ỌGỌST 31, 2022 | E DEGHARỊRỊ YA NA JENỤWARỊ 26, 2023
RỌSHỊA

OTÚ IHE SI KWỤRỤ—NWANNA A MARA IKPE | “Jehova Enyela M Ndị Enyi Kwụ M n’Azụ Ụjọ Na-anaghị Atụ”

KPỌWA

N’abalị iri abụọ na anọ n’ọnwa Jenụwarị, Ụlọikpe Kuznetskiy nke Novokuznetsk, dị na Kemerovo, mara Nwanna Sergey Sushilnikov ikpe ma kwuo na a ga-eji afọ isii lee ma ọ̀ ga-edebe iwu ndị ha nyere ya. Ọ bụrụ na o debeghị ha, a ga-atụ ya mkpọrọ. Ọ gaghị aga mkpọrọ ka ọ dị ugbu a.

Afọ Ihe Ndị A Kọrọ Akụkọ Ha Mere

Nọvemba 2019

Ndị uwe ojii tinyere ihe ga-eme ka ha na-anụ ihe Sergey na-ekwu n’ekwentị, na-esetakwa vidio ihe na-eme n’ụlọ ya
Jun 3, 2021

Ha gbara ya akwụkwọ na ọ na-eme mpụ
Jun 8, 2021

Ndị uwe ojii bịara na-achọ ihe n’ụlọ Sergey, kpụrụ ya na nwunye ya gaa ịgba ha ajụjụ
Julaị 15, 2021

Ọchịchị etiti obodo ha debara aha ya n’ebe e dere aha ndị omempụ, jichiekwa ego ha dowere n’ụlọ akụ̀
Febụwarị 8, 2022

E boro ya ebubo na ọ na-ahaziri òtù ndị omempụ ọrụ ma na-arụrụ ha ọrụ. A machikwara ha isi n’obodo ha gaa ebe ọ bụla
Mach 30, 2022

A malitere ikpe ya ikpe

Onye Ọ Bụ

Sergey Sushilnikov

Mgbe A Mụrụ Ya: 1957 (Korkino, Chelyabinsk Region)

Akụkọ Ndụ Ya: Ọ bụ onye na-elekọta ọrụ a na-arụ n’otu ụlọ ọrụ na-enye ndị mmadụ ọkụ. Ọ laala ezumike nká

Ọ lụrụ Tatyana n’afọ 1979. Ha nwere ụmụ nwaanyị abụọ

O si n’aka nwanne nwunye ya mata gbasara Ndịàmà Jehova. Ya na nwunye ya mere baptizim n’afọ 1996

Ihe Ndị O Kwuru

Olee ihe Baịbụl kwuru na-enyere gị aka n’oge a ihe siri ike?

Ihe e kwuru n’Ilu 17:17 na-atọgbu m atọgbu. Ebe ahụ sịrị: “Ezigbo enyi na-egosi mgbe niile na ọ hụrụ enyi ya n’anya. Ọ bụkwa nwanne nke na-enyere enyi ya aka n’oge nsogbu.” N’oge a a na-akpagbu m, achọsiri m ike ka ndị enyi m nyere m aka. Achọpụtala m na ihe e kwuru n’Ilu 17:17 bụ eziokwu. Jehova enyela m ndị enyi kwụ m n’azụ ụjọ na-anaghị atụ, ndị dị njikere inyere m aka mgbe ihe siri ike.

Olee otú ụmụnna sirila kwado gị na nwunye gị?

Mgbe ndị uwe ojii kwaghasịchara ụlọ anyị ka ha na-achọ ihe, ha kpụụrụ anyị gaa n’ụlọ ọrụ ha ịgba anyị ajụjụ. E bu ụzọ hapụ nwunye m. Ozugbo o rutere ụlọ, otu nwanna nwaanyị katara obi bịa n’ụlọ anyị. Ụmụnna anyị ndị ọzọ bịakwara nyere anyị aka dozie ụlọ anyị a kwaghasịchara. Otu okenye bịara ka ọ mara otú anyị mere n’agbanyeghị na o nwere ike ime ka a nwụchiekwa ya.

Na Jọn 13:35, Jizọs sịrị: “Ọ bụrụ na unu hụrụ ibe unu n’anya, mmadụ niile ga-eji ya mata na unu bụ ndị na-eso ụzọ m.” Ọ magburu onwe ya na mụ na nwunye m nwere ụmụnna hụrụ anyị n’anya otú a nakwa na anyị ejirila anya anyị hụ otú ha si egosi na ha hụrụ anyị n’anya.

Obi dị anyị ụtọ na Jehova ga na-enyere ndị ji obi ha niile na-ejere ya ozi aka mgbe niile “n’oge nsogbu.”—Abụ Ọma 46:1.

AKỤKỌ NDỊ SI N'OBODO DỊ ICHE ICHE