IKPƐYI ƐLĀ Ō KLƆCƐ ƆMƐ 29
Je Otabɔ Lɛ Ujisɔsi Nōo Wɛ Otrɛyi Ku Alɔ A
“É kwú ɔfú dóódu nōo yɔ̄ ɔkpáncō mɛ́mla ɛcɛ ú kpó gā um ɛɛ́.”—UMÁT. 28:18.
IJÉ ƆMƐ 13 Christ, Our Model
ƆDĀ NƐ ALƆ GÁĀ NWU A *
1. Ɔdi wɛ ɔtu ku Ujehofa ɛpleeko ku alɔ nyā a?
ƐPLEEKO ku alɔ nyā, ó wɛ ɔtu ku Ɔwɔico ku alɔ tɔɔna ku ɔkoolɔhi lɛyikwu Ajɔɔcɛ a gā ɛga doodu ipu ɛcɛ a. (Umák. 13:10; 1 Utím. 2:3, 4) Uklɔ a wɛ uklɔ ku Ujehofa, ó kē cɛgbá nɛhi, anu ya ɛɛ nɛ ó fu Ɔyinɔnyilɔ ku nu nɛ ó yihɔtu nu nɛhi a kóō bēē leyi kwu ɔ a. Alɔ jé kpɔcii ka abɔ Ujisɔsi yɔ i bi alɔ jé ɔwɛ ipu uklɔ ku ɔna ō ta a, ku uklɔ a géē ŋmɛyi ɛgɛ nɛ Ujehofa dɔka a, gbɔbu ɛɛ ku eko amoomɛ a kóō wa.—Umát. 24:14.
2. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?
2 Ipu ikpɛyi ɛlā nyā, alɔ géē má ɛgɛ nɛ Ujisɔsi gē bi “ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī” a, le nwu alɔ ɛlā ŋma Ubáyíbu mla ō lɛ ācɛ nōo gē yɛce ɔ a tutu, abɔ é gē yuklɔ ku ɔna ō ta babanya fiyɛ otɛtɛ a. (Umát. 24:45) Alɔ klla géē kɛla lɛyikwu aɔdā nɛ ɔnyɔɔnyɛ ku alɔ lɔfu ya, ō je otabɔ lɛ Ujisɔsi mɛmla ɔcocɛhɔ néē cika ō lɛ ɔtuce ɔ a.
UJISƆSI GĒ BI ALƆ JÉ ƆWƐ IPU UKLƆ KU ƆNA Ō TA A
3. Ɔfu nyá néē je lɛ Ujisɔsi a?
3 Ujisɔsi gē má ɔwɛ fu lɛ alɔ ipu uklɔ ku ɔna ō ta a. Ɛgɛnyá nɛ alɔ bi le jé ɛnyā a? Eko kpii gbɔbu ɛɛ ku Ujisɔsi kóō cigbihi gā ɔkpanco a, ó kɛla mla ayikpo ku nu ōhī ɛyi ɛfú éyi nōo yɔ Ugalili a. Ó da uwa kahinii: “É kwú ɔfú dóódu nōo yɔ̄ ɔkpáncō mɛ́mla ɛcɛ ú kpó gā um ɛɛ́.” Leyi bi ɛlā nɛ ó ka gboce ɔɔma mɛɛnɛ, ó kahinii: “Aá nyɔ̄ gā ɛgiyí ācɛ kú éwo dóódu, kú aá yá kéē le pīya ayíkpó kú um.” (Umát. 28:18, 19) Ɛnyā mafu ka éyi ku aɔdā nēé je ɔfu lɛ Ujisɔsi kóō ya a, wɛ ō leyi kwu uklɔ ku ɔna ō ta a nɛ.
4. Ɛgɛnyá nɛ alɔ bi le jé ku Ujisɔsi yɔ i leyi kwu uklɔ ku ɔna ō ta a jaa kwu icɛ a?
4 Ujisɔsi ka é géē yuklɔ ku ɔna ō ta klla lɛ ācɛ piya ayikpo ku nu “ga ɛgiyí ācɛ kú éwo dóódu,” ka ó klla géē yɔ mla ayikpo ku nu “eko dóódu jāā gbéeko nɛ̄ ɛcɛ í mɛ.” (Umát. 28:20) Ɛlā ɔɔma mafu ka Ujisɔsi géē yɔ i leyi kwu uklɔ ku ɔna ō ta a jaa wa eko ku alɔ nyā.
5. Ɛgɛnyá nɛ alɔ gē tabɔ ya ku akacɛ nōo yɔ ipu ɔkpá ku Aíjē Kú Ɛ̄gbā 110:3 a kóō le ya jila a?
5 Ujisɔsi i yuufi ku á jé ŋ, ācɛ alɛwa i gáā yɔ nōo géē jé ō tɔɔna ɛpleeko ku amoomɛ a ŋ. Ó jé ku akacɛ nōo yɔ ipu ɔkpá ku Aíjē Kú Ɛ̄gbā a géē ya jila, nōo kahinii: “Ɛ̄cī dúúmā nāa gáā kpɛ́fú tá aólɛlā kú uwɔ, ācɛ ɔlɛ́ uwɔ géē cɛ̄ í fu iyī uwā tá uwɔ ɔkwu kéē kpɛ́fú.” (Aíjē 110:3) Ɔdaŋ ku a gē tɔɔna ku ɔkoolɔhi a, a yɔ i je otabɔ lɛ Ujisɔsi mla ɔcocɛhɔ néē cika ō lɛ ɔtuce ɔ a, a klla yɔ i tabɔ ya ku akacɛ nōo yɔ ipu Ubáyíbu a kóō le ya jila. Uklɔ a yɔ i gɔbu o n, amāŋ alɔ yɔ i má unwalu ɛyɛɛyɛyi.
6. Ɔdi wɛ unwalu éyi nɛ alɔ gē má abɔ alɔ gē tɔɔna icɛ a?
6 Unwalu éyi nɛ alɔ gē má abɔ alɔ gē tɔɔna a wɛ o ya ŋmo ŋma ɛgiyi ācɛ. Ācɛ nōo cigbihi ŋma ɛ̄gbā ō gba ku Ujehofa, aotrɛyi ku ɛ̄gbā ō gba ɛkɛmgbɛ, mla ācɛ imeli lɛ ɛkɛmgbɛ ka lɛ ācɛ alɛwa lɛyikwu uklɔ ku alɔ ɛ. Ɔdaŋ ku aɔmaapu alɔ, ācɛ nɛ alɔ jé, mla ācɛ nɛ alɔ gē yuklɔ mla uwa a kpɔtuce aɛlā ɛkɛmgbɛ nyā, é lɔfu gbɔɔ ō ceyitikwu kēé ya ku alɔ hii gba Ujehofa ɛ̄gbā amāŋ nyɔ gáā tɔɔna gɛ ŋ. Ipu éwo ōhī, aolɛla ku alɔ gē ce ufi tu ayinɛ alɔ iyē, gē bɛyikwu uwa klla gē kpo uwa tu inu agba. Ó gē hɛ alɔ idaago ku ācɛ gē ya alɔ lɛ a ŋ. Ujisɔsi kahinii: “Odúúdú ācɛ í wɔ́tū aá ohígbū iyē um.” (Umát. 24:9) Ɔdā nōo ya ɛɛ nɛ alɔ yɔ i má ɛdɔ iwɔtu ɛgɛnyā ŋma ɛgiyi ācɛ a, cabɔ mafu ka Ujehofa yɔ i gweeye mla alɔ. (Umát. 5:11, 12) Ebilii gē ya nɛ ācɛ gē ya alɔ ŋmo a. Amáŋ Ujisɔsi kē lɔfu nɛɛnɛhi fiyɛ Ebilii! Mla otabɔ ku Ujisɔsi, alɔ yɔ i tɔɔna lɛ ācɛ ku éwo doodu. Alɔ kɛla lɛyikwu ɔdā nōo ya ɛɛ nɛ ɛnyā wɛ ɔkwɛyi a.
7. Ɔdi nɛ a yɔ i má nōo cabɔ mafu gā uwɔ, ka akacɛ nōo yɔ ipu ɔkpá ku Ɔdā Nēé Mafú Lɛ Ujɔ́ni 14:6, 7 a yɔ i ya jila a?
7 Unwalu ɔhá nɛ alɔ gē má eko nɛ alɔ gē tɔɔna a wɛ ka ācɛ gē ka uce ɛyɛɛyɛyi. Ipu ɛbɛ nɛ Ujisɔsi mafu lɛ Ujɔni a, Ujisɔsi da ɔ ka ɛpleeko ku alɔ nyā, unwalu ɔɔma i gáā ci alɔ ŋma ō tɔɔna ŋ. (Jé Ɔdā Nēé Mafú Lɛ Ujɔ́ni 14:6, 7.) Alɔ gē tɔɔna lɛ ācɛ alɛwa ɛgɛ nɛ alɔ ya gla, o ya ɛɛ kéē lɛ ɛga ō po olɛhɔ lɛyikwu Ajɔɔcɛ a. Ɛgɛnyá nɛ alɔ gē bi le ya ɛnyā a? Icɛ, ācɛ ipu oduudu ɛcɛ lɔfu jé aɔkpá ku alɔ ipu intanɛt ipu jw.org, ohigbu ku alɔ lɛ aɔkpá nyā cɔwɔ gā ipu uce nōo fiyɛ ula ɛpa ce ofu igwo (1,000) ɛ! Ígwu Nōo Gē Leyi Kwu Ɔwa Ku Alɔ a cɛ kéē cɔwɔ ɔkpá ku Jɔɔnyɛ Oyeeyi Nōó Gáā Mɛ Gboogboo Ŋ! ma ipu uce nōo fiyɛ ula ce ofu igwo ɛhɔ (700) a! Ɔkpá nyā kē wɛ ɔkpá kpɔcii nɛ alɔ gē bi le ya oklɔcɛ mla ācɛ a. Alɔ kóō gē ya auvidio ku aodahɔ, o ya ɛɛ kéē lɔfu nwu ɛlā lɛyikwu Ubáyíbu gla. Alɔ klla gē ya ɔkpá ku alɔ ɛdɔ nɛ ācɛ nōó gē mɛɛbɛ ŋ ma lɔfu jé néē gē hi ka u braille a. Alɔ yɔ i má ɛgɛ nɛ akacɛ ku Ubáyíbu yɔ i ya jila lɛ a. Ācɛ ŋma “aéwo [mla uce ɛyɛɛyɛyi]” yɔ i nwu ɛgɛ néē gē ka “ucē nōo le yēŋēē,” nōo kē wɛ ɔkwɛyi nōo yɔ ipu Ubáyíbu a. (Usak. 8:23; Usɛf. 3:9) Ɛjɛɛji ɛnyā tɔɔtɛ ohigbu ka Ujisɔsi Ukraist wɛ ɔcɛ nōo yɔ i leyi kwu ɛjɛɛji uklɔ nyā a.
8. Ohigbu ɔna nɛ alɔ gē ta a ɔdi ya ɛ ma?
8 Icɛ, ācɛ nōo fiyɛ umiliyɔn ahata (8,000,000) ŋma ajɛ ofu igwɛɛpa (240) a wɛ ipu ɔwa ku Ujehofa. Ihayi doodu ācɛ alɛwa kē i ya ubatisim kpɔ! Amáŋ ɔdā nōo cɛgbá fiyɛ aluka ku ācɛ a, wɛ ɛnɛɛnɛ uce ō ya nɛ ācɛ nōo ba nyā ceyitikwu kéē lɛ a nɛ. Ubáyíbu hi ɔ kóō je “pīya ɔ̄cɛ ɛ̄yīpɛ̄” a. (Ukól. 3:8-10) Gbɔbu a, ācɛ nōo yɔ nyā gē cikpo ɔnyā amāŋ gbo aja, é wɛ ācɛ ō nuunu, ācɛ ō wɔtu ācɛ ŋma éwo ɔhá, é klla wɛ ācɛ nōó gē bi ɛlā lɛyikwu éwo ku uwa le hija fluflu ŋ. Amáŋ babanya é kwu piyabɔ ɛ, é lɛ abɔ ci aɔdā nōo ba abɔɔ a kpɛmm. Akacɛ ku Ubáyíbu nōo yɔ ipu ɔkpá ku Ayisáya 2:4 a yɔ i ya jila. É gē “kllɔcɛ́ ɛfú ō kpó ɛ́ɛ́ gɛ ŋ́.” Abɔ alɔ gē ceyitikwu ku alɔ je piya ɔcɛ ɛyipɛ ipu uce ō ya ku alɔ a, ó gē tabɔ pi ācɛ wa ipu ɔwa ku Ujehofa. Ó klla gē mafu ku alɔ yɔ i yɛce Ujisɔsi nōo gē leyi kwu alɔ, abɔ ó yɔ i bi alɔ jé ɔwɛ a. (Ujɔ́n. 13:35; 1 Upít. 2:12) Ɔdiya ɛɛ nɛ alɔ gē lɔfu ya ɛnyā a? Ohigbu ka Ujisɔsi gē je otabɔ nɛ alɔ cɛgbá a lɛ alɔ.
UJISƆSI LƐ ƆCOCƐHƆ FU
9. Oŋma ɛlā nōo yɔ ipu ɔkpá ku Umátiyu 24:45-47 a, ɔdi nɛ Ujisɔsi ka kóō géē ya ɛpleeko amoomɛ a?
9 Jé Umátiyu 24:45-47. Ujisɔsi ka ku ɛpleeko amoomɛ a, ó géē fu “ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī” nōo géē yɔ i nwu alɔ ɛlā ŋma Ubáyíbu. Ohigbu ɛnyā, alɔ lɔfu leyice ku ɔcocɛhɔ ɔɔma géē yɔ i yuklɔ lɔfu lɔfu ɛpleeko ku alɔ nyā. Ɛgɔɔma nɛ ó kē lɛ ɔkwɔɔkwɛyi a. Ujisɔsi gē bi ígwu nɛ̄ŋcɛ́ ku acɛnyilɔ néē lɛ anɔ tu uwa ɛyi a le ta ācɛ ɔlɛ Ujehofa mla acɛ néē gē klɔcɛ mla uwa a abɔ, kéē lɔfu jɛyi ɛlā nōo yɔ ipu Ubáyíbu a lɔɔlɔhi nōo lɛbɛɛka ō “je ɔdōlé lɛ uwá eko ā.” Acɛnyilɔ nyā i gē má iyi uwa ka é wɛ aɔkpani nōo cika ō lɛ ācɛ ɔhá kwu tu abɔ, cɛɛ kéē da uwa ɔdā néē cika ō miyɛ cɛ a ŋ. (2 Ukɔ́r. 1:24) Ikɔkɔ ɔɔma a, é jé ka Ujisɔsi Ukraist wɛ “otrɛ̄yí” ku ācɛ ɔlɛ nu a.—Ayis. 55:4.
10. Ɔkpá nyá ŋma ipu aɔkpá nōo yɔ ipu ifoto a lɛ abɔ kwu uwɔ ɔtu ku a gbɔɔ ō gba Ujehofa ɛ̄gbā a?
10 Ŋmiifi ihayi ku 1919 a, ɔcocɛhɔ néē cika ō lɛ ɔtuce ɔ a lɛ aɔkpá ɛyɛɛyɛyi ya ɛ, nōo jɛga aflɛyi lɛ ācɛ ɛpɛpɛ kéē gáā nwu ɛlā lɛyikwu Ɔwɔico. Ipu ihayi ku 1921, ɔcocɛhɔ a lɛ ɔkpá éyi ya néē gē hi ku The Harp of God, o ya ɛɛ kóō ta ācɛ ɛpɛpɛ abɔ kéē bi ɔ le nwu aɛlā okpɔcii nɛ Ubáyíbu gē nwu a. Abɔ eko yɔ i nyɔ a, é gbɔɔ ō ya aɔkpá alɛwa ɔhá duu. Ŋma ipu ɛjɛɛji aɔkpá nōo ba nyā, ɛnyá ta uwɔ abɔ ku a gáā jé Adā alɔ nōo yɔ ɔkpanco klla yihɔtu nu a? Ɔkpá ku “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, What Does the Bible Really Teach?, What Can the Bible Teach Us?, kɛɛ ku ɔkpá ɛpɛpɛ nɛ alɔ lɛ babanya nōo wɛ u Jɔɔnyɛ Oyeeyi Nōó Gáā Mɛ Gboogboo Ŋ! ma nɛɛ? É ya ɛjɛɛji aɔkpá nyā, o ya ɛɛ ku alɔ bi ɔ le nwu ācɛ ɛlā ŋma Ubáyíbu. Eko néē kē ya aɔkpá nyā wɛɛcɛ a, wɛ eko nɛ alɔ cɛgbá nu a yiili.
11. Ɔdiya nōó cɛgbá ku alɔ nwu ɛlā lɛyikwu Ujehofa mla Ubáyíbu fiyɛ a?
11 Ó wɛ ācɛ ɛpɛpɛ foofunu cɛgbá ō jé ɛlā lipu lipu lɛyikwu Ujehofa mla Ubáyíbu a ŋ. Ɛjɛɛji alɔ cɛgbá ō jé ɛlā lipu lipu. Ɔyikpo Upɔlu ta ɔkpá kahinii: “Ɔdōlé olɔfú wɛ ákú ācɛ nēe le jɛ̄.” Upɔlu ka tu ɔ kpɔ ka ō bi ɛlā nɛ alɔ nwu ŋma ipu Ubáyíbu a le yuklɔ, géē ta alɔ abɔ ō “jé ɔdā nōo lɔhi mɛ́mla ɔdā nōo bɔ̄bí.” (Uhíb. 5:14) Ó lɔfu lɔnɔ tu alɔ babanya ō lɛyitaajɛ lɛ ɔwɛ nɛ Ujehofa dɔka ku alɔ lā oyeeyi a, ohigbu ka ɛyinɛhi ku ācɛ wɛ ācɛ ō lā oyeeyi nōó lɔhi ŋ. Amáŋ Ujisɔsi le má ku alɔ nwu ɔdā nɛ alɔ cɛgbá, o ya ku alɔ lɛ abɔ bi ɔtu okpoce olɔfu ku alɔ. Alɔ gē miyɛ aɛlā ō nwu nyā ŋma ipu ɛlā ku Ɔwɔico nōo wɛ Ubáyíbu a. Ɔcɛ ō jeeyi néē lɔtuce ɔ gla a gē tutu ku ɔdole nyā, klla ya kóō yɛ fu ācɛ ɔlɛ Ɔwɔico ɛhaajɛ ɔwɛ nɛ Ujisɔsi yɔ i mafu a.
12. Bɛɛka Ujisɔsi a, ɛgɛnyá nɛ alɔ lɛ ojilima ce iye ku Ɔwɔico a?
12 Bɛɛka Ujisɔsi a, alɔ lɛ ojilima je lɛ iye ku Ɔwɔico ɛgɛ nōó cɛgbá nu a ɛ. (Ujɔ́n. 17:6, 26) Ocabɔ mafu, ipu ihayi ku 1931, alɔ gbɔɔ ō lé iye nōo cɛtɔha mla Ubáyíbu nōo wɛ Ācɛ Ocijali Ku Ujehofa a. Oŋma lɛ ō ya lɛ a, alɔ mafu ɛgɛ nɛ iye ku Ɔwɔico cɛgbá nɛhi lɛ alɔ, ku alɔ klla dɔka ku ācɛ kéē jé alɔ kwu iye ku Adā alɔ nōo yɔ ɔkpanco a. (Ayis. 43:10-12) Oŋma ɔmɛ Ɔya Igwo ku ihayi ɔɔma, iye otiihɔ ɔɔma gē bɛɛcɛ iyɔbu eyeeye ku Ɔda Ō Gbaajɛ. O ka tu ɔ, Ubáyíbu ku New World Translation of the Holy Scriptures lɛ iye ku Ɔwɔico kwuce gā ɛga okpaakpa nōó cika ō yɔ ipu Ɛlā ku nu a. Ɛnyā kē wɛ ɛyɛɛyi kpanaa gwu ɔdā nɛ ācɛ icɔɔci ɛkɛmgbɛ ya a ta, nōo lɛ iye ku Ujehofa fu ŋma ɛyinɛhi ku Ubáyíbu ku uwa néē cɔwɔ a!
UJISƆSI LƐ ĀCƐ NŌO GĒ YƐCE Ɔ A PIYATƆHA LƆƆLƆHI
13. Ɔdi cɛ gā uwɔ kpɔtuce lɔfu lɔfu ka Ujisɔsi yɔ i bi “ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī” a, yuklɔ icɛ a? (Ujɔ́ni 6:68)
13 O bu ipu “ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī” a, Ujisɔsi lɛ ɔwa nōo teyi peee kwaajɛ ipu ɛcɛ nyā, nōo géē nyila ɛ̄gbā ō gba ku ɔkwɛyi a. Ɛgɛnyá nɛ ɔtu gē ya uwɔ lɛyikwu ɔwa ɔɔma a? Á jé ŋ, ɔtu lɔfu ya uwɔ ɛgɛ nōó ya ɔyikpo Upita nōo da Ujisɔsi kahinii: “Ɛgiyí ɔ̄nyɛ nɛ̄ alɔ géē nyɔ̄ gɛ? Awɔ lɛ ɛlā nōo gē je oyēeyī opiyóó á.” (Ujɔ́n. 6:68) Ɛgimi nɛ oduuma ku alɔ gē yɛ i yɔ, ɔdaŋ ku alɔ i gē yɛ i yɔ ipu ɔwa ku Ujehofa ŋ ma? O bu ɔwa ku Ujehofa, Ukraist le má ku alɔ lɛ ɔdā doodu nɛ alɔ cɛgbá o ya ɛɛ ku alɔ hayi kpaakpa lɛ Ɔwɔico a. Ó klla gē nwu alɔ ɛlā o ya ɛɛ ku alɔ yuklɔ ku ɔna ō ta ku alɔ lɔɔlɔhi. Ó klla gɔbu ta alɔ abɔ ku alɔ le “pīya ɔ̄cɛ ɛ̄yīpɛ̄ ā,” o ya ɛɛ ku alɔ ya ɔdā nōo géē he Ujehofa ɔtu.—Āfi. 4:24.
14. Ɛgɛnyá nɛ a lɛ itene ŋma ō wɛ ipu ɔwa ku Ujehofa ɛpleeko ku ōcē ku corona a?
14 Ujisɔsi gē mafu ɔwɛ ku ijeeyi lɛ alɔ ō ya odee eko ku unwalu. Alɔ má itene ku ɔwɛ nɛ ó gē mafu lɛ alɔ a peee ɛpleeko nɛ ōcē ku corona gbɔɔ a. Abɔ ācɛ alɛwa nōo yɔ ipu ɛcɛ a i jé ɔdā o ya ɛpleeko ɔɔma ŋ ma, Ujisɔsi le ya ku alɔ miyɛ ɔwɛ ō ya odee nōo géē ya ku alɔ lɛ ogbotu. É ta alɔ ɔtu kwu ɔtu ō bi ɔdā ō kla okonu eko nɛ alɔ yɔ ɛga nɛ ācɛ alɛwa ba, mla ō bēē tu ligbo ŋma ɛgiyi ācɛ. É ta anyakwɔcɛ ku ujɔ ɛlá kwu ɔ kéē bēē yɛ fu ɛjɛɛji ācɛ nōo yɔ ipu ujɔ a ojigogo, o ya ɛɛ kéē jé ɔdā néē cɛgbá ō ya kéē lɛ ogbotu, ɔbɔla ku ɔkpiye, mla ō yɔ kwu Ujehofa ajaajɛ a. (Ayis. 32:1, 2) É ma ɔwɛ fu lɛ alɔ klla je ɔtu ō tu kwu ɔtu lɛ alɔ, o bu ipu aɔka ɛpɛpɛ nōo gē ŋma ɛgiyi Ígwu Nōo Gē Leyi Kwu Ɔwa Ku Alɔ a.
15. Ukɔ́ nyá nɛ alɔ miyɛ lɛyikwu ɛgɛ nɛ alɔ géē ya ōjila ku ujɔ, mla ō yuklɔ ku ɔna ō ta ɛpleeko ku ōcē ku corona a, ɔdā olɔhi nyá kē bɛɛcɛ ŋma anu a?
15 Ɛpleeko ku ōcē ku corona a, alɔ miyɛ ukɔ́ nōo teyi peee lɛyikwu ɛgɛ nɛ alɔ géē bēē ya ōjila ku ujɔ, mla ō yuklɔ ku ɔna ō ta a. Ó gboji fluflu ŋ, alɔ gbɔɔ ō gā ōjila ku ujɔ, ojileyi, mla ojileyi nɛhi o bu ipu intanɛt. Alɔ klla gbɔɔ ō ya ɛjɛɛji uklɔ ku ɔna ō ta ku alɔ o bu ɔkpá ō ta fu ācɛ, amāŋ mla ɔdā ō le gwu uwaya. Ujehofa lɛ ɔhā hɛ ce oceyitikwu ku alɔ. Abɔ ku ɛga ō yuklɔ alɛwa lɛ ācɛ ō yuklɔ ku ɔna ō ta nōo lɛwa nɛhi lɛ. Ku ɛlā ɔkwɛyi a ba, ācɛ alɛwa lɛ ɔ̄kā ō ta ɔtu kwu ɔtu néē má ɛpleeko ɔɔma.—Má ikpati nōo kahinii: “ Ujehofa Lɛ Ɔhā Hɛ Ce Uklɔ Ku Ɔna Ō Ta Ku Alɔ.”
16. Ɔdi nɛ alɔ jé kpɔcii a?
16 Ó lɛ ācɛ ōhī nɛ ɔtu lɔfu ya uwa ku ɔwa a yɔ i da alɔ lɛyikwu ɛgɛ nɛ alɔ géē lɛ ogbotu ŋma ōcē a fiyɛ ɔfu. Amáŋ igbalɛwa, ó gē gáā ta alɔ eyī peee ku ɔwɛ ō ya odee nɛ alɔ gē miyɛ a wɛ ɔwɛ ku ijeeyi. (Umát. 11:19) Abɔ alɔ kē yɔ i gbɛla lɛyikwu ɔwɛ ku ihɔtu nɛ Ujisɔsi gē bi alɔ jé ɔwɛ a, alɔ lɔfu lɔtuce kpɔcii ka ɔdā duuma nōo géē ya ɛcɔbu a, Ujehofa mla Ɔyinɔnyilɔ ku nu nōo he ɔ ɔtu nɛhi a géē yɔ mla alɔ.—Jé Ācɛ Uhíbru 13:5, 6.
17. Ɛgɛnyá nɛ ɔtu ya uwɔ lɛyikwu ō yukɔ ɛhaajɛ ku Ujisɔsi abɔ o yɔ i ma ɔwɛ fu lɛ alɔ a?
17 Alɔ gweeye nɛhi ka Ujisɔsi wɛ otrɛyi ku alɔ a! Alɔ i wɛ ipu ɔwa nōó kɔ ígwu ígwu ohigbu uculo, éwo nɛ ɔcɛ ŋma, mla uce nɛ ɔcɛ gē ka a ŋ. Alɔ yɔ i nwu ɛlā lɔɔlɔhi ŋma ɛlā ku Ɔwɔico, klla yɔ i nwu ɛlā nɛ alɔ cɛgbá o ya ɛɛ ku alɔ yuklɔ ku ɔna ō ta a. Eyeeye ku alɔ gē miyɛ ɛlā ō nwu lɛyikwu ɛgɛ nɛ alɔ géē je piya ɔcɛ ɛyipɛ a, alɔ kē yɔ i nwu ɛgɛ nɛ alɔ géē yihɔtu ku iyi alɔ. Alɔ lɛ ɛjɛɛji ɔdā nōo ya ɛɛ nɛ alɔ cika ō gwo, ohigbu ka Ujisɔsi wɛ otrɛyi ku alɔ a!
IJÉ ƆMƐ 16 Praise Jah for His Son, the Anointed
^ Umiliyɔn alɛwa ku acɛnyilɔ, acɛnya mɛmla ayipɛ yɔ i tɔɔna ku ɔkoolɔhi a mla ɔtu caca babanya. A wɛ ipu uwa a? Ɔdaŋ ku a wɛ, ɔɔma lé ku a wɛ ipu ācɛ nɛ Ondu alɔ Ujisɔsi gē bi jé ɔwɛ a. Ipu ikpɛyi ɛlā nyā, alɔ géē kɛla lɛyikwu aɔdā nōo mafu ka Ujisɔsi yɔ i bi alɔ jé ɔwɛ ipu uklɔ ku ɔna ō ta nɛ alɔ gē ya icɛ a. Ō gbɛla tu aɛlā nyā géē ta alɔ abɔ ku alɔ lɛ ɔtu ku alɔ ya ekponu, ō yɔ i gba Ujehofa ɛ̄gbā gɔbu klla yɔ i yɛce ɔwɛ nɛ Ujisɔsi yɔ i mafu lɛ alɔ a.
