Ang Oriri Ọchịpwụrụ ọ-kụ ẹkpẹ nya iJisọsị ju apyobwuna yẹẹyẹẹ. Chajị nyọlẹ ká igu nyamwụ ji ọnaabwọ lẹ, ọ tịtọ nyọka ri Ang Oriri Ọchịpwụrụ bala angịjụgbẹyị nyamwụ bala ọ-ka ya ọhụhụ ọlẹ kị ka họ lụka ookpokpo ẹ-ẹpwụ nya ẹka yeji ene, ọhụhụ ọọwa ri Ang Oriri nya Obyi nya Ọngọlahị. Ọọwa lẹ, ọ du iPita bala ịJọn ẹrụ nyọka nwụla ube ọọwa nọ ẹẹ. (Luk 22:7-13; yẹ ifoto ọla ẹbẹ nya ọgbanyẹ.) Ọwẹ kpụhị ịtịya ang odudu ọlẹ kahị baba nyọka nwụlanọ nya ọ-Họ Kpa Kpịtịya nya Igu nya IJisọsị la ẹnụtụrụ 27 nya Ọya Ọhata. Ọhẹka ọjịra-jịra chụ ọngọ ya ẹla, nwụla ere bala ịkaa nọ bala ang ịkịla lẹ. Ma, ịyẹ ọngọngọọng nyahị à tị́ ka jẹ́-ẹ họ nyọka nwụlanọ gbe ọ-Họ Kpa Kpịtịya nya Igu nya IJisọsị ọwẹ?

Nwụla ọkịlẹtụ nyang nọ. Wa ịBayịbụụ ọwawa nya ọ-Họ Kpa Kpịtịya nya Igu nya IJisọsị bala ọ-kụ irya jwaa kpori-kpori. A ka yẹ jaabwọ kị nwụlọọ nọ ẹ-ẹpwụ nya Examining the Scriptures Daily. Ị da ẹla gụ ọọwa ju ẹ-ẹpwụ nya Apendix B12-A bala B12-B ọlẹpwụ nya New World Translation of the Holy Scriptures. (Yẹ Ụpwụ ọ-Kpa Jẹ́ Ang nya Ọhịhị Bala Ụkụrwọ Nyahị nya Ọya Ohene nya 2020 ịnyịnyị.) Alugbiyegu ka mwahị nya ẹla ịlẹ kị ka jẹ lụka nya ang ọjẹ́jẹ nya ugbiyegu nyaa u-uhye nya iya ọkịlaakịla nya iJisọsị bwula ọwụla Watch Tower Publications Index lee Research Guide for Jehovah’s Witnesses yẹ.

Wụrụ angịkịla wẹ ọtụguru ọwẹ. La ọ-gaga ẹ-ẹpwụ nya ọ-wụrụ angịnyị ẹpwa wẹ ọhụhụ ọwẹ. Kụ irya nya angịlẹ ká ka jẹ́-ẹ wụrụ, lala ọmwẹẹkpẹ ka nyang, angịlẹ ká ka jẹ́ ịBayịbụụ ta ene-ene, aligu bala alugbiyegu nyang. Angịgbahị nya ọjịra-jịra ka maga nyọka wụrụ angịlẹ kị gbile ẹta ẹkpẹ. Kpịtịya nyori, kori ká ọngịnyị á kụ o-oye nyang ka, à ka jẹ́-ẹ mwahị nya ụka bala ẹga ọlẹ kị ka họ ọ-Họ Kpa Kpịtịya nya Igu nya IJisọsị ẹ-ẹga kọ kụ bwula ọ-yụbwọ ba U-UHYE NYAHỊ ẹ-ẹpwụ nya jw.org/ige ọ-ọmwụ ọdada nya ẹbẹ ọhọhẹ, lẹ à ka chụ “ọ-Họ Kpa Kpịtịya nya Igu nya IJisọsị” lẹlẹ.

Ang ọkịla oyina ahị tị́ ka jẹ́-ẹ họ nyọka nwụlanọ?