N’ime awa mbụ a mụrụ nwatakịrị, ọ dị ezigbo mkpa ka nne ya kuru ya ma na-emetụ ya aka. Ime otú ahụ ga-enyere nwa ahụ aka n’uto ya. *

Gịnị na-eme ka nwaanyị mụrụ nwa hụ nwa ọhụrụ ya n’anya ma na-elekọta ya nke ọma? N’akwụkwọ bụ́ The Journal of Perinatal Education, otu ọkachamara aha ya bụ Jeannette Crenshaw kwuru ihe na-akpata ya. Ọ sịrị na e nwere ihe ahụ́ nwaanyị na-emepụta a na-akpọ oxytocin n’oge ahụ. Ihe a “na-eme ka nne na-ahụkwu nwa ya n’anya ka ọ na-ele nwa ahụ anya, na-emetụ ya aka ma ọ bụ na-enye ya ara.” E nwekwara ihe ọzọ ahụ́ nwaanyị na-emepụta na-eme “ka nwaanyị ahụ na-elekọta nwa ya, na-enye ya ihe ọ chọrọ.” Ọ na-emekwa ka ya na nwa ya dịrị n’ezigbo mma. Gịnị ka ihe a na-egosi?

Ọ bụ Jehova Chineke, onye kere anyị ma hụ anyị n’anya, mere ka nne na nwa ya na-adị ná mma otú a. * Eze Devid kwuru na ọ bụ Chineke “si n’afọ sepụta” ya, na ọ bụkwa Chineke mere ka obi ruo ya ala mgbe nne ya ku ya. Ọ gwara Jehova, sị: “E nyefere m n’aka gị malite n’oge m nọ n’akpa nwa; ị bụ Chineke m malite n’oge m nọ n’afọ nne m.”—Abụ Ọma 22:9, 10.

CHEGODỊ IHE A: Ebe ọ bụ na Chineke kere nwaanyị otú ọ ga-enwe ike ịhụ nwa ya n’anya ma lekọta ya nke ọma, ọ̀ bụ na o gosighị na ihe gbasara onye ọ bụla n’ime anyị, bụ́ “ndị Chineke mụrụ,” na-emetụ ya n’obi?—Ọrụ Ndịozi 17:29.

Jizọs Kraịst ma Onye kere anyị nke ọma karịa otú onye ọ bụla ọzọ ma ya. O kwuru, sị: “Ọ̀ bụ na a dịghị ere nza abụọ otu mkpụrụ ego nke ga-azụtali naanị ihe dị nta? Ma o nweghị otu n’ime ha ga-ada n’ala, Nna unu aghara ịma. Ma a gụwo ntutu niile dị n’isi unu ọnụ. Ya mere, unu atụla egwu: Unu dị oké ọnụ ahịa karịa ọtụtụ nza.”—Matiu 10:29-31.

Ọ bụ mmadụ ole na ole n’ime anyị na-anọ lewe ụmụ obere nnụnụ niile ha hụrụ, ma ya fọdụzie ịma mgbe otu n’ime ha dara n’ala. Ma, Nna anyị nke eluigwe na-ahụ nke ọ bụla n’ime ha. Ma, ọtụtụ ụmụ nnụnụ adịghịdị oké ọnụ ahịa n’anya ya karịa otu mmadụ. Ihe ihe a na-akụziri anyị doro anya. “Atụla egwu” na Chineke amaghị na ị nọ. Ọ na-eche banyere gị.

 Baịbụl kwuru, sị:

• “Anya Jehova dị n’ebe niile, na-elegide ndị ọjọọ na ndị ọma.”—ILU 15:3.

• “Anya Jehova dị n’ebe ndị ezi omume nọ, ntị ya dịkwa ná mkpu enyemaka ha na-eti.”—ABỤ ỌMA 34:15.

• “M ga-aṅụrị ọṅụ, nweekwa obi ụtọ n’obiọma gị, n’ihi na ị hụwo mmekpa ahụ́ m; ị marawo ahụhụ mkpụrụ obi m na-ata.”—ABỤ ỌMA 31:7.

Ò nwere uru ọ ga-abara anyị ma anyị mata na ihe banyere anyị na-emetụ Chineke n’obi, nakwa na anya ya dị n’ebe anyị nọ n’ihi na ọ hụrụ anyị n’anya? Ehenụ. Otu nwaanyị onye Ịngland aha ya bụ Hannah * kwuru, sị:

“E nwere ọtụtụ mgbe m chere na Jehova ahụghị m n’anya, nakwa na ọ naghị aza ekpere m. Echere m na ọ bụ n’ihi na enweghị m okwukwe, cheekwa na ọ na-ata m ahụhụ ma ọ bụkwanụ na ọ naghị aza ekpere m n’ihi na e nweghị onye m bụ. M chere na ọ chọghị ịma gbasara m.”

Ma ugbu a, Hannah anaghịzi enwe obi abụọ ma Jehova ọ̀ na-aza ekpere ya nakwa ma ọ̀ hụrụ ya n’anya. Gịnị mere na ọ naghịzi enwe obi abụọ? Hannah kwuru, sị: “M ji nwayọọ nwayọọ kwụsị ya. M chetara otu okwu ruru m n’obi e si na Baịbụl kwuo ọtụtụ afọ gara aga gbasara àjà mgbapụta Jizọs. Okwu ahụ mere ka obi sie m ike na Jehova hụrụ m n’anya. Mgbe ọ bụla Jehova zara ekpere m, m na-adapụ n’ákwá n’ihi na achọpụtala m na Jehova hụrụ m n’anya. Ịmụ Baịbụl na ịga ọmụmụ ihe Ndịàmà Jehova enyerela m aka ịmụtakwu gbasara Jehova, àgwà ya, na otú o si hụ anyị n’anya. Ugbu a, o doola m ezigbo anya na Jehova na-enyere anyị aka, na ọ hụrụ anyị niile n’anya, chọọkwa ilekọta onye ọ bụla n’ime anyị.”

Ihe a Hannah kwuru na-agba ume. Ma, olee otú obi nwere ike isi sie gị ike na Chineke na-aghọta ma na-echeta otú obi dị gị? A ga-aza ajụjụ a n’isiokwu na-esonụ.