Ɛlā nōo yɔ ipu ɔkpá ku Oblatūkíne 22:25-27 i yɔ abɔɔ kóō mafu ɔdā nōo ya ɛɛ nɛ alɔ géē ka ka ɔcɛnyilɔ a le ɛpɔbi a ŋ, ohigbu ka ó teyi peee ipu ɔgba ɔɔma ka ɔcɛnyilɔ a lé ɛpɔbi á. Amáŋ íne a yɔ i mafu peee ɔdā nōo ya nɛ alɔ lɔfu ka ka ɔcɛnya a le ɛpɔhi a. Alɔ leyi yɛ aɛlā nōo yɔ ipu ɛga ku Ubáyíbu ɔɔma ɛ.

Aɔgba nōo yɔ gbɔbu lɛ ɔgba ɔɔma kɛla lɛyikwu ɔcɛnyilɔ nōo cikpo ɔyipɔncɛnya néē lɛ ɔka ku nu da ɛ ma ipu “igelī.” Abɔ é lɛ ɔka ku ɔyipɔncɛnya a da ɛ ma, é géē ŋmo ɔcɛnyilɔ a ɛpɔbi ka ó lɛ ikpo ɔnyā ɔcɛ ɔhá ce ɛ, ohigbu ka ɔyipɔncɛnya a kwu piya ɔnyā ɔcɛ ɛ. Amáŋ, ɔncɛnya a kē bɛ? “Ó dɛ̄gba ká ācɛ kéē wā í tá ɔ̄ abɔ̄ ŋ́.” Ó lɛ aafu ŋ, ɔdaŋ ka ó géē yɛ i dɛgba nɛɛ, ācɛ ɔhá géē yɛ i po klla wa gáā ta ɔ abɔ. Amáŋ ó kē dɛgba ŋ. Ohigbu ɔɔma, ó lɛ abɔ ipu ɔdā nōo ya a. Ó lɛ a, é géē kɛpɔ tu uwa ɛplɛɛpa ka é lé ɛpɔbi.—Obla. 22:23, 24.

Íne a klla gáā kɛla lɛyikwu āhɔ̄ ɔhá kahinii: ‘Ɔ́dāŋ ka ɔ̄cɛ dúúmā lɛ ɔyípɔ̄ncɛ́nyā ɛ́gɔ́ɔ́mā hɛ́ bá ajɛ ipácí, ɔ̄cɛnyīlɔ ā ōfōōfūnū, nɛ̄ ɛ́ɛ géē ŋmó á. Ó ka ɛ́ɛ gáā yá ɔyípɔ̄ncɛ́nyā ā ɔdā dúúmā ŋ́, ohígbū ka ɔ́ bīyíne dúúmā nōo cíkā kéē ŋmó ɔ̄ ŋ́. Íne ā wɛ ékpónú mla íne kú eko nɛ̄ ɔ̄cɛ lɛ unu nu tá ɔ̄cɛ ɔhá lɛ ɔ́ ŋmó ā. Ohígbū ka ɔ̄cɛ a lɛ ɔyípɔ̄ncɛ́nyā ā hɛ́ bá ajɛ ipácí, nááná nɛ̄ ɔnyā ā dɛ̄gba kú otábɔ̄, amáŋ ɔ̄cɛ dúúmā í wā í tá ɔ̄ abɔ̄ ŋ́.’—Obla. 22:25-27.

Ipu āhɔ̄ ɔɔma, acohɛpɔ a kpɔtuce ɛlā nɛ ɔyipɔncɛnya a ka a. Ɔwɛ ɛgɛnyá a? É géē je ɔ ka ɔyipɔncɛnya a “dɛ̄gba kú otábɔ̄, amáŋ ɔ̄cɛ dúúmā í wā í tá ɔ̄ abɔ̄ ŋ́.” Ohigbu ɔɔma, é gáā bi ɔyipɔncɛnya a ka ó biya íne ŋ. Amáŋ é géē ŋmo ɔcɛnyilɔ a ɛpɔbi ka ó wɛ ɔcɛ ō hɛ ɔcɛ ba ajɛ mla ɔcɛ ō cikpo ɔnyā ɔcɛ ɔhá, ohigbu ka ó lɛ ɔyipɔncɛnya néē lɛ ɔka ku nu da ɛ ma “hɛ́ bá ajɛ.”

Ó lɛ a, naana nɛ íne nōo yɔ ipu ɔgba nyā yɔ i mafu ka ɔyipɔncɛnya a i biya íne ŋ ma a, ó klla yɔ i mafu ɔdā nōo ya ɛɛ néē géē ŋmo ɔcɛnyilɔ a ɛpɔbi ka ó wɛ ɔcɛ ō hɛ ɔcɛ ba ajɛ mla ɔcɛ ō cikpo ɔnyā ɔcɛ ɔhá a. Alɔ kē lɛ ɔtuce ka acohɛpɔ a géē “lɛ ɔkwu nū bū lɔɔlɔhi” klla bi ɔdā nɛ Ɔwɔico le ka peee igbalɛwa ɛ ma, le miya ɔdā okpaakpa ō ya.—Obla. 13:14; 17:4; Oyɛb. 20:14.