1-2. (a) Ɔdi nɛ aotrɛyi ku ɛcɛ nyā géē ka tɛɛcɛ ɛ̄cī éyi nōo gboji gɛ ŋ ma? (b) Aɔka nyá cɛgbá ku alɔ jé ohi ku uwa a?

GBƐLA tu ɛlā nyā ɛ: Alɔ je ɔ ku aotrɛyi ku ɛcɛ nyā gáā lɛ akacɛ nɛ alɔ humayi gbeyi kéē ka a ka tɛɛcɛ ɛ, ka “ɔdā dóódu í je unwalu lɛ alɔ gɛ ŋ́, alɔ kē bá ɛbɔ́.” É lɔfu gbɔɔ ō ya ɔbɔɔcɛ ku aa le ya ku ɛbɔ kóō yɔ ipu ɛcɛ a ɛ. É géē yɔ i ya ku alɔ gbɛla ka é lɔfu bi ɛjɛɛji unwalu ku ɛcɛ nyā wa oŋmɛyi gla. Amáŋ é gáā lɔfu ci ɔdā nōo gáā ya gboce ɔ a ŋ! Ɔdiya a? Akacɛ ku Ubáyíbu kahinii: “Igbɛ ékpónú ífi nɛ̄ɛ̄nɛ̄hi géē wā í yá uwā! . . . É kē gáā kwu hɛ̄ ɔ̄ tá glá ŋ́.”—1 Utes. 5:3.

² Ó lɛ aɔka nōo cɛgbá nɛhi nɛ alɔ cika ō jé ohi ku uwa: Ɔdi gáā ya eko ku “ōwē nɛ̄hi” a? Ɔdi nɛ Ujehofa géē dɔka ku alɔ ya ɛpleeko ɔɔma a? Ɛgɛnyá nɛ alɔ gáā lɛ iyi alɔ tutu babanya, o ya ɛɛ ku alɔ lɔfu hayi kpaakpa eko ku owe nɛhi a?—Umát. 24:21.

3. Oŋma ɛlā nōo yɔ ipu Ɔdā Nēé Mafú Lɛ Ujɔ́ni 17:5, 15-18 a, ɛgɛnyá nɛ Ɔwɔico gáā bi le ca “Ubábīlɔn Nɛ̄hi” taajɛ a?

³ Jé Ɔdā Nēé Mafú Lɛ Ujɔ́ni 17:5, 15-18. É géē lɛ “Ubábīlɔn Nɛ̄hi” cataajɛ! Ɛgɛ nɛ alɔ ka gbɔbu a, aotrɛyi ku ɛcɛ a i gáā lɔfu ci ɔdā nōo gáā ya eko ɔɔma gla ŋ. Ɔdiya a? Ohigbu ka “Ɔwɔicō [géē] kwú ɔtū í lɛ uwá nēé géē cɛ̄ tɔ̄há kéē yá ɔdā nōo he ɔ́ ɔtū ā.” Ɔdi wɛ ɔdā nōo he ɔ ɔtu a? Ɔdā nōo he Ɔwɔico ɔtu a wɛ ō lɛ ɛjɛɛji ɔwɛ ō gba ɛ̄gbā ɛkɛmgbɛ cataajɛ kwu ācɛ nōo gē ka ka aa wɛ Ācɛ O Yɛce Ukraist a. * Ɔwɔico géē  lɛ ɔdā nōo he ɔ ɔtu a tu ipu ɔtu ku “ajī igwó” ku “ɛbɛ́ obɔ̄bí nɔ̄wá yōōō” a. Aji igwo a kwɛyi ɛjɛɛji aigɔmɛnti nōo ge ta “ɛbɛ́ obɔ̄bí nɔ̄wá yōōō” a abɔ. Ɛbɛ obɔbi nɔwa yooo a kē kwɛyi United Nation. (Mafú 17:3, 11-13; 18:8) Eko duuma nɛ ɛjɛɛji aigɔmɛnti gbɔɔ ō kpo ɛfú ta aɔwɛ ō gba ɛ̄gbā ku ɛkɛmgbɛ, ɔɔma gáā wɛ ɔdā ocabɔ nōo géē mafu ka eko ku owe nɛhi a gáā gbɔɔ ɛ. Ɔdā nōo géē ya igbekponu nyā géē tuufi nɛɛnɛhi. Ó klla géē lɛ iyē kwu ɛjɛɛji ācɛ nōo yɔ ipu ɛcɛ nyā a.

4. (a) Ɔdi nɛ aotrɛyi ku ɛcɛ a géē lɛ abɔ ba ɔ kóō wɛ ɔdā nōo ya ɛɛ néē yɔ i kpo ɛfú ta ɛ̄gbā ō gba ku ɛkɛmgbɛ a? (b) Ɔdi nɛ ācɛ nōo gē gba ɛ̄gbā mla uwa a géē lɔfu ya a?

⁴ Alɔ i jé ɔdā nɛ aotrɛyi ku ɛcɛ nyā géē lɛ abɔ ba ɔ ka anu ya ɛɛ néē yɔ i kpo ɛfú ta ɔwa ku ɛ̄gbā ō gba ku ɛkɛmgbɛ ŋ. Á jé ŋ, é géē ka ku aɔwɛ ō gba ɛ̄gbā ɛyɛɛyɛyi nōo yɔ ipu ɛcɛ a yɔ i ya nɛ ɛbɔ i yɔ ipu ɛcɛ nyā ŋ ma, ku uwa kéē i lɛ abɔ eko doodu ipu ɛlā imeli ku ɛcɛ nyā. Amāŋ, é lɔfu ka ku ɛ̄gbā ō gba ku ɛkɛmgbɛ lɛ ije mla aɔdā agbenu lɛ fiyɛ ɔfu ɛ. (Mafú 18:3, 7) Ɔdaŋ ka aotrɛyi ku ɛcɛ a gbɔɔ ō kpo ɛfú ta ɛ̄gbā ō gba ku ɛkɛmgbɛ, ó lɔfu wɛ ka é gáā kpo ɛjɛɛji ācɛ ɔlɛ uwa yiifi ŋ. Ikɔkɔ ɔɔma, ó lɛbɛɛka ɔwa ku uwa néē gáā cataajɛ a. Ɔdaŋ ka é lɛ ɔɔma ya, ācɛ ɔlɛ uwa nōo gē gba ɛ̄gbā mla uwa gbɔbu a géē ka ku aotrɛyi ku uwa i lɔfu ya ɔdā néē cokonu a lɛ uwa gla ŋ. Ohigbu ɛnyā, ɛyinɛhi ku uwa lɔfu ka ka é lɛ ɔdā duuma ō ya mla uwa gɛ ŋ.

5. Ɔdi nɛ Ujehofa cokonu lɛ alɔ lɛyikwu eko ku owe nɛhi a, ɔdiya ɛɛ nɛ ó kē cokonu ɔɔma lɛ alɔ a?

⁵ Ubáyíbu i da alɔ oŋma eko nyá gáā ta eko nyá nɛ ocataajɛ ku aɔwɛ ō gba ɛ̄gbā a gáā wɛ a ŋ. Amáŋ alɔ jé ka ó gáā gboji ajɛ ŋ. (Mafú 18:10, 21) Ujehofa lɛ okonu ce lɛ alɔ ɛ, ka anuɔ géē “lɛ ɛ̄cī” ku eko ku owe nɛhi a “cē kpií,” o ya ɛɛ ku “ācɛ nɛ̄ ó fu ā” mɛmla ɛ̄gbā ō gba ku ɔkwɛyi kóō wi. (Umák. 13:19, 20) Amáŋ ɔdi nɛ Ujehofa dɔka ku alɔ ya, oŋma eko nɛ owe nɛhi a géē gbɔɔ gáā ta eko ku ɛfú ō kpo ku Amagɛdɔn a?

6. Ɔdi ɔhá nɛ alɔ cika ō ya, ɔdaŋ ku alɔ i dɔka ō lɛ abɔ ipu ɔdā duuma nōo lɛ ō ya mla ɛ̄gbā ō gba ku ɛkɛmgbɛ ŋ ma?

⁶ Ipu ikpɛyi ɛlā nɛ alɔ klɔcɛ gbɔbu lɛ ɛnyā, alɔ ka ka ɔdā éyi nɛ Ujehofa dɔka ku ācɛ ɔlɛ  nu kéē ya a wɛ kahinii, ó dɔka kéē hii lɛ abɔ ipu ɔdā duuma nōo tɛɛma kwu ɛ̄gbā ō gba ku ɛkɛmgbɛ ŋ. Amáŋ ó wɛ ɔɔma foofunu ŋ. Alɔ cika ō lɛ ɔtu ku alɔ ya ekpo ō yɔ i gba Ujehofa ɛ̄gbā duu. Alɔ leyi yɛ ɔwɛ ɛpa nɛ alɔ lɔfu ya ɛnyā gla.

7. (a) Ɛgɛnyá nɛ alɔ gáā lɛyitaajɛ lɛ aɔdā nɛ Ujehofa mafu lɛ alɔ kéē wɛ aɔdā olɔhi a? (b) Ɔdiya ɛɛ nɛ ɔkpá ku Ācɛ Uhíbru 10:24, 25 ka kóō ya nɛ alɔ cika ō jila tɔha a, ɔdiya nōó kē cɛgbá fiyɛ duu babanya a?

⁷ Aflɛyi, alɔ cika ō bēē lɛyitaajɛ lɛ aɔdā nɛ Ujehofa mafu lɛ alɔ kéē wɛ aɔdā olɔhi a. Alɔ kóō hii miyɛ aɔdobɔbi nɛ ācɛ ku ɛcɛ nyā gē ya a kéē wɛ aɔdā olɔhi ŋ. Ocabɔ mafu, alɔ i gē dɔka aya duuma ku aja ō gbo amāŋ ikpo ɔnyā ɔhá ō ce ŋ, kwu aya ku acɛnya nōo gē lɛ iyi uwa amāŋ acɛnyilɔ nōo gē lɛ iyi uwa klla gē ce ikpo iyi uwa, mla auce obɔbi ɔhá nōo tɛɛma kwu ɔ a. (Umát. 19:4, 5; Uróm 1:26, 27) Ɔmpa, alɔ cika ō yɔ i gba Ujehofa ɛ̄gbā mla Ācɛ O Yɛce Ukraist ɔmpa alɔ. Alɔ lɔfu ya ɛnyā ɛga duuma gla, ipu Agbla Ku Ajɔɔcɛ, amāŋ ipu ɔlɛ ku ɔyinɛ alɔ duuma eko duuma nɛ ó cɛgbá, amāŋ ɛga ō tayinu. Ɔdā duuma nōo kóō ya naana, alɔ i gáā lɛ abɔ ci ō gā ōjila ku ujɔ ŋ. Ku ɔkwɛyi a, alɔ cika ō yɔ i jila tɔha “ofíyɛ́ dúú ā ɛ́gɛ́nɛ̄ [alɔ] jé ka ɛ̄cī ā le bá ɛɛ́ mā.”—Jé Ācɛ Uhíbru 10:24, 25.

8. Ɛgɛnyá nɛ olɛhɔ nɛ alɔ gē tɔɔna a géē lɔfu piyabɔ ɛcɔbu a?

⁸ Ɛpleeko ku owe nɛhi a, á jé ŋ, olɛhɔ nɛ alɔ gē tɔɔna a géē je piyabɔ. Babanya, alɔ yɔ i tɔɔna ku ɔkoolɔhi lɛyikwu Ajɔɔcɛ a klla gē ceyitikwu ku alɔ lɛ ācɛ piya ayikpo ku Ukraist. Amáŋ ɛpleeko ɔɔma, alɔ lɔfu tɔɔna olɛhɔ nōo géē lɛ kpaa á. Ubáyíbu da alɔ ka ó géē lɛbɛɛka ɛcɔɔwɔ nōo gbɛnu nɛhi a. (Mafú 16:21) Alɔ lɔfu tɔɔna ku ɛcɛ obɔbi ku Ebilii le ba oŋmɛyi ɛ. Abɔ eko yɔ i nyɔ a, alɔ géē jé ɔdā nɛ olɛhɔ ku alɔ ɔɔma géē wɛ piii mla ɛgɛ nɛ alɔ géē tɔɔna nu a. Ɔwɛ nɛ alɔ gē bi le tɔɔna ŋmiifi ihayi alɛwa a nɛ alɔ gáā bi le tɔɔna eko ɔɔma kpɔ ɛ ma? Kɛɛ ku alɔ géē bi ɔwɛ ɛpɛpɛ ɔhá le tɔɔna? Alɔ géē gbeyi ku alɔ má ɔ, ohigbu ku alɔ i jé ŋ. Amáŋ ɔwɛ duuma nɛ alɔ kóō bi le tɔɔna naana, ó lɛbɛɛka alɔ géē lɛ ɛnɛɛnɛ ɛga ō tɔɔna olɛhɔ ku ɛpɔ ō ka ku Ujehofa mla ɔtu ō lɛ!—Isík. 2:3-5.

9. Ɔdi nɛ aéwo a géē lɔfu ya lɛyikwu olɛhɔ ku alɔ a, amáŋ ɔdi wɛ ɔtooce ku alɔ a?

⁹ Ó teyi peee ka olɛhɔ ku alɔ géē lɔfu ya ku aéwo a kéē ceyitikwu kwu alɔ abɔfu ku alɔ lɛ abɔ ci ɔna ō ta a piyoo. Ɛgɛ nɛ alɔ gē lɛ ɔtuce Ujehofa kóō ta alɔ abɔ ipu uklɔ ku ɔna ō ta ku alɔ babanya a, ɛgɔɔma nɛ alɔ gáā lɛ ɔtuce ɔ eko ɔɔma kóō ta alɔ abɔ duu a. Alɔ lɛ ɔtuce ku Ɔwɔico ku alɔ géē je ɔfu nɛ alɔ cɛgbá a lɛ alɔ, o ya ɛɛ ku alɔ lɔfu ya ɔdā nɛ ó tine a.—Umáy. 3:8.

10. Ɛgɛ néē kacɛ ipu ɔkpá ku Ulúku 21:25-28 a, ɛgɛnyá nɛ aɔdā nōo géē ya ɛpleeko ku owe nɛhi a géē lɛ abɔ kwu ɛyinɛhi ku ācɛ a?

¹⁰ Jé Ulúku 21:25-28. Ɛpleeko ku owe nɛhi a, ɛjɛɛji ācɛ géē le kpo hidaago ohigbu aɔdā nōo géē yɔ i ya a. É géē yɔ i má ka ɛjɛɛji aɔdā néē gbolo ce uwa kéē géē yɔ piyoo a yɔ i cataajɛ. É géē yɔ ipu “ákanya,” é géē yɔ i yuufi ka é géē ŋmo uwa ɛpleeko obɔbi nɛhi ipu ɔ̄kā ku alɛɛcɛ a. (Usɛf. 1:14, 15) Ɛpleeko ɔɔma āhɔ̄ ku oyeeyi lɔfu lɔnɔ nɛɛnɛhi, kwu āhɔ̄ ku oyeeyi ku ācɛ nōo gē gba Ujehofa ɛ̄gbā duu. Abɔ alɔ i wɛ ācɛ ku ɛcɛ nyā ŋ ma a, alɔ géē lɔfu má owe ɛyɛɛyɛyi. Á jé ŋ, alɔ i kóō gáā lɛ ɛjɛɛji aɔdā nōo wɛ ɛgbá ku alɔ a eko ɔɔma ŋ.

11. (a) Ɔdaŋ ka é lɛ aɔwɛ ō gba ɛ̄gbā ku ɛkɛmgbɛ cataajɛ, ɔdiya ɛɛ nɛ ācɛ mɛmla aotrɛyi ku ɛcɛ nyā géē lɛ ɔtu ku uwa kwu ɛgiyi Ācɛ Ocijali Ku Ujehofa a? (b) Ɔdiya nɛ alɔ i cika ō yuufi eko ku owe nɛhi a ŋ ma?

¹¹ Eko géē wa, ācɛ néē lɛ ɔwɛ ō gba ɛ̄gbā ku uwa cataajɛ a géē lɔfu gbɔɔ ō cɔnu  nɛɛnɛhi, abɔ é ca ɔwɛ ō gba ɛ̄gbā ku Ācɛ Ocijali Ku Ujehofa taajɛ ŋ ma. Ó teyi peee ka é géē gbɔɔ ō da ācɛ ɔhá lɛyikwu ɛgɛ néē yɔ i cɔnu nɛhi lɛ a, jaa gā ipu intanɛt duu. Aotrɛyi ku ɛcɛ a mla otrɛyi ku uwa Ebilii, géē wɔtu alɔ nɛhi ohigbu ka ɛ̄gbā ō gba ku alɔ ofoofunu néē cataajɛ ŋ ma. Ɔdā nɛ aéwo a tɛtɛ bi ɔtu, ō lɛ ɛjɛɛji ɔwɛ ō gba ɛ̄gbā cataajɛ ŋma ipu ɛcɛ a i lɛyi lɛ uwa ŋ. Ohigbu ɛnyā, ɛgiyi alɔ néē gáā lɛ eyī ku uwa kwu mɛɛ a. Ɛpleeko ɔɔma, aéwo a géē je piya Ugɔgu ku Umagogu. * É géē piyatɔha ō ya ɛɛ kéē bi ɛjɛɛji ɔfu ku uwa le kpo ɛfú ta ācɛ nōo gē gba Ujehofa ɛ̄gbā a. (Isík. 38:2, 14-16) Alɔ lɔfu yɔ i gbɛla lɛyikwu aɔdā nōo géē ya eko ku owe nɛhi a, ofiyɛ duu abɔ alɔ i jé ɛjɛɛji ɔdā nōo géē ya eko ɔɔma piii ŋ ma. Amáŋ, alɔ jé kpɔcii ka alɔ i cika ō yuufi eko ku owe nɛhi a ŋ. Ujehofa géē yɔ i tu alɔ ukɔ́ nōo géē nya oyeeyi ku alɔ ta. (Aíjē 34:19) Alɔ géē lɔfu “māháyicō kpaakpa cɛ́ɛ́ kú [alɔ] je eyī gicō” ohigbu ku alɔ jé ka “Ɔwɔicō géē wā í nya [alɔ] tá ānāānā.” *

12. Ɛgɛnyá nɛ “Ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī” humayi ta alɔ abɔ ku alɔ tutu lɛyikwu aɔdā nōo géē ya ɛcɔbu a?

¹² “Ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī” a humayi lɛ alɔ tutu, o ya ɛɛ ku alɔ lɔfu hayi kpaakpa eko ku owe nɛhi a ɛ. (Umát. 24:45) É ya ɛnyā ɔwɛ alɛwa. Ɔwɛ éyi wɛ o bu ipu ōmiya ku ojileyi nɛhi ku alɔ ku ihayi ku 2016 gā 2018 a. Ɛlā ō ka tɛɛcɛ néē ya ipu aojileyi nɛhi nōo ba nyā ta alɔ ɔtu kwu ɔtu ku alɔ ya ku auce ō ya nɛ alɔ cɛgbá a kóō bēē lɔfu tōōtɔ̄ɔ̄ abɔ eko ku Ujehofa le ba ɛ ma. Alɔ kɛla lɛyikwu auce ō ya a ligii ɛ.

13. Ɛgɛnyá nɛ alɔ géē ya ku alɔ yɔ kwu Ujehofa fiyɛ a, ɔdiya nɛ alɔ kē cika ō ya lɛ a babanya a?

¹³ Ō yɔ kwu Ujehofa: Ikpɛyi ɛlā ku ōmiya ku ojileyi nɛhi ku 2016 a kahinii: “Yɔ Kwu Ujehofa Gā Ajaajɛ!” Ōmiya a nwu alɔ ka ɔdaŋ ku alɔ lɛ ɛma ō lɔhi mla Ujehofa, ku alɔ géē yɔ kwu ɔ gā ajaajɛ. Ó klla ta alɔ ɛlá kwu ɔ ku alɔ géē yɔ kwu Ujehofa gā ajaajɛ ɔdaŋ ku alɔ gē gbɔɔkɔ lɛ ɔ ŋma ɔtu ku alɔ, klla gē klɔcɛ ɛlā nu lipu lipu. Ō ya ɔɔma géē je ɔfu lɛ alɔ ku alɔ yale ipu unwalu duuma. Abɔ eko ku owe nɛhi a yɔ i ba a, alɔ kóō leyice ka alɔ géē má ojama nɛɛnɛhi fiyɛ nōo géē ja alɔ ma ku alɔ kóō hii yɔ kwu Ujehofa amāŋ Ajɔɔcɛ ku nu gā ajaajɛ ŋ. Ācɛ géē lɔfu gbɔɔ ō ŋmo alɔ okonu. (2 Upít. 3:3, 4) É lɔfu ya alɔ lɛ a, abɔ alɔ i gē cɛ ō lɛ abɔ ipu aɔdā ku ɛcɛ ku Ebilii nyā ŋ ma. Babanya nɛ alɔ cika ō ya ku alɔ yɔ kwu Ujehofa ajaajɛ fiyɛ a, o ya ɛɛ ku alɔ lɔfu yɔ kwu ɔ gā ajaajɛ ɛpleeko ku owe nɛhi a.

14. (a) Opiyabɔ nyá gáā ya lɛyikwu ayinɛ nɔnyilɔ nōo gē leyi kwu alɔ ipu ɛcɛ nyā a? (b) Ɔdiya nōó géē cɛgbá ku alɔ yɔ kwu Ujehofa ajaajɛ eko ɔɔma a?

¹⁴ Ɛpleeko ku owe nɛhi a, opiyabɔ géē yɔ lɛyikwu ayinɛ nɔnyilɔ nōo gē leyi kwu alɔ ipu ɛcɛ nyā a. Eko éyi géē wa néē géē lɛ ɛjɛɛji ācɛ néē lɛ anɔ tu uwa ɛyi nōo yɔ ipu ɛcɛ nyā kpɔ ɛ ma tuba klla kwu uwa u kpo gā ɔkpanco. É géē wɛ ipu aicɔɔja nōo géē kpo ɛfú eko ku Amagɛdɔn a. (Umát. 24:31; Mafú 2:26, 27) Ɛnyā kē mafu ka Ígwu Nōo Gē Leyi Kwu Ɔwa Ku Alɔ a i gáā yɔ ipu ɛcɛ mla alɔ eko ɔɔma gɛ ŋ. Amáŋ, ɛwa nɛhi ku ācɛ a i gáā fiyakata ŋ. Ayinɛ nɔnyilɔ ŋma ipu  ígwu ku aala ɔhá nōo cika jɛ a gáā bēē leyi kwu alɔ á. Alɔ géē mafu ku alɔ yɔ kwu Ujehofa, ɔdaŋ ku alɔ gē ta ayinɛ nɔnyilɔ nōo ba nyā abɔ klla gē yɛce ɔwɛ duuma nɛ Ujehofa mafu lɛ uwa a. Alɔ cika ō yɛce ɔwɛ duuma néē mafu lɛ alɔ, ɔdaŋ ku alɔ dɔka ō lɛ onyata!

15. Ɛgɛnyá nɛ alɔ gáā ya ku ɔtoole ku alɔ kóō lɔfu a, ɔdiya nōó kē cɛgbá ku alɔ ya lɛ a babanya a?

¹⁵ Ɔtoole: Ikpɛyi ɛlā ku ōmiya ku ojileyi nɛhi ku 2017 a kahinii: “Ɛ̄jɛ̄ Kóō Hii Jɛ uwɔ Ŋ!” Ōmiya ɔɔma ta alɔ abɔ ku alɔ lɛ ɔtu ku alɔ ya ekpo lɔfu lɔfu ō lɔtu ojama duuma. Alɔ klla nwu ka ɔtoole ku alɔ gē wa ŋma lɛ ō gbolo ce Ujehofa, ó wɛ ohigbu ka āhɔ̄ ku alɔ géē lɔhi fiyɛ amāŋ ka ó gáā lɔfu ŋ. (Uróm 12:12) Alɔ kóō hii mlanyi ɔdā nɛ Ujisɔsi cokonu nu lɛ alɔ a nóó, ó kahinii: “Ɔ̄cɛ nōo lɛ ɔtūlé jāā ga ámōōmɛ ā . . . géē nyatá á.” (Umát. 24:13.) Okonu ō ce ɔɔma yɔ i mafu ku alɔ cika ō hayi kpaakpa ipu āhɔ̄ olɔnɔ amāŋ unwalu duuma. Ɔdaŋ ku alɔ gē lɔtu ɛjɛɛji ojama nɛ alɔ gē má babanya, ó géē ya ku ɔtu okpoce ku alɔ kóō lɔfu gbɔbu ɛɛ ku eko ku owe nɛhi a kóō gbɔɔ.

16. Ɔdiya nɛ alɔ gē lɛ ɔtu a, ɔdi nɛ alɔ cika ō ya, o ya ɛɛ ku ɔtu ō lɛ ku alɔ kóō yɔ i lɔfu babanya a?

¹⁶ Ɔtu ō lɛ: Ikpɛyi ɛlā ku ōmiya ku ojileyi nɛhi ku 2017 a kahinii: “Lɛ Ɔtū Lɛ!” Ɛlā ō ka tɛɛcɛ ku ojileyi nɛhi ɔɔma ta alɔ abɔ ku alɔ bla ku alɔ i gē lɛ ɔtu ohigbu ɔfu ku abɔyi alɔ ŋ. Ɛgɛ nɛ alɔ gē gbolo ce Ujehofa o ya ɛɛ ku alɔ lɛ ɔtoole a, ɛgɔɔma nɛ alɔ cika ō gbolo ce Ujehofa, o ya ɛɛ ku alɔ lɛ ɔtu ɔkwɔɔkwɛyi a. Ɛgɛnyá nɛ alɔ géē nwu ɛgɛ nɛ alɔ géē gbolo ce Ujehofa tōōtɔ̄ɔ̄ a? Alɔ géē ya ɛnyā ɔdaŋ ku alɔ gē jé Ubáyíbu eko doodu klla gē gbɛla tu ɛgɛ nɛ Ujehofa nyā ācɛ ɔlɛ nu ta eko igble a. (Aíjē 68:20; 2 Upít. 2:9) Ɔdaŋ ka aéwo a gbɔɔ ō kpo ɛfú ta alɔ ɛpleeko ku owe nɛhi a, alɔ géē cɛgbá ɔtu ō lɛ mla ō lɛ ɔtuce Ujehofa fiyɛ ɛgɛ nɛ alɔ gē ya gbɔbu a. (Aíjē 112:7, 8; Uhíb. 13:6) Ɔdaŋ ku alɔ gbolo ce Ujehofa babanya, alɔ géē lɛ ɔtu nɛ alɔ cɛgbá, eko nɛ Ugɔgu géē wa i kpo ɛfú ta alɔ a. *

17. Ɔdiya nɛ alɔ i cika ō yuufi Amagɛdɔn ŋ ma? (Má ifoto nōo yɔ iyɔbu ku Ɔda Ō Gbaajɛ nyā.)

¹⁷ Ikpɛyi ɛlā nɛ alɔ klɔcɛ gbɔbu lɛ ɛnyā  mafu ku ɛyinɛhi ku alɔ lā oyeeyi ku alɔ ɛpleeko amoomɛ a. Amáŋ alɔ lɛ eyiyoce ku alɔ géē lɛ onyata amāŋ wi eko ku owe nɛhi a. Ɛfú ō kpo ku Amagɛdɔn géē bi ɛcɛ obɔbi ku Ebilii nyā wa oŋmɛyi. Amáŋ, alɔ i cika ō yuufi ɔdā duuma ŋ. Ɔdiya a? Ohigbu ka ɛfú ō kpo a wɛ aku Ujehofa, alɔ i gáā cɛgbá ō nuunu ŋ. (Aiít. 1:33; Isík. 38:18-20; Usak. 14:3) Eko duuma nɛ Ujehofa lɛ ɔ́da a je, Ujisɔsi géē kpo aicɔɔja ku Ujehofa trɛyi kéē wa gáā kpo ɛfú. Ācɛ néē lɛ anɔ tu uwa ɛyi nōo heyi ŋma ɔlekwu gā ɔkpanco mla uluuluula igbingbidi ku aalelekwu otɛhɔ ku Ɔwɔico wɛ aicɔɔja ku Ujehofa a. É géē piyatɔha klla nuunu ta Ebilii, aalelekwu otɛhɔ obɔbi ku nu, mla aicɔɔja ku uwa nōo yɔ ipu ɛcɛ nyā a.—Udán. 12:1; Mafú 6:2; 17:14.

18. (a) Ɔdi nɛ Ujehofa cokonu lɛ alɔ a? (b) Ɔdiya nɛ Ɔdā Nēé Mafú Lɛ Ujɔ́ni 7:9, 13-17 ta uwɔ abɔ ku a lɛ ɔtooce olɔfu lɛyikwu eyiyoce ku uwɔ ku ɛcɔbu a?

¹⁸ Ujehofa cokonu kahinii: “Ó lɛ íyɛ́fú dúúmā nēé bī wā gaá le nuunu tá uwɔ nōo géē lɔfú yá uwɔ ɔdā dúúmā glá ŋ́.” (Ayis. 54:17) “Ɛwa nɛ̄hi” ku ācɛ nōo hayi kpaakpa gba Ujehofa ɛ̄gbā géē wi “ŋmá eko kú ákanya [amāŋ owe] nɛ̄hi ā.” Cɛɛ, é géē yɔ i gba Ujehofa ɛ̄gbā gɔbu. (Jé Ɔdā Nēé Mafú Lɛ Ujɔ́ni 7:9, 13-17.) Ubáyíbu da alɔ aɔdā alɛwa nōo ya nɛ alɔ cika ō lɛ ɔtooce olɔfu ku alɔ géē wi amāŋ lɛ onyata ɛcɔbu a! Alɔ jé ka “Óndú ā gē gbō ācɛ nōo gē yɛce ɔ́ kpaakpa ā.” (Aíjē 31:23) Ɛjɛɛji ācɛ nōo yihɔtu ku Ujehofa klla gē cɛtra ɔ a géē gweeye nɛɛnɛhi ō má ɛgɛ nɛ Ujehofa géē ya ku iye ku nu kóō le tiihɔ a.—Isík. 38:23.

19. Ɛnɛɛnɛ ɛga nyá nɛ alɔ géē jɔɔnyɛ nu ɛcɔbu a?

¹⁹ Ɔdaŋ ka Ebilii i yɔ ipu ɛcɛ nyā gɛ ŋ, gbɛla lɛyikwu ɛgɛ néē géē lɔfu bi ɔkpá ku 2 Utímōti 3:2-5 le mafu uce ō ya ku ācɛ ipu ɛcɛ ɛpɛpɛ a. (Má ikpati nōo kahinii: “ Uce Ō Ya Ku Ācɛ Eko Ɔɔma.”) Ɔyinɛ alɔ Ugeorge Gangas, nōo wɛ ipu Ígwu Nōo Gē Leyi Kwu Ɔwa Ku Alɔ eko nɛ ó yeeyi a ka ɔ lɛ a kahinii: “Ɛcɛ ku alɔ nyā géē lɔhi nɛhi eko duuma nɛ ɛjɛɛji ācɛ géē wɛ ācɛ ō gba Ujehofa ɛ̄gbā foofunu! Ó gáā gboji gɛ ŋ, a géē lɛ ɛnɛɛnɛ ɛga ō lā ipu ɛcɛ ɛpɛpɛ a. Alɔ géē lā oyeeyi bɛɛka Ujehofa a. Alɔ i gáā kwū gboogboo gɛ ŋ.” Eyiyoce ɛgɛnyá i lɛ ɛdɔ ŋ!