1. Gịnị mere Jehova ji kee ihe ndị dị ndụ?

E NWERE mgbe Jehova nọ naanị ya. Ma, owu amaghị ya. Ihe niile zuuru ya. Ma, ọ chọrọ ka ndị ọzọ dịrị ndụ ma na-enwe obi ụtọ. Ọ bụ ịhụnanya mere ka Jehova malite ike ihe.​—Ọma 36:9; 1 Jọn 4:19.

2. Olee otú obi dị Jizọs na ndị mmụọ ozi mgbe Jehova kere ihe ndị ọzọ?

² Jehova bu ụzọ kee Ọkpara ya bụ́ Jizọs. O sizi n’aka Ọkpara ya “kee ihe ndị ọzọ niile” ma ọtụtụ ndị mmụọ ozi. (Kọl. 1:16) Obi dị Jizọs ezigbo ụtọ na ya na Nna ya rụkọrọ ọrụ. (Ilu 8:30) Obi dịkwa ndị mmụọ ozi ụtọ. Ha hụrụ mgbe Jehova na Jizọs kere eluigwe na ụwa. Gịnị ka ndị mmụọ ozi ahụ mere? Ha malitere “iti mkpu otuto” mgbe e kere ụwa. O dokwara anya na ha tikwara mkpu otuto mgbe e kere ihe ndị ọzọ, karịchaa ụmụ mmadụ. (Job 38:7; Ilu 8:31) Ihe niile Jehova kere gosiri amamihe ya na otú o si hụ anyị n’anya.​—Ọma 104:24; Rom 1:20.

3. Dị ka e kwuru ná 1 Ndị Kọrịnt 15:​21, 22, olee ihe àjà Jizọs ji ndụ ya chụọ mere ka o kwe omume?

³ Jehova chọrọ ka ụmụ mmadụ biri n’ụwa a mara mma o kere ruo mgbe ebighị ebi ma na-enwe obi ụtọ. Ma, mgbe Adam na Iv nupụụrụ Nna ha hụrụ ha n’anya isi, ha na ụmụ ha enweghịzi ike ịdị ndụ ebighị ebi. (Rom 5:12)  Gịnị ka Jehova meziri? O kwuru ozugbo otú ọ ga-esi anapụta ụmụ mmadụ. (Jen. 3:15) Jehova ga-eji Ọkpara ya bụ́ Jizọs chụọ àjà iji gbapụta ụmụ Adam na Iv n’aka mmehie na ọnwụ. Nke ahụ ga-emezi ka o nye onye ọ bụla họọrọ ife ya ndụ ebighị ebi.​—Jọn 3:16; Rom 6:23; Gụọ 1 Ndị Kọrịnt 15:​21, 22.

4. Olee ajụjụ ndị anyị ga-eleba anya na ha n’isiokwu a?

⁴ E nwere ọtụtụ ajụjụ anyị nwere ike ịjụ gbasara nkwa Chineke kwere ịkpọlite ndị nwụrụ anwụ n’ọnwụ. Dị ka ihe atụ, olee otú e nwere ike isi kpọlite ndị nwụrụ anwụ? Ànyị ga-amata onye anyị nwụrụ anwụ ma a kpọlite ya? Olee otú mbilite n’ọnwụ ga-esi mee ka anyị nwee obi ụtọ? Oleekwa ihe mbilite n’ọnwụ na-akụziri anyị gbasara ịhụnanya Jehova, amamihe ya, na ndidi ya? Ka anyị leba anya n’ajụjụ ndị a.

5. Gịnị mere anyị ji kwesị ịna-atụ anya na a gaghị akpọlite ndị niile nwụrụ anwụ otu mgbe?

⁵ Mgbe Jehova ga-esi n’aka Ọkpara ya kpọlite ọtụtụ nde mmadụ, anyị nwere ike ịtụ anya na ọ bụghị ndị niile nwụrụnụ ka a ga-akpọlite otu mgbe. N’ihi gịnị? N’ihi na ọ bụrụ na ha niile ebilite n’ọnwụ n’ụwa otu mgbe, o nwere ike ịkpata ọgba aghara. Jehova anaghị eme ihe ọ bụla a na-ahazighị ahazi. Ọ ma na e kwesịrị ịhazi ihe niile ahazi ka ndị mmadụ nwee ike ibi n’udo. (1 Kọr. 14:33) Jehova nwere amamihe na ndidi mgbe ya na Jizọs ji nwayọọ nwayọọ hazie ụwa a ka ndị mmadụ nwee ike ibi na ya tupu ya ekee mmadụ.  Jizọs ga na-enwekwa ndidi na amamihe n’otu puku afọ ahụ ọ ga-achị mgbe ya na ndị Amagedọn na-egbughị ga na-akwadebe ụwa iji nabata ndị a ga-akpọlite n’ọnwụ.

6. Dị ka e kwuru n’Ọrụ Ndịozi 24:​15, ole ndị ga-eso ná ndị Jehova ga-akpọlite n’ọnwụ?

⁶ Ihe kacha mkpa bụ na ndị niile na-anwụghị n’Amagedọn ga na-akụziri ndị a kpọlitere n’ọnwụ gbasara Alaeze Chineke na ihe ndị Jehova chọrọ ha n’aka. N’ihi gịnị? N’ihi na ọtụtụ ndị a ga-akpọlite n’ọnwụ ga-eso ná “ndị ajọ omume.” (Gụọ Ọrụ Ndịozi 24:15.) Ha ga-agbanwe ọtụtụ ihe ná ndụ ha ka àjà Jizọs chụrụ nwee ike ịbara ha uru. Chegodị ọrụ buru ibu a ga-arụ ịkụziri ọtụtụ nde mmadụ na-amaghị gbasara Jehova ihe. À ga-akụziri ha ya otu otu otú ahụ anyị si amụrụ ndị mmadụ ihe taa? Hà ga-anọ n’ọgbakọ dị iche iche ebe a ga-anọ kụziere ha ihe ha ga-akụziri ndị ọzọ a ga-akpọlite n’ọnwụ? Anyị amabeghị. Ma, ihe anyị ma bụ na ná ngwụcha Ọchịchị Puku Afọ Kraịst, “ihe ọmụma Jehova ga-ejupụta ụwa.” (Aịza. 11:9) Anyị ga-enwe ọtụtụ ọrụ na-eme obi ụtọ anyị ga-arụ n’ime otu puku afọ ahụ.

7. Gịnị mere ndị Chineke ga-eji na-enwe ọmịiko mgbe ha na-akụziri ndị a kpọlitere n’ọnwụ ihe?

⁷ N’otu puku afọ ahụ Kraịst ga-achị, ndị Jehova niile ga-agbanwe ọtụtụ ihe ná ndụ ha iji na-eme ihe dị Chineke mma. N’ihi ya, ha niile ga na-enwere ibe ha ọmịiko ka ha na-enyere ndị a kpọlitere n’ọnwụ aka ịgbanwe, kwụsị iche echiche ọjọọ na ime ihe ọjọọ ma na-eme ihe Jehova na-achọ. (1 Pita 3:8) O doro anya na ndị a kpọlitere n’ọnwụ ga-ahụ na ndị Jehova dị umeala n’obi, nakwa na ha ka na-agbanwe ihe ụfọdụ ná ndụ ha iji nwee ike ịna-eme ihe dị Jehova mma. Ha ga-achọkwa iso ha na-efe Jehova.​—Fil. 2:12.

8. Gịnị mere anyị ga-eji na-atụ anya na anyị ga-amata ndị anyị nwụrụ anwụ ma a kpọlite ha?

⁸ E nwere ọtụtụ ihe mere e nwere ike iji kwuo na ndị ahụ ga-anabata ndị a kpọlitere n’ọnwụ ga-amata ndị ha. Dị ka ihe atụ, otú Jehova si kpọlite ndị mmadụ n’ọnwụ n’oge gara aga gosiri na Jehova ga-eme ka ndị si n’ọnwụ bilie nwee ike ikwu okwu na iche echiche otú ha na-emebu, dịrịkwa otú ha dịbu tupu ha anwụọ. Cheta na Jizọs ji ọnwụ tụnyere ụra, jirikwa mbilite n’ọnwụ tụnyere ịkpọte mmadụ n’ụra. (Mat. 9:​18, 24; Jọn 11:​11-13) Mmadụ si n’ụra teta, ọ na-adị otú ọ dịbu, na-ekwukwa okwu otú o si ekwubu. Ọ na-amakwa ihe ndị ọ mabu tupu ya ehiwe ụra. Chegodị gbasara Lazarọs. Abalị anọ agaala kemgbe ọ nwụrụ, n’ihi ya, ahụ́ ya erewela. Ma mgbe Jizọs kpọlitere ya, ụmụnne ya ndị nwaanyị matara ya ozugbo, yanwa amatakwa ha.​—Jọn 11:​38-44; 12:​1, 2. 

9. Gịnị mere ndị a ga-akpọlite n’ọnwụ agaghị ezu okè mgbe a ga-akpọlite ha?

⁹ Jehova kwere nkwa na e nweghị onye dị ndụ mgbe ahụ Kraịst ga na-achị ga-asị: “Ana m arịa ọrịa.” (Aịza. 33:24; Rom 6:7) N’ihi ya, ahụ́ ga-agbasi ndị a ga-akpọlite n’ọnwụ ike. Ma, ha agaghị ezu okè ozugbo. Ma ọ́ bụghị ya, ndị mabu ha agaghị amakwa ha. O yiri ka mmadụ niile hà ga-eji nwayọọ nwayọọ zuo okè n’ime otu puku afọ ahụ Kraịst  ga-achị. Ọ bụ naanị ná ngwụcha puku afọ ahụ ka Jizọs ga-enyefe Nna ya Alaeze ahụ. Mgbe ahụ, Alaeze ahụ arụzuola ọrụ ya, ma ime ka mmadụ niile zuo okè.​—1 Kọr. 15:​24-28; Mkpu. 20:​1-3.

10. Olee otú obi ga-adị gị maka mbilite n’ọnwụ?

¹⁰ Chegodị otú obi ga-adị gị ịnabata onye gị nwụrụ anwụ. Obi ụtọ ọ̀ ga-eme ka ị chịwa ọchị ka ọ̀ bụ ka i bewe ákwá? Obi ụtọ ọ̀ ga-eme ka ị bụwa abụ iji too Jehova? Otu ihe doro anya bụ na obi ga-adị gị ezigbo ụtọ n’ebe Nna gị hụrụ gị n’anya na Ọkpara ya nọ n’ihi ime ka e nwee mbilite n’ọnwụ.

11. Dị ka Jizọs kwuru na Jọn 5:​28, 29, olee otú ihe ga-adịrị ndị na-erubere Chineke isi?

¹¹ Chegodị otú obi ga-adị ndị a kpọlitere n’ọnwụ ka ha na-agbanwe ndụ ha iji na-eme ihe Chineke chọrọ. Ndị gbanwerenụ ga-adị ndụ ebighị ebi na Paradaịs. Ma, a gaghị ekwe ka ndị nupụụrụ Chineke isi mee ka udo ghara ịdị na Paradaịs.​—Aịza. 65:20; gụọ Jọn 5:​28, 29.

12. Olee otú Jehova ga-esi gọzie ndị niile bi n’ụwa?

¹² N’Alaeze ahụ, ndị Chineke niile ga-ahụ na ihe e kwuru n’Ilu 10:22 bụ eziokwu. Ebe ahụ sịrị: “Ọ bụ ngọzi Jehova na-eme mmadụ ọgaranya, ọ dịghịkwa atụkwasị ihe mgbu na ya.” Mmụọ nsọ Chineke ga-eme ka ndị Chineke na-emekwu ka Jizọs, jirikwa nwayọọ nwayọọ zuo okè. (Jọn 13:​15-17; Efe. 4:​23, 24) Kwa ụbọchị, ahụ́ ga na-agbasikwu ha ike, ha abụrụkwuo ndị ezigbo mmadụ. A ga-enwe ezigbo obi ụtọ mgbe ahụ. (Job 33:25) Ma, olee otú iche gbasara mbilite n’ọnwụ ga-esi enyere anyị aka ugbu a?

13. Dị ka e kwuru n’Abụ Ọma 139:​1-4, olee otú mbilite n’ọnwụ ga-esi gosi otú Jehova hụruru anyị n’anya?

¹³ Dị ka anyị kwuburu, ọ bụrụ na Jehova akpọlite ndị mmadụ n’ọnwụ, ọ ga-eme ka ha cheta ihe ndị ha mabu, ha ana-akpakwa àgwà e ji mara ha tupu ha anwụọ. Chegodị echiche ihe nke ahụ pụtara. Otú Jehova hụruru gị n’anya ruru nke na ọ ma ihe niile gbasara gị ma ihe ndị ị na-eche, ihe ndị ị na-ekwu, nakwa ihe ndị ị na-eme. Ọ ga-echetakwa ha. N’ihi ya, ọ kpọlitewe gị n’ọnwụ, ọ ga-adịrị ya mfe ime ka ị dịghachi otú ị dịbu. Eze Devid ma na Jehova ma onye nke ọ bụla n’ime anyị nke ọma. (Gụọ Abụ Ọma 139:​1-4.) Olee otú obi na-adị anyị ịmata na Jehova ma anyị nke ọma?

14. Olee otú obi kwesịrị ịdị anyị ma anyị na-eche gbasara otú Jehova maruru anyị?

¹⁴ Ọ bụrụ na anyị echee gbasara otú Jehova si mara anyị nke ọma, anyị agaghị na-echegbu onwe anyị. N’ihi gịnị? Cheta na ihe gbasara anyị na-emetụ Jehova n’obi. O jighị onye ọ bụla n’ime anyị egwuri egwu. Ọ ma nke ọma ihe ndị mere anyị ji na-eme otú anyị si eme. Ihe a na-eme ka obi ruo anyị ala. Ka anyị ghara iche na anyị nọ naanị anyị. Jehova nọ anyị n’akụkụ mgbe ọ bụla na-achọ otú ọ ga-esi nyere anyị aka.​—2 Ihe 16:9.

15. Olee otú mbilite n’ọnwụ si egosi na amamihe Jehova enweghị atụ?

¹⁵ Ndị mmadụ na-atụ ọnwụ egwu. Ndị Ekwensu na-achị na-ejikarị ya eme ka ndị mmadụ ghọgbuo enyi ha ma ọ bụ  mee ihe ha na-ekwesịghị ime. Ma, anyị anaghị atụ ọnwụ egwu. Anyị ma na ọ bụrụ na ndị iro anyị egbuo anyị, Jehova ga-akpọlite anyị. (Mkpu. 2:10) O doro anyị anya na o nweghị ihe ha ga-eme ka anyị kwụsị ife Jehova. (Rom 8:​35-39) Olileanya mbilite n’ọnwụ Jehova mere ka anyị nwee gosiri na amamihe ya enweghị atụ. O ji ya mee ka Ekwensu ghara ịna-eji ọnwụ eyi anyị egwu, meekwa ka obi sie anyị ike ịna-erubere Chineke isi.

16. Olee ajụjụ ndị i kwesịrị ịjụ onwe gị? Oleekwa otú azịza ha ga-esi nyere gị aka ịmata ma ị̀ tụkwasịrị Jehova obi?

¹⁶ Ọ bụrụ na ndị iro Jehova asị na ha ga-egbu gị, ị̀ ga-atụkwasị Jehova obi na ọ ga-akpọlite gị n’ọnwụ? Olee otú ị ga-esi mara? Otu ụzọ bụ ịjụ onwe gị sị, ‘Mkpebi ọ bụla m na-eme kwa ụbọchị ọ̀ na-egosi na m tụkwasịrị Jehova obi?’ (Luk 16:10) I nwekwara ike ịjụ onwe gị sị, ‘Otú m si ebi ndụ ọ̀ na-egosi na m tụkwasịrị Jehova obi na ọ ga-enye m ihe ndị dị m mkpa ma m buru ụzọ na-achọ Alaeze ya?’ (Mat. 6:​31-33) Ọ bụrụ na ihe ị ga-aza na ajụjụ ndị ahụ bụ ee, o gosiri na ị tụkwasịrị Jehova obi, nakwa na ị dị njikere idi nsogbu ọ bụla ga-abịara gị.​—Ilu 3:​5, 6.

17. (a) Olee otú mbilite n’ọnwụ si egosi na Jehova nwere ndidi? (b) Olee otú anyị ga-esi egosi na obi dị anyị ụtọ maka ndidi Jehova?

¹⁷ Jehova nwere ụbọchị na awa ọ kara aka ọ ga-ebibi ụwa ochie a. (Mat. 24:36) Ọ gaghị akwụsị inwe ndidi ma bibie ụwa tupu oge ahụ eruo. Ọ chọsiri ike ịkpọlite ndị nwụrụ anwụ, ma ọ na-enwe ndidi. (Job 14:​14, 15) Ọ na-eche ka oge ọ kara aka ruo ka ọ kpọlite ha n’ọnwụ. (Jọn 5:28) E nwere ọtụtụ ihe mere obi ji kwesị ịdị anyị ụtọ na Jehova na-enwe ndidi. Chegodị echiche: Ọtụtụ ndị, ma anyịnwa, ‘echegharịala’ n’ihi ndidi Jehova nwere. (2 Pita 3:9) Jehova chọrọ ka ọtụtụ ndị nwee ike inweta ndụ ebighị ebi. N’ihi ya, ka anyị gosi na obi dị anyị ụtọ maka ndidi ya. Olee otú anyị ga-esi egosi ya? Ọ bụ ime ike anyị niile iji chọta ndị “nwere ezi obi maka inweta ndụ ebighị ebi,” nakwa inyere ha aka ka ha hụ Jehova n’anya ma na-efe ya. (Ọrụ 13:48) Anyị mee otú ahụ, ndidi Jehova ga-abara ha uru otú ahụ ọ baara anyị.

18. Olee ihe mere o ji dị mma inwere ndị ọzọ ndidi?

 ¹⁸ Jehova ga-eji ndidi chere ruo mgbe Jizọs chịchara otu puku afọ tupu ya atụwa anya na anyị ga-ezu okè. Tupu mgbe ahụ, Jehova dị njikere ịgbaghara anyị mmehie anyị. N’ihi ya, anyị kwesịrị ịna-eme ka Jehova na-elekwasị anya n’ebe ndị ọzọ na-emeta ma na-enwere ha ndidi. Chegodị ihe mere otu nwanna nwaanyị di ya malitere ichegbu onwe ya ma kwụsị ịga ọmụmụ ihe. Nwanna nwaanyị ahụ sịrị: “Ihe a wutere m n’ihi na o mere ka ihe ndị anyị bu n’obi ime ghara inwe isi.” N’agbanyeghị ihe ndị a, nwaanyị a hụrụ di ya n’anya nweere ya ndidi. Ike agwụghị ya n’ihi na ọ tụkwasịrị Jehova obi. O mere ka Jehova. Otú o si mee ya bụ na o lekwasịrị anya n’àgwà ọma ndị di ya nwere. Ọ sịrị: “Di m nwere àgwà ndị magburu onwe ha. Ọ na-agbasi mbọ ike ịkwụsị ichegbu onwe ya.” Ọ dị ezigbo mkpa inwere ndị ezinụlọ anyị ma ọ bụ ndị ọgbakọ anyị nọ ná nsogbu ndidi.

19. Olee ihe anyị kwesịrị ikpebisi ike ime?

¹⁹ Jizọs na ndị mmụọ ozi nwere obi ụtọ mgbe mbụ e kere ụwa. Chetụgodịnụ ụdị obi ụtọ ha ga-enwe ma ha hụ na ụwa a jupụtaziri ná ndị zuru okè hụrụ Jehova n’anya ma na-efe ya. Chee ụdị obi ụtọ ndị ahụ ga-eso Jizọs chịa n’eluigwe ga-enwe ma ha hụ ka ọchịchị ha na-abara ndị mmadụ uru. (Mkpu. 4:​4, 9-11; 5:​9, 10) Cheekwa otú ọ ga-adị mgbe obi ụtọ ga-anọchi ákwá, mgbe ọrịa, iru uju, na ọnwụ na-agaghịzi adị ruo mgbe ebighị ebi. (Mkpu. 21:4) Ruo mgbe ihe ndị a ga-eme, kpebisie ike na ị ga na-eme ka Nna anyị hụrụ anyị n’anya, nwee amamihe, na-enwekwa ndidi. I mee otú ahụ, ị ga na-enwe obi ụtọ, n’agbanyeghị nsogbu ọ bụla bịaara gị. (Jems 1:​2-4) Anyị nwere ezigbo obi ụtọ maka nkwa Jehova kwere anyị “na a gaje inwe mbilite n’ọnwụ.”​—Ọrụ 24:15.