Bwu ẹka nya 2018, ịmagajini nyahị ịlẹ kahị kaa ya ha aluche, ọnyọnyị nyaa kaa ya ẹla u-uhye nya egbeju nya ẹla ookpokpo. Ịmagajini ịwẹ wuu tị juwa ẹ-ẹpwụ nya Ang-abwọ ịlẹ Kahị kaa Kpa Mẹ Ang Jẹ. Lẹ, ahị ka jẹ́-ẹ kpa họ ụkụrwọ lụka nya ẹrụ ọnyịịla ọ-kpa pyẹ myị. Ahị ka jẹ́-ẹ kpa ịhyẹ nyaa ba ịlọhị myị ụka kahị juwa ká anyị lee ọ-ka ihi. Ị́ họ ịmagajini ịwẹ nyọka kpa jẹ ang bala angịnyị ka, ma ị ka jẹ́-ẹ gu ọngịnyị gbịla nyọka tịtọ nya ọ-jẹ ang chajị nya Ohe Oluhye.

Ụka ká dọmwụ nya ẹla oyaya bala ọngọọwa, wa ịBayịbụụ ọhẹ jwoo bala o-ya ẹla rụ́ egbeju nya ẹlẹhẹ ọlẹ kọ ka kpọọ ịpyọ bwu ịmagajini. Ọ-chụ pwokwita, kori ká ọngọọwa à la ugbeyigu lee o-ja bida, ahị ka yẹkẹẹ: “M̀ wa ụpwụ ọhẹ kpangjẹ kọ ya ẹla u-uhye nya egbeju nya ẹlẹwẹ. Ḿ ka mọọ jẹng myị́?” Kori ká yẹ nyori ọngọọwa ke ụrụ lang, a ka ya ịmagajini ọlẹ kị họ kpehe họọ lee a ka ya du ẹrụ bwu ifon kịlọọ myị́, o-ri kọ ri ụka nya ụgbanyẹ-ụgbanyẹ dọmwụ wẹwẹ. Ịlẹhị lẹ, á-apwụ ọ-ya ha angịnyị à ri ang dudu kahị wẹẹ kpehe nya ẹla Ohe ka, ma ịmagajini ịwẹ kaa dahị ụbwọ nyọka mwahị nya angịlẹ kị nwụlanọ nyọka kpa ẹla ọlẹ kị wẹẹ jẹ́ họ ụkụrwọ ịnyị.​—Ụkụr 13:48.