1-2. (a) Ɛgɛnyá nɛ ɔtu lɔfu ya alɔ lɛ eko nɛ alɔ gbɛla lɛyikwu oyeeyi mla uklɔ ku ɔna ō ta ku Ujisɔsi a? (b) Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

 EKO duuma nɛ ɔcɛ nɛ alɔ yihɔtu nu gekwu, abɔ ku nu gē kwu alɔ nɛhi! Eko aflɛyi a, ó gē kwu alɔ iyē eko duuma nɛ alɔ gbɛla lɛyikwu ɛ̄cī ōhī gbɔbu ɛɛ ku ɔcɛ a kóō kwū a. Ofiyɛ duu a, ɔdaŋ ka ɔcɛ nɛ alɔ yihɔtu nu a jɔɔnɔ nɛɛnɛhi gbɔbu ɛɛ nōó kwū a. Amáŋ abɔ eko yɔ i nyɔ a, alɔ lɔfu gbɔɔ ō gweeye eko duuma nɛ alɔ gbɛla lɛyikwu ɔdā nōó nwu alɔ amāŋ ɔdā nōó ya amāŋ ɔdā nōó ka, o ya ɛɛ kóō ta alɔ ɔtu kwu ɔtu amāŋ nōó ya ku alɔ yɛhɛ a.

² Ɔwɛ ekponu ɔɔma, ó kwu alɔ iyē nɛhi ō jé lɛyikwu owe nɛ Ujisɔsi má mla ikwū nɛ ó kwū a. Ɛpleeko Ku Oblatu, alɔ gē gbɛla lɛyikwu ɛgɛ nɛ ikwū ku Ujisɔsi cɛgbá nɛhi lɛ a. (1 Ukɔ́r. 11:24, 25) Naana kpɔ a, ō gbɛla lɛyikwu ɛjɛɛji ɛlā nɛ Ujisɔsi ka mla ɔdā nɛ ó ya eko nɛ ó yɔ ɛcɛ a gē cɛ lɛ alɔ gweeye nɛhi. Ó klla gē tu alɔ ɔtu kwu ɔtu nɛhi, eko duuma nɛ alɔ gbɛla kwu ɔdā nɛ ó yɔ i ya babanya mla ɔdā nɛ ó géē ya lɛ alɔ ɛcɔbu a. Ō gbɛla tu aɔdā nyā mla ihɔtu nɛ ó lɛ lɛ alɔ a géē ya ku alɔ mafu ka ó jɛ alɔ eyī, ipu ɔwɛ ɛyɛɛyɛyi nɛ alɔ géē kɛla lɛyikwu ɔ ipu ikpɛyi ɛlā nyā.

3. Ɔdiya nɛ ofula a cika ō jɛ alɔ eyī a?

³ Ó gē jɛ alɔ eyī nɛhi eko duuma nɛ alɔ gbɛla lɛyikwu oyeeyi  ku Ujisɔsi mla ikwū ku nu. Eko nɛ Ujisɔsi yɔ ipu ɛcɛ a, ó nwu ācɛ lɛyikwu ɔdā olɔhi nɛ Ajɔɔcɛ ku Ɔwɔico géē ya a. Alɔ yihɔtu ɛlā nɛ Ubáyíbu nwu lɛyikwu ofula a mla aɔdā olɔhi nōó ya tɔɔtɛ a. Ofula a jɛ alɔ eyī nɛhi ohigbu ka ó lɛ ɔ ya tɔɔtɛ ku alɔ jɔɔnyɛ ɛnɛɛnɛ ɛma mla Ujehofa mla Ujisɔsi. Ācɛ nōo kpɔtuce Ujisɔsi a klla lɛ eyiyoce ō lā oyeeyi opiyoo mla ō má ācɛ néē yihɔtu uwa nōo gekwu ɛ ma. (Ujɔ́n. 5:28, 29; Uróm 6:23) Alɔ i ya ɔdā duuma nōo mafu ku alɔ cika jɛ ō miyɛ aɔhā nyā ŋ. Alɔ i kē gáā cila Ɔwɔico mla Ukraist ule ku ɔdā néē ya lɛ alɔ a gla ŋ. (Uróm 5:8, 20, 21) Amáŋ, alɔ lɔfu mafu lɛ uwa ka ó jɛ alɔ eyī. Ɛgɛnyá a?

4. Ɛgɛnyá nɛ Umeri Umagadalini mafu ka ɔdā nɛ Ujisɔsi ya lɛ ɔ a jɛ ɔ eyī a? (Má ifoto a.)

⁴ Leyi yɛ ocabɔ ku ɔcɛnya éyi ku ācɛ Ujiyu néē hi ka Umeri Umagadalini a. Ó yɔ i má owe nɛɛnɛhi ohigbu ka aalelekwu obɔbi ahaapa yɔ i junwalu lɛ ɔ. Ɔtu lɔfu ya ɔ ka ó lɛ ɔcɛ duuma nōo gáā ta ɔ abɔ gla ŋ. Ohigbu ɛnyā, gbɛla lɛyikwu ɛgɛ nɛ ó ta Ujisɔsi ahinya lɛ eko nɛ ó hɛ ɔ ta ŋma abɔ ku aalelekwu obɔbi a! Abɔ ɔdā nɛ Ujisɔsi ya a jɛ ɔ eyī nɛhi a, ó kwu piya ɔyikpo ku Ujisɔsi. Ó klla bi eko, ɔfu, mla aɔdā agbenu alɛwa le je otabɔ lɛ uklɔ ku ɔna ō ta a. (Ulúk. 8:1-3) Naana nɛ ɔdā nɛ Ujisɔsi ya a jɛ Umeri eyī nɛhi a, ó jé ka Ujisɔsi géē ya ɔdā nōo fiyɛ ɔɔma ɛcɔbu lɛ ɔ ŋ. Ō je oyeeyi ku nu gweeye kwɛyi alɛɛcɛ, o ya ɛɛ “ka ɔ̄cɛ dúúmā nōo lɔtūce ɔ́” kóō lɛ oyeeyi opiyoo lɛ. (Ujɔ́n. 3:16) Naana kpɔ a, Umeri mafu ku ɔdā nɛ Ujisɔsi ya a jɛ ɔ eyī ŋma lɛ ō yɔ kwu ɔ gā ajaajɛ. Eko nɛ Ujisɔsi yɔ i má owe ɛyi ɔcí ku owe a, Umeri hayi piya ɔ. Ó kē ya lɛ a ohigbu ka ó lɛ ɛlá wu Ujisɔsi klla dɔka ō je ɔtu ō tu lé lɛ ācɛ nōo ba abɔɔ a. (Ujɔ́n. 19:25) Igbihi nɛ Ujisɔsi gekwu a, Umeri mla acɛnya ɛpa ɔhá lɛ anɔ okpocu lá kéē nyɔ i le nya okwū ku Ujisɔsi iyē. (Umák. 16:1, 2) Ujehofa hɔha ce Umeri nɛɛnɛhi abɔ ó yɔ kwu Ujisɔsi gā ajaajɛ a. Ujisɔsi le jila mla Umeri klla lɛ ɔka ka mla ɔ igbihi nɛ ó le heyi ŋma ɔlekwu a. Ɛga nɛ  Umeri lɛ nyā, ayikpo ku nu oligii foofunu lɛ a.—Ujɔ́n. 20:11-18.

5. Ɛgɛnyá nɛ alɔ gáā mafu ka ɛjɛɛji ɔdā nɛ Ujehofa mla Ujisɔsi ya lɛ alɔ a jɛ alɔ eyī a?

⁵ Alɔ klla lɔfu mafu ka ɔdā nɛ Ujehofa mla Ujisɔsi ya lɛ alɔ a jɛ alɔ eyī nɛhi ŋma lɛ ō bi eko, ɔfu mla aɔdā agbenu ku alɔ le gba Ujehofa ɛ̄gbā. Ocabɔ mafu, alɔ lɔfu je iyi alɔ tɛɛcɛ ō je otabɔ ō gwo aɛga nɛ alɔ gē bi le gba Ujehofa ɛ̄gbā a klla tu uwa bi.

6. Ɔdiya nɛ alɔ lɔfu ka ka ofula a wɛ ɛhi lɛ eyeeye ku alɔ a?

⁶ Eko duuma nɛ alɔ leyi yɛ ɛgɛ nɛ Ujehofa mla Ujisɔsi yihɔtu alɔ a, ɛnyā gē lɛ abɔ kwu alɔ ɔtu ku alɔ yihɔtu uwa duu. (1 Ujɔ́n. 4:10, 19) Alɔ klla gē yihɔtu uwa fiyɛ ɔdaŋ ku alɔ gáā le jé ku Ujisɔsi kwū lɛ eyeeye ku alɔ. Ɔcocɛhɔ Upɔlu jé ɛnyā, ó kē mafu ku ɛnyā jɛ ɔ eyī ŋma lɛ ɔkpá nɛ ó ta fu ācɛ Ugalesiya a. Ó kahinii: “Ɔyí Ɔwɔicō . . . yíihɔtū tá um klla cɛ̄ gekwú o yá ɛ́ɛ́ kóō lɛ um nyatá.” (Ugal. 2:20) Ohigbu ku Ujisɔsi kwū lɛ alɔ a, Ujehofa lɔfu pi uwɔ wa ɛgiyi nu o ya ɛɛ ku a kwu piya ɔya ku nu. (Ujɔ́n. 6:44) Ó lɛ abɔ kwu uwɔ ɔtu ō jé ku Ujehofa má ɔdā olɔhi ɛgiyi uwɔ klla lɛ ule nōo fiyɛ duu a gba o ya ɛɛ ku a kwu piya ɔya ku nu ŋ? Ɛnyā gē ya ku ihɔtu nɛ alɔ lɛ lɛ Ujehofa mla Ujisɔsi a kóō lɔfu iyē. Alɔ cika ō da iyi alɔ ɔka kahinii: ‘Ɔdi nɛ ihɔtu ɔɔma géē lɛ abɔ kwu um ɔtu ku um ya a?’

7. Ɛgɛ nɛ alɔ yɔ i má ŋma ipu ifoto a, ɛgɛnyá nɛ ɛjɛɛji alɔ gáā ma ihɔtu nɛ alɔ lɛ lɛ Ujehofa mla Ujisɔsi a fu a? (2 Ācɛ Ukɔ́rīnti 5:14, 15; 6:1, 2)

⁷ Ihɔtu nɛ alɔ lɛ lɛ Ɔwɔico mla Ukraist a gē ya ku alɔ mafu ihɔtu lɛ ācɛ ɔhá duu. (Jé 2 Ācɛ Ukɔ́rīnti 5:14, 15; 6:1, 2.) Ɔwɛ éyi nɛ alɔ géē mafu ihɔtu ku alɔ a, wɛ ō lɛ ɔtu caca ipu uklɔ ku ɔna ō ta a. Alɔ gē kɛla lɛ ɛjɛɛji ācɛ nɛ alɔ má. Alɔ i gē ta ō kɛla lɛ ācɛ ohigbu ka é lɛ ucolo amāŋ ŋma uce ɔhá ŋ. Ɔdā ɔhá kpɔ, alɔ gē  kɛla lɛ ɛjɛɛji ācɛ, kwu ācɛ ō lɛ ije, ācɛ ō jé ɔkpá, ācɛ nōó lɛ ije ŋ mla ācɛ nōó jé ɔkpá ŋ. O bu ɔwɛ ɛgɛnyā, alɔ yɔ i ya ku ococɛ ku Ujehofa kóō le ya jila ohigbu ku ó “tine kú odúúdú ācɛ kéē lɛ ɛlā ɔkwɛyi ā jé, cɛ́ɛ́ kóō géē lɛ uwa nyatá.”—1 Utím. 2:4.

8. Ɛgɛnyá nɛ alɔ gáā mafu ihɔtu lɛ ayinɛ alɔ a?

⁸ Alɔ gē mafu ku alɔ yihɔtu Ɔwɔico mla Ukraist ŋma lɛ ō yihɔtu ayinɛ alɔ. (1 Ujɔ́n. 4:21) Alɔ gē lɛ ɛlá wu uwa klla gē ya ɛgbá ku uwa lɛ uwa eko néē lɛ unwalu. Alɔ gē ta uwa ɔtu lé eko nɛ ɔcɛ néē yihɔtu nu gekwu. Alɔ klla gē nyɔ i má uwa eko néē yɔ i doōcē, klla gē ya ɔdā duuma nɛ alɔ ya gla ō tu uwa ɔtu kwu ɔtu eko duuma nɛ ɔtu le gbenyi lɛ uwa. (2 Ukɔ́r. 1:3-7; 1 Utes. 5:11, 14) Alɔ gē gbɔɔkɔ lɛ uwa eko doodu ohigbu ku alɔ jé ka “ɔkɔ nɛ̄ ɔ̄cɛ o yá ɔdā okpaakpa ā gē gbā í yúklɔ́ nɛ̄ɛ̄nɛ̄hi.”—Ujɛ́m. 5:16.

9. Ɔwɛ ɔhá nyá nɛ alɔ lɔfu mafu ihɔtu lɛ ayinɛ alɔ a?

⁹ Alɔ klla gē mafu ihɔtu lɛ ayinɛ alɔ ŋma lɛ ō ba ɛbɔ mla uwa. Alɔ gē ceyitikwu gbla Ujehofa ya ŋma lɛ ō je ya ayinɛ alɔ ɛhi. Ujehofa cɛ lɛ ɔyi nu kóō kwū ohigbu íne ō biya ku alɔ. Ohigbu ɛnyā, alɔ le tutu ō je ya ayinɛ alɔ ɛhi eko duuma néē lɛ ɔdā ō kwiiye ya alɔ. Alɔ i dɔka ō lɛbɛɛka ɔfiyɛ obɔbiipu nɛ Ujisɔsi kɛla lɛyikwu ɔ ipu aciije ku nu a ŋ. Naana nɛ ɔkpani ku ɔcocɛhɔ a kwu ule alɛwa nɛ ó bi ɔ a i ya ɔ ɛhi a, ɔcocɛhɔ a ta ō je ya ɔcocɛhɔ ɔmpa nu nōo bi ɔ ule ligii a ɛhi. (Umát.18:23-35) Ɔdaŋ ku a lɛ ɛlā mla ɔcɛ éyi ipu ujɔ, a lɔfu fu ikpo aflɛyi ku a lɛ ɛbɔ ya mla ɔcɛ ɔɔma ɛɛ ku a nyɔ gā Oblatu Ku Ikwū ku Ujisɔsi a? (Umát. 5:23, 24) Ō ya ɛnyā géē mafu ku a yihɔtu Ujehofa mla Ujisɔsi nɛhi.

10-11. Ɛgɛnyá nɛ anyakwɔcɛ ku ujɔ géē mafu ka é yihɔtu ku Ujehofa mla Ujisɔsi a? (1 Upíta 5:1, 2)

¹⁰ Ɛgɛnyá nɛ anyakwɔcɛ ku ujɔ géē mafu ka é yihɔtu Ujehofa mla Ujisɔsi a? Ɔwɛ ō cɛgbá éyi wɛ ō ya ɛgbá ku aala ku Ujisɔsi lɛ uwa. (Jé 1 Upíta 5:1, 2.) Ujisɔsi lɛ ɛlā nyā teyi peee lɛ ɔcocɛhɔ Upita. Igbihi nɛ Upita lɛ iho ku Ujisɔsi hɛ igbo ɛta ka anuɔ i jé Ujisɔsi ŋ ma a, ó dɔka ō mafu peee ka anuɔ yihɔtu ku nu kpɔ. Igbihi nɛ Ujisɔsi le heyi ŋma ɔlekwu a, ó da Upita ɔka kahinii: “Usáyímɔ̄n, ɔyí Ujɔ́ni, a yíihɔtū um?” Alɔ jé ka Upita géē ya ɔdā duuma nɛ ó ya gla o ya ɛɛ kóō mafu lɛ Ɔkpani nu ka anuɔ yihɔtu nu. Ujisɔsi da Upita kahinii: “Gbō aálá kú um.” (Ujɔ́n. 21:15-17) Upita kē mafu ipu ɛjɛɛji oyeeyi ku nu ka anuɔ yihɔtu ku Ujisɔsi ŋma lɛ ō leyikwu aala ku Ondu a.

¹¹ Anyakwɔcɛ ku ujɔ, ipu alaadi ku Oblatu a amāŋ igbihi nɛ Oblatu a le ya gáā le yɛ, ɛgɛnyá nɛ a géē mafu ka ɛlā nɛ Ujisɔsi ka lɛ Upita a cɛgbá gā uwɔ a? A lɔfu mafu ihɔtu ku uwɔ lɛ Ujehofa mla Ujisɔsi ŋma lɛ ō nyɔ gáā ta ayinɛ ɔtu kwu ɔtu ojigogo, klla ceyitikwu je otabɔ lɛ ācɛ nōó gē gɛɛcɛ ku uklɔ ku ɔna ō ta gɛ ŋ ma kéē kwu cigbihi wa ɛgiyi Ujehofa. (Isík. 34:11, 12) A klla lɔfu ceyitikwu je ɔtu ō tu kwu ɔtu lɛ ācɛ néē gē klɔcɛ ku Ubáyíbu mla uwa, mla ācɛ nɛ ɛlā ku Ɔwɔico he uwa ɔtu nōo wa Oblatu a. Alɔ dɔka ō ya uwa omaaba ohigbu ku alɔ leyice ku uwa abɔyi uwa lɔfu je piya ayikpo ku Ujisɔsi duu.

12. Ɔdiya nōo gbɛla tu ɛlā nɛ Ujisɔsi ka otu gbɔbu ɛɛ kóō kwū a, gē je ɔtu ō lɛ lɛ alɔ a? (Ujɔ́ni 16:32, 33)

¹² Otu gbɔbu ɛɛ ku Ujisɔsi kóō kwū a, ó da ayikpo ku nu kahinii: “Ācɛ kú ɛcɛ géē yá ká aá móōwē. Amáŋ aá lɛ ɔtū lɛ! Ohígbū ka n lɛ ɛcɛ yálé mɛɛ́.” (Jé Ujɔ́ni 16:32, 33.) Ɔdi ta Ujisɔsi abɔ kóō mafu ɔtu ō lɛ eko nɛ aolɛla ku nu yɔ i ta ɔ ufi, ka ó klla hayi kpaakpa jaa gbeeko nɛ ó gekwu a? Ó gbolo ce Ujehofa. Abɔ Ujisɔsi jé ka ayikpo ku nu géē má ɛdɔ  ojama ekponu ɔɔma a, ó gbɔɔkɔ lɛ Ujehofa kóō leyikwu uwa. (Ujɔ́n. 17:11) Ɔdiya nɛ ɛnyā gē je ɔtu ō lɛ lɛ alɔ a? Ohigbu ka Ujehofa lɔfu fiyɛ aolɛla ku alɔ a. (1 Ujɔ́n. 4:4) Ujehofa gē má ɛjɛɛji odee. Alɔ lɔtuce ka ɔdaŋ ku alɔ gbolo ce Ujehofa, alɔ géē ya ufi ku alɔ lé klla mafu ɔtu ō lɛ.

13. Ɛgɛnyá nɛ Ujosɛfu ɔcɛ Arimateyi a mafu ɔtu ō lɛ a?

¹³ Leyi yɛ ocabɔ ku Ujosɛfu ɔcɛ Arimateyi a. Ācɛ Ujiyu gē lɛ ojilima ce ɔ nɛhi. Ó wɛ ipu ójila ohɛpɔ ku ɛga ō kɛpɔ nōo fiyɛ duu ku ācɛ Ujiyu a. Naana kpɔ a, eko nɛ Ujisɔsi yɔ i yuklɔ ku ɔna ō ta a, Ujosɛfu i wɛ ɔcɛ nōo mafu ɔtu ō lɛ ŋ. Ujɔni ka ó “wɛ ɔyíkpo kú Ujísɔ̄si tayínū ohígbū kóō gē yúufi ācɛ Ujíyu ā.” (Ujɔ́n. 19:38) Naana nɛ ɔkoolɔhi lɛyikwu Ajɔɔcɛ a he Ujosɛfu ɔtu a, ó mafu iyi nu lɛ ācɛ ka ó kpɔtuce Ujisɔsi ŋ. Ó lɔfu yɔ i yuufi ku ācɛ i gáā lɛ ojilima ce ɔ gɛ ŋ, ɔdaŋ ka é le jé ka ó kwu piya ɔyikpo ku Ujisɔsi. Amáŋ Ubáyíbu da alɔ ka igbihi nɛ Ujisɔsi gekwu a, Ujosɛfu mafu ɔtu ō lɛ “leyī hɔ́lá le yɛ tá ɛgiyí Upáyílēti gaá da ɔ́ kóō kwú okwū kú Ujísɔ̄si ú lɛ anúɔ.” (Umák. 15:42, 43) Ujosɛfu i ceyitikwu lɛ ɔ tayinu ŋma ɛgiyi ācɛ ka ó wɛ ɔyikpo ku Ujisɔsi gɛ ŋ.

14. Ɔdi nɛ a cika ō ya ɔdaŋ ku a gē yuufi ācɛ a?

¹⁴ A gē yuufi ācɛ bɛɛka Ujosɛfu a? Ipu inɔkpa amāŋ ɛgiyi uklɔ, ó gē ta uwɔ uweyi ō da ācɛ ɔhá ku a wɛ éyi ku Ācɛ Ocijali Ku Ujehofa? A yɔ i lɛ abɔ ci ō je piya ɔcɛ ō tɔɔna ɛlā Ɔwɔico amāŋ ō ya ubatisim, ohigbu ku a yɔ i junwalu lɛ iyi uwɔ lɛyikwu ɔdā nɛ ācɛ ɔhá géē ka nɛɛ? A hii cɛ ku ɛgɛ nɛ ɔtu yɔ i ya uwɔ a kóō ci uwɔ ŋma ō ya ɔdā nɛ a jé kóō wɛ ɔdā okpaakpa a ŋ. Gbɔɔkɔ ŋma ɔtu lɛ Ujehofa. Ba ɔ kóō je ɔtu ō lɛ gā uwɔ o ya ɛɛ ku a ya ococɛ ku nu jila. Abɔ a yɔ i má ɛgɛ nɛ Ujehofa yɔ i cila ɔkɔ ō gba ku uwɔ a, a géē lɔfu klla lɛ ɔtu tōōtɔ̄ɔ̄.—Ayis. 41:10, 13.

15. Igbihi nɛ Ujisɔsi le hɛ wɛɛcɛ lɛ ayikpo ku nu a, ɔdi nɛ eeye néē lɛ a cɛ lɛ uwa ya a? (Ulúku 24:52, 53)

¹⁵ Ó kwu ayikpo a iyē nɛhi eko nɛ Ujisɔsi kwū a. Leyi yɛ iyi uwɔ ipu āhɔ̄ ɔɔma. Ó wɛ ka oklobiya ku uwa néē yihɔtu ku nu a kwū foofunu ŋ, amáŋ ó ya uwa bɛɛka é lɛ eyiyoce gɛ ŋ ma duu. (Ulúk. 24:17-21) Naana kpɔ a, eko nɛ Ujisɔsi le hɛ wɛɛcɛ ɛgiyi uwa a, ó lɛ eko taajɛ lɛ ɔ ta uwa eyī peee uklɔ nɛ ó lɛ ō ya ku akacɛ ku Ubáyíbu kóō le ya jila a. Ó klla je uklɔ ō cɛgbá lɛ uwa kéē ya. (Ulúk. 24:26, 27, 45-48) Igbihi ɛ̄cī ofu ɛpa (40) nɛ Ujisɔsi le ta ɔkpanco a, ayikpo ku nu i cɔnu gɛ ŋ amáŋ é gbɔɔ ō gweeye. Ō jé ka Ujisɔsi yeeyi klla le tutu ō ta uwa abɔ, o ya ɛɛ kéē lɛ uklɔ nōó je lɛ  uwa a ya kwɛyi a cɛ lɛ uwa gweeye nɛhi. Eeye ku uwa nyā ya kéē hii habɔ ō cɛtra Ujehofa ta ŋ.—Jé Ulúku 24:52, 53; Ācot. 5:42.

16. Ɛgɛnyá nɛ alɔ gáā gbla ayikpo ku Ujisɔsi ya a?

¹⁶ Ɛgɛnyá nɛ alɔ gáā gbla ayikpo ku Ujisɔsi ya a? Alɔ lɔfu lɛ eeye ipu ɛ̄gbā ō gba ku Ujehofa ipu ɛjɛɛji ihayi a, ó wɛ ɛpleeko ku Oblatu Ku Ikwū ku Ujisɔsi foofunu ŋ. Ɛnyā wɛ ku alɔ géē lɛ Ajɔɔcɛ a ta aflɛyi ipu oyeeyi ku alɔ. Ocabɔ mafu, alɛwa ku ācɛ lɛ ōmiya ku uklɔ ku uwa tuya o ya ɛɛ kéē lɛ ɛga ō yuklɔ ku ɔna ō ta, gā ōjila ku ujɔ, mla ō ya ɛ̄gbā ō gba ku apɔlɛ ku uwa. Ācɛ ōhī kē le miya ku aa i gáā lɛ aɔdā ōhī nɛ ācɛ gē má kéē cɛgbá nu a ŋ, o ya ɛɛ kéē tiile ipu ujɔ fiyɛ amāŋ o ya ɛɛ kéē nyɔ gā ɛga nɛ ɛgbá yɔ. Naana nɛ ó cɛgbá ɔtu ō lé o ya ɛɛ ku alɔ gɔbu yɔ i gba Ujehofa ɛ̄gbā a, ó cokonu ka anuɔ géē hɔha ce alɔ nɛɛnɛhi ɔdaŋ ku alɔ kwu Ajɔɔcɛ ku nu i ta aflɛyi ipu oyeeyi ku alɔ.—Aíit. 10:22; Umát. 6:32, 33.

17. Ɔdi nɛ a lɛ ɔtu ku uwɔ ya ekponu ō ya ɛpleeko ku Oblatu a? (Má ifoto a.)

¹⁷ Alɔ yɔ i leyice ō jɔɔnyɛ Oblatu Ku Ikwū ku Ujisɔsi Utiyusde, ɛ̄cī 4 ku Ɔya Ɔmɛnɛ. Naana kpɔ a, a hii gbeyi jaa gbeeko ɔɔma gbɔbu ɛɛ ku a gbɛla lɛyikwu oyeeyi mla ikwū ku Ujisɔsi mla ihɔtu nɛ anu mla Ujehofa mafu lɛ alɔ a ŋ. Alaadi ōhī gbɔbu lɛ Oblatu a mla alaadi ōhī igbihi ku Oblatu a, lɛ eko taajɛ lɔɔlɔhi ku a gbɛla tu oyeeyi mla ikwū ku Ujisɔsi mla ihɔtu nɛ anu mla Ujehofa mafu lɛ alɔ a. Ocabɔ mafu, lɛ eko taajɛ ku a jé klla gbɛla tu aɔdā nōo ya nōo yɔ ipu ucaati nyā nōo kahinii: “Ɛgɛnyá Nɛ A Gáā Tutu Lɛyikwu Ɛ̄cī Ku Oblatu Ku Ikwū Ku Ujisɔsi A?” nōo yɔ ipu mwb19.4 upeji ɔmɛ 4 a. Abɔ a yɔ i klɔcɛ lɛyikwu Ikwū ku Ujisɔsi a, dɔka aɛga ku Ubáyíbu nōo géē ya ku ɔdā nɛ Ujisɔsi ya a kóō jɛ uwɔ eyī. Klla dɔka aɛga ɔhá nōo géē ya ku ihɔtu, ɔtu ō lɛ mla eeye nɛ a lɛ a kóō nwune tōōtɔ̄ɔ̄. Ceyitikwu ku a gbɛla lɛyikwu aɔwɛ nɛ a géē mafu ka aɔdā nɛ Ujisɔsi ya a jɛ uwɔ eyī nɛhi. Le jé kpɔcii ka ɛjɛɛji ɔdā nɛ a ya, o ya ɛɛ ku a blakwu Ujisɔsi ɛpleeko ku Oblatu a jɛ ɔ eyī nɛhi.—Mafú 2:19.