Isiokwu bu nke a ụzọ kwuru na Chineke ga-ebibi ndị ọjọọ n’oge na-adịghị anya ma kwụsị nsogbu niile ụmụ mmadụ nwere. Obi siri anyị ike na Chineke ga-eme ya. Gịnị mere obi ji sie anyị ike? Ọ bụ n’ihi na Okwu ya bụ́ Baịbụl gwara anyị, sị:

“Ụwa na-agafe agafe.”​—1 JỌN 2:17.

Obi siri anyị ike na ọ bụghị mmadụ niile ka Chineke ga-ebibi n’ihi na amaokwu Baịbụl a kwukwara, sị:

“Onye na-eme uche Chineke ga-anọgide ruo mgbe ebighị ebi.”

N’ihi ya, ọ bụrụ na anyị achọghị ka Chineke bibie anyị mgbe ọ na-ebibi ndị ọjọọ, anyị ga na-eme uche ya. Ma, anyị ga-ebu ụzọ mata onye Chineke bụ tupu anyị amata uche ya.

Jizọs kwuru, sị: “Iji nweta ndụ ebighị ebi, ha ga-amata gị, onye naanị ya bụ ezi Chineke.” (Jọn 17:3) Ọ bụrụ na anyị chọrọ ịdị ndụ ebighị ebi, anyị kwesịrị ‘ịmata’ Chineke. Ihe ọ pụtara abụghị naanị ikweta na Chineke dị ma ọ bụ ịmata ihe ole na ole gbasara ya. Anyị na ya kwesịkwara ịbụ enyi. Otú ahụ anyị ga-ewepụta ohere ka anyị na enyi anyị na-anọrị ma anyị chọọ ka anyị na ya dịkwuo ná mma ka anyị kwesịkwara ime ma anyị chọọ ka anyị na Chineke na-abụ enyi. Ka anyị leba anya n’ụfọdụ eziokwu dị mkpa anyị mụtara na Baịbụl ga-enyere anyị aka ịbụ enyi Chineke, anyị na ya anọgidekwa na-abụ enyi.

Anyị na-eri nri mgbe niile ka anyị nwee ike ịna-adị ndụ. Ma, Jizọs kwuru, sị: “Ọ bụghị naanị achịcha ga-eme ka mmadụ dị ndụ, kama ọ bụ okwu niile si n’ọnụ Jehova pụta.”​—Matiu 4:4.

Taa, ọ bụ na Baịbụl ka okwu Jehova dị. Ka ị na-agụ akwụkwọ a dị nsọ, ị ga-amụta eziokwu ndị dị mkpa gbasara ihe ndị Chineke mere n’oge gara aga, ihe ndị ọ na-eme ugbu a, na ihe ndị ọ ga-eme n’ọdịnihu.

Olee ihe ị ga-eme ma ị chọọ ime ihe Chineke kwuru ma ya ana-esiri gị ike ịkwụsị ime ihe ndị ọ sịrị na ha adịghị mma? Ihe ga-enyere gị aka bụ ịmata Chineke nke ọma.

Chegodị gbasara otu nwaanyị anyị ga-akpọ Sakura. Nwaanyị a na-akwa iko. Mgbe ọ malitere ịmụ Baịbụl, ọ mụtara na Chineke kwuru ka anyị ‘gbaara ịkwa iko ọsọ.’ (1 Ndị Kọrịnt 6:18) Sakura rịọrọ Chineke ka o nyere ya aka ka ọ kwụsị ịkwa iko. O mechakwara kwụsị ya. Ma, ịkwa iko ka na-agụ ya mgbe ụfọdụ. O kwuru, sị: “Mgbe ọ bụla ime omume rụrụ arụ gbatara m n’uche, m na-ekpe ekpere kọọrọ ya Jehova, ebe m makwanụ na m gaghị akwụsịli ya n’onwe m. Otú Jehova si aza m ekpere emeela ka mụ na ya dịrịkwuo ná mma.” Ọtụtụ nde mmadụ amatala Chineke otú ahụ Sakura matara ya. Chineke na-enye ha ike ha ji na-agbanwe àgwà ha ma na-eme ihe dị ya mma.​—Ndị Filipaị 4:13.

Ọ bụrụ na ị mata Chineke nke ọma, ‘Chineke ga-amatakwu gị,’ gị abụrụkwa ezigbo enyi ya. (Ndị Galeshia 4:9; Abụ Ọma 25:14) Ime otú a ga-eme ka i biri n’ụwa ọhụrụ Chineke. Ma, olee otú ụwa ọhụrụ ahụ ga-adị? Isiokwu na-esonụ ga-eme ka anyị mata azịza ya.