ACƐNYA ɛpa yɔ i yɛ iyawu tɔha ipu Baguio Igeli ku Philippines. É gáā lɛ ayinɛ alɔ nōo yɔ i bi ucarti yuklɔ ku ɔna ō ta a má, amáŋ é yɛ faajɛ ɛga nɛ ucarti a mahayi a ŋ. Ɔyinɛ alɔ nɔnya Helen nōo hayi pi ucarti a, lɛ ɛhɛ hɛ mla uwa. Acɛnya ɛpa a gɔbu yɔ i yɛ iyawu, amáŋ é gáā dɔka ɛgɛ nɛ Helen yɛhɛ mɛmla uwa lɛ a.

Igbihaajɛ, acɛnya ɔɔma le ta ɔlɛ ipu umoto, amáŋ abɔ é yɔ ɔwɛ yɔ i gā ɔlɛ a, é má Agbla Ku Ajɔɔcɛ mla ina nɛhi ku jw.org. É gáā bla ku ikpɛla néē má piii ɛyi ucarti nɛ ayinɛ alɔ bi yɔ i tɔɔna gbɔbu a ya abɔɔ a. É gaajɛ ŋma ipu umoto a le ta ipu Agbla Ku Ajɔɔcɛ a. Abɔɔ, é má ōmiya lɛyikwu ɛgɛ néē gē ya ōjila ipu Agbla Ku Ajɔɔcɛ ɔɔma a.

Acɛnya ɛpa ɔɔma gā ōjila éyi nōo yɔ igbɔha a. Ó le hɛ uwa idaago nɛhi abɔ é má Helen eko néē gā ipu Agbla Ku Ajɔɔcɛ a! É gáā le bla boobu ku anu wɛ ɔcɛ nōo yɛhɛ mɛmla uwa a. Helen kahinii: “Ɔtu ku um plico, ohigbu ku um jé ɔdā nōo ya ɛɛ néē wa ɛgiyi um a ŋ.” Amáŋ acɛnya a le da Helen kē má ɔ hayi pi ucarti gbɔbu ɛ.

Acɛnya a jɔɔnyɛ ōjila a mla opiyatɔha a nɛhi, klla lɛ ɔtu ogbonɛɛ ō yɔ pi ayinɛ nōo yɔ ipu ujɔ a. Eko néē má ācɛ ɔhá yɔ i lɛ Agbla Ku Ajɔɔcɛ tubi igbihi nɛ ōjila le ŋmɛyi a, é da ɔka ɔdaŋ kē lɔfu tabɔ gla. Éyi ku acɛnya a i lā ipu Philippines gɛ ŋ, amáŋ ɔcɛnya ɔhá a gbɔɔ ō wa ōjila ku ujɔ, klla gbɔɔ oklɔcɛ ku Ubáyíbu. Ɛjɛɛji odee nyā ya, ohigbu ɛhɛ ō hɛ foofunu!