Nke #1: Ị na-emere ndị ọzọ ihe ọma, hanwa ga na-emekwara gị ihe ọma.

 Ndị mmadụ hụ na ị na-enye ndị ọzọ ihe, ha ga na-enyekwa gị ihe. Baịbụl kwuru, sị:

•  “Na-enyenụ ihe, ndị mmadụ ga-enyekwa unu ihe. . . . Ihe unu ji atụ̀ ihe ka ha ga-eji tụọrọ unu ihe.”​—Luk 6:​38.

Nke #2: Ị na-emere ndị ọzọ ihe ọma, ị na-emekwara onwe gị ihe ọma ma.

Inye ndị ọzọ ihe ga-eme ka ị mara na ị bara uru, meekwa ka i nwee obi ụtọ mmadụ na-enwe ma o nye ndị ọzọ ihe. Lee otú Baịbụl sị kwuo ya:

• “A na-enweta obi ụtọ ka ukwuu n’inye ihe karịa ka a na-enweta n’ịnara ihe.”​—Ọrụ Ndịozi 20:35.

• “Mgbe ị na-akpọ oriri, kpọọ ndị ogbenye, ndị nwere nkwarụ, ndị ngwọrọ, ndị ìsì; ị ga-enwekwa obi ụtọ, n’ihi na ha enweghị ihe ọ bụla ha ga-eji kwụọ gị ụgwọ.”​—Luk 14:13, 14.

O nweghị ebe a na-enweghị ndị na-eto eto na-emere ndị ọzọ ihe ọma. Lee ụfọdụ n’ime ha.

 “Mgbe ụfọdụ, m bịa ka m nọrọ ọdụ lee tiivi, mụ echeta mama m na papa m gara ọrụ, chetakwa na ike ga-agwụcha ha ma ha lọta. N’ihi ya, m na-ebili gaa saa efere ma zaa ụlọ. M na-emekwara ha kọfị n’ihi na ọ bụ ihe na-amasị ha. Mama m lọta, ọ na-asị, ‘Ime ụlọ a mara mma, ọ na-esikwa ísì ọma. Nwa m, i meela nnụ?’ Imere papa m na mama m ụdị ihe a na-eme m obi ụtọ.”​—Casey.

“Papa m na mama m na-egboro m mkpa m niile. N’ihi ya, mgbe nnukwu ihe mebiri n’ụgbọala ha n’afọ gara aga, m nyere ha akwụkwọ ha ga-eji dọrọ ego mezie ya, n’agbanyeghị na o mere ka obere ego fọdụziere m. Ọ bụ eziokwu na ha ekweghị anara m ego ahụ, ma m rịọsiri ha ike ka ha were ya. O nweghị ihe ihe ahụ m meere ha bụ ma e jiri ya tụnyere ihe ha meerela m. Obi tọrọ m ezigbo ụtọ na m nyere nne na nna m ihe.”​—Holly.

Ị̀ maara? Ọtụtụ Ndịàmà Jehova na-eto eto na-enwe obi ụtọ n’ihi na ha na-enyere ndị ọzọ aka ịmụta ihe dị na Baịbụl. Ụfọdụ n’ime ha akwagadịla ná mba ọzọ n’ihi na e nwechaghị ndị na-akụzi Baịbụl ná mba ahụ.

“Esi m Amerịka kwaga Meksiko ka m nye aka na-akụziri ndị mmadụ Baịbụl n’ebe ahụ. Mgbe ụfọdụ, anaghị m enwe ego ma ọ bụ ihe ọzọ m ga-enye ndị ọzọ n’ihi na o nweghị otú ọ dịịrị m. Ma, achọpụtala m na m jiri ike m na oge m gaa ozi ọma, ndị m ziri ozi ọma na-enwe ezigbo obi ụtọ karịadị otú ha gaara enwe ma a sị na m nyere ha ego ma ọ bụ ihe ndị ọzọ.”​—Evan.

Ị̀ ga-achọ inwe obi ụtọ mmadụ na-enwe ma o meere ndị ọzọ ihe ọma? Lee ihe ụfọdụ ị ga-eme.

 Iji nyere ndị ezinụlọ unu aka:

• Saa efere, zaa ụlọ, ma ọ bụkwanụ gị ehichaa ụlọ n’echeghị ka a gwa gị ya agwa

• Sie nri

• Kelee papa gị na mama gị maka ihe ọma ndị ha na-emere gị ma ọ bụ gị edee ya na kaadị nye ha

• Nyere nwanne gị aka ka o mee ihe onye nkụzi ha sịrị ya mee

Iji nyere ndị na-abụghị ndị ezinụlọ unu aka:

• Gaa leta onye ahụ́ na-adịghị

• Gaa na nke onye agbata obi unu merela agadi meere ya ihe ụfọdụ

• Gaa leta onye na-anaghịzi apụta èzí

• Zụta onyinye ị ga-enye onye ihe na-esiri ike ma nye ya ya

Ihe ga-enyere gị aka: E wezụga ihe ndị a e dere ebe a, gbalịa cheta n’onwe gị ụzọ ndị ọzọ i nwere ike isi meere mmadụ ihe ọma. Gbalịakwa meere mmadụ ihe ọma n’izu a. O nwere ike ịtụ gị n’anya otú obi ga-esi tọọ gị ụtọ.

“I nyere ndị ọzọ aka, obi ga-adị gị ụtọ. Afọ ga-ejukwa gị. O nwedịrị ike ịbụ na ihe ahụ i meere ndị ọzọ tọrọ gị ụtọ mgbe ị na-eme ya, n’agbanyeghị na ị maghị na ọ ga-atọ gị ụtọ ná mmalite. O nwekwara ike ịbụ na ọ dịghị gị ka ihe ahụ i mere ò furu gị ihe, ebe ọ bụ na ọ bakwaara gịnwa ezigbo uru.”​—Alana.