Ezikiel 9:1-11
9 Chineke ji oké olu kwuo okwu, mụ ejiri ntị m nụ ya. Ọ sịrị: “Kpọọnụ ndị na-ebibi obodo a ka ha bịa nso, ka onye ọ bụla n’ime ha jirikwa ngwá ọgụ ọ ga-eji bibie obodo a!”
2 Ahụrụ m ụmụ nwoke isii si n’ebe ọnụ ụzọ ámá mgbago+ nke chere ihu n’ebe ugwu na-abịa. Onye nke ọ bụla ji ngwá ọgụ o ji akụgbu mmadụ. E nwekwara otu nwoke so ha nke yi uwe linin. Ọ fanyekwara mpi ịnk odeakwụkwọ* n’úkwù. Ha batakwara guzoro n’akụkụ ebe ịchụàjà e ji ọla kọpa rụọ.+
3 Ma ebube Chineke Izrel+ pụrụ n’elu cherob ọ na-adịbu gaa dịrị n’ọnụ ụzọ ụlọ ahụ.+ Chineke wee kpọwa nwoke ahụ yi uwe linin, onye fanyere mpi ịnk odeakwụkwọ n’úkwù.
4 Jehova gwakwara ya, sị: “Gagharịa n’ime obodo a, bụ́ Jeruselem, gakwuru ndị obi na-adịghị mma, ndị na-asụkwa ude+ n’ihi arụ niile a na-akpa na ya, kaa ha akara n’egedege ihu.”+
5 Ọ gwakwara ndị nke ọzọ okwu mụ anụ ya. Ọ gwara ha, sị: “Soronụ ya n’azụ gagharịa n’ime obodo a ma gbuo ndị mmadụ. Unu emela ebere. Unu enwekwala ọmịiko.+
6 Gbuonụ ma agadi ma nwa okorobịa ma nwa agbọghọ na-amaghị nwoke ma nwatakịrị ma ụmụ nwaanyị. Gbuchaanụ ha.+ Ma, unu agala onye ọ bụla nwere akara ahụ nso.+ Malitekwanụ n’ụlọ nsọ m.”+ Ha wee malite ná ndị okenye nọ n’ihu ụlọ ahụ.+
7 Ọ gwakwara ha, sị: “Merụọnụ ụlọ a, meekwanụ ka ndị e gburu egbu ju n’ogige dị na ya.+ Gawanụ!” Ha wee gaa gbuo ndị nọ n’obodo ahụ.
8 Ha gbugidere ndị mmadụ, naanị m afọdụ. M gbukwara ikpere n’ala, kpudo ihu n’ala, tiekwa mkpu, sị: “Ewoo, Ọkaakaa Onyenwe anyị Jehova! Ị̀ na-ebibi ndị niile fọdụrụ n’Izrel n’ihi iwe ị na-ewesa Jeruselem?”+
9 Ya asị m: “Mmehie ndị Izrel na Juda karịrị akarị.+ Ọbara ndị e gburu egbu juru n’ala ha.+ Mpụ jukwara n’obodo ha.+ Ha sịrị, ‘Jehova ahapụla ala a. Jehova anaghị ahụ anyị.’+
10 N’ihi ya, agaghị m emere ha ebere.* Agaghịkwa m enwere ha ọmịiko.+ M ga-eme ka ha jiri isi ha buru ihe ha metara.”
11 M hụkwara ka nwoke ahụ nke yi uwe linin, onye fanyere mpi ịnk n’úkwù, nọ na-akọ otú o si jee. Ọ sịrị: “Emeela m ihe ị gwara m mee.”
Ihe E Dere n'Ala Ala Peeji
^ Ma ọ bụ “ihe odeakwụkwọ ji ede ihe.”
^ Na Hibru, “anya m agaghị emere ha ebere.”
