Ụka kahị juwa bala aanahị, ọ kaa lahị jaabwọ ọlẹ kọ la Adịrahụ iDevidi ụka kọ yẹkẹẹ: “Ọ chakpa ri ang ọkpịpyọ, bala ang ohiigu nya aanịna ọ-ka kụ lawụlẹ lokpunyi!” (Eje Ọnyịịla 133:1) Okpunyi nyahị-ị́ wẹ ka ji ị-ịwẹ lịlọmwụ ka. Ọng myị́ ọng nyahị baba nyọka họ ụpa nyamwụ.

1. Ẹla ọkpọnchị oyina a tị́ ka yẹ a-arịrị nya angịnyị nya Ohe?

Kori ká ka ọjịra-jịra ọ-ọpyị ọkịla, á ka wo òja nyaa ka myị́, ma ọ ka lang lala ahụ nyị juwa ẹ-ẹpwa nyịlong, ị ka dang ọwụraba bala ọ-mẹjẹ nyori à háa. Ịyẹ tị́ du? Chajị ẹga myị́ ẹga odehe, ahị kaa jẹ́ ịBayịbụụ bwula ang-abwọ ookpokpo. Ahị tị myịmyị kaa maga nyọka mẹ ọháha jẹ ẹ-ẹga nya awụlẹ. Ẹga myị́ ẹga kahị kụ, ahị kaa wụrụ ẹnyị nya iJihova nyọka “gbịgba [họọ] lawụlẹ wuu.”—ỊSẹfaniya 3:9.

2. Ịyẹ a tị́ ka họ chajị ká okpunyi ka nwà kịlahị?

“Anụ́-ụ juwa la ọháha ẹ-ẹga nya awụlẹ yẹẹyẹẹ bwu ẹpwụ ọkịlẹtụ nyanụ wuu mẹ.” (1 iPita 1:22) Ányị a tị́ ka bwu kpa ẹla ọwẹ họ ụkụrwọ? Maga nyọka yẹ abwẹla ọnyịịla nya angịkịla, ọkọkọ nyọka yẹhị rịrị u-uhye nya ọdẹwụ-dẹwụ nyaa. A bịrị ụka bala angịlẹ ká ẹla nyanụ me awụlẹ bala ọ-kaa tịtọ nya ang ụma ookpokpo kem ka. Maga nyọka jẹ́ aanahị alẹng bala anyang ịlẹ kị datị hing. Ahị ka jẹ́-ẹ maga nyọka ku olegu nya oye-oye ọyẹyẹ rụ hi ọkịlẹtụ nyahị gbang-gbang ịnyịnyị.—Wa 1 iPita 2:17. a

3. Ịyẹ a tị́ ka họ kori ká o-wo lawụlẹ-ka á ji ẹpwarịrị nyang ahụ bala ọọnahị ọhẹ?

Ahị ri angị kaa yẹ jula awụlẹ kpá odu lẹ, áhị la kpẹẹkpẹẹ ka. Ụka ọhẹ, ahị kaa họ ẹla wụ́ awụlẹ ẹjẹ lee ọ-dọmwụ họ ẹla ọ-jụ awụlẹ. Lẹ Omyi Ẹla nya Ohe byihi yẹkẹẹ: “Anụ́-ụ juwa la ọhịnyọhi ha awụlẹ mẹ. Chajị jaabwọ ká Ọngọlahị ayịdang hịnyọhi ịhọbịrị ịhọhọ nyanụ hanụ wẹẹ, ịnyịnyị, anụ tịtị ka juwa hịnyọhi ọhọbịrị nya awụlẹ ha awụlẹ pyii lẹlẹ.” (Wa Ala iKolosi 3:13.) Áhị ka jẹ́-ẹ wa ụka ịmanyị ịlẹ kahị họ ẹla jụ iJihova kpá ka, ọ tị kaa hịnyọhi hahị kpọkpọọkpọ. Lẹ ọ yẹhị rịrị kahị ka hịnyọhi ha aanahị ịnyịnyị. Kori ká jẹ́ nyori à họ ẹla wụ́ ọngọhẹ ẹjẹ aalẹ, à maga nyọka myị́ ẹla ọọwa.—Wa ịMatiyu 5:23, 24. b

 JẸ́ GỤ ỌỌWA

4. Angịnyị ụma ọnyị myị́ ọnyị a háng

Ahị kaa tịtọ ká aanahị ka háahị. Ma ọ ka lahị ujwo myị́ nyọka ye ọngịnyị ọlẹ kọ datị hiihi myị. Ịyẹ à tị́ ka dahị ụbwọ? Wa Ụkụrwọ nya Alẹrụ 10:34, 35, kanụ ya ẹla u-uhye nya ịtọ ẹla ịlẹ:

• IJihova kaa ye angịnyị ụma ọnyị myị́ ọnyị myị nyọka ri Alibeenu nyamwụ. Ányị ọọwa à tị́ ka gu abwọlẹ ká kaa yẹ angịlẹ kị datị hing?

• Irya ọlanyị angịnyị lụmẹ-lụmẹ o-oye nyang à tị́ kaa la ẹ-ẹga nya angị datị hyaa? Ịyẹ tị́ du ká ka cheji ba hi irya ọlịnyị?

Wa 2 Ala ịKọrịntị 6:11-13, kanụ ya ẹla u-uhye nya ịtọ ẹla ọlẹ:

• Ányị a tị́ ka bwu tụ́ ju aanang ịlẹ kị datị hing chwẹẹ?

5. Hịnyọhi bala ọ-họ okpunyi

IJihova kaa hịnyọhi hahị nanana nyori ọwa ayịdang á baba nyahị ọ-ka hịnyọhi họọ chajị nya ọhọbịrị ọhẹ-lọhẹ ka. Wa Eje Ọnyịịla 86:5, kanụ ya ẹla u-uhye nya ịtọ ẹla ịlẹ:

• Ẹlịyẹ a tị́ jẹ́ bwu ọgba ọwẹ u-uhye nya ọ-hịnyọhi nya iJihova?

• Ịyẹ tị́ du ká ọ-hịnyọhi nyamwụ myịng lẹhị?

• Iwe-ahụrụ iyina à tị́ ka du kọ ka lujwo nyọka la okpunyi bala angịkịla?

Ányị a tị́ ka bwu gbịla iJihova bala ọ-kịnyaa ẹ-ẹpwụ nya okpunyi ọlala bala aanahị? Wa Etu 19:11, kanụ ya ẹla u-uhye nya ịtọ ẹla ọlẹ:

• Kori ká ọngọhẹ á họ ẹla wụ́ng ẹjẹ, ịyẹ a tị́ ka họ nyọka nwụla iwe-ahụrụ ọọwa?

 Ahị kaa họ ẹla wụ́ angịkịla ẹjẹ ụka ọhẹ. Ịyẹ ahị tị́ ka họ kori kọ lịnyị? Yẹ IFIM ọwẹ, kanụ ya ẹla u-uhye nya ịtọ ẹla ọlẹ kọ tọọ da.

• Ẹ-ẹpwụ nya ifim ọwẹ, ịyẹ ọọnahị ọwẹ à tị́ họ chajị ká okpunyi ka ji?

 ẸLỊYẸ A TỊ́ JẸ́?

À ka jẹ́-ẹ dụbwọ chajị ká okpunyi ọlẹpwụ nya ọjịra-jịra ka nwà kịlahị-ịlahị bwula ọ-hịnyọhi bala ọ-mẹ ọháha jẹ ẹ-ẹga nya aanahị.

Ẹlịyẹ A Tị́ Yụbwọ Chị?

• Ányị a tị́ ka họ ká angịnyị ịdatị hing ka wụ́ng ẹjẹ ka?

• Ịyẹ a tị́ ka họ kori ká o-wo lawụlẹ-ka á ji ẹpwarịrị nyang ahụ bala ọọnang?

• Ịyẹ tị́ du ká tịtọ nyọka ba ọgụ-ẹpẹtẹ nya ọ-hịnyọhi nya iJihova jẹ?