Samuel nke Mbụ 23:1-29
23 Ka oge na-aga, a bịara kọọrọ Devid, sị: “Ndị Filistia na-alụso ndị Kaịla agha,+ na-ebukọrọkwa ihe ndị dị n’ebe a na-azọcha ọka.”
2 Devid wee jụọ Jehova,+ sị: “Ọ̀ bụ m gaa gbuo ndị Filistia ndị a?” Jehova asị Devid: “Gaa gbuo ndị Filistia ma napụta ndị Kaịla n’aka ha.”
3 Ma, ndị agha Devid sịrị ya: “Egwu ji anyị ugbu a anyị ka nọ na Juda ebe a.+ Marazienụ ihe ga-eme ma anyị gaa Kaịla ịlụso ndị agha ndị Filistia agha.”+
4 Devid jụkwara Jehova ase ọzọ.+ Jehova asị ya: “Gawa Kaịla n’ihi na m ga-enyefe ndị Filistia n’aka gị.”+
5 N’ihi ya, Devid na ndị agha ya jere Kaịla lụso ndị Filistia agha. Ọ sụrụ ha akwụ ma chịrị anụ ụlọ ha. Otú a ka Devid si napụta ndị bi na Kaịla.+
6 Abayata+ nwa Ahimelek chị efọd n’aka mgbe ahụ ọ gbakwuuru Devid na Kaịla.
7 A kọọrọ Sọl, sị: “Devid nọ na Kaịla.” Sọl asị: “Chineke enyefeela ya n’aka m,+ n’ihi na o jirila aka ya kee onwe ya agbụ, ebe ọ bụ na ọ banyere n’obodo nwere ọnụ ụzọ ámá na ihe e ji atụchi ya.”
8 Sọl wee kpọkọta ndị agha ya niile ka ha gaa Kaịla nọchibido Devid na ndị agha ya.
9 Mgbe Devid matara na Sọl na-akpara ya nkata ọjọọ, ọ gwara Abayata onye nchụàjà, sị: “Biko, chịta efọd ebe a.”+
10 Devid sịkwara: “Jehova bụ́ Chineke Izrel, ohu gị anụla na Sọl na-achọ ịbịa bibie obodo a bụ́ Kaịla n’ihi m.+
11 Ndị na-achị* Kaịla hà ga-enyefe m n’aka ya? Sọl ọ̀ ga-abịa otú ohu gị nụrụ? Jehova bụ́ Chineke Izrel, biko, gwa ohu gị.” Jehova asị ya: “Ọ ga-abịa.”
12 Devid ajụọkwa, sị: “Ndị na-achị Kaịla hà ga-enyefe mụ na ndị agha m n’aka Sọl?” Jehova asị: “Ha ga-enyefe unu n’aka ya.”
13 Devid na ndị agha ya, ndị dị ihe dị ka narị ụmụ nwoke isii (600),+ wee si na Kaịla pụọ ozugbo, na-ejegharị ebe ọ bụla aka na-agaghị akpa ha. Mgbe a kọọrọ Sọl na Devid agbapụla na Kaịla, ọ hapụziri ịchụrụ ya gawa.
14 Devid gara biri n’ala ịkpa Zif bụ́ ugwu ugwu,+ n’ebe siri ike mbanye. Sọl na-achọgharịkwa ya ụbọchị niile,+ ma Jehova enyefeghị ya n’aka ya.
15 Mgbe Devid nọ n’ala ịkpa Zif dị na Horesh, ọ ma na* Sọl achọrọla ya bịa ebe ahụ ka o gbuo ya.
16 Ma Jonatan nwa Sọl gara hụ Devid ebe ọ nọ na Horesh, gbaakwa ya ume ka ọ tụkwasị Jehova obi.+
17 Ọ gwara ya, sị: “Ụjọ atụla gị, n’ihi na Sọl nna m agaghị emeli gị ihe ọ bụla. Ị ga-abụkwa eze Izrel,+ mụnwa ga-abụkwa osote gị. Nna m makwa gbasara ya.”+
18 Ha abụọ gbakwara ndụ+ n’ihu Jehova, Devid anọrọkwa na Horesh, Jonatan alaghachi n’ụlọ ya.
19 Ndị Zif mechara gaa Gibia, na nke Sọl,+ sị ya: “Ị̀ makwa na ebe Devid zoro dị anyị nso?+ Ọ bụ n’ebe siri ike mbanye na Horesh,+ n’ugwu Hakaịla,+ nke dị n’ebe ndịda* Jeshaịmọn.*+
20 Eze, bịa mgbe ọ bụla ị* chọrọ ịbịa. Anyị ga-enyefe ya n’aka gị.”+
21 Sọl asị ha: “Ka Jehova gọzie unu, n’ihi na unu emeterela m ebere.
22 Biko, gaanụ gbaa mbọ chọpụta kpọmkwem ebe ọ nọ nakwa onye hụrụ ya ebe ahụ, maka na a gwara m na ọ dị ezigbo aghụghọ.
23 Saanụ anya na mmiri chọpụta ebe niile ọ na-ezo. Bịakwanụ gwa m ma unu hụ kpọmkwem ebe ọ na-ezo. M ga-esozi unu gaa. Ọ bụrụkwa na ọ nọ n’ala Juda, m ga-achọ ya n’obodo niile dị na ya, hụ na m chọtara ya.”
24 Ha gawara buru Sọl ụzọ garuo Zif.+ Devid na ndị agha ya nọ mgbe ahụ n’ala ịkpa Meyọn+ nke dị n’Araba+ n’ebe ndịda Jeshaịmọn.
25 Sọl na ndị agha ya mechara bịa ịchọ ya.+ Mgbe a gwara ya Devid, ọ gawara ozugbo ná nnukwu nkume+ dị n’ala ịkpa Meyọn, ma nọrọ ebe ahụ. Mgbe Sọl nụrụ ya, ọ chụụrụ Devid banye n’ala ịkpa Meyọn.
26 Mgbe Sọl ruru n’otu ugwu, nọrọ n’otu akụkụ, Devid na ndị agha ya nọ n’akụkụ nke ọzọ n’ugwu ahụ. Devid nọ na-eme ngwa ngwa ka ọ gbanahụ+ Sọl, ma Sọl na ndị agha ya nọ na-eru Devid na ndị agha ya nso ka ha jide ha.+
27 Ma otu onye bịara gwa Sọl, sị: “Bịa ngwa ngwa, n’ihi na ndị Filistia abịala n’ala anyị ịlụso anyị agha.”
28 Sọl wee kwụsị ịchụ Devid+ ma gawa ịlụso ndị Filistia agha. Ọ bụ ya mere e ji akpọ ebe ahụ Nnukwu Nkume A Nọ Kewaa.
29 Devid sizi ebe ahụ gaa nọrọ n’ebe siri ike mbanye n’En-gedi.+
Ihe E Dere n'Ala Ala Peeji
^ O nwere ike ịbụ, “Ndị nwe ala.”
^ O nwere ike ịbụ, “ụjọ ji ya maka na.”
^ Na Hibru, “n’akụkụ aka nri.”
^ O nwere ike ịbụ, “ọzara; ala ịkpa.”
^ Ma ọ bụ “mkpụrụ obi gị.”
