1. Ịyẹ à tị́ du kọ kaa lujwo nyọka wo etu nya ọhịnyọhi nya angịnyị ehe?

 “M̀ HỊNYỌHI HANG LẸ.” Omyi ẹla ọwẹ kaa kpụ ọngịnyị ọkịlẹtụ nyii, ọgụgụ kori ká jẹ́ nyori ọwa nyị họ ẹla lee o-ya ẹla wụ ọngịnyị ẹjẹ! Ma etu nyori “m̀ hịnyọhi hang lẹ” tị́ ri ányị kpangga? Ọngọlẹ ká họ ẹla wụ ẹjẹ wẹẹ ya nyori anụ nyị ka jẹ́-ẹ ri aligu ọlam-ọlam tịrẹkpẹ myị́myị́ lẹ ịnyị? Lee ọ́ tị́ tịtọ nyọka ya ẹla u-uhye nya ẹla ọọwa gụ ọọwa kaka ịnyị? Ang lụmẹ-lụmẹ ji ẹpwụ nya ọhịnyọhi nya angịnyị ehe.

 2. Ányị ịBayịbụụ à tị́ chabwọ nya ọhịnyọhi nya iJihova? (Yẹ ọdawụlẹ oleji ịnyịnyị.)

² Ụgbẹyị ọlẹ ká iJihova kaa hịnyọhi hahị ahị angịnyị ehe ịlẹ kahị la kpẹẹkpẹẹ ka, datị hi abwọlẹ kahị kaa hịnyọhi ha awụlẹ. Ọngọngọhẹ-ẹ́ ka jẹ́-ẹ hịnyọhi lala iJihova kaka. Ọngọ da eje ọnyịịla ya ẹla u-uhye nya iJihova yẹkẹẹ: “À kaa hịnyọhi hahị ọlam-ọlam, du kahị ka jẹ-ẹ̀ ju uhi nyang.” a (Eje. 130:4, NW) Ee, iJihova kem à kaa “hịnyọhi” ọlam-ọlam lẹ. Ọwa à ri ọngọlẹ kọ mẹjẹẹhị ang ọlẹ ká ọhịnyọhi nya ịlẹhị ri lẹ. Omyi ẹla nya ala iHiburu ọlẹ ká angị da ịBayịbụụ kaa kpa ya ẹla rụ ọhịnyọhi nya iJihova lẹ, ị́ kpa ya ẹla rụ ọhịnyọhi nya angịnyị ehe ẹnẹnẹhẹ ka.

 3. Ányị ọhịnyọhi nya iJihova à tị́ bwu datị hi ịnyahị? (Ayịsaya 55:6, 7)

³ Ọhịnyọhi nya iJihova datị hi ịnya angịnyị ehe. Kori ká iJihova á hịnyọhi ha ọngịnyị lẹ aalẹ, ọ hịlẹ ịhọbịrị nya ọngọọwa gbang-gbang lẹ. Ahị ka jẹ́-ẹ myịmyị-ị̀ ri igu ọlam-ọlam balọọ tịrẹkpẹ. Ọ myịhị lẹhị nyọlẹ ká iJihova kaa hịnyọhi hahị weji-weji  bala ọ-kaa họ ịnyị ụka wuu.—Wa Ayịsaya 55:6, 7.

 4. Ányị iJihova à tị́ bwu dahị ụbwọ nyọka jẹ́ ang ọlẹ ká ọhịnyọhi ọlam-ọlam ri?

⁴ Kori ká ọhịnyọhi nya iJihova á datị hi ịnyahị, ányị ahị tị́ ka jẹ́-ẹ bwu wo etu nyamwụ yẹẹyẹẹ nyọlẹ kahị la kpẹẹkpẹẹ ka? IJihova kpa ẹla ị-chụ pwokwita ịhyẹ ya ẹla nyọka dahị ụbwọ jẹ́ jaabwọ kọ kaa hịnyọhi hahị. Ẹ-ẹpwụ nya ang ọjẹ́jẹ ọlẹ, ahị ka ya ẹla u-uhye nya ịhyẹ lẹpwụ nyaa. Ị ka mẹjẹẹhị jaabwọ ká iJihova kaa hu ịhọbịrị nyahị hiihi ụka kahị yẹda bala abwọlẹ kọ kaa ya iwe da hahị nyọka ri aligu nyamwụ ọlam-ọlam tịrẹkpẹ. Jaabwọ kahị wẹẹ ka kụ ẹhị yẹ ẹla ị-chụ pwokwita ịịwa, ị ka dahị ụbwọ ká ẹla nya Adahị, ọlẹ kọ ri Ohe nya ahyẹẹrwẹrwa ọlẹ kọ kaa hịnyọhi a-agbẹyị lụmẹ-lụmẹ, ka myịhị lẹhị gụ́ ọọwa.

IJIHOVA KAA HU ỊHỌBỊRỊ NYAHỊ HIIHI

 5. Ịyẹ à tị́ kaa họ ụka ká iJihova á hịnyọhi ịhọbịrị nyahị?

⁵ ỊBayịbụụ kaa chabwọ nya ịhọbịrị lala olo olilo. Adịrahụ iDevidi chabwọ nya ịhọbịrị nya ịlọmwụ ị-ịlẹ: “Ịhọbịrị nyam myị̀ birim hịkẹ-hịkẹ lala enyi, olo nyaa la tẹ̀mẹjẹ kịlam-kịla lọkpakpa.” (Eje. 38:4) Ma iJihova kaa hịnyọhi ha alịhọbịrị ịlẹ kị yẹ irya da. (Eje. 25:18; 32:5) Etu nya omyi ẹla nya iHiburu ọlẹ kị yẹda kaka ri “hịnyọhi” ẹ-ẹpwụ nya ịgba ịwẹ ri ọ-ka “hu ang hi” lee ọ-ka “hu ang kpa rụ.” Ahị ka jẹ́-ẹ yẹ iJihova lala ọlẹng ọlẹ kọ la ogogo yẹẹyẹẹ kọ wẹ ka hu olo olilo nya ịhọbịrị nyahị kparụ hiihi.

 6. Ányị iJihova à tị́ kaa hu ịhọbịrị nyahị daarụ lụrụ kaka ba?

⁶ Ẹla ọ-chụ pwokwita ọkịla ya ẹla jaabwọ ká iJihova kaa hu ịhọbịrị nyahị daarụ hiihi lụrụ kaka ba. Eje Ọnyịịla 103:12 yẹkẹẹ: “Jaabwọ ká ọmwẹnụ-ụtụrụ ji hwẹẹẹ hi ọmwẹnụ-obyi-ì wẹẹ, ịnyịnyị-ịnyịnyị ọ tụ ịhọbịrị nyahị rụ hwẹẹẹ hiihi lẹ.” Ọmwẹnụ-ụtụrụ lụrụ yẹẹyẹẹ hi ọmwẹnụ-obyi. Ịwa imimiiye á ka jẹ́-ẹ tawụlẹ ẹnẹnẹhẹ kaka. Etu nya ọọwa ri, iJihova kaa hu ịhọbịrị nyahị daarụ hiihi lụrụ kpoye nya abwọlẹ kahị ka jẹ́-ẹ me irya. Ẹlẹwẹ họ kahị jẹ́ nyori iJihova kaa hịnyọhi hahị chẹpwụ-chẹpwụ!

 7. Ányị ịBayịbụu à tị́ chabwọ nya ang ọlẹ ká iJihova kaa họ la ịhọbịrị nyahị? (ỊMayịka 7:18, 19)

⁷ Kori ká iJihova á hu ịhọbịrị nyahi daarụ lụrụ hiihi yẹẹyẹẹ lẹ, ọ kaa kpịtịya nyaa ẹ-ẹga kị ji wẹẹ? Ehe. Adịrahụ iHesekaya da ụpwụ u-uhye nya iJihova yẹkẹẹ: “À hịnyọhi ang inyibyi nyam wuu.” (Ayị. 38:9, 17) Ọ lala o-ri Ohe hu ọhọbịrị nyamwụ kpa rụ hi ahị nya ịlọmwụ. Ẹla ọ-chụ pwokwita ọwẹ mẹjẹ nyori iJihova kaa hu ịhọbịrị nya angịlẹ kị yẹ irya da daarụ hi ẹga ọlẹ kọ ka jẹ́-ẹ yaa. Ahị ka jẹ́-ẹ ya ẹla ọwẹ ụ-ụgbẹyị ọkịla ị-ịlẹ: “À hịlẹ ịhọbịrị nyam lala o-ri am nyị́ họ ịhọbịrị kpong-kpong ka.” ỊBayịbụụ ya ẹla ụma ọlịnyị-ịnyị ẹ-ẹpwụ nya ẹla ọ-chụ pwokwita ọkịla ọlẹ kị da ju ụ-ụpwụ nya ịMayịka 7:18, 19. (Wọọ.) Ụwa ya nyori iJihova nyị hu ịhọbịrị nyahị da ẹjwọ ju ka ẹpwụ nya ihu. Ụka onyogo lẹ, ịngịngịhyẹ ọlẹ kọ chabwọ da ka ẹpwụ nya ihu lẹ ị́ jẹ́-ẹ gbọọ tịrẹkpẹ kaka.

 8. Ẹlịyẹ ahị tị́ jẹ́ da ụka ọlẹ?

⁸ ỊBayịbụụ họ kahị jẹ́ nyori ụka ká iJihova á hịnyọhi hahị lẹ aalẹ, ọ kaa hu ịhọbịrị ọọwa kpa rụ hiihi gbang-gbang, lẹ áhị ka baba nyọka kpụ ịlọhị abyị kaka. Ọ la jaabwọ ká iDevidi ya ịnyịlẹhị. Ọ yẹkẹẹ: “Ahị ọwawa juwa ha angịlẹ wuu ká Ohe Oluhye hịnyọhi ang inyibyi ịhọhọ nyaa wuu haa lẹ, bala angịlẹ ká Ohe Oluhye á kpa ahyẹẹrwẹrwa nyamwụ chị ang ke ibyi nya ịhọbịrị ịlẹ kị họ wuu ịnyịnyị lẹ. Ahị ọwawa ka juwa ha ọng myị́ ọng ọlẹ ká Ọngọlahị á juwa da ọhọbịrị ọhọhọ nya ọngọọwa ju nọ gbe ẹnụtụrụ nya eje ohyẹẹkpẹ kaka, ịnyịnyị.” (Rom. 4:7, 8) Ọhịnyọhi nya ịlẹhị à wẹ lẹ!

 IJIHOVA KAA HỊLẸ ỊHỌBỊRỊ NYAHỊ HIIHI

 9. Ẹla ọ-chụ pwokwita oyina iJihova à tị́ kpa wụlẹ abwọlẹ kọ kaa hịnyọhi kaka ba?

⁹ IJihova kpa ẹla ọ-chụ pwokwita ọkịla chabwọ nya abwọlẹ kọ bwu kpa ọ-ra kpehe hịlẹ ịhọbịrị nya angịlẹ kị yẹda. Ọọwa tị ka du ká ẹla nyamwụ ka myịhị lẹhị gụ́ olene. Ahị wa ẹ-ẹpwụ nya ịBayịbụụ nyori iJihova kaa hụ́ ịhọbịrị bala ọ-wụlaa la enyi. Ọọwa du ká alịhọbịrị kaa la charị-charị. (Eje. 51:7; Ayị. 4:4; Jer. 33:8) IJihova la ịlọmwụ chabwọ nya ocheju nyamwụ ị-ịlẹ: “Anụ tị́ je jaabwọ ká ịwọ-ọ́ chị ang onyoowuru kọọ rụ̄ ka, ịịwẹ angịnyị ọnwụnwụ nyanụ à bịrị abwẹla nyanụ lẹ. M̀ tị ka hụụnụ kanụ ka pwo lala ara. Ó-ri ká ịngịhyẹ-ẹ́ chịnụ ịrị jaabwọ ká ịwọ kaa chị ang ịrị wẹwẹ, m̀ tị̀ ka yịlẹẹnụ kanụ ka la owuru lala owu olewu-lewu.” (Ayị. 1:18) Ọ kaa lujwo yẹẹyẹẹ nyọka jẹ́-ẹ hụ́ ang ọnyọmịla lala ịwọ lee ida rụ hi apwụ onyoowuru. IJihova kpa ẹla ọ-chụ pwokwita ọwẹ ya ẹla chajị nyọka ya ahị ọdahile hahị nyori ọwa nyị ka jẹ́-ẹ hụ ịhọbịrị nyahị gbee ká ịrị ọhẹ-lọhẹ á ka hi baahị kaka.

10. Ẹla ọ-chụ pwokwita ọkịla oyina iJihova à tị́ kpa chabwọ nya abwọlẹ ká ọhịnyọhi nyamwụ lụmẹ kaka ba?

¹⁰ Jaabwọ ká ang ọjẹ́jẹ ọlẹ kọ jene nyọlẹ ya, ịhọbịrị lala “uri” ọkpakpa. (Mat. 6:12; Luk. 11:4) Lẹ ụka myị́ ụka kahị họ ọhọbịrị ba iJihova, ọ lala o-ri ahị nyị wẹẹ kpọọ uri gụ́ ọla ene-ene. Uri ọtụka-ọtụka ahị kpa iJihova wẹ lẹ! Ma ụka kọ hịnyọhi hahị lẹ aalẹ, ọ lala o-ri nyị nyẹẹkpẹ da uri ọlẹ kahị ka nwụ ịnọ lẹ. Ọ́ ka myị́myị́-ị ya ahị nyị nwụ uri nya ịhọbịrị ịlẹ kọ hịnyọhi hahị lẹ kaka. Jaabwọ ká ọngịnyị ọlẹ kọ kpa uri ọtụka-ọtụka kị tị ya ga họọ kaa chị ọkẹkẹnị, ịnyịnyị ọ kaa lahị ụka ká iJihova á hịnyọhi hahị lẹ!

11. Ịyẹ à tị́ ri etu nyọlẹ ká ịBayịbụu ya nyori Ohe nyị ‘hịlẹ ibyi’ nya ịhọbịrị nyahị hiihi? (Ụkụrwọ nya Alẹrụ 3:19)

¹¹ IJihova á kaa nyẹẹkpẹ da uri, lee ịhọbịrị nyahị chwee ka, ọ kaa hịlaa hiihi ịnyịnyị. (Wa Ụkụrwọ nya Alẹrụ 3:19.) Ụka ká ọngịnyị á hịnyọhi uri ha ọngọkịla, ọ lala o-ri nyị gbile ịgba imiiye wẹ awụlẹ wẹ ị-ịlẹ X, bwu uhye nya ẹga ọlẹ kọ dọọ ju lẹ. Ma, ịnọmba ọlẹ kọ da ene kọ wẹẹ gbile ịgba wẹ awụlẹ wẹ bwu uhye nyamwụ ka jẹ́-ẹ hyehe wẹẹ. Ma ọ-ka hịlẹ ang tị datị. Nyọka wo etu nya ẹla ọ-chụ pwokwita ọwẹ, ahị baba byọka kpịtịya nyori ụma nya èbè ọlẹ kị kaa kpa da ụpwụ lụka nya alene jẹ́-ẹ hịlẹ i-ijata. Ọngịnyị ka jẹ́-ẹ kpa ichocho ọlẹ kọ ju enyi hịlẹ ang ọlẹ kị da hụrụ. Lẹ ụka kị ‘hịlẹ ibyi’ nya uri nyahị hiihi lẹ aalẹ, ọ kaa byi gbang-gbang lẹ. Angịnyị á ka jẹ́-ẹ yẹ ịna ọlẹ kị da ụ-ụwa ene kaka. Ọ kaa lala o-ri ahị nyị́ dọmwụ kpa uri ene lẹka. Ọ kpụhị ọkịlẹtụ nyii nyọka jẹ́ nyori iJihova á kaa hịnyọhi ịhọbịrị nyahị kem ka, ma ọ kaa hịlaa gbang-gbang ịnyịnyị!—Eje. 51:9.

12. Ẹlịyẹ ahị tị́ jẹ́ bwu ọ-chụ pwokwita nya egbamwụ?

¹² IJihova kpa ẹla ọ-chụ pwokwita ọkịla ụma ọlịịwẹ ya ẹla nyọka chabwọ nya abwọlẹ kọ kaa hịlẹ ịhọbịrị hi ọngịnyị. Ọ yẹkẹẹ: “M̀ tụ ang inyibyi nyang tuu hụrụ lala egbamwụ. M yịlẹ ịhọbịrị nyang hụrụ jaabwọ ká amwụ kaa go ba.” (Ayị. 44:22) Ụka ká iJihova á hịnyọhi, ọ kaa lala nyị hu egbamwụ ọchụka ọhẹ ke ị-họ tịpyọ nyahị chajị kaahị lee ọwa á ka jẹ́-ẹ yaa kpong-kpong kaka.

13. Ụka ká iJihova á hịnyọhi ịhọbịrị nyahị, ányị ọ tị́ kaa lahị?

¹³ Ịyẹ ẹla ọ-chụ pwokwita ọwẹ à tị́ mẹjẹẹhị? Ụka ká iJihova á hịnyọhi ịhọbịrị lẹ, ahị myịmyị kịnyaa la ọ-kpụ ịlọhị abyị u-uhye nyaa kaka. Bwula ịwọ nya iJisọsị, Ohe hịlẹ ịhọbịrị nyahị wuu kpẹng-kpẹng lẹ. Ọ́ daa ju ẹ-ẹgẹhẹ kpụ ọ ka yaa myị́myị́ kaka. Kori kahị yẹ irya da bwu ẹpwụ nya ịhọbịrị nyahị lẹ aalẹ, ịịwẹ iJihova à kaa hịnyọhi hahị lẹlẹ.

 IJIHOVA KAA YEHI MYỊ LALA ALIGU NYAMWỤ TỊRẸKPẸ

14. Ịyẹ tị́ du ká ọhịnyọhi nya iJihova ju ọdahịhile? (Yẹ ifoto ịnyịnyị.)

¹⁴ Nyọlẹ ká iJihova kaa hịnyọhi hahị cheji-cheji wẹẹ, o dudu kahị jẹ́-ẹ ri igu ọlam-ọlam balọọ myị́myị́. Ọọwa dudu kahị kaa kịnyaa la ọ-kpụ ịlọhị abyị kaka. Áhị baba nyọka juhi nyori iJihova kpa ẹla nyahị ẹ-ẹpwụ juwa wẹẹ bala o-ri ọ ja mwahị nya iwe ọlẹ kọ ka kpa yẹẹhị akama chajị nyaa ka. Ọ́ ka myị-ị họ ịnyị ẹnẹnẹhẹ ka. Ụka ká iJihova á ya nyori ọwa nyị hịnyọhi hahị lẹ, ahị dahịhilọọ mẹ. IJihova byi ọlọmwụ iJeremaya yẹkẹẹ: “M ka hịnyọhi ọhọbịrị nyaa. M ka kpịtịya nyang inyibyi ịlẹ kị họ kaka.” (Jer. 31:34) Ọlẹrụ ịPọlụ ya ẹla ụma ọlịnyị-ịnyị ụka kọ ya ẹla rụ ẹlẹwẹ nyori: “Ḿ ka kpịtịya nya ịhọbịrị nyaa ịlẹ wuu kị họ kpong-kpong lụka ọọwa kaka.” (Hib. 8:12) Ma ịyẹ etu nya ọọwa à tị́ ri ịlẹhị?

15. Ịyẹ à tị́ ri etu nya iJihova ọ-ka myị́myị́-ị kpịtịya nya ịhọbịrị nyahị kaka?

¹⁵ Ẹ-ẹpwụ nya ịBayịbụụ, ụ-ụka wuu etu nya omyi ẹla ọlẹ ko ri “kpịtịya” à kaa ri ọ-ka kpịtịya nya ẹla ọlẹ kọ họ kẹkpẹ lee ọ-ka kụ irya u-uhye nyamwụ ka. Etu nyamwụ ka ri ọngịnyị ọ-ka họ ẹla u-uhye nya ẹla ọlẹ kọ kpịtịya. Oloyi ọlẹ kị gu ilo ịkịka nya iJisọsị bịlẹ yẹkẹẹ: “Ayịbahị iJisọsị ee, Aa chuchuu, ká kpịtịya nyam ụka ọlẹ ká ka tịrẹkpẹ warị la ọngịrị nya adịrahụ oriri nyang.” (Luk. 23:42, 43) I-irya ọ-ka kụ chajị nyamwụ lụka ọọwa ị-ịwẹ kem ọ wẹẹ bịlẹ iJisọsị ka. Ẹla ọlẹ ká iJisọsị wẹ mẹjẹ nyori ọ ka họ ụkụrwọ nyọka wulọọ eji bwula igu. Lẹ, ụka ká iJihova ya nyori ọwa nyị́ ka kpịtịya nya ịhọbịrị nyahị kaka, etu nya ọọwa ri ọ́ ka myị-ị wuhi uri nyaa kaka. Ọ́ ka myị́myị́-ị yẹẹhị akama ị-ịlahị chajị nya ịhọbịrị ịlẹ kọ hịnyọhi lẹ kaka.

16. Ányị ịBayịbụụ à tị́ chabwọ nya ịlọhị ọlala ọlẹ kahị kaa yé ụka ká Ohe á hịnyọhi hahị ọlam-ọlam?

¹⁶ Ụka ká iJihova á hịnyọhi hahị lẹ aalẹ, ahị gbocho lẹ. ỊBayịbụụ kpa ẹla ọ-chụ pwokwita ọkịla ya ẹla nyọka dahị ụbwọ wo etu nya ẹlẹwẹ. Chajị nyọlẹ kahị la kpẹẹkpẹẹ ka wẹẹ, ahị ri “anyịhị nya ọhọbịrị ọhọhọ.” Ma ụka ká iJihova  hịnyọhi hahị, ahị lala anyịhị ịlẹ ká Ohe ‘chị da bwu ẹpwụ nya ọhọbịrị ọhọhọ lẹ.’ (Rom. 6:17, 18; Ọwụ. 1:5) Ee, ọhịnyọhi nya iJihova kaa ya ọkẹkẹnị ọtụka-ọtụka hahị chajị ahị jẹ́ nyori ahị gbocho bwu ẹpwụ nya ọnyọhị oriri lẹ.

17. Ányị ọhịnyọhi à tị́ kaa kpa uda ọhọhọ wẹ ọngịnyị? (Ayịsaya 53:5)

¹⁷ Wa Ayịsaya 53:5. ỊBayịbụụ ya nyori chajị nyọlẹ kahị ri ala ịhọbịrị wẹẹ, ahị lala angịlẹ kị la ẹdụrụ ọtịpyọ ọhẹ. Nyọlẹ ká iJihova ya Ọnyị nyamwụ kịliya chajị nyahị wẹẹ, ọ họhị uda lẹ. (1 Pit. 2:24) Ụka kahị họ ọhọbịrị, ahị kaa bịrị igu oriri nyahị bala iJihova. Ma ọ-ra kpehe dudu kọ kaa hịnyọhi hahị kpụ ahị jẹ́-ẹ ri igu ọlam-ọlam balọọ myị́myị́. Jaabwọ ká ọngịnyị ọlẹ kọ yé uda bwu ẹdụrụ ọnyọọngịrị ọlẹ kọ la kaa chị ọkẹkẹnị yẹẹyẹẹ, ahị ịnyịnyị kaa chị ọkẹkẹnị ụka ká iJihova á họhị uda nya olegu kpụ kahị jẹ́ ri igu balọọ tịrẹkpẹ chajị nya ọhịnyọhi nyamwụ.

ABWỌLẸ KÁ ỌHỊNYỌHI NYA IJIHOVA KAA GUHI

18. Ẹlịyẹ ahị tị́ jẹ́ u-uhye nya ọhịnyọhi nya iJihova bwula ọ-kụ ẹhị yẹ ọ-chụ pwokwita ịlẹ ká ịBayịbụụ kpa ya ẹla? (Yẹ akpa ọlẹ kọ ri “Abwọlẹ ká IJihova kaa Hịnyọhi Hahị.”)

¹⁸ Ẹlịyẹ ahị tị́ jẹ́ nyọlẹ kahị kụ ẹhị yẹ ọ-chụ pwokwita u-uhye nya ọhịnyọhi nya iJihova bwu ẹpwụ nya ịBayịbụụ? Kori kọ hịnyọhi lẹ aalẹ, ọ họ ịnyị weji-weji lẹ, ọ́ tị ka wuhi uri nyamwụ ẹnẹnẹhẹ kaka. Ọọwa dudu kahị jẹ́-ẹ ri igu ọlam-ọlam bala Adahị olepwoohe. Ahị tị ka kpịtịya ịnyịnyị nyori ọhịnyọhi ọlịịwẹ ri āhị ẹ-ẹga nyahị. Ọháha bala ahyẹẹrwẹrwa ọlẹ ká iJihova la ẹ-ẹga nyahị ahị ala ịhọbịrị à du kọ ya āhị ọwẹ hahị lẹ, ahị angịnyị ehe á họ ẹla kpọọ ịnọ ka.—Rom. 3:24.

19. (a) Ẹlịyẹ ahị tị́ ka họ pyii ene kahị ka yé ọhịnyọhi? (Ala iRom 4:8) (b) Ẹlịyẹ ahị tị́ ka kụ ẹhị yẹ ẹ-ẹpwụ nya ang ọjẹ́jẹ ọkịla?

¹⁹ Wa Ala iRom 4:8. Ọ myịhị lẹhị yẹẹyẹẹ nyọlẹ ká iJihova ri Ohe ọlẹ kọọ “hịnyọhi” ọlam-ọlam! (Eje. 130:4) Ma, kori kahị tịtọ nyọka yé ọhịnyọhi nya iJihova aalẹ, ahị ịnyịnyị baba nyọka họ ang ọkpọnchị ọhẹ. IJisọsị wụlẹ yẹkẹẹ: “Ó . . . ri kanụ myị juwa hịnyọhi ịhọbịrị nya angịnyị ehe aananụ ịkịla haa ka aalẹ, Ohe Oluhye Adanụ á tịtị ka hịnyọhi ịhọbịrị nyanụ anụ hanụ ka ịnyịnyị.” (Mat. 6:14, 15) Lẹ, ọ baba kahị ka gbịla iJihova bwula ọhịnyọhi ha angịkịla pyii. Ma ányị ahị tị́ ka jẹ́-ẹ họ ịnyị? Ang ọjẹ́jẹ ọkịla ka mẹjẹẹhị jaabwọ kahị ka bwu họ ịnyị.