1. Ɛga nyá nɛ Ujehofa je lɛ eyeeye ku ācɛ nōo gē gba ɔ ɛ̄gbā ɔwɛ okpaakpa a?

OHIGBU ihɔtu nɛ Ujehofa lɛ lɛ alɔ a, ó jɛga lɛ eyeeye ku ācɛ nōo gē gba ɔ ɛ̄gbā ɔwɛ okpaakpa a kéē yɔ ipu ujɔ ku nu. Naana nɛ eyeeye ku alɔ gē ya odee ɔwɛ ɛyɛɛyɛyi a, ɛjɛɛji alɔ tiile klla cɛgbá iyi alɔ nɛhi. Upɔlu nōo wɛ ɔcocɛhɔ a, ta alɔ abɔ ku alɔ jé ɔdā nōo ya nɛ ɛlā nyā cɛgbá nɛhi a. Ɛgɛnyá a?

2. Oŋma ɛlā nōo yɔ ipu ɔkpá ku Ācɛ Ɛ́fēsɔsi 4:16 a, ɔdiya nɛ ayinɛ alɔ cika ō jɛ alɔ eyī, nɛ alɔ klla cika ō bēē yuklɔ tɔha a?

² Oŋma ɛga ku Ubáyíbu néē je ikpɛyi ɛlā nyā ŋma a, Upɔlu mafu peee ka ó lɛ ɔcɛ duuma nōo géē má ɔcɛ ō gba Ujehofa ɛ̄gbā ɔhá cɛɛ ō kahinii: “Ń cɛgbá awɔ ŋ́’ glá ŋ́.” (1 Ukɔ́r. 12:21) Ɔdaŋ ku alɔ dɔka ku ɛbɔ kóō yɔ ipu ujɔ, ayinɛ alɔ cika ō jɛ alɔ eyī, alɔ klla cika ō bēē yuklɔ tɔha. (Jé Ācɛ Ɛ́fēsɔsi 4:16.) Ɔdaŋ ku alɔ yuklɔ tɔha ipu opiyatɔha, ayinɛ nōo yɔ ipu ujɔ a géē yihɔtu iyi uwa, ujɔ a klla géē bēē lɔfu tōōtɔ̄ɔ̄.

3. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

³ Ɔwɛ ɛyɛɛyɛyi nyá nɛ alɔ lɔfu mafu ojilima lɛ ayinɛ alɔ ipu ujɔ a? Ipu ikpɛyi ɛlā nyā, alɔ géē kɛla lɛyikwu ɔwɛ nɛ anyakwɔcɛ lɔfu mafu ojilima lɛ anyakwɔcɛ ɔhá a. Oŋma ɔɔma, alɔ géē kɛla lɛyikwu ɛgɛ nɛ ɛjɛɛji alɔ lɔfu mafu ku ayinɛ alɔ nōó lɛ ɔba amāŋ ɔnyā ɛ ŋ ma cɛgbá lɛ alɔ a. Amoomɛ, alɔ géē nwu ɛgɛ nɛ alɔ lɔfu mafu ihɔtu, lɛ ācɛ nōó jé ō ka uce ku alɔ lɔɔlɔhi ŋ ma.

4. Ahɔ̄ ō pi ku Upɔlu nyá yɔ ipu ɔkpá ku Ācɛ Uróm 12:10 nɛ anyakwɔcɛ ku ujɔ cika ō bi le yuklɔ a?

⁴ Alelekwu Ihɔ ku Ujehofa fu ɛjɛɛji anyakwɔcɛ nōo yɔ ipu ujɔ a. Naana a, ɔnyɔɔnyɛ ku uwa lɛ ɛhi ɛyɛɛyɛyi. (1 Ukɔ́r. 12: 17, 18) Ó lɛ ōhī ku uwa nōó gboji néē je uwa piya anyakwɔcɛ ku ujɔ ɛ ŋ, ohigbu ɛnyā, é lɔfu jé odee bɛɛka anyakwɔcɛ ɔhá a ŋ. Ó lɛ aōhī nōó lɔfu ya aɔdā alɛwa gla ŋ, ohigbu kē kwu hila okpliici ɛ, amāŋ ohigbu unwalu ku ōcē. Naana a, ɔnyakwɔcɛ ku ujɔ duuma kóō má ɔmpa nu kóō tiile ŋ nɛ ŋ. Ikɔkɔ ɔɔma, eyeeye ku anyakwɔcɛ ku ujɔ cika ō yuklɔ mla ahɔ̄ ō pi ku Upɔlu nōo yɔ ipu ɔkpá ku Ācɛ Uróm 12:10.—Jé.

5. Ɛgɛnyá nɛ anyakwɔcɛ ku ujɔ lɔfu mafu kē lɛ ojilima ce ɔmpa uwa a, ɔdiya nōó cɛgbá kéē ya lɛ a?

⁵ Anyakwɔcɛ ku ujɔ géē mafu kē lɛ ojilima ce aɔmpa uwa, ŋma lɛ ō jahɔ tu uwa lɔɔlɔhi. Ɛnyā kē cɛgbá, ofiyɛ duu eko duuma néē jila tɔha, o ya ɛɛ kéē kɛla lɛyikwu aɛlā ō cɛgbá nɛɛnɛhi. Ohigbu ɔdi a? Má ɔdā nɛ Ɔda Ō Gbaajɛ aku oyibo ku Ɔya Ɔmigwo ku ihayi ku 1988 ka a: “Anyakwɔcɛ ku ujɔ jé ku Ujisɔsi lɔfu bi Alelekwu Ihɔ a, le ta ɔnyakwɔcɛ ku ujɔ duuma abɔ kóō gbɛla lɛyikwu ukɔ́ ku Ubáyíbu nōo lɔfu ta anyakwɔcɛ abɔ kéē jé ɔdā néē lɔfu ya ipu āhɔ̄ duuma, amāŋ ya ōmiya duuma nōo cɛgbá nɛhi a. (Ācot. 15:6-15) Alelekwu Ihɔ gē ta ɛjɛɛji anyakwɔcɛ ku ujɔ abɔ, ó wɛ ɔcɛ éyi ku uwa foofunu ŋ.”

6. Ɛgɛnyá nɛ anyakwɔcɛ lɔfu yuklɔ tɔha ipu opiyatɔha a, ɛgɛnyá nɛ ujɔ a kē gáā lɛ itene eko duuma néē i ya lɛ a?

⁶ Ɔnyakwɔcɛ ku ujɔ nōo gē lɛ ojilima ce ɔmpa nu i gáā ceyitikwu kóō kɛla aflɛyi ipu ōjila ku anyakwɔcɛ ku ujɔ ŋ. Ó gáā bēē kɛla igbalɛwa ŋ, ó kē gáā bēē gbɛla ku ɛlá ō gbo ku nu wɛ ɛ̄nɛ̄ ō kpaakpa eko doodu ŋ. Ikɔkɔ ɔɔma, ó géē ka ɔdā nɛ ó gbɛla a ɔwɛ nōo mafu ka ó tu iyi nu waajɛ. Ó gē jahɔ lɔɔlɔhi ta ɛlā nɛ ācɛ ɔhá gē ka a. Ɔdā nōo klla cɛgbá fiyɛ duu a, wɛ ku ó le tutu ō kɛla lɛyikwu ukɔ́ nōo ŋma ipu Ubáyíbu mɛmla ō yɛce ɔwɛ duuma nɛ “ɔ̄cocɛ̄hɔ̄ néē cika ō lɛ ɔtū ce ɔ́ nōo jéeyī” a yɔ i mafu a. (Umát. 24:45-47) Ɔdaŋ ka anyakwɔcɛ ku ujɔ mafu ihɔtu, klla lɛ ojilima ce iyi uwa eko duuma néē yɔ i kɛla lɛyikwu aɔdā ōhī, Alelekwu Ihɔ ku Ɔwɔico géē yɔ mla uwa. Ó klla géē gbo uwa kéē ya ōmiya nōo géē lɔfu tu ujɔ a iyē.—Ujɛ́m. 3:17, 18.

7. Ɔdi nɛ Ujisɔsi gbɛla lɛyikwu ācɛ nōó lɛ ɔba amāŋ ɔnyā ŋ ma?

⁷ Ujɔ nɛ alɔ lɛ icɛ a lɛ ō ya mla aɔba mla ɔnyā, ācɛ ōhī ku uwa kē lɛ ayi duu. Amáŋ, ó kē lɛ ō ya mla ayinɛ alɔ ōhī nōó lɛ ɔba amāŋ ɔnyā ɛ ŋ. Ɛgɛnyá nɛ alɔ cika ō bēē má ācɛ nōó lɛ ɔba amāŋ ɔnyā ɛ ŋ ma? Alɔ cika ō gbla Ujisɔsi ya, ɔwɛ nɛ ó leyi má uwa a. Ɛpleeko nɛ Ujisɔsi yɔ i yuklɔ ku ɔna ō ta ipu ɛcɛ nyā a, ó lɛ ɔnyā nóó. Ó bi eko ku nu mla ɔtu ekponu le yuklɔ ku nu. Ujisɔsi i nwu ka ó cɛgbá ku ɔcɛ kóō lɛ ɔba amāŋ ɔnyā piii, amāŋ ku ɔcɛ kóō hii lɛ ŋ. Amáŋ, ó ka ku Ācɛ O Yɛce Ukraist ōhī géē miya ku uwa i gáā lɛ ɔba amāŋ ɔnyā ŋ. (Umát. 19:11, 12; Má ɔdā ōhī néē ka ipu nwtsty lɛyikwu Umátiyu 19:12 a.) Ujisɔsi lɛ ojilima ce ācɛ nōó lɛ ɔba amāŋ ɔnyā ŋ ma. Ó gbɛla ku ācɛ nōó lɛ ɔba amāŋ ɔnyā ŋ ma, fiyɛ ācɛ nōo lɛ ɔba amāŋ ɔnyā a, amāŋ ku odee yɔ i bi ipu oyeeyi ku uwa, ohigbu kē lɛ ɔba amāŋ ɔnyā ŋ.

8. Oŋma ɛlā nōo yɔ ipu ɔkpá ku 1 Ācɛ Ukɔ́rīnti 7:7-9 a, ɔdi nɛ Upɔlu ta Ācɛ O Yɛce Ukraist ɔtu kwu ɔtu kéē leyi yɛ ɔ a?

⁸ Bɛɛka Ujisɔsi a, Upɔlu nōo wɛ ɔcocɛhɔ a i lɛ ɔnyā ɛpleeko nɛ ó yuklɔ ku ɔna ō ta ku nu a ŋ. Upɔlu i nwu ka ó wɛ ɔdobɔbi, ku Ɔcɛ O Yɛce Ukraist kóō lɛ ɔba amāŋ ɔnyā ŋ. Ó jé ku ɛnyā lɛ ō ya mla ōmiya ku ɔnyɔɔnyɛ. Naana a, Upɔlu ta Ācɛ O Yɛce Ukraist ɔtu kwu ɔtu kéē leyi yɛ ɔ, ɔdaŋ kē lɔfu gba Ujehofa ɛ̄gbā, ɔdaŋ kē lɛ ɔba amāŋ ɔnyā ŋ. (Jé 1 Ācɛ Ukɔ́rīnti 7:7-9.) Ó lɛ aafu ŋ, Upɔlu i leyi má Ācɛ O Yɛce Ukraist nōó lɛ ɔba amāŋ ɔnyā ŋ ma taajɛ ŋ. Ó kóō lɛ Utimoti ɔyinɛ nɔnyilɔ nɛ ó lɛ ɔnyā ŋ ma fu, kóō ya aɔdā nōo cɛgbá nɛɛnɛhi ipu uklɔ ku Ujehofa a. * (Ufíl. 2:19-22) Ó teyi peee, ka ó géē wɛ ɔdobɔbi ō gbɛla ku ɔyinɛ nɔnyilɔ éyi cika fiyɛ amāŋ ka ó cika jɛ ŋ, ohigbu ku ɔcɛ ɔɔma lɛ ɔba amāŋ ɔnyā amāŋ ohigbu ka ɔcɛ ɔɔma i lɛ ŋ.—1 Ukɔ́r. 7:32-35, 38.

9. Ɔdi nɛ alɔ lɔfu ka lɛyikwu ō lɛ ɔba amāŋ ɔnyā mɛmla á lɛ ŋ ma?

⁹ Ujisɔsi amāŋ Upɔlu i nwu ku Ācɛ O Yɛce Ukraist cika ō lɛ ɔba amāŋ ɔnyā piii, amāŋ kē cika ō lɛ ŋ. Ó lɛ a, ɔdi nɛ alɔ lɔfu ka lɛyikwu ō lɛ ɔba amāŋ ɔnyā mɛmla á lɛ ŋ ma? Ɔda Ō Gbaajɛ aku oyibo ku Ɔya Ɔmigwo ku ihayi ku 2012 a, jɛ ɛnɛɛnɛ ohi lɛyikwu ɔka nyā. Ó kahinii: “Ku ɛlā ɔkwɛyi a ba, [ɔba amāŋ ɔnyā ō lɛ mla á lɛ ɔba amāŋ ɔnyā ŋ ma] wɛ ɛhi ŋma ɛgiyi Ɔwɔico. . . . Ujehofa i gbɛla ku ācɛ nōó lɛ ɔba amāŋ ɔnyā ŋ ma  cika ō bēē ya uweyi amāŋ lɛ ɔtunobi, ohigbu kē lɛ ɔba amāŋ ɔnyā ŋ.” Ŋma lɛ ō bi ɛnyā ɔtu a, alɔ cika ō lɛ ojilima ce ayinɛ alɔ ipu ujɔ nōó lɛ ɔba amāŋ ɔnyā ŋ.

10. Ɛgɛnyá nɛ alɔ lɔfu mafu ojilima lɛ ayinɛ alɔ nōó lɛ ɔba amāŋ ɔnyā ŋ ma?

¹⁰ Ɛgɛnyá nɛ alɔ lɔfu mafu ku alɔ lɛ ojilima ce āhɔ̄ amāŋ ɛgɛ nɛ ɔtu gē ya ayinɛ alɔ nōó lɛ ɔba amāŋ ɔnyā ŋ ma? Alɔ cika ō bla, ku Ācɛ O Yɛce Ukraist ōhī le miya ku uwa i gáā lɛ ɔba amāŋ ɔnyā ŋ. Ó kē lɛ Ācɛ O Yɛce Ukraist ɔhá nōo dɔka ō lɛ ɔba amāŋ ɔnyā, amáŋ é má ɔcɛ ō he uwa ɔtu ɛ ŋ. Ó kē lɛ ācɛ ōhī nɛ obiye ku uwa gekwu ɛ. Ɛgɛ duuma nɛ ó lɛ, ó géē wɛ ɔdā okpaakpa ɔdaŋ ku ācɛ nōo yɔ ipu ujɔ a gbɔɔ ō da ācɛ nōó lɛ ɔba amāŋ ɔnyā ŋ ma ɔka, lɛyikwu ɔdā nōo ya néē lɛ ɔba amāŋ ɔnyā ɛ ŋ? Amāŋ ó géē lɔhi ō da uwa ku a lɔfu je otabɔ lɛ uwa kéē tine ɔcɛ néē géē lɛ a? Ó wɛ ɔkwɛyi ku ōhī ku uwa lɔfu da uwɔ ku a ta uwa otabɔ lɛ a gla. Amáŋ ɔdaŋ kē dɔka otabɔ ŋ, ɛgɛnyá nɛ ɔtu lɔfu ya ɔyinɛ alɔ lɛ, ɔdaŋ ku ɔcɛ éyi gbɔɔ ō dɔka obiye éyi lɛ uwa a? (1 Utes. 4:11; 1 Utím. 5:13) Alɔ leyi yɛ aɛlā ōhī nɛ ayinɛ alɔ nōo hayi kpaakpa ipu ɛ̄gbā gba ku Ujehofa nōó lɛ ɔba amāŋ ɔnyā ŋ ma ka a.

11-12. Ɛgɛnyá nɛ alɔ lɔfu ya ku ɔtu kóō biya lɛ ācɛ nōó lɛ ɔba amaŋ ɔnyā ŋ ma?

¹¹ Ɔcɛ ō leyi kwu usɛkut éyi nɛ ó lɛ ɔnyā ŋ ma nōo gē yuklɔ ku nu lɔɔlɔhi a, gáā le má ku itene alɛwa yɔ, ɔdaŋ ku ɔcɛ i lɛ ɔba amāŋ ɔnyā ŋ. Amáŋ ó ka ka ó wɛ ɔdā ō biya ɔcɛ ɔtu nɛhi, eko duuma nɛ ayinɛ nōo jikoko ipu ujɔ gē da anuɔ ɔka kahinii: “Ɔdiya nɛ a lɛ ɔnyā ɛ ŋ ma?” Ɔyinɛ alɔ nɔnyilɔ éyi nōó lɛ ɔnyā ŋ, nōo gē yuklɔ abɔ ku ɛga ō yuklɔ ku alɔ kahinii: “Ekoohi, n gē má ku ayinɛ alɔ ōhī gē gbɛla kē cika ō bēē menyinyi ācɛ nōo lɛ ɔba amāŋ ɔnyā ŋ. Ɛnyā kē lɔfu ya kéē gbɔɔ ō má ku ɔba amāŋ ɔnyā néē lɛ ŋ ma wɛ unwalu, ikɔkɔ ō má ɔ ku ɛhi a.”

¹² Ɔyinɛ alɔ nɔnya éyi nōo gē yuklɔ ipu Ubɛtɛlu a kahinii: “Ayinɛ alɔ ōhī gē gbɛla ku ɛjɛɛji ācɛ nōó lɛ ɔba amāŋ ɔnyā ŋ ma yɔ i tine obiye a, amāŋ ku eko nɛ ɛjɛɛji ācɛ nōó lɛ ɔba amāŋ ɔnyā ŋ ma yɔ ipu ígwu ku ācɛ a, ó wɛ ɛnɛɛnɛ ɛga lɛ uwa kéē lɔfu dɔka obiye. Ó lɛ eko éyi nɛ um nyɔ gā éwo ɔhá nyɔ i yuklɔ ku Ubɛtɛlu ku um, n kē faajɛ ɔnɔɔnɛ ku ɛ̄cī nōo wɛ ɛ̄cī ku ōjila. Ɔyinɛ nɔnya nɛ um kla ɔlɛ nu a da um ka ó lɛ ayinɛ alɔ nɔnyilɔ ɛpa nōo yɔ ipu ujɔ a nōo wɛ aɛgɔ um. Ó da um ka anuɔ i yɔ ceyitikwu kóō dɔka ɔba gā um nóó. Amáŋ boobu nɛ alɔ faajɛ Agbla Ku Ajɔɔcɛ a, ó lɛ um bi gā ɛga nɛ ayinɛ nɔnyilɔ ɛpa a yɔ a, o ya ɛɛ ku um lɔfu má uwa. Ó lɛ aafu ŋ, ɛnyā ta ami mɛmla ayinɛ alɔ nɔnyilɔ ɛpa ɔɔma uweyi nɛhi.”

13. Aocabɔ nyá ta ɔyinɛ alɔ nɔnya éyi nɛ ó lɛ ɔba ŋ ma ɔtu kwu ɔtu a?

¹³ Ɔyinɛ alɔ nɔnya ɔhá nōo gē yuklɔ ipu Ubɛtɛlu a kahinii: “N jé ācɛ ō gbɔbu ɔna ō ta nōo jikoko, nōó lɛ ɔba amaŋ ɔnyā ŋ ma, é jijeeyi, é gē lɛ aɔdā néē miya ō ya piii a ɔtu, é gē tutu ō ta ācɛ ɔhá abɔ, é kē lɛ eeye. É klla wɛ otabɔ nɛɛnɛhi lɛ ujɔ a duu. É lɛ ɔtu olɔhi lɛyikwu ō lɛ ɔba amāŋ ɔnyā. É gē gbɛla kē lɔhi fiyɛ ācɛ ɔhá, ohigbu ku uwa a i lɛ ɔba amāŋ ɔnyā ŋ. É klla gē gbɛla ke gáā lɛ eeye gla ŋ ohigbu ke lɛ obiye amāŋ ayi ŋ.” Ɛnyā ya ɛɛ nɛ ó gē lɔɔnyɛ nɛɛnɛhi ō yɔ ipu ujɔ nɛ ɛjɛɛji uwa jɛ iyi uwa eyī klla gē lɛ ojilima ce iyi uwa a. A géē jé ku ayinɛ uwɔ i gē menyinyi uwɔ amāŋ gē má uwɔ imalanyi ŋ. É gáā leyi gwu uwɔ bonu amāŋ gbɛla ku a lɔhi fiyɛ uwa ŋ. A jé peee kē yihɔtu uwɔ.

14. Ɛgɛnyá nɛ alɔ gáā mafu ku alɔ lɛ ojilima ce ācɛ nōó lɛ ɔba amāŋ ɔnyā ŋ ma?

¹⁴ Ó géē jɛ ayinɛ alɔ nōó lɛ ɔba amāŋ ɔnyā ŋ ma eyī nɛhi, ɔdaŋ ku alɔ mafu lɛ uwa kē cɛgbá lɛ alɔ, ohigbu uce ō ya olɔhi ɛyɛɛyɛyi néē lɛ a, ó wɛ ō menyinyi uwa ohigbu kē lɛ ɔba amāŋ ɔnyā ŋ. Ikɔkɔ néē cika ō yɔ i ta alɔ  eyinyinyi a, ō hayi kpaakpa ku uwa cika ō jɛ alɔ eyī nɛhi. Ɛnyā géē ya, ɔtu i gáā bēē ya ayinɛ alɔ nōó lɛ ɔba amāŋ ɔnyā ŋ ma bɛɛka alɔ yɔ i da uwa kahinii: “Ń cɛgbá awɔ ŋ́.” (1 Ukɔ́r. 12:21) Ikɔkɔ ɔɔma, é géē jé ku alɔ lɛ ojilima ce uwa, klla gē gweeye nɛɛnɛhi ohigbu ku uwa yɔ ipu ujɔ a.

15. Opiyabɔ nyá nɛ ācɛ ōhī ya, o ya ɛɛ kéē lɔfu yuklɔ ku ɔna ō ta fiyɛ ɛgɛ néē tɛtɛ gē ya a?

¹⁵ Ihayi ōhī nōo gā yɛ a, alɛwa ku ācɛ ō tɔɔna ɛlā Ɔwɔico lɛ ɔ piya ōmiya ku uwa ō nwu uce ɛyipɛ, o ya ɛɛ kéē lɔfu yuklɔ ku ɔna ō ta fiyɛ ɛgɛ néē tɛtɛ gē ya a. Ó ya ɛɛ kéē lɔfu ya ɛnyā a, é cɛgbá ō ya opiyabɔ ipu oyeeyi ku uwa. Ayinɛ alɔ nyá nyɛ ŋma ujɔ nōo gē ka uce ku uwa, o ya ɛɛ kéē lɔfu yuklɔ ipu ujɔ nōo gē ka uce ɔhá, nōo klla cɛgbá ācɛ ō tɔɔna ɛlā Ɔwɔico. (Ācot. 16:9) Ɛnyā wɛ ōmiya nɛ eyeeye ku uwa ya, o ya kéē gba Ujehofa ɛ̄gbā mla ɛjɛɛji ɔfu ku uwa. Naana nōó géē lɔfu je uwa ihayi alɛwa gbɔbu ɛɛ kē gbɔɔ ō ka uce a lɔɔlɔhi a, ó lɛ ɔwɛ alɛwa néē gē je otabɔ lɛ ujɔ a kpɔ. Uce ō ya olɔhi ɛyɛɛyɛyi néē lɛ, mla ɔdā néē má ɛ ma, gē lɔfu tu ayinɛ nōo yɔ ipu ujɔ a iyē nɛɛnɛhi. Ɛgɛ nɛ ayinɛ a je iyi uwa tɛɛcɛ kéē yuklɔ lɛ ācɛ ɔhá a jɛ alɔ eyī nɛhi!

16. Ɔdi lɔfu mafu ku ɔyinɛ alɔ nɔnyilɔ le cika jɛ ō wɛ ɔnyakwɔcɛ ku ujɔ amāŋ ɔcɛ ō ta anyakwɔcɛ ku ujɔ abɔ a?

¹⁶ Anyakwɔcɛ ku ujɔ i cika ō ci ɔyinɛ alɔ nɔnyilɔ duuma ŋma ō wɛ ɔnyakwɔcɛ ku ujɔ, amāŋ ɔcɛ ō ta anyakwɔcɛ ku ujɔ abɔ, ohigbu ka ó jé ō ka uce ku ujɔ a lɔɔlɔhi ŋ. Anyakwɔcɛ ku ujɔ géē miya ɔdaŋ ku ɔyinɛ alɔ nɔnyilɔ duuma cika jɛ ō wɛ ɔnyakwɔcɛ ku ujɔ amāŋ ɔcɛ ō ta anyakwɔcɛ ku ujɔ abɔ, ŋma lɛ ō leyi yɛ ɔwɛ nɛ Ubáyíbu kē cika ō ya uce lɛ a, ó wɛ ɛgɛ nɛ ɔcɛ ɔɔma jé ō ka uce a lɔɔlɔhi lɛ a ŋ.—1 Utím. 3:1-10, 12, 13; Utáy. 1:5-9.

17. Ɔka nyá gē wa ipu ɔtu ku adā mla aɛ́nɛ́ ɔdaŋ ku uwa mla apɔlɛ ku uwa le calɛ gā éwo ɔhá a?

¹⁷ Apɔlɛ ōhī nōo wɛ Ācɛ O Yɛce Ukraist le calɛ ŋma éwo ku uwa ɛ, ohigbu āhɔ̄ olɔnɔ nōo yɔ éwo ku uwa, amāŋ ohigbu ka é yɔ i dɔka uklɔ. Ohigbu ɛnyā, ayipɛ ɔlɛ uwa géē cɛgbá ō gā inɔkpa nōo gē ka uce okpɔcii ku éwo ɛyipɛ néē calɛ nyɔ a. Adā uwa mla ɛ́nɛ́ uwa kē i cɛgbá ō nwu uce okpɔcii ku éwo ɛyipɛ ɔɔma, o ya ɛɛ kéē lɔfu má uklɔ. Ɔdaŋ ku ujɔ amāŋ ígwu éyi yɔ nōo gē ka uce ku ɔlɛ uwa bɛ? Ujɔ nyá nɛ apɔlɛ a cika ō nyɔ a? Ó cika ō wɛ ujɔ nōo gē ka uce okpɔcii ku éwo néē nyɔ a nɛɛ, kɛɛ ku ujɔ nōo gē ka uce ku ɔlɛ uwa piii a?

18. Oŋma ɛlā nōo yɔ ipu ɔkpá ku Ācɛ Ugalésīya 6:5 a, ɛgɛnyá nɛ alɔ gáā mafu ku alɔ lɛ ojilima ce ōmiya nɛ otrɛyi ku apɔlɛ miya a?

¹⁸ Otrɛyi ku apɔlɛ a cika ō ka ujɔ nɛ apɔlɛ ku nu cika ō nyɔ a. Ó cika ō leyi yɛ ɔdā nōo géē he apɔlɛ ku nu ɔtu a lɔɔlɔhi. (Jé Ācɛ Ugalésīya 6:5.) Abɔ ɛlā nyā wɛ ɛlā nōo lɛ ō ya mla apɔlɛ ku nu a, ó géē lɔhi ku alɔ lɛ ojilima ce ōmiya duuma nɛ otrɛyi ku apɔlɛ a  miya lɛ apɔlɛ ku nu a. Ɔdā duuma nɛ ó miya, alɔ cɛtɔha mla ōmiya ɔɔma ŋma lɛ ō ya uwa omaaba mla ō mafu ihɔtu lɛ apɔlɛ a.—Uróm 15:7.

19. Ɔdi nɛ otrɛyi ku apɔlɛ cika ō gbɛla lɛyikwu ɔ lɔɔlɔhi klla gbɔɔkɔ lɛyikwu ɔ a?

¹⁹ Apɔlɛ ōhī lɔfu yɔ ujɔ nōo gē ka uce ku ɔlɛ uwa, amáŋ, ayipɛ ɔlɛ uwa i kē lɔfu ka uce a lɔɔlɔhi gla ŋ. Ɔdaŋ ku ujɔ nɛ apɔlɛ a ya anu a, yɔ ɔwɛ ɛga néē gē ka uce nɛ ayipɛ a gē nwu ipu inɔkpa a, ó géē lɔnɔ ku ayipɛ ɔlɛ uwa a kéē jɛyi ɛlā néē yɔ i ka ipu ōjila a, é kē gáā jɛ gɔbu ipu ɛ̄gbā ō gba ku Ujehofa gla ŋ. Ɔdiya? Ohigbu ku ayipɛ a lɔfu gē gā inɔkpa nōo gē ka uce kpɔcii ku éwo ɛyipɛ néē yɔ a, amáŋ uce ɔɔma i kē wɛ uce ku ɔlɛ uwa ŋ. Eko duuma nɛ ɛnyā le ya, otrɛyi ku apɔlɛ a cika ō gbɛla lɔɔlɔhi klla gbɔɔkɔ lɛ Ujehofa kóō jijeeyi lɛ ɔ, nōo géē ta ɔ abɔ jé ɔdā ō cɛgbá nɛ ó cika ō ya, o ya ɛɛ kóō ta ayi nu abɔ tubla Ujehofa ajaajɛ mla ācɛ ɔlɛ nu. Aɛ́nɛ́ mla adā géē cɛgbá ō nwu ayipɛ ɔlɛ uwa kē jé ō ka uce ku uwa lɔɔlɔhi, amāŋ ó géē cɛgbá kéē nyɔ gā ujɔ ɔhá nōo gē ka uce nɛ ayipɛ ɔlɛ uwa jɛyi nu lɔɔlɔhi. Ɔdā duuma nɛ otrɛyi ku apɔlɛ a miya, ujɔ néē miya ō nyɔ a cika ō ya ku anu mla apɔlɛ ku nu kéē jé kē lɛ ojilima ce uwa, kē klla cɛgbá nɛhi.

20. Ɛgɛnyá nɛ alɔ gáā mafu ku alɔ lɛ ojilima ce ayinɛ alɔ nōo yɔ i nwu uce ɛyipɛ a?

²⁰ Oŋma ɛjɛɛji aɛlā nɛ alɔ humayi ka a, ipu ujɔ alɛwa, ó lɛ ayinɛ nōo yɔ i ceyitikwu kéē nwu uce ɛyipɛ. Ó géē lɔfu lɔnɔ tu uwa kéē ka ɔdā néē yɔ i gbɛla a. Amáŋ ɔdaŋ ku alɔ i gbɛla foofunu lɛyikwu ɛgɛ néē yɔ i ka uce ɛyipɛ ku uwa a ŋ, alɔ géē má ɛdɔ ihɔtu néē lɛ lɛ Ujehofa, mla ɔtu caca néē lɛ ō gba ɔ ɛ̄gbā a. Ɔdaŋ ku alɔ gē má auce ō ya olɔhi néē lɛ nyā, alɔ géē lɛ ojilima ce uwa klla géē má uwa kē cɛgbá nɛɛnɛhi. Alɔ i gáā ka kahinii: “Ń cɛgbá awɔ ŋ́,” ohigbu kē jé ō ka uce ku alɔ lɔɔlɔhi ŋ.

21-22. Ɛnɛɛnɛ ɛga nyá nɛ alɔ lɛ a?

²¹ Ujehofa je uklɔ ō cɛgbá lɛ eyeeye ku alɔ nɛ alɔ lɔfu ya ipu ujɔ ku nu a lɛ alɔ. Ɛnyā wɛ ɛnɛɛnɛ ɛga, ó kē wɛ ɔdā nōo jɛ alɔ eyī nɛhi. Ɔdaŋ ku a wɛ ɔcɛnyilɔ o, amāŋ ɔcɛnya, a lɛ ɔba amāŋ ɔnyā amāŋ ku a lɛ ŋ, a wɛ ɛdrɔ amāŋ okplici nɛɛ ó, amāŋ ɔcɛ nōo jé ō ka uce éyi lɔɔlɔhi amāŋ ku a jé ō ka ɔ lɔɔlɔhi nóó, ɛjɛɛji alɔ cɛgbá nɛɛnɛhi lɛ Ujehofa, alɔ kē cɛgbá iyi alɔ.—Uróm 12:4, 5; Ukól. 3:10, 11.

²² Ɛjɛɛji alɔ kóō bi aɛnɛɛnɛ ɛlā nɛ alɔ nwu ŋma aciije ku Upɔlu lɛyikwu ɔkpiye ku ɔlɛɛcɛ a le yuklɔ. Ɛnyā géē ta alɔ abɔ jé ɔdā nɛ alɔ lɔfu ya ō tu ayinɛ alɔ ɔtu kwu ɔtu a. Ó klla géē ta alɔ abɔ ku alɔ kóō bēē yihɔtu mla ō lɛ ojilima ce ayinɛ alɔ nōo yɔ ipu ujɔ a.