Aịzaya 14:1-32
14 Jehova ga-emere Jekọb ebere,+ họrọkwa Izrel ọzọ.+ Ọ ga-eme ka ha biri* n’ala ha.+ Ndị mbịarambịa ga-agakwurukwa ndị ezinụlọ Jekọb, ha na ha ebiri.+
2 Ndị obodo dị iche iche ga-edulata ha n’obodo ha. Ndị ezinụlọ Izrel ga-akpọrọkwa ha ka ha bụrụ ndị nwoke na ndị nwaanyị ga na-eje ozi+ n’ala Jehova. Ndị ha na-agbaburu ohu ga na-agbaziri ha ohu, ndị na-amanyebu ha ịrụ ọrụ ga-anọzi n’okpuru ha.
3 Mgbe Jehova ga-eme ka nsogbu unu na ihe na-egbu unu mgbu kwụsị, meekwa ka unu kwụsị ịgba ohu,+
4 unu ga-amalite ịma eze Babịlọn njakịrị, sị:
“Ehee, nke onye na-amanye ndị ọzọ ịrụ ọrụ agwụla.
Mmegbu alaala.+
5 Jehova agbajiela mkpara ndị ajọ omume,Ya bụ, mkpara ndị na-achị achị.+
6 O bibiela onye na-eji ezigbo iwe eti ndị dị iche iche ihe n’akwụsịghị akwụsị,+Onye ji iwe na-echi mba dị iche iche ọnụ n’ala n’eleghị anya n’azụ.+
7 Ugbu a, ụwa niile ezurula ike, daakwa jụụ.
Ndị mmadụ na-etikwa mkpu ọṅụ.+
8 Osisi junipa na osisi sida ndị dị na LebanọnSodị na-aṅụrị ọṅụ n’ihi ihe mere gị.
Ha na-asị, ‘Kemgbe ị dara,O nweghị onye na-egbutu osisi nke na-abịa egbutu anyị.’
9 Mgbe e liri gị, ili* mara jijijiMgbe ọ hụrụ gị.
Ọ bụ gị mere o ji kpọtee ndị nwụrụ anwụ,Ya bụ, ndị niile ji aka ike chịa ụwa.*
O mekwara ka ndị eze niile na-achị mba dị iche iche bilie n’ocheeze ha.
10 Ha niile malitere ịsị gị,‘Ike ọ̀ gwụla gị otú ọ gwụrụ anyị?
Ị̀ dịzi ka anyị?
11 Nganga gị ebiela.
A naghịzi anụ ụda ụbọ akwara gị.*+
A gbasaala ikpuru n’okpuru gị ka i dinara n’elu ya.
Ikpuru ekpuchiekwala gị.’
12 Nwa chi ọbụbọ, onye na-enwu ka kpakpando,Ị̀ hụla ka i si si n’eluigwe daa?
Onye meriri mba niile,Ị̀ hụla ka i si daruo ala?+
13 I kwuru n’obi gị, sị: ‘M ga-agbago n’eluigwe.+
M ga-ebuli ocheeze m ka ọ dị elu karịa kpakpando Chineke.+
M ga-anọdụ ala n’ugwu nzukọ,N’ime ime ebe ugwu.+
14 M ga-agafe ígwé ojii, gbagoo n’eluigwe.
M ga-eme onwe m ka m yie Onye Kacha Elu.’
15 Ma, a ga-achụba gị n’ili,*Chụba gị n’ebe kacha mie emie n’ili.
16 Ndị na-ahụ gị ga-ekporopụ anya na-ele gị.
Ha ga-eleru gị anya ma sị,‘Ọ̀ bụ onye a bụ onye ahụ nọ na-eme ka ụwa maa jijiji,Onye nọkwa na-emenye alaeze dị iche iche ụjọ?+
17 Ọ̀ bụ ya bụ onye mere ka ụwa niile dị ka ala ịkpa,Meriekwa obodo ndị dị na ya,+Onye na-anaghịkwa ekwe ahapụ ndị o ji eji ka ha laa?’+
18 A kwanyeere ndị eze niile ọzọ chịrị mba dị iche iche ùgwùMgbe a na-eli ha.
N’eziokwu, a kwanyeere onye nke ọ bụla n’ime ha ùgwù.
19 Ma, e lighị gịnwa eli.
A tụfuru gị ka ome* na-abaghị uru.
Ndị e ji mma agha magbuo, ndị a tụbara n’olulu bụ́ okwute okwuteKpuchiri gị ka ákwà.
Ị dị ka ozu a na-azọ ụkwụ.
20 E liri ndị eze ndị ahụ eli, ma, a gaghị eli gịnwa eli,N’ihi na i bibiri ala gị,Gbuokwa ndị nke gị.
O nweghị mgbe ọzọ a ga-echeta aha ụmụ ndị na-eme ihe ọjọọ.
21 Rụọnụ ebe a ga-anọ gbuo ụmụ yaMaka ihe ọjọọ ndị nna nna ha mere.
Igbu ha ga-eme ka ha ghara ibili weghara ụwa,Ebe niile n’ụwa abụrụzie obodo ha.”
22 Jehova nke ụsụụ ndị agha kwuru, sị: “M ga-emesi ha ike.”+
Jehova kwukwara, sị: “M ga-ehichapụ aha Babịlọn, bibiekwa ndị ya fọrọnụ, ma ụmụ ha ma ụmụ ụmụ ha.”+
23 Jehova nke ụsụụ ndị agha kwuru, sị: “M ga-eme ka ọ bụrụ ebe ebi ogwu ga-ebi, meekwa ka ọ bụrụ ọdọ mmiri ahịhịa juru. M ga-ebibikwa ya kpamkpam.”*+
24 Jehova nke ụsụụ ndị agha ṅụrụ iyi, sị:
“Ọ bụ ihe m zubere ga-eme.
Ọ bụkwa ihe m kpebiri ga-eme.
25 M ga-ebibi onye Asiria nọ n’ala m,Zọpịakwa ya n’ugwu m.+
M ga-ewepụ yok ọ nyawara ndị m,Butuokwa ibu o bukwasịrị n’ubu ha.”+
26 Ihe a ka e kpebiri ime ụwa niile.
Ihe a bụkwa aka a gbatịrị iji mee mba niile ihe.
27 Jehova nke ụsụụ ndị agha ekpebiela ihe ọ ga-eme,Ònye ga-emeli ka ọ ghara inwe isi?+
Ọ gbatịakwala aka ya.
Ònyekwa ga-emeli ka o weghachi ya?+
28 N’afọ Eze Ehaz nwụrụ,+ Chineke kwuru ihe a:
29 “Ndị Filistia, ka onye ọ bụla n’ime unu ghara ịṅụrị ọṅụN’agbanyeghị na a gbajiela mkpara onye na-apịa unu ihe.
Agwọ ọjọọ ga-esi na mgbọrọgwụ agwọ pụta,+Ụmụ ya ga-abụkwa agwọ na-acha ọkụ ọkụ nke na-efe efe.*
30 Ụmụ ndị ọ na-enweghị ka ọ hà ha ga-eriju afọ.
Ndị ogbenye ga-edinakwa ala, obi eruo ha ala,Ma, m ga-eji ụnwụ gbuo ndị gị.
A ga-egbukwa ndị gị fọrọnụ.+
31 Ọnụ ụzọ ámá, besie ákwá ike. Obodo, beekwa ákwá.
Ndị Filistia, obi ga-awụnye unu niile n’afọ.
N’ihi na ndị agha si n’ebe ugwu na-abịa ka anwụrụ ọkụ.
E nweghịkwa onye ọ bụla n’ime ha na-aga nọrọ iche.”
32 Gịnị ka ha ga-agwa ndị ozi mba ahụ zitere?
Ha ga-agwa ha na Jehova atọọla ntọala Zayọn,+Nakwa na ndị ya ọ na-enweghị ka ọ hà ha ga-agbaba n’ime ya.
Ihe E Dere n'Ala Ala Peeji
^ Ma ọ bụ “zuru ike.”
^ Ma ọ bụ “Shiol.” Gụọ Nkọwa Okwu.
^ Na Hibru, “ndị dị ka mkpi chịrị ụwa.”
^ Ma ọ bụ “Nganga gị na ụda ụbọ akwara gị dịzi n’ili.”
^ Ma ọ bụ “na Shiol.” Gụọ Nkọwa Okwu.
^ Ma ọ bụ “alaka.”
^ Na Hibru, “M ga-ejikwa ázị́zà e ji ala ihe n’iyi zaa ya.”
^ Ma ọ bụ “agwọ ọjọọ nke na-efe ọsọ.”
