1. Ɔdi wɛ ōmiya nōo lɔhi fiyɛ duu nɛ ɔcɛ cika ō ya a?

IGBALƐWA, ɔdā nɛ ɛ́nɛ́ mla adā miya ō ya a, gē lɛ abɔ kwu oyeeyi ku ayipɛ ɔlɛ uwa ihayi alɛwa. Ɔdaŋ ku ɛ́nɛ́ mla adā lɛ ōmiya obɔbi ya, é lɔfu hɛ unwalu taajɛ lɛ ayipɛ ɔlɛ uwa. Amáŋ, ɔdaŋ kē ya ōmiya olɔhi, é géē ta apɔlɛ uwa abɔ kéē lɛ eeye ipu oyeeyi ku uwa. Amáŋ, ayi a kē lɛ ōmiya néē cika ō ya duu. Ōmiya nōo lɔhi fiyɛ duu nɛ ɔcɛ cika ō ya a, wɛ ō gba Ujehofa Adā ku ihɔtu nɛ ó lā ɔkpanco a nɛ.—Aíjē 73:28.

2. Ɔdi wɛ ōmiya olɔhi nɛ Ujisɔsi, Ujosɛfu mla Umeri ya a?

² Ujosɛfu mla Umeri tine ō ta ayipɛ ɔlɛ uwa abɔ kéē gba Ujehofa ɛ̄gbā, ōmiya nɛ Ujosɛfu mla Umeri kē miya nyā mafu ɔkwɔɔkwɛyi, kóō gba Ujehofa ɛ̄gbā wɛ ɔdā nōo cɛgbá fiyɛ duu ipu oyeeyi ku uwa a. (Ulúk. 2:40, 41, 52) Ujiɔsi abɔyi nu kē yɛce ōmiya nōo ta ɔ abɔ ya ɔdā nōo he adā nu ɔtu. (Umát. 4:1-10) Ujisɔsi jɛ kwu piya ɔcɛ ogbonɛnɛ, ɔcɛ ō hayi kpaakpa mla ɔcɛ nōo lɛ ɔtu nɛhi. Ó wɛ ɛdɔ ɔyi nɛ ɛ́nɛ́ amāŋ adā duuma nōo yihɔtu ku Ujehofa géē dɔka ō lɛ.

3. Aɔka nyá nɛ alɔ gáā cila ipu ikpɛyi ɛlā nyā a?

³ Ipu ikpɛyi ɛlā nyā, alɔ géē cila ohi ku aɔka nyā: Ōmiya olɔhi nyá nɛ Ujehofa ya lɛyikwu Ujisɔsi a? Ɔdi nɛ ɛ́nɛ́ mla adā nōo wɛ ācɛ ō gba Ujehofa ɛ̄gbā lɔfu nwu ŋma ōmiya nɛ Ujosɛfu mla Umeri ya a? Ɔdi nɛ ayipɛ oklobiya mla ayipɛ nɔnya kē lɔfu nwu ŋma ōmiya nɛ Ujisɔsi ya a?

4. Ōmiya ō cɛgbá nyá nɛ Ujehofa ya lɛyikwu ɔyi nu a?

⁴ Ujehofa lɛ ɛ́nɛ́ mla adā olɔhi je lɛ Ujisɔsi. (Umát. 1:18-23;  Ulúk. 1:26-38) Aɛlā nɛ Umeri ka ŋma ipu ɔtu ku nu, néē ta ipu Ubáyíbu a mafu ka ó yihɔtu ku Ujehofa mla Ɔkpiihɔ lɔɔlɔhi. (Ulúk. 1:46-55) Ɔwɛ nɛ Ujosɛfu kē tɛyi waajɛ, ya ɔdā nɛ Ujehofa da ɔ kóō ya a, mafu ka ó yihɔtu Ɔwɔico klla dɔka ō ya ɔdā nōo he ɔ ɔtu.—Umát. 1:24.

5-6. Ɔdi wɛ aɔdā ōhī nɛ Ujehofa cɛ lɛ Ɔyi nu kóō má a?

⁵ Ujehofa i je ɛ́nɛ́ mla adā nōo lɛ ije nɛɛnɛhi lɛ Ujisɔsi ŋ. Abɔ é lɛ Ujisɔsi ma a, ɛya nɛ Ujosɛfu mla Umeri gwo a mafu kéē wɛ acogbɛha. (Ulúk. 2:24) Á jé ŋ, ɛga nɛ Ujosɛfu gē gbɔɔci a, lɔfu wɛ ɛga ō ligii éyi nōo kwu Unasareti ɛga nɛ ó ŋma a ajaajɛ. Ó lɔfu wɛ kē lɛ aɔdā agbenu alɛwa ŋ, ohigbu ku igbihaajɛ, é klla lɛ ayi ma bɛɛka ahaapa amāŋ fiyɛ a.—Umát. 13:55, 56.

⁶ Ujehofa gbo Ujisɔsi ŋma ipu unwalu ōhī, amáŋ ó gbo ɔ ŋma ipu ɛjɛɛji unwalu ŋ. (Umát. 2:13-15) Ocabɔ mafu, Ujisɔsi lɛ aɔmaapu nōó kpɔtuce ɛlā ku nu ŋ. Gbɛla kwu ɛgɛ nɛ ɔtu biya lɛ Ujisɔsi abɔ ācɛ ku apɔlɛ ku nu ta ō miyɛ cɛ ka anu wɛ Ohɔnyɛta ɔkwɔɔkwɛyi a. (Umák. 3:21; Ujɔ́n. 7:5) Ó lɔfu wɛ ku Ujosɛfu nōo wɛ adā ku Ujisɔsi ipu ɛcɛ nyā kwū ɛpleeko nɛ Ujisɔsi wɛ ɔyipɛ oklobiya kpɔ, ɛnyā kē wɛ ɔdā nōo géē kwu ɔ iyē nɛhi. Abɔ Ujisɔsi wɛ ɔkpla a, ɛnyā géē ya kóō gɔbu mla uklɔ nɛ adā nu tɛtɛ gē ya a. (Umák. 6:3) Abɔ Ujisɔsi yɔ i jɛ a, ó gbɔɔ ō nwu ɛgɛ nɛ ó géē leyi kwu apɔlɛ ku nu. Ó teyi peee ka ó yuklɔ lɔfu lɔfu, o ya ɛɛ ka ó ya ɛgbá ku apɔlɛ ku nu lɛ uwa. Ó lɛ a, Ujisɔsi je ɔdā nōo wɛ ku ɛ̄jɛ̄ kóō jɛ ɔcɛ nōo humayi yuklɔ ŋma ɔcɔɔci jaa gbo ɔnɔɔnɛ.

7. (a) Aɔka nyá lɔfu ta ɔba mla ɔnyā abɔ lɛyikwu ō bi ayipɛ ɔlɛ uwa jɛ a? (b) Ɛgɛnyá nɛ ɔkpá ku Aíita 2:1 lɔfu je otabɔ lɛ ɛ́nɛ́ mla adā kéē nwu ayipɛ ɔlɛ uwa ɛlā a?

⁷ Ɔdaŋ ku a wɛ ɔba amāŋ ɔnyā nōo géē dɔka ō má ayi, lɛ ɔka da iyi uwɔ kahinii: ‘Alɔ wɛ ācɛ nōo gē ta iyi alɔ waajɛ, klla gē lɛ ojilima ce Ɔwɔico mla ɛlā ku nu? Ujehofa géē fu alɔ, ku alɔ teyi ta ɔyi néē ma ɛpɛpɛ nōo cɛgbá nɛhi a?’ (Aíjē 127:3, 4) Ɔdaŋ ku a kē le piya ɛ́nɛ́ amāŋ adā ɛ, lɛ ɔka nyā da iyi uwɔ: ‘N gē nwu ayipɛ ɔlɛ um kē géē lɛ itene ŋma ō ceyitikwu yuklɔ lɔfu lɔfu?’ (Ɔ̄cok. 3:12, 13) ‘N gē ceyitikwu ya ɔdā nɛ um ya gla, o ya ɛɛ ka um gbo ayipɛ ɔlɛ um ŋma ɛgiyi ɔdobɔbi nōo lɔfu ya uwa ipu ɛcɛ obɔbi ku Ebilii nyā?’ (Aíit. 22:3) A gáā gbo ayipɛ  ɔlɛ uwɔ ŋma ɛjɛɛji unwalu néē lɔfu má a gla ŋ. A kóō ya ɔɔma gboogboo gla ŋ. Amáŋ ɛmɛɛma, a lɔfu ta uwa abɔ kéē ya otutu lɛyikwu unwalu néē géē má ipu oyeeyi ku uwa, ŋma ō gbolo ce ɛlā nɛ Ubáyíbu gē nwu a. (Jé Aíita 2:1-6.) Ocabɔ mafu, ɔdaŋ ku ɔmaapu ku uwɔ duuma ta ka anuɔ i gba Ujehofa ɛ̄gbā gɛ ŋ, ta ayipɛ ɔlɛ uwɔ abɔ kéē nwu ɛlā lɛyikwu ɔdā nōo ya nōó cɛgbá kéē hayi kpaakpa lɛ Ujehofa a. (Aíjē 31:23) Ɔdaŋ ku ɔcɛ nɛ a kē yihɔtu ku nu gekwu nɛɛ, lɛ ɛga ku Ubáyíbu nōo géē ta uwa ɔtu kwu ɔtu mafu lɛ uwa.—2 Ukɔ́r. 1:3, 4; 2 Utím. 3:16.

8. Ɛlā nyá yɔ ipu ɔkpá ku Oblatūkíne 6:6, 7, nɛ Ujosɛfu mla Umeri bi le yuklɔ a?

⁸ Ujosɛfu mla Umeri ta Ujisɔsi abɔ ka ó lɛ ɛma olɔhi mla Ujehofa. É yɛce ɔdā nɛ Ujehofa da ɛjɛɛji ɛ́nɛ́ mla adā a. (Jé Oblatūkíne 6:6, 7.) Ujosɛfu mla Umeri yihɔtu ku Ujehofa nɛɛnɛhi, ɔdā nōo kē cɛgbá lɛ uwa fiyɛ duu a wɛ ɛgɛ néē géē ta ayipɛ ɔlɛ uwa abɔ kéē lɛ ɛdɔ ihɔtu ɛgɔɔma lɛ Ujehofa.

9. Ɔdi wɛ ōmiya ō cɛgbá nɛ Ujosɛfu mla Umeri ya a?

⁹ Ujosɛfu mla Umeri gē gba Ujehofa ɛ̄gbā tɔha mla ayipɛ ɔlɛ uwa ojigogo. Ó lɛ aafu ŋ, é gē gā ɛga néē gē jila tɔha ipu ɛgogbɔɔkɔ nōo yɔ Unasareti a. É klla gē gā Ujerusalɛm ɔnu ucɛ ku onyata. (Ulúk. 2:41; 4:16) Á jé ŋ, é gē bi ɛga néē lɛ ō gā Ujerusalɛm ɔɔma le nwu Ujisɔsi mla ayinɛ nu ohile lɛyikwu ɔdā nōo ya ācɛ ō gba Ujehofa ɛ̄gbā eko ku igble. Ó klla lɔfu wɛ kē kóō nyɔ gáā má ɛga ōhī néē kɛla lɛyikwu ɔ ipu Ɔkpiihɔ duu. Abɔ é yɔ i ma ayi alɛwa tōōtɔ̄ɔ̄ a, ó lɔfu ya kóō lɔnɔ ta Ujosɛfu mla Umeri kéē bēē gba Ujehofa ɛ̄gbā ojigogo ɛgɛ néē tɛtɛ gē ya a. Amáŋ, é lɛ itene alɛwa ŋma ō ya ɛnyā! Apɔlɛ ku uwa lɛ ɛma olɔhi mla Ujehofa, ohigbu kéē lɛ ɛ̄gbā ō gba ku Ujehofa piya ɔdā aflɛyi ipu oyeeyi ku uwa.

10. Ɛlā nyá nɛ ɛ́nɛ́ mla adā nōo lɛ ufi ku Ujehofa lɔfu nwu ŋma ocabɔ ku Ujosɛfu mla Umeri a?

¹⁰ Ɔdi nɛ ɛ́nɛ́ mla adā nōo lɛ ufi ku Ujehofa lɔfu nwu ŋma ocabɔ ku Ujosɛfu mla Umeri a? Ɛlā néē lɔfu nwu nōo cɛgbá fiyɛ duu a, wɛ ō nwu ayipɛ ɔlɛ uwa o bu ipu ɛlā ō ka mla uce ō ya ku uwa, ku é yihɔtu ku  Ujehofa nɛɛnɛhi. Le jé ka ɔdā olɔhi fiyɛ duu nɛ a ya lɛ uwa gla a, wɛ ō ta uwa abɔ kéē yihɔtu ku Ujehofa. Ɔdā ɔhá nōo cɛgbá nɛhi nɛ a lɔfu nwu uwa a, wɛ ɛgɛ néē géē bēē ya oklɔcɛ ku Ubáyíbu, bēē gbɔɔkɔ, gē nyɔ ōjila ku ujɔ mɛmla ō tɔɔna eko doodu. (1 Utím. 6:6) Ɔkwɛyi a wɛ ku a cika ō ya ɛgbá ku ayipɛ ɔlɛ uwɔ lɛ uwa piii. (1 Utím. 5:8) Amáŋ bla, ka ó wɛ aɔdā agbenu nɛ a gē lá lɛ uwa a gáā ta uwa abɔ kéē wi gā ipu ɛcɛ ɛpɛpɛ a ŋ, amáŋ ɛma ku uwa mla Ujehofa nɛ. *—Isík. 7:19; 1 Utím. 4:8.

11. (a) Ɛgɛnyá nɛ ɛlā nōo yɔ 1 Utímōti 6:17-19 lɔfu ta ɛ́nɛ́ mla adā abɔ kéē yɛce ōmiya olɔhi abɔ é yɔ i bi ayipɛ ɔlɛ uwa jɛ a? (b) Ɔdi nɛ apɔlɛ ku uwɔ lɔfu miya ō ya a, ɔhā nyá kē lɔfu bɛɛcɛ ŋma anu a? (Má ikpati nōo kahinii “Ɔdi Nɛ A Miya Ō Ya A?”)

¹¹ Ó wɛ ɔdā olɔhi nɛhi ō má ɛgɛ nɛ adā mla ɛ́nɛ́ alɛwa nōo gē gba Ujehofa ɛ̄gbā, yɔ i ta ayipɛ ɔlɛ uwa abɔ yɛce ōmiya nōo géē ya kéē lɛ ɛma olɔhi mla Ujehofa a! Ɛjɛɛji apɔlɛ a gē gba ɛ̄gbā tɔha eko doodu. É gē gā ōjila ku ujɔ, klla gē gā ojileyi nɛhi tɔha. É gē yuklɔ ku ɔna ō ta a tɔha. Apɔlɛ ōhī gē nyɔ gáā tɔɔna ɛga nɛ ɛgbá ku ɛlā Ɔwɔico yɔ nɛɛnɛhi. Ōhī ku uwa gē nyɔ gáā má Ubɛtɛlu, amāŋ gē tabɔ gwo ɔlɛ lɛ ɔwa ku alɔ. Apɔlɛ nōo gē ya ɛdɔ ōmiya ɛgɛnyā, gē ŋmo ije tu ɔ nɛhi, ó kē lɔfu lɔnɔ ta uwa. Amáŋ, Ujehofa kē i cila uwa ule nɛɛnɛhi. (Jé 1 Utímōti 6:17-19.) Ayipɛ néē bi jɛ ipu ɛdɔ apɔlɛ ɛgɛnyā gē jɛ mla uce olɔhi nyā, é gē hijema ku ɛ́nɛ́ mla adā uwa nwu uwa ɛlā ɔwɛ ɛgɛnyā ŋ! *—Aíit. 10:22.

12. Ɔdi nɛ Ujisɔsi cɛgbá ō ya abɔ ó yɔ i jɛ a?

¹² Adā ku Ujisɔsi nōo lā ɔkpanco a gē ya ōmiya olɔhi piyoo, ɛgɔɔma nɛ ɛ́nɛ́ mla adā ku Ujisɔsi ipu ɛcɛ ya ōmiya olɔhi duu a. Amáŋ, abɔ Ujisɔsi yɔ i jɛ a, ó cɛgbá ō ya ōmiya ku abɔyi nu. (Ugal. 6:5) Bɛɛka ɛjɛɛji alɔ a, Ujisɔsi lɛ íkwu ō ya ɔdā duuma nōo he ɔ ɔtu ō ya. Ɔdaŋ ka ó he ɔ ɔtu nɛɛ, ó géē yɛ i ta ō lɛ ɔdā nɛ Ujehofa tine a piya ɔdā aflɛyi ipu oyeeyi ku nu. Ikɔkɔ ɔɔma, ó le miya ō lɛ ɛma olɔhi mla Ujehofa. (Ujɔ́n. 8:29) Ɛgɛnyá nɛ ocabɔ ku nu lɔfu ta ayipɛ oklobiya mla ayipɛ nɔnya abɔ icɛ a?

13. O gbɔɔ ŋma eko nɛ Ujisɔsi wɛ ɔyipɛ oklobiya a, ōmiya nyá nɛ ó ya nōo cɛgbá nɛhi a?

¹³ O gbɔɔ ŋma eko nɛ Ujisɔsi wɛ ɔyipɛ oklobiya a, ó miya ō bēē lɛyi taajɛ lɛ ɛ́nɛ́ mla adā nu. Ó gē ya ikpɛyi olɔfu ta ɛ́nɛ́ mla adā nu, ohigbu ka ó gbɛla ka ó jé odee fiyɛ uwa nɛ ŋ. Ikɔkɔ ɔɔma, “ó lɛyítáajɛ lɛ uwá.” (Ulúk. 2:51) Ujisɔsi wɛ ɔkpla ipu apɔlɛ ku nu a. Ó jé ka ó wɛ uklɔ nɛhi, ó kē bi ɔ le hija fluuflu ŋ. Ó ceyitikwu kóō nwu ɛgɛ néē gē gbɔɔci ŋma ɛgiyi adā nu  Ujosɛfu, o ya ɛɛ kóō má ije ō ya ɛgbá ku apɔlɛ ku nu lɛ uwa.

14. Ɛgɛnyá nɛ alɔ jé ku Ujisɔsi wɛ ɔcɛ nōo gē ya oklɔcɛ ku Ɛlā Ɔwɔico lɔɔlɔhi a?

¹⁴ Ó lɔfu wɛ ku ɛ́nɛ́ mla adā ku Ujisɔsi da ɔ lɛyikwu ɔwɛ ō hidaago néē bi le ma ɔ a, mla ɛlā nɛ alelekwu otɛhɔ ku Ɔwɔico ka lɛyikwu ɔ a. (Ulúk. 2:8-19, 25-38) Amáŋ, ó wɛ ɔɔma foofunu ŋ, ó ya oklɔcɛ ku Ɔkpiihɔ abɔyi nu. Ɛgɛnya nɛ alɔ jé ku Ujisɔsi wɛ ɔcɛ ō ya oklɔcɛ ku Ɛlā Ɔwɔico lɔɔlɔhi a? Ohigbu ku eko nɛ ó wɛ ɔyipɛ a, aitica nōo yɔ Ujerusalɛm a nōo “pó ɛ́gɛ́nɛ̄ ó bi ohílīpú yɔ̄ í le dɔɔ̄kā klla yɔ̄ ī cīla ɔ̄kā ā le kpó hídáagó.” (Ulúk. 2:46, 47) Eko nɛ Ujisɔsi wɛ ihayi 12 foofunu, ó le mafu ka Ujehofa wɛ adā nu ɛ.—Ulúk. 2:42, 43, 49.

15. Ɛgɛnyá nɛ Ujisɔsi mafu ka ó cɛ ō ya ɔdā nɛ Ɔwɔico tine a?

¹⁵ Abɔ Ujisɔsi gáā lɛ ɔdā nɛ Ɔwɔico miya lɛ ɔ a jé a, ó cɛ ku anuɔ géē ya ɔdā nɛ Ɔwɔico tine lɛ ɔ a. (Ujɔ́n. 6:38 ) Ó jé ku ācɛ alɛwa géē wɔtu nu. Naana nōó wɛ ɔdā nōo he ɔ ɔtu ŋ ma, ó lɛyitaajɛ ya ɔdā nɛ Ɔwɔico da ɔ kóō ya a kpɔ. Eko nɛ Ujisɔsi ya ubatisim ihayi ku 29 a, ɔdā nōo cɛgbá lɛ ɔ fiyɛ duu a wɛ ō ya ɔdā nɛ Ujehofa tine a. (Uhíb. 10:5-7) Eko nɛ ó yɔ i kwū ɛyi ɔcí ku owe a, ó lɛ ɔtu ku nu ya ekponu ō ya ɔdā nɛ Ujehofa tine a kpɔ.—Ujɔ́n. 19:30.

16. Ɛlā nyá nɛ ayipɛ lɔfu nwu ŋma ɛgiyi Ujisɔsi gla a?

¹⁶ Lɛyitaajɛ lɛ ɛ́nɛ́ mla adā uwɔ.Bɛɛka Ujosɛfu mla Umeri a, ɛ́nɛ́ mla adā uwɔ i jila iyē ŋ duu. Amáŋ Ujehofa lɛ ɛ́nɛ́ mla adā uwɔ fu kéē gbo uwɔ, klla nwu uwɔ ɛlā. Ɔdaŋ ku a gē lɛ ojilima ce uwa, gē tɛyi waajɛ klla gē yɛce ukɔ́ ku uwa, a géē “jɛ̄ gɔbū ipú ɔdā dóódu nɛ̄ a lɛ abɔ . . . kwu ɔ́ gē yá.”—Āfi. 6:1-4.

17. Ŋma ɛlā nōo yɔ Ujóssuwa 24:15, ɔdi nɛ ayipɛ oklobiya mla ayipɛ nɔnya cika ō miya lɛ iyi uwa a?

¹⁷ Ya ōmiya lɛyikwu ɔcɛ nɛ a géē gba ɛ̄gbā. A cika ō jé ɔdā nɛ Ujehofa dɔka ŋma ɛgiyi uwɔ ɔkwɔɔkwɛyi, mla ɛgɛ nɛ a géē ya ɔdā nɛ ó dɔka ipu oyeeyi ku uwɔ. (Ācɛ Uróm 12:2) Ó géē ta uwɔ abɔ ya ōmiya nōo cɛgbá fiyɛ duu ipu oyeeyi ku uwɔ, ɛnyā kē lɛ ō ya mla ō gba Ujehofa ɛ̄gbā. (Jé Ujóssuwa 24:15; Ɔ̄cok. 12:1) Ɔdaŋ ku a lɛ ōmiya ō bēē jé Ubáyíbu klla bēē ya oklɔcɛ ojigogo, ihɔtu mla ɔtu okpoce nɛ a lɛ lɛ Ujehofa a géē lɔfu fiyɛ.

18. Ɔdi wɛ ōmiya éyi nɛ ɛdrɔ cika ō ya a, itene nyá néē kē gáā lɛ ŋma anu a?

 ¹⁸ Miya ō lɛ ɔdā nɛ Ujehofa tine a ta aflɛyi ipu oyeeyi ku uwɔ. Ɛcɛ ku Ebilii nyā gē nwu alɔ ku ɔdaŋ ku alɔ bi ɛjɛɛji ɔfu ku alɔ le ya ɔdā nōo he alɔ ɔtu ipu nu, alɔ géē lɛ eeye. Amáŋ, ɔkwɛyi a wɛ ku alɔ jé ku ācɛ nōo gē bi ɛjɛɛji ɔfu ku uwa lɛ nu aɔdā agbenu inya a, gē nyɔ i “lɛ ōwē o lɔnɔ alɛwa bī wā í klá iyi uwā.” (1 Utím. 6:9, 10) Amáŋ, ɔdaŋ ku a jahɔ lɛ Ujehofa klla lɛ ɔdā nɛ ó tine a ta aflɛyi ipu oyeeyi ku uwɔ, a géē ya lɔhi klla i “jɛ̄ gɔbū ipú ɔdā dóódu nāa í yá ā.”—Ujós. 1:8.

19. Ɔdi nɛ ɛ́nɛ́ mla adā cika ō bi ɔtu a?

¹⁹ Ɛ́nɛ́ mla adā, ceyitikwu ya ɔdā duuma nɛ a ya gla, o ya ɛɛ ku a ta ayipɛ ɔlɛ uwɔ abɔ kéē gba Ujehofa ɛ̄gbā. Lɔtuce Ujehofa, ohigbu ka ó géē ta uwɔ abɔ ya ōmiya olɔhi. (Aíit. 3:5, 6) Bla ku uce ō ya ku uwɔ gē lɛ abɔ kwu ayipɛ ɔlɛ uwɔ ɔtu fiyɛ ɛlā nɛ a gē ka ŋma okonu a. Ó lɛ a, ya ōmiya nōo géē ya ku Ujehofa kóō gweeye mɛmla uwa.

20. Ɔhā nyá nɛ ayipɛ oklobiya mla ayipɛ nɔnya gáā lɛ ɔdaŋ kē miya ō gba Ujehofa ɛ̄gbā a?

²⁰ Ayipɛ oklobiya mla ayipɛ nɔnya, ɛ́nɛ́ mla adā aa géē ta aa abɔ ya ōmiya olɔhi ipu oyeeyi ku aa. Amáŋ, o ya ɛɛ ku aa ya ɔdā nōo he Ɔwɔico ɔtu a, aa gáā ya ōmiya ɔɔma abɔyi aa a. Ó lɛ a, yɛce ocabɔ ku Ujisɔsi, ku aa gba adā aa nōo yɔ ɔkpanco a ɛ̄gbā. Ɔdaŋ ku aa le ya lɛ a, aa géē lɛ itene, klla jɔɔnyɛ ɛnɛɛnɛ oyeeyi babanya. (1 Utím. 4:16) Aa klla géē jɔɔnyɛ eeye nōo fiyɛ duu a ɛcɔbu!