhi ŋ. Ajɛ ku ɔlɛ a gē blinyi nɛhi, nɛ augwu klla gē kwinya yɛ jila ɔlɛ a ta ɛbɛɛbɛ. Naana nɛ oyeeyi a i tɔɔtɛ fluflu ŋ ma a, igbalɛwa n gē gbɛla ‘Oyeeyi nyā lɔhi ibi!’

Eko duuma nɛ um gbɛla gā igbihi, ó gē jɛ um eyī nɛhi ku ɛ́nɛ́ mla adā um ya ɔdā néē ya gla kéē nwu um lɛyikwu ɔwɛ ku Ujehofa, naana nɛ ɛma ku um mla Ujehofa i lɔfu lɛ a ŋ ma a. N má ku ɛlā nōo yɔ ipu ɔkpá ku Aíita 22:6 a, le ya jila ipu oyeeyi ku um. Ɛ́nɛ́ um mla Adā um gē gweeye nɛhi ohigbu ami mla Alex. Abɔ é má alɔ yɔ i gba Ujehofa ɛ̄gbā a wɛ ɔdā nōo gē cɛ lɛ uwa gweeye nɛhi. Ŋmifi ihayi ku 2016, alɔ yɔ i yuklɔ ku ɔcɛ ō leyi kwu usɛkut ɛga nɛ abɔ ku ɛga ō yuklɔ ku Australasia gē yuklɔ ku ɔna ō ta a.

Ó wɛ ɔdā nōo gē lɔnɔ nɛhi ō kpɔtuce ku eko ōhī nōo gáā yɛ a, n gē jɔɔnyɛ uklɔ ku ɔna ō ta ŋ. Babanya, uklɔ ku ɔna ō ta a he um ɔtu nɛhi! N gáā le jé peee ka ɔdā duuma nōo ya ipu oyeeyi ku alɔ naana, eeye ɔkwɛyi gē wa ŋma ō gba Ɔwɔico ɛ̄gbā ŋma ipu oduudu ɔtu ku alɔ. Ii, ihayi igwaahata (18) nɛ um bi le gba Ujehofa ɛ̄gbā mla Alex a, wɛ ihayi nɛ um lɛ eeye fiyɛ duu ipu oyeeyi ku um a. Babanya, n lɛ ɛlā ɔkwɛyi nɛ Udefidi ɔcɛ ō gwiije ka lɛ Ujehofa a jé peee ɛ. Ó kahinii: “Odúúdú ācɛ nɛ̄ Ɔwɔicō gē gbō ŋmá unwalu ā kéē gwéeye. É kéē bá ī gwíijē kú éeyē eko dóódu. . . . Gbō ācɛ nɛ̄ ɛlā awɔ he uwá ɔtū ā, cɛ́ɛ́ kéē gwéeyē ohígbū ɔdā nāa yá lɛ uwá ā.”—Aíjē 5:11.