Obatɔha ku ɔba mla ɔnyā ku Ācɛ O Yɛce Ukraist nōo yɔ i nyɔ mɛɛlɛ gē bi owoofu géē lɛ Ujehofa, ó klla gē bi eeye gē lɛ ɔba mla ɔnyā a duu. (Umák. 10:9) O ya ɛɛ ku obatɔha ku ɔba mla ɔnyā kóō yɔ i nyɔ gbɔbu kéē klla lɛ eeye a, Ācɛ O Yɛce Ukraist cika ō yɛce ukɔ́ ku Ubáyíbu yiili eko néē gáā fu ɔcɛ nōo géē wɛ ɔba amāŋ ɔnyā uwa a.

Gbɔbu ɛɛ ku ɔcɛnyilɔ mɛmla ɔcɛnya kéē gbɔɔ iyawu ō lɛ iyi uwa, ó géē wɛ ɔdā ijeeyi kéē gbeyi gbeeko néē le gla eko nɛ “unwū ɔnyā” amāŋ unwu ɔcɛnyilɔ ‘le lɔfu tu uwa iye a’ ohigbu ka eko ɔɔma unwu ku ɔkpiye i gē cɛ lɛ ɔcɛ ya ōmiya ku ijeeyi ŋ. (1 Ukɔ́r. 7:36) Ó géē wɛ ɔdā ijeeyi ō bi eko nɛ á lɛ ɔba amāŋ ɔnyā ɛɛ ŋ ma le ya ku ɛma nɛ a lɛ mla Ujehofa a kóō lɔfu nɛhi. A klla lɔfu bi eko ɔɔma duu lɛ nwu ɛlā lɛyikwu auce olɔhi nɛ Ācɛ O Yɛce Ukraist cika ō lɛ a. Aɛnyā géē ta ɔ abɔ ku a ya ɔdā alɛwa nōo géē ya ku obatɔha ku uwɔ kóō nyɔ mɛɛlɛ.

Gbɔbu ɛɛ ku a cɛ ō lɛ ɔba amāŋ ɔnyā, le eko taajɛ lɔɔlɔhi ku a lɛ “ɛdɔ ɔ̄cɛ ɔkwɛ̄yi [nɛ ó] wɛ ipú ɔtū” a jé. (1 Upít. 3:4) Ɔdaŋ ku a lɛ aafu duuma ipu ɔtu, lɛ ɔka ka lɛyikwu ɔ mla ɔcɛ nɛ a gáa lɛ a. Ipu obatɔha ku ɔba mla ɔnyā, leyi ku uwɔ kwu ɔdā nɛ a lɔfu je lɛ obiiye ku uwɔ fiyɛ ɔdā nɛ a yɔ i leyice ku a géē lɛ ŋma ɛgiyi nu a. (Ufíl. 2:3, 4) Ɔdaŋ ku a gē bi ukɔ́ ku Ubáyíbu le yuklɔ gbɔbu ɛɛ ku á lɛ ɔba amāŋ ɔnyā, ó géē tɔɔtɛ gā uwɔ fiyɛ ō ya lɛ a gɔbu igbihi nɛ a le lɛ, o ya ɛɛ ku obatɔha a kóō lɛ eeye.

LƐ UVIDIO NYĀ MAFU NŌO KAHINII: Ō YA OTUTU KU ƆBA MLA ƆNYĀ Ō LƐ—AYA 3: ‘LƐ ƆDĀ NƐ A GÁĀ ŊMO TU Ɔ A JÉ GBƆBU,’ CƐƐ AA LƐ ƆKA NŌO BA NYĀ CILA:

• Ɛgɛnyá nɛ ɛma ku ɔyinɛ nɔnya a mla Ujoe jɛ gɔbu a?

• Ɔdi nɛ ɔyinɛ nɔnya má abɔ ō gáā gbɔɔ ō jé ɔ tōōtɔ̄ɔ̄ a?

• Ɛgɛnyá nɛ adā mla ɛ́nɛ́ nu ta ɔ abɔ a, ōmiya ku ijeeyi nyá nōó kē ya a?