Ɔdiya nɛ a cika ō da adā mla ɛ́nɛ́ uwɔ ɔdā nɛ a yɔ i gbɛla a? (Aíit. 23:26) Ohigbu ka Ujehofa lɛ uklɔ ɔɔma je lɛ uwa ō leyi kwu uwɔ klla gbo uwɔ. (Aíjē 127:3, 4) Ó géē lɔnɔ lɛ uwa ō ta uwɔ abɔ ɔdaŋ ku a kwu ɛgbá mla unwalu ku uwɔ i tayinu ŋma ɛgiyi uwa. Ɔdā ɔhá kpɔ, á gáā nwu ɛlā ŋma ocabɔ ku ɔdā néē má ipu oyeeyi ku uwa ɛ ma ŋ. Ó wɛ ɔdobɔbi ō je ɔdā ōhī tayinu ŋma ɛgiyi adā mla ɛ́nɛ́ uwɔ ekoohi nɛɛ? Obɔbi ekoohi ŋ, amáŋ leyi kwɛɛcɛ ku a hii plla uwa ŋma lɛ ō da uwa ɛlā ɛkɛmgbɛ néē géē kpɔtuce ɔ ŋ.—Aíit. 3:32.

Ɛgɛnyá nɛ a lɔfu kɛla lɛ adā mla ɛ́nɛ́ uwɔ a? Ceyitikwu ku a lɛ eko nōo lɔhi gā uwɔ mla uwa tu. Ɔdaŋ ka ɔɔma i kē tɔɔtɛ ŋ, a lɔfu lɛ uleta ta fu éyi ku uwa ku a da ɔ ɛgɛ nɛ ɔtu ya uwɔ lɛ a. Ɔdaŋ néē kē dɔka ō kɛla lɛyikwu ɛlā éyi, nɛ awɔ a i kē dɔka ō kɛla lɛyikwu ɔ ŋ bɛɛ? Bla kéē dɔka ō ta uwɔ abɔ ɔkwɔɔkwɛyi. Leyi má adā mla ɛ́nɛ́ uwɔ kéē wɛ ācɛ nɛ a cika ō piyatɔha mla uwa, á leyi má uwa bɛɛka aolɛla ku uwɔ ŋ. Oceyitikwu duuma nɛ a ya o ya ɛɛ ku a kɛla lɛ adā mla ɛ́nɛ́ uwɔ ŋma ɔtu a géē lɛ itene gā uwɔ ipu ɛjɛɛji oyeeyi ku uwɔ, ó klla géē wɛ oyeeyi opiyoo!—Aíit. 4:10-12.

LƐ UVIDIO NYĀ MAFU NŌO KAHINII: OYEEYI KU ƐDRƆ KU UM—ƐGƐNYÁ NƐ UM GÉĒ KƐLA LƐ ADĀ MLA Ɛ́NƐ́ KU UM A? CƐƐ AA LƐ ƆKA NŌO BA NYĀ CILA:

• Ɔdi nɛ Esther mla u Partik wa i jé lɛyikwu iyi uwa a?

• Ɔdi nɛ a lɔfu nwu ŋma ocabɔ ku Ujisɔsi a?

• Ɛgɛnyá nɛ adā mla ɛ́nɛ́ uwɔ mafu kéē lɛ ɛlá wu uwɔ a?

• Aukɔ́ ku Ubáyíbu nyá lɔfu ta uwɔ abɔ kɛla lɛ adā mla ɛ́nɛ́ uwɔ a?