“Aá [cika ō kwu] pīya Itíca.” (Uhíb. 5:12) Gbɛla tu ɛlā nyā ɛ, Ujehofa nōo wɛ itica fiyɛ duu ipu ɔkpanco mla ɛcɛ a, yɔ i hi alɔ igwú ku alɔ gáā nwu ācɛ ɔhá ɛlā lɛyikwu ɔ! Uklɔ duuma néē je gā uwɔ ku a ya, nōo lɛ ō ya mla ō nwu ācɛ ɛlā ɔkwɛyi lɛyikwu Ujehofa, ipu apɔlɛ, ipu ujɔ, amāŋ ipu uklɔ ku ɔna ō ta a, i wɛ uklɔ ija ŋ, ɛnɛnɛ uklɔ nōó wɛ a. Ɛgɛnyá nɛ alɔ gáā yuklɔ nyā mɛɛlɛ a?

Ohi ku ɔka ɔɔma yɔ ipu ɛlā nɛ Upɔlu nōo wɛ ɔcocɛhɔ a ta gē lɛ Utimoti a, ó da ɔ kahinii: “Lɛ eko táajɛ ká ā yɔ̄ ī jé ɛlɔ̄ɔwɔicō ā tɛ́ɛcɛ, yɔ̄ ī nwū ɛjɛ̄ɛ̄jī ācɛ ká ā klla bī ɛlɔ̄ɔwɔicō ā tɔ́ɔna lɛ uwá.” Ó klla da ɔ kahinii: “Ɔ́dāŋ ka a yɔ ī yá aɔ́dā . . . nēe bá nyā glá, a géē lɔfu nya iyi uwɔ mɛ́mla ācɛ nēe gē jāhɔ̄ gā awɔ ā tá.” (1Utím. 4:13, 16) Ɛlā nɛ a gē bi nyɔ i tɔɔna lɛ ācɛ a wɛ ɛlā nōo gē nya oyeeyi ta. Ɛnyā ya ɛɛ nōó cɛgbá ku a yɔ i ceyitikwu ya lɔhi fiyɛ, ipu ɔwɛ nɛ a gē bi le jé ɔkpá mla ō nwu ācɛ ɛlā a. Alɔ ya ɔkpá nyā, o ya ɛɛ kóō ta uwɔ abɔ ya ɛnyā. Má aɔdā ōhī nōo yɔ ipu ɔkpá nyā a.

Ujehofa “jé ō nwū ɔ̄cɛ odée fíyɛ́ odúúdú ācɛ nēe ī nwū ɔ̄cɛ odée . . . á.” (Ujób. 36:22) Abɔ ɔkpá nyā géē yɔ i ta uwɔ abɔ ku a ya lɔhi fiyɛ ipu ɔkpá ō jé mla ō nwu ācɛ ɛlā a, a hii mlanyi ka ɛlā nɛ a gē nwu ācɛ a ŋma Ɛgiyi Ujehofa ŋ, anu kē i pi ācɛ wa ɛgiyi nu a. (Ujɔ́ni 6:44) Ó lɛ a, gbɔɔkɔ lɛ Ujehofa eko doodu kóō je owiihɔ ku nu gā awɔ. Bi Ubáyíbu le kɛla Ɔwɔico lɛ ācɛ eko doodu. A hii ya ku ācɛ kéē je owofu gā awɔ ŋ, amáŋ, ya kéē je owofu lɛ Ujehofa. Ceyitikwu ya ku ɛlā ku uwɔ kóō lɛ abɔ kwu ācɛ nɛ a yɔ i kɛla lɛ uwa a ɔtu, o ya ɛɛ kéē lɛ ihɔtu nɛhi lɛ Ujehofa.

Olɛhɔ nōo cɛgbá fiyɛ duu nɛ Ujehofa je lɛ alɛɛcɛ a, anu nɛ ó hi uwɔ igwú ku a gáā nwu ācɛ a. Alɔ lɔtuce ku abɔ a yɔ i gbolo ce “ɔfú nɛ̄ Ɔwɔicō [gē] je” lɛ ɔcɛ a, a géē ya lɔhi.—1 Upít. 4:11.

Ācɛ ō nwu ɔkpá bɛɛka aa,

Ígwu Nōo Gē Leyi Kwu Ɔwa ku Ācɛ Ocijali Ku Ujehofa