Abụ Ọma 107:1-43
(Abụ Ọma 107-150)
107 Keleenụ Jehova n’ihi na ọ dị mma.+
Ịhụnanya ya na-adịru mgbe ebighị ebi.+
2 Ka ndị Jehova napụtara kwuo otú ahụ,Bụ́ ndị ọ napụtara n’aka onye iro,+
3 Ndị o si n’ala dị iche iche kpọkọta.+
O si ma n’ebe ọwụwa anyanwụ ma n’ebe ọdịda anyanwụ,Ma n’ebe ugwu ma n’ebe ndịda kpọkọta ha.+
4 Ha wagharịrị n’ala ịkpa, n’ọzara.
Ha ahụghị ụzọ ha ga-esi gaa n’obodo ha ga-ebi.
5 Agụụ gụrụ ha, mmiri gụkwara ha.
Ezigbo ike gwụrụ ha.*
6 Ha nọ na-ebesara Jehova ákwá mgbe ha na-ata ahụhụ.+
Ọ napụtara ha ná nsogbu ha nọ na ya.+
7 O mere ka ha jee ije n’ezigbo ụzọ,+Ka ha wee bata n’obodo ha ga-ebi.+
8 Ka ndị mmadụ kelee Jehova+ n’ihi ịhụnanya ya*Nakwa n’ihi ọrụ ndị dị ebube ọ na-arụrụ ndị mmadụ.+
9 N’ihi na o nyela ndị mmiri na-agụ mmiri.
O jirikwala ihe ọma dị iche iche nyejuo ndị* agụụ na-agụ afọ.+
10 Ụfọdụ bibu n’oké ọchịchịrị,Bụ́ ndị mkpọrọ a na-emekpa ahụ́, ndị a tụkwara ịga.
11 N’ihi na ha nupụrụ isi n’ihe Chineke kwuru.
Ha ledara ndụmọdụ Onye Kacha Elu anya.+
12 N’ihi ya, o mere ka ihe siere ha ike ka ha wee dị umeala n’obi.+
Ha dara, e nweghịkwa onye nyeere ha aka.
13 Ha kpọkuru Jehova ka o nyere ha aka mgbe ha na-ata ahụhụ.
Ọ napụtara ha ná nsogbu ha nọ na ya.
14 O si n’oké ọchịchịrị kpọpụta ha,Ọ dọbisịkwara agbụ e kere ha.+
15 Ka ndị mmadụ kelee Jehova n’ihi ịhụnanya ya*+Nakwa n’ihi ọrụ ndị dị ebube ọ na-arụrụ ndị mmadụ.
16 N’ihi na o tiwaala ibo ụzọ e ji ọla kọpa rụọMa gbuwaa ígwè e ji atụchi ha.+
17 Ha dị nzuzu, ha takwara ahụhụ+Maka mmehie ha na ihe ọjọọ ha mere.+
18 E nweghịzi nri ọ bụla na-agụ ha agụụ.
Ọ fọrọ obere ka ha nwụọ.
19 Ha na-akpọku Jehova ka o nyere ha aka mgbe ha na-ata ahụhụ.
Ọ na-anapụtakwa ha ná nsogbu ha nọ na ya.
20 Ọ na-enye iwu, e wee gwọọ ha.+
Ọ na-anapụtakwa ha n’olulu ebe e ji ha.
21 Ka ndị mmadụ kelee Jehova n’ihi ịhụnanya ya*Nakwa n’ihi ọrụ ndị dị ebube ọ na-arụrụ ndị mmadụ.
22 Ka ha chụọrọ ya àjà ekele,+Jirikwa mkpu ọṅụ kọsaa ọrụ ya.
23 Ndị ji ụgbọ mmiri aga n’oké osimiri,Ndị na-azụ ahịa n’elu nnukwu mmiri,+
24 Ha ahụla ọrụ JehovaNakwa ihe ndị dị ebube o kere n’oké osimiri,+
25 Otú okwu o kwuru si eme ka oké ifufe malite ife,+Meekwa ka e nwee ebili mmiri n’oké osimiri.
26 Ebili mmiri na-ebugoru ha na mbara igwe.
Ọ na-atụbakwa ha n’ala ala osimiri.
Obi na-alọ ha mmiri n’ihi ọdachi chọrọ ịdakwasị ha.
27 Ha na-aṅagharị, na-adagharịkwa ka ndị mmanya na-egbu,E nweghịzi uru ihe niile ha ma gbasara ịkwọ ụgbọ bara.+
28 Ha na-ebesara Jehova ákwá mgbe ahụ ha na-ata ahụhụ,+Ọ na-anapụtakwa ha ná nsogbu ha nọ na ya.
29 Ọ na-eme ka oké ifufe kwụsị ife.
Ebili mmiri na-adajụ.+
30 Ha na-aṅụrị ọṅụ mgbe ihe niile a dara jụụ,Ọ na-edurukwa ha gaa n’ebe ha bu n’obi ịkwụsị ụgbọ ha.
31 Ka ndị mmadụ kelee Jehova n’ihi ịhụnanya ya*Nakwa n’ihi ọrụ ndị dị ebube ọ na-arụrụ ndị mmadụ.+
32 Ka ha too ya n’ebe ndị mmadụ gbakọrọ,+Ka ha tookwa ya n’ebe ndị okenye zukọrọ.
33 Ọ na-eme ka osimiri ghọọ ọzara,Ọ na-eme ka isi mmiri ghọọ ala kpọrọ nkụ,+
34 Ọ na-emekwa ka ala nke na-eme nri ghọọ ala nnu nke na-abaghịzi uru,+N’ihi ihe ọjọọ nke ndị bi na ya na-eme.
35 Ọ na-eme ka ọzara ghọọ ọdọ mmiri nke ahịhịa amị juru,Na-emekwa ka ala kpọrọ nkụ ghọọ isi mmiri.+
36 Ọ na-emekwa ka ndị agụụ na-agụ biri n’ebe ahụ,+Ka ha wee rụọ obodo ha ga-ebi.+
37 Ha na-akụ mkpụrụ n’ubi, na-akọkwa ubi vaịn+Nke na-amị mkpụrụ nke ọma.+
38 Ọ na-agọzi ha, ha adịzie nnọọ ọtụtụ.
Ọ naghị ekwe ka anụ ụlọ ha dị ole na ole.+
39 Ma n’ihi mmegbu a na-emegbu ha na ọdachi na-adakwasị ha na uju ha na-eru,Ha na-adị ole na ole ọzọ, a na-emechukwa ha ihu.
40 Ọ na-eme ka a na-eleda ndị a ma ama anya,Na-emekwa ka ha na-agagharị n’ọzara ụzọ na-adịghị.+
41 Ma ọ na-anapụta ndị ogbenye a na-emegbu emegbu,+Na-emekwa ka ezinụlọ ha dị ọtụtụ ka ìgwè atụrụ.
42 Ndị ezi omume na-ahụ ihe ndị a ṅụrịa ọṅụ.+
Ma a ga-emechi ọnụ ndị ajọ omume niile.+
43 Onye ọ bụla ma ihe ga-ahụ ihe ndị a+Ma chebara ịhụnanya Jehova ezigbo echiche.+
Ihe E Dere n'Ala Ala Peeji
^ Ma ọ bụ “mkpụrụ obi ha.”
^ Ma ọ bụ “ịhụnanya ya pụrụ iche.”
^ Ma ọ bụ “mkpụrụ obi.”
^ Ma ọ bụ “ịhụnanya ya pụrụ iche.”
^ Ma ọ bụ “ịhụnanya ya pụrụ iche.”
^ Ma ọ bụ “ịhụnanya ya pụrụ iche.”
