Ihe Ịdị Umeala n’Obi Jehova Pụtaara Anyị

DEVID bụ nwoke tara nnọọ ahụhụ. Ọgọ ya nwoke na-ekwo ekworo bụ́ Eze Sọl mesoro ya mmeso obi ọjọọ. Sọl nwara ugboro atọ iji ube tụgbuo Devid, ọ chụgharịkwara ya ọtụtụ afọ n’akwụsịghị akwụsị, na-amanye ya ịghọ onye na-agba ọsọ ndụ. (1 Samuel 18:11; 19:10; 26:20) Ma, Jehova nọnyeere Devid. Jehova zọpụtara ya ọ bụghị nanị n’aka Sọl kamakwa n’aka ndị iro ya ndị ọzọ. Ya mere, anyị pụrụ ịghọta okwu Devid, dị ka e dere n’abụ a: “Jehova bụ oké nkume m, na ebe m e wusiri ike, na onye na-eme ka m gbapụ. . . . I [Jehova enyewokwa m] ọta nzọpụta Gị: umeala n’obi nke Gị na-emekwa m ka m baa ụba.” (2 Samuel 22:2, 36) Devid ghọrọ onye a ma ama n’Izrel. Oleezi otú nke a si metụta umeala n’obi Jehova?

Mgbe Akwụkwọ Nsọ na-ekwu banyere Jehova dị ka onye dị umeala n’obi, ọ dịghị apụta na o rughị eru n’ụzọ ọ bụla ma ọ bụ na ọ nọ n’okpuru ndị ọzọ. Kama nke ahụ, àgwà ọma a na-egosi na o nwere ọmịiko miri emi maka ụmụ mmadụ bụ́ ndị ji ezi obi na-agbalị inweta ihu ọma ya, ọ na-emekwara ha ebere. N’Abụ Ọma 113:6, 7, anyị na-agụ, sị: “[Jehova] na-eme Onwe ya ka Ọ dị ala ilekwasị eluigwe na ilekwasị ụwa anya. Ọ bụ onye na-eme ka onye na-enweghị ike si n’ájá bilie.” Ya ‘ime onwe ya ka ọ dị ala’ pụtara na “ọ na-ehuda ala iji hụ” ma ọ bụ na “ọ na-eweda onwe ya ala iji kirie.” (Today’s English Version; Young’s Literal Translation of the Holy Bible) Ya mere, site n’eluigwe, Jehova n’onwe ya ‘hudatara ala’ ma ọ bụ ‘weda onwe ya ala,’ iji hụ Devid, bụ́ onye na-ezughị okè ma bụrụ nwoke dị umeala n’obi nke chọrọ ijere Chineke ozi. N’ihi ya, Devid na-emesi anyị obi ike, sị: “Jehova dị elu, ma ọ bụ onye dị umeala n’obi ka Ọ na-ahụ anya.” (Abụ Ọma 138:6) Ụzọ obi ebere, ndidi, na ọmịiko Jehova si mesoo Devid kwesịrị ịgba ndị nile chọrọ ime uche Chineke ume.

Ọ bụ ezie na Jehova dị ka Eze Kasịnụ nọ n’ọkwá kachasị elu n’eluigwe na ala, ọ dị njikere iso onye ọ bụla n’ime anyị mekọọ ihe. Nke a na-emesi anyị obi ike na anyị pụrụ ịdabere n’enyemaka ya na-adịghị ada ada ọbụna n’ọnọdụ ndị kasị sie ike. Ọ dịghị ihe ọ bụla mere anyị ga-eji tụọ ụjọ na ọ ga-echefu anyị.  N’ihe banyere ndị ya bụ́ Izrel oge ochie, e kwuru banyere Jehova n’ụzọ dabara adaba dị ka “onye chetara [ha] n’ọnọdụ [ha] dị ala: n’ihi na ruo mgbe ebighị ebi ka ebere Ya dị.”—Abụ Ọma 136:23.

Dị ka ndị ohu Jehova nke oge a, anyị pụrụ ịta ahụhụ dị ka Devid tara. Ọ pụrụ ịbụ na anyị na-eche ịkwa emo sitere n’aka ndị na-amaghị Chineke ihu, ma ọ bụ ikekwe anyị na ọrịa na-alụ ma ọ bụ bụrụ ndị mmadụ nwụnahụrụ. N’agbanyeghị ihe bụ ọnọdụ anyị, ọ bụrụ na obi anyị ziri ezi, anyị pụrụ ịgakwuru Jehova n’ekpere, na-arịọ maka ebere ya. Jehova ‘ga-ehuda ala’ iji hụ anyị ma nụ ekpere anyị. Ọbụ abụ ahụ e nyere ike mmụọ nsọ dere, sị: “Anya abụọ nke Jehova dị n’ahụ́ ndị ezi omume, ntị Ya abụọ ghekwara oghe ná mkpu ha na-etiku Ya.” (Abụ Ọma 34:15) Ọ́ dịghị emetụ gị n’ahụ́ ịtụgharị uche n’àgwà ịdị umeala n’obi magburu onwe ya nke Jehova?

[Foto ndị dị na peeji nke 30]

Dị nnọọ ka ọ nụrụ ekpere Devid, Jehova dị njikere ịnụ ekpere anyị taa