1-2. Ɛgɛ nɛ ɔkpá ku 1 Utímōti 6:20 ka a, ɔdi nɛ Utimoti cɛgbá ō ya a?

IGBALƐWA alɔ gē kpo aɔdā nōo ce alɔ ɛgbá nɛɛnɛhi a tayinu ɛgiyi ācɛ ɔhá. Ocabɔ mafu, alɔ gē lɛ ije ku alɔ tayinu ipu ubank. Eko duuma nɛ alɔ ya lɛ a, alɔ gē leyice ku ije ku alɔ i gáā bi ŋ, ka é klla gáā je ɔ uwi ŋ duu. Ɛnyā lɛ ɔ ta alɔ eyī peee, ɔdā nōó wɛ ku ɔcɛ ɔhá kóō leyi kwu ɔdā nɛ ɔcɛ má ku ó wɛ ɔdā ō cɛgbá lɛ ɔ a.

² Jé 1 Utímōti 6:20. Upɔlu nōo wɛ ɔcocɛhɔ a ta Utimoti ɛlá kwu ɛhi o cɛgbá fiyɛ duu nɛ ó miyɛ a. Ɛhi ɔɔma kē wɛ ɔkwɛyi lɛyikwu ɔdā nɛ Ɔwɔico bi ɔtu ō ya lɛ alɛɛcɛ a. Ujehofa klla je ɛnɛɛnɛ ɛga lɛ Utimoti kóō “bī olɛhɔ̄ ā tɔ́ɔna” mla ō “yúklɔ́ kú ɔ̄cɛ nōo gē bī ɔ̄kōolɔhi ā tɔ́ɔna.” (2 Utím. 4:2, 5) Upɔlu da Utimoti kóō leyi kwu ɔdā néē kpo tu uwɔ abɔ a. Bɛɛka Utimoti a, é kpo aɔdā o cɛgbá lɛ alɔ ku alɔ leyi kwu uwa duu. Aɔdi nē wɛ a? Ɔdi kē ya ɛɛ nɛ alɔ cika ō leyi kwu aɔdā agbenu nɛ Ujehofa kpo lɛ alɔ a?

3-4. Aɔdi ya nɛ ɛlā ɔkwɛyi nōo yɔ ipu Ubáyíbu a cɛgbá nɛhi a?

³ Ujehofa lɛ ɛhi ku ɛlā ɔkwɛyi ku nu, nōo cɛgbá fiyɛ duu nōo yɔ ipu Ubáyíbu a je lɛ alɔ ɛ. Aɛlā ɔkwɛyi nyā cɛgbá, ohigbu kōó gē nwu alɔ ɛgɛ nɛ alɔ géē lɛ ɛma olɔhi mla Ujehofa, mla ɔdā nōo gē cɛ lɛ alɔ lɛ eyee ɔkwɛyi a. Eko duuma nɛ alɔ kpɔtuce ɛlā ɔkwɛyi ɔɔma ācɛ i gáā bi ɛlā ɛkɛmgbɛ le plla alɔ gla ŋ, alɔ klla géē bēē lā oyeeyi okpaakpa.—1 Ukɔ́r. 6:9-11.

⁴ Ɔdā ɔhá nōo ya ɛɛ nɛ ɛlā ɔkwɛyi nōo yɔ ipu Ubáyíbu a cɛgbá nɛhi a wɛ ka Ujehofa lɛ ɛlā ɔkwɛyi a ta eyī peee lɛ ācɛ nōo tu iyi uwa waajɛ “néē fu kéē lɛ oyēeyī opiyóó ā.”  (Ācot. 13:48) Ācɛ nōo ta iyi uwa waajɛ a, kpɔtuce ku ɔcocɛhɔ néē cika ō lɛ ɔtu ce ɔ nōo jeeyi a, gē nwu alɔ ɛlā ɔkwɛyi lɛyi kwu Ubáyíbu icɛ a. (Umát. 11:25; 24:45) Ɔdaŋ ku ɔcɛ i je otabɔ lɛ alɔ ŋ, alɔ i gáā jɛyi ɛlā ɔkwɛyi nōo yɔ ipu Ubáyíbu a abɔ yɔ alɔ gla ŋ. Ɔdā nōo cɛgbá fiyɛ duu a kē wɛ ō lɛyi ku nu jé.—Aíit. 3:13, 15.

5. Ɛnɛɛnɛ ɛga ɔhá nyá nɛ Ujehofa je lɛ alɔ a?

⁵ Ujehofa je ɛnɛɛnɛ ɛga lɛ alɔ ō nwu ācɛ ɔhá ɛlā ɔkwɛyi nōo yɔ ipu Ubáyíbu mla ō ka ɔdā nɛ ó bi ɔtu ō ya lɛ alɛɛcɛ a. (Umát. 24:14) Uklɔ ku ɔna ō ta a cɛgbá nɛɛnɛhi, ohigbu kóō gē tu ācɛ abɔ kéē gáā wɛ ipu apɔlɛ ku Ujehofa mla ō je eyiyoce ku oyeeyi opiyoo lɛ uwa ɛcɔbu. (1 Utím. 4:16) Ɔdaŋ ku a yɔ i tɔɔna eko doodu amāŋ eko kpii, ɛnyā mafu ku a yɔ i tabɔ ipu uklɔ nōo cɛgbá fiyɛ nōo yɔ i ya balɔbanya. (1 Utím. 2:3, 4) Ó wɛ ɔdā ojilima nɛhi ku alɔ yɔ i yuklɔ tɔha mla Ɔwɔico!—1 Ukɔ́r. 3:9.

6. Ɔdi ya da ācɛ ōhī nōo ta ō leyi kwɛɛcɛ a?

⁶ Ācɛ O Yɛce Ukraist ōhī ɛpleeko ku Utimoti a, i miyɛ ɛga néē je lɛ uwa kéē wɛ ācɛ o yuklɔ tɔha mla Ɔwɔico a ŋ. Ohigbu ku Udimasi yihɔtu ku ɛcɛ a, ó habɔ ɛnɛɛnɛ ɛga nɛ ó lɛ ō yuklɔ tɔha mla Upɔlu a ta. (2 Utím. 4:10) Ó lɛbɛɛka Ufigelɔsi mla Uhamojinesi habɔ uklɔ ku ɔna ō ta a ta, ohigbu kéē yɔ i yuufi kéē géē miya aa owe ɛgɛ néē ya Upɔlu a. (2 Utím. 1:15) Uhimɛnayɔsi, Alesaŋda, mɛmla Ufiletusi kwu igbihi u ce kwu ō gba Ujehofa ɛ̄gbā, anuɔ é nyɛɛ ŋma ɛlā ɔkwɛyi a. (1 Utím. 1:19, 20; 2 Utím. 2:16-18) Ɛjɛɛji ācɛ nōo ba nyā tɛtɛ yihɔtu ku Ujehofa, amāŋ é má ɔdā nɛ Ujehofa je lɛ uwa a ku ɔdā o cɛgbá gɛ ŋ.

7. Ula nyá nɛ Ebilii gē bi le kwu alɔ, o ya ɛɛ ku alɔ ya ɔdā nōó dɔka a?

⁷ Ɛgɛnyá nɛ Ebilii lɔfu ya, ku alɔ habɔ aɔdā agbenu nɛ Ujehofa kpo tu alɔ abɔ a? Alɔ má ula ōhī nɛ Ebilii gē bi le yuklɔ a. Ó gē bi aɔdā ɛyɛɛyɛyi le yuklɔ, bɛɛka ɔdā ō bi le jɔɔnyɛ iyi alɔ, TV, ɛga o kɔka ipu intanɛti mla aɔkpá ɛyɛɛyɛyi néē ta a, o ya ɛɛ ku ihɔtu nɛ alɔ lɛ lɛ Ujehofa a kóō gbɔɔ ō waajɛ. O ya ku alɔ hii tɔɔna gɛ ŋ ma a, ó gē bi oyaŋmo mla ɛlā obɔbi nɛ ācɛ gē ka a le tu alɔ ufi. Ó klla gē ya ku alɔ jahɔ tu ɔdā iciici néē gē hi ka “ɔdooje” ku ācɛ nōo lɛ igbihi ce kwu ɛ̄gbā ō gba ku Ujehofa a, o ya ɛɛ ku alɔ habɔ ɛlā ɔkwɛyi a ta.—1 Utím. 6:20, 21.

8. Ɔdi nɛ a nwu ŋma ocabɔ mafu ku ɔyinɛ alɔ nɔnyilɔ Udaniyɛlu a?

⁸ Ɔdāŋ ku alɔ i lɛ ɛlá kwu ɔ ŋ, alɔ géē gbɔɔ ō nyɛɛ ŋma ipu ɔkwɛyi a ɛmɛɛma.  Leyi yɛ ocabɔ mafu ku ɔdā nōo ya da Udaniyɛlu, * nōo yihɔtu ō ta uvideo game nɛɛnɛhi a. Ó kahinii: “N gbɔɔ ō ta uvideo game ŋma eko nɛ um wɛ ihayi igwo a. Eko aflɛyi a, n gē ta ugame olɔhi. Amáŋ ɛmɛɛma n gbɔɔ ō ta ugame néē gē nuunu anu mla ɛ̄nɛ̄ é gē yiimabɔ anu.” Igbihajɛ, ɛ̄cī doodu ó gē bi awa igwɛɛhɔ le ta uvideo game. Udaniyɛlu kahinii: “N jé ka eko nɛ um gē bi le ta ugame a mla ugame nɛ um gē ta a, yɔ i je ɛma ku um mla Ujehofa kɔ ɛmɛɛma. Amáŋ, n ka um cika ō ya ɔdā nɛ Ubáyíbu ka ami ɔ ya a ŋ.” Ɔdaŋ ku alɔ i lɛ ɛlá kwu ɔ ŋ, ɔdā nɛ alɔ gē bi le jɔɔnyɛ iyi alɔ a gē ya ku alɔ nyɛɛ ŋma ɔkwɛyi a. Ɔdaŋ ku ɛnyā le ya aɔdā agbenu nɛ Ujehofa je lɛ alɔ a géē hɛ alɔ abɔ.

9. Ɛgɛ nɛ ɔkpá ku 1 Utímōti 1:18, 19 ka a, ɔnyɛ nɛ Upɔlu lɛ Utimoti gbla ɔ a?

⁹ Jé 1 Utímōti 1:18, 19. Upɔlu lɛ Utimoti gbla icɔɔja klla da ɔ kóō nyɔ gā “nuunu kú Óndú ā lɔhi.” Unu o nu nyā i wɛ aku eyī caa ŋ, amáŋ aku alelekwu nɛ. Ɔwɛ ɛgɛnyá nɛ Ācɛ O Yɛce Ukraist lɛbɛɛka icɔɔja nōo yɔ i nuunu ɔgbɛfu a? Ɛdɔ uce nyá nɛ alɔ cɛgbá ō lɛ, abɔ alɔ wɛ icɔɔja ku Ukraist a? Alɔ kɛla lɛyikwu aɔdā ɛhɔ nɛ alɔ lɔfu nwu ŋma aciije nɛ Upɔlu ta a. Ɛnyā géē ta alɔ abɔ lɛ abɔ bi ɔkwɛyi a kli.

10. Ɔdi wɛ ufi ku Ɔwɔico a, ɔdi ya ɛɛ nɛ alɔ kē cɛgbá nu a?

¹⁰ Yuufi ku Ɔwɔico. Icɔɔja olɔhi gē hayi kpaakpa. Ó gē nuunu nɛhi o ya ɛɛ kóō gba ɔcɛ amāŋ odee nɛ ó yihɔtu nu a. Upɔlu ta Utimoti ɔtu kwu ɔtu kóō yuufi Ɔwɔico, ɛnyā wɛ ka ó hayi kpaakpa lɛ Ɔwɔico. (1 Utím. 4:7) Abɔɔ ihɔtu nɛ alɔ lɛ lɛ Ɔwɔico a gē nwune tōōtɔ̄ɔ̄ a, ó géē ya ku alɔ ya ɔdā nɛ ó dɔka a. Ó klla gēé ya ku alɔ lɛ abɔ bi ɔkwɛyi a kli.—1 Utím. 4:8-10; 6:6.

11. Ɔdiya nɛ alɔ cɛgbá ō kwu iyi alɔ bi a?

¹¹ Nwu iyi uwɔ ɛgɛ nɛ a géē ya ɔdā o kpaakpa a. Icɔɔja cika ō yuklɔ lɔfu lɔfu ō ya ɛɛ kóō le tutu ō kpɛfu eko doodu. Utimoti hayi lɔfu ipu ɛ̄gbā ō gba ku Ɔwɔico ohigbu ka ó yɛce ukɔ́ nɛ Upɔlu tu ɔ a. Ukɔ́ a wɛ ka ó le kwu ŋma unwu obɔbi, cɛɛ kóō nwu ō ya auce olɔhi, klla piyatɔha mla Ācɛ O Yɛce Ukraist ɔmpa nu a. (2 Utím. 2:22) Ɔɔma cɛgbá ō kwu iyi ɔcɛ bi. Alɔ cɛgbá ō kwu iyi alɔ bi, o ya ɛɛ ku alɔ lɛ unwu ku ɔkpiye ku alɔ yale. (Uróm 7:21-25) O ka tu ɔ, alɔ cɛgbá ō kwu iyi alɔ bi ō ya ɛɛ ku alɔ ceyitikwu kwu uce otɛtɛ nɛ alɔ lɛ a kpo bonu cɛɛ ku alɔ kwu piya ɔcɛ ɛyipɛ. (Āfi. 4:22, 24) Eko nɛ ɛ̄jɛ̄ kē le jɛ alɔ ŋma uklɔ, alɔ gē ceyitikwu lɔfu lɔfu ō ya ɛɛ ku alɔ gā ōjila ku ujɔ.—Uhíb. 10:24, 25.

12. Ɛgɛnyá nɛ alɔ gáā ya lɔhi fiyɛ ipu ō bi Ubáyíbu le nwu ācɛ ɛlā a?

¹² Icɔɔja cɛgbá ō nwu ɛgɛ nɛ ó géē bi aɔdā ō kpɛfu ku nu le kpɛfu. Ɔdaŋ kóō dɔka ō bi uwa le kpɛfu lɔɔlɔhi, ó gē yɔ i bi le ya otutu eko doodu. Ɛgɔɔma duu, alɔ cɛgbá ō nwu ɛgɛ nɛ alɔ géē bi Ubáyíbu le yuklɔ lɔɔlɔhi a. (2 Utím. 2:15) Alɔ gē nwu ɔwɛ ōhī ipu ōjila ku ujɔ. Amáŋ, gbɔbu ɛɛ ku alɔ ta ācɛ ɔhá abɔ kéē kpɔtuce ka ɛlā ɔkwɛyi nōo yɔ ipu Ubáyíbu a géē ta uwa abɔ gla a, alɔ cɛgbá oklɔcɛ ku Ubáyíbu abɔyi alɔ eko doodu. Alɔ cɛgbá ō bi Ubáyíbu nōo wɛ ɛlā ku Ɔwɔico le ta iyi alɔ abɔ, o ya ɛɛ ka ɔtu okpoce ku alɔ kóō lɔfu iyē. Ɛnyā wɛ ku alɔ i gáā bēē jé Ubáyíbu ofoofunu ŋ. Amáŋ alɔ géē gbɛla tu ɔdā nɛ alɔ jé a lipu lipu klla dɔka aɔkpá ku alɔ nōo kɛla lɛyikwu ɔ a. Ɛnyā géē ta alɔ abɔ jɛyi ku Ubáyíbu a lɔɔlɔhi klla bi ɔ  le yuklɔ. (1 Utím. 4:13-15) Oŋma lɛ ō ya ɛgɛnyā alɔ géē bi Ubáyíbu le nwu ācɛ ɔhá ɛlā lɔɔlɔhi. Ɛnyā wɛ ka alɔ i gáā jé ɔgba ku Ubáyíbu lɛ uwa anca ŋ. Alɔ dɔka ō tu ācɛ nōo gē jahɔ tu alɔ a abɔ kéē jɛyi ɔgba nɛ alɔ jé lɛ uwa mla ɛgɛ néē géē bi ɔ le yuklɔ ipu oyeeyi ku uwa. Ɔdaŋ ku alɔ gē klɔcɛ ku Ubáyíbu abɔyi alɔ eko doodu, alɔ géē bi Ubáyíbu le nwu ācɛ ɔhá ɛlā lɔɔlɔhi.—2 Utím. 3:16, 17.

13. Ɔdi nɛ Uhíbru 5:14 ka alɔ cika ō ya, o ya ɛɛ ku alɔ nwu ɛgɛ nɛ alɔ géē jé ɔdā olɔhi mɛmla ɔdobɔbi a?

¹³ Bēē gbɛla lɔɔlɔhi. Icɔɔja cika ō bi ɛlá ō gbo ku nu le jé lɛyikwu unwalu nōo lɔfu wa gla, cɛɛ ó le kwu ŋma anu. Alɔ a duu cika ō jé aɔdā nōo lɔfu bi unwalu gē lɛ alɔ gla, cɛɛ ku alɔ le kwu ŋma anu. (Aíit. 22:3; jé Ācɛ Uhíbru 5:14.) Ocabɔ mafu, alɔ cɛgbá ō bi ijeeyi le je aɔdā nɛ alɔ gē bi le jɔɔnyɛ iyi alɔ a. Igbalɛwa, ōmiya ipu TV mla aufilm gē mafu aɔdā nōo lɛ ō ya mla aja ō gbo. Uce ō ya ɛgɔɔma gē cɛ lɛ Ɔwɔico cɔnu, ó klla gē bi unwalu wa. Ohigbu ɛnyā, alɔ cika ō le kwu ŋma ɛgiyi aɔdā ō bi hija duuma nōo lɔfu ya ku ihɔtu nɛ alɔ lɛ lɛ Ɔwɔico a kóō mɛ a.—Āfi. 5:5, 6.

14. Ɛgɛnyá nɛ ɛlá ō gbo lɔɔlɔhi ta Udaniyɛlu abɔ a?

¹⁴ Udaniyɛlu, nɛ alɔ kɛla lɛyikwu ɔ gbɔbu a, gbɔɔ ō gbɛla lɛyikwu augame nōó gē ta nōo lɛ ō ya mla imabɔ mla unu ō nu a kéē wɛ unwalu. O lɛ ɛlā nyā jila má ipu Watchtower Library, o ya kóō má ɛlā nōo géē ta ɔ abɔ lɛ unwalu ku nu nyā yale. Ɛgɛnyá nɛ ɔɔma lɛ abɔ kwu ɔ iyē a? Ó gáā lɛ abɔ ci ō ta augame obɔbi a. Ó klla kwu abɔ i ci ō piyatɔha mla ācɛ nɛ ó gē ta ugame mla uwa gbɔbu a. Udaniyɛlu kahinii: “Ikɔkɔ nɛ um géē yɔ i ta ugame a, n gbɔɔ ō gɛɛcɛ gā hija klla piyatɔha mla ayinɛ ipu ujɔ.” Babanya, Udaniyɛlu wɛ ɔcɛ ō gbɔbu ɔna ō ta mla ɔnyakwɔcɛ ku ujɔ.

15. Ɔdiya nɛ aɔka ɛkɛmgbɛ bɔbi nɛhi a?

¹⁵ Bɛɛka Utimoti a, alɔ cika ō gbɛla tu unwalu nōo lɔfu bɛɛcɛ ŋma ɛlā ɛkɛmgbɛ nɛ ācɛ nōo lɛ igbihi ce kwu ɛ̄gbā ō gba ku Ujehofa gē ka a. (1 Utím. 4:1, 7; 2 Utím. 2:16) Ocabɔ mafu, é lɔfu kɛla ɛkɛmgbɛ lɛyikwu ayinɛ alɔ gla amāŋ ya ku alɔ hii kpɔtuce ɔwa ku Ujehofa gɛ ŋ. Ɛlā ɛkɛmgbɛ ɛgɛnyā lɔfu ya ku ɔtu okpoce ku alɔ kóō hii lɔfu gɛ ŋ. Alɔ i cika ō kpɔtuce ɛdɔ ɛlā ɛgɔɔma ŋ. Ɔdiya? Ohigbu ka ācɛ nōo gē ya ku aɔka ɛgɛnyā kóō nyila a i “gē  gbɛlá olɔhi glá gɛ ŋ́. É lɛ ɛlā ɔkwɛyi dóódu ipú kú uwā gɛ ŋ́.” Ɔdā néē dɔka foofunu a wɛ ō “yɔ̄ gē táafu mla ācɛ ɔhá mɛ́mla o yɔ̄ ge gbaapɔ̄.” (1 Utím. 6:4, 5) É dɔka ku alɔ kpɔtuce ɛkɛmgbɛ ku uwa cɛɛ ku alɔ hii kpɔtuce ayinɛ alɔ gɛ ŋ.

16. Ɔdi lɔfu gbaji tu alɔ nɛ alɔ cika ō le kwu ŋma ɛgiyi nu piii a?

¹⁶ Le kwu ŋma ɛgiyi aɔdā nōo géē gbaji ta uwɔ. Bɛɛka “icɔɔja olɔhi ku Ohɔnyɛta Ujisɔsi a,” Utimoti cɛgbá ō lɛ ɔtu kwu uklɔ ku ɔna ō ta a fiyɛ aɔdā agbenu mla aɔdā ɔhá nɛ ó miya ó ya ipu oyeeyi ku nu a. (2 Utím. 2:3, 4) Bɛɛka Utimoti a, alɔ cɛ ku aɔdā agbenu kóō hii lɛ alɔ gbaji ŋ. Unwu ku ɔdā “agbénú kú ɛcɛ nyā” lɔfu ya ku ihɔtu nɛ alɔ lɛ lɛ Ujehofa a kóō hii lɔfu gɛ ŋ. Ó klla géē ya ku Ubáyíbu mla uklɔ ku ɔna ō ta kóō hii jɛ alɔ eyī gɛ ŋ duu. (Umát. 13:22) Ó cɛgbá ku alɔ lɛ oyeeyi ku alɔ ya tɔɔtɛ, cɛɛ ku alɔ bi eko mla ɔfu ku alɔ le mafu ka ‘ɔtū kú alɔ kwu ō jɛga lɛ Ɔwɔicō kóō le ɔcɛ́ lé oyēeyī kú alɔ.’—Umát. 6:22-25, 33.

17-18. Ɔdi nɛ alɔ géē ya, o ya ɛɛ ku ɛma ku alɔ mla Ujehofa kóō lɔfu a?

¹⁷ Le tutu ku a ya odee fiyaa. Icɔɔja cika ō lɛ ōmiya ya taajɛ lɛyikwu ɛgɛ nɛ ó géē gbo iyi nu tu a. O ya ɛɛ ku alɔ leyi kwu aɔdā nɛ Ujehofa kpo lɛ alɔ a lɔɔlɔhi, alɔ cɛgbá ō ya odee fiyaa eko duuma nɛ alɔ lɛ unwalu má. Ɔdi gáā tu alɔ abɔ ya lɛ a? Alɔ cɛgbá ō lɛ ō miya ya taajɛ, ku ɔdā nɛ alɔ géē ya eko duuma nɛ alɔ lɛ unwalu má a.

¹⁸ Ocabɔ mafu, eko duuma nɛ a le yɛ tu ɛga nɛ ācɛ gē jila tɔha, ācɛ nōo wa ōjila ɔɔma a gē dɔka ɔwɛ nōo yɔ kwu uwa ajaajɛ a. Ɔdiya a? O ya ɛɛ kóō tɔɔtɛ lɛ uwa kéē nyɛɛ ohigbu eko nɛ ɔdā acigili gbɔɔ ō ya. Ɛgɔɔma duu, alɔ cɛgbá ō lɛ ōmiya ya taajɛ ku ɔdā nɛ alɔ géē ya eko duuma nɛ alɔ lɛ ifoto ku ācɛ o tohɛɛwa, ifoto ku nu ō nu, amāŋ eko duuma nɛ ɔcɛ nōo lɛ igbihi ce kwu ɛ̄gbā ō gba ku Ujehofa gbɔɔ ō kɛla lɛyikwu alɔ ipu TV. Ɔdāŋ ku alɔ le otutu ya lɛyikwu ɔdā nɛ alɔ lɔfu ya, ó géē tɔɔtɛ lɛ alɔ ō ya ku ɛma ku alɔ mla Ujehofa kóō lɔfu klla hayi kpaakpa ipu eyī ku Ujehofa.—Aíjē 101:3; 1 Utím. 4:12.

19. Ɔdāŋ ku alɔ leyi kwu aɔdā nɛ Ujehofa kpo lɛ alɔ a, aɔhā nyá nɛ alɔ gáā lɛ ɛcɔbu a?

¹⁹ Alɔ cika ō leyi kwu ɛjɛɛji aɔdā ō cɛgbá nɛ Ujehofa kpo lɛ alɔ a. Aodee bɛɛka ɛlā ɔkwɛyi nōo yɔ ipu Ubáyíbu, ō nyɔ gáā nwu ācɛ ɔhá lɛyikwu ɔ. Ɔdāŋ ku alɔ ya lɛ a, alɔ géē lɛ ɔtu o yeŋee, oyeeyi ɔkwɛyi a mla eeye nōo gē wa ŋma lɛ ō ta ācɛ ɔhá abɔ gáā jé Ujehofa a. Mla otabɔ ku Ujehofa, alɔ géē leyi kwu aɔdā nɛ ó kpo lɛ alɔ a.—1 Utím. 6:12, 19.