Gịnị Mere Okwu Banyere Mmụọ Nsọ Ji Agbagwoju Ndị Mmadụ Anya?

GỊNỊ bụ mmụọ nsọ? Ajụjụ a yiri nnọọ ajụjụ dị mfe, ma o nwere ike isi ike ịchọta azịza ya. Poopu Benedict nke Iri na Isii gwara ìgwè mmadụ gbakọrọ n’Australia, sị: “O yiri ka anyị enweghị ike ịghọtacha ihe Mmụọ ahụ bụ.”

N’ezie, okwu banyere mmụọ nsọ na-agbagwoju ndị mmadụ anya, e nwekwara ọtụtụ ihe ndị mmadụ na-aza mgbe a jụrụ ha ajụjụ bụ́, Gịnị bụ mmụọ nsọ? Lee ụfọdụ ihe ndị mmadụ na-azakarị:

• Ọ bụ onye bi n’ime ndị na-eso ụzọ Kraịst.

• Ọ bụ iwu Chineke nke nọ n’ọrụ.

• Ọ bụ ihe na-egosi na Chineke nọ n’ọrụ n’ụwa.

• Ọ bụ onye nke atọ n’Atọ n’Ime Otu.

Gịnị mere e ji nwee azịza dị iche iche otú a? Mgbagwoju anya a malitere na narị afọ nke anọ Oge Anyị, mgbe ụfọdụ ndị ọkà mmụta okpukpe kwuru na mmụọ nsọ bụ onye ya na Chineke hatụ. Ma, Akwụkwọ Nsọ ma ọ bụ ndị na-eso ụzọ Kraịst oge gboo akụzighị nke a. Akwụkwọ bụ́ New Catholic Encyclopedia kwuru, sị: “O doro anya na Agba Ochie akọwaghị mmụọ Chineke dị ka onye . . . Mmụọ Chineke bụ nnọọ ike Chineke.” Otu akwụkwọ ahụ kwukwara, sị: “Ihe ka ọtụtụ n’ihe e dere n’Agba Ọhụrụ gosiri na mmụọ Chineke bụ ihe, ọ bụghị onye; ihe kacha mee ka anyị mata nke a bụ na Agba Ọhụrụ gosiri na mmụọ nsọ na ike Chineke yiri.”

Ka a sịkwa ihe mere o ji esiri ndị mmadụ ike ikwere na ike nkịtị bụ onye. N’ihi ya, otu nnyocha e mere n’oge na-adịbeghị anya na United States gosiri na ihe ka ọtụtụ ná ndị mmadụ ekweghị na mmụọ nsọ bụ onye ma ọ bụ “ihe dị ndụ.” Echiche ha ò ziri ezi? Ka ànyị kwesịrị ikwere ihe ndị ọkà mmụta okpukpe kwuru, bụ́ ndị na-ekwusi ike na “Mmụọ Nsọ bụ Onye dị nnọọ iche ná Nna ahụ na Ọkpara ahụ”?

Iji nweta azịza ziri ezi, ọ dị mkpa ka anyị gaa n’Okwu Chineke, bụ́ Baịbụl, bụ́ nke kọwara ihe mmụọ nsọ bụ nke ọma. Pọl onyeozi dere, sị: “Akwụkwọ Nsọ dum si n’ike mmụọ nsọ Chineke, ọ bara uru iji ya zie ihe, iji ya dọọ mmadụ aka ná ntị.”—2 Timoti 3:16.

Gịnị mere i kwesịrị iji chọọ ịmata nke bụ́ eziokwu banyere mmụọ nsọ? Ọ bụ n’ihi na ịmata nke bụ́ eziokwu nwere ike ime ka i nweta enyemaka Chineke. Ò nwere mgbe ike ụwa na-agwụ gị? Jizọs kwere ndị na-eso ụzọ ya nkwa, sị: “Na-arịọnụ, a ga-enye unu . . . Ọ bụrụ na unu maara otú e si enye ụmụ unu ezi onyinye, . . . lee ka Nna unu nke nọ n’eluigwe ga-esi nye ndị na-arịọ ya mmụọ nsọ karị!”—Luk 11:9, 13.

N’isiokwu ndị na-esonụ, anyị ga-atụle otú Akwụkwọ Nsọ si kọwaara anyị ihe mmụọ nsọ bụ. Anyị ga-ahụkwa otú ọ ga-esi baara anyị uru ná ndụ anyị.

[Ihe odide gbatụrụ okpotokpo nke dị na peeji nke 3]

Akwụkwọ Nsọ kọwaara anyị ihe mmụọ nsọ bụ