1-2. Jaabwọ ká ụpwụ nya Eje Ọnyịịla 34:8 ya, ányị ahị tị́ ka bwu jẹ́ ang u-uhye nya abwẹla ịnyịịla nya iJihova?

KỤ IRYA nyori ọngọhẹ ya ang oriri ọlẹ ká kpa kọnụ ẹnẹnẹhẹ lẹka hang nyọka ri wẹẹ. À ka jẹ́ ang u-uhye nya ang oriri ọọwa bwula ọ-mwụụrụ yọọ, koo oru, jẹ́ jaabwọ kị kaa bwu kpọọ, lee ọ-tọ angịkịla wo kori ká ang oriri ọọwa-á kaa háa. Ma, ụgbẹyị ọlẹ kem á ka bwu jẹ́ kori ká ang oriri ọọwa-á ka háng ri ọ-ka kpọọ kọnụ lịlọng.

² Ahị ka jẹ́ ang u-uhye nya abwẹla ịnyịịla nya iJihova bwula ọ-wa ịBayịbụụ bala apwụ nyahị tụ́ ọ-ka wo ẹla bwu ẹga nya angịkịla u-uhye nya ahị ọwawa ịlẹ kị yé bwu ẹga nya iJihova. Ma ahị ka jẹ́ jaabwọ ká iJihova há kaka ba kori kahị “wụlayẹ” lịlọhị. (Wa Eje Ọnyịịla 34:8.) Ọ-chụ pwokwita nya ụgbẹyị ọhẹ ọlẹ kahị ka bwu họ ịnyị lẹẹ. Ọhẹka ahị tịtọ nyọka kpa ụka nyahị wuu họ ụkụrwọ nya iJihova, ma nyọka jẹ́-ẹ họ ịnyị, ahị ka baba nyọka hu ọhịhị nyahị hukee. Ọhẹka ụka lụmẹ-lụmẹ, ahị kaa wa ọnụ ọmyịmyị nya iJisọsị ọlẹ kọ ya nyori, kori káahị nyị́ hu Ịpyị-Adịrahụ nya Ohe kụ ịlahị, iJihova nyị ka ya ang ịlẹ kị ri ịbaba nyahị hahị, ma áhị tị yẹ ká iJihova họ ịnyị hahị ụka ọhẹ lẹka. (Mat. 6:33) Ma nyọlẹ kahị la ọmyịmyị u-uhye nya ehe ọchịchị nya iJisọsị wẹẹ, ahị cheje nyọka kpa okpoko ọlẹ kahị la họ ang dụmwọ-dụmwọ, chụ ụka ọlẹ kahị kaa kpa họ ụkụrwọ hi, bala ọ-kaa ya ahị ju ụkụrwọ nya ẹrụ ọnyịịla ọ-kpa pyẹ. Jaabwọ kahị wẹẹ họ ịnyị, ahị ka yẹ lịlọhị nyori iJihova kaa họ ịbaba nyahị hahị ịnyịlẹhị. Ahị lịlọhị ka ‘yẹ’ jẹ́ nyori iJihova la ọháha.

3. Jaabwọ ká ụpwụ nya Eje Ọnyịịla 16:1, 2 ya, owo anyị à tị́ kaa yé ang ọnyịịla bwu ẹga nya iJihova?

³ IJihova kaa “họ ang ọnyịịla ha ọng̣ myị́ ọng wuu,” tụ́ angịlẹ kị dọmwụ jọ́ọ jẹ́ ka. (Eje. 145:9; Mat. 5:45) Ma angịlẹ kị la ọháha ẹ-ẹga nya iJihova bala ọ-kaa gbịgba họọ la ọkịlẹtụ nyaa wuu à  kaa yé ahị ọwawa bwu ẹga nyamwụ gụgụụgụ lẹ. (Wa Eje Ọnyịịla 16:1, 2.) Ahị ya ẹla u-uhye nya ang ịnyịịla ịhyẹ ịlẹ ká iJihova họ hahị wẹẹ.

4. Ányị iJihova à tị́ị̀ mẹ abwẹla ịnyịịla nyamwụ jẹ ẹ-ẹga nya angịlẹ kị dọmwụ nyọka tụ́ jwoo chwẹẹ?

⁴ Ụka myị́ ụka kahị kpa ẹla ọlẹ kahị jẹ́ bwu ẹga nya iJihova họ ụkụrwọ, ahị kaa yẹ jaabwọ kọ kaa dahị ụbwọ ẹ-ẹpwụ nya ọhịhị. Jaabwọ kahị wẹẹ jẹ́ ang u-uhye nyamwụ bala ọ-la ọháha ẹ-ẹga nyamwụ, ọ kaa dahị ụbwọ nyọka pẹhi irya bala abwẹla ịlẹ kị họ́ọ ka. (Kol. 1:21) Ụka kahị tị hu ọhịhị nyahị ju iJihova ụ-ụbwọ, kahị hu enyi Ohe, ọ kaa họ ang ịnyịịla hahị gụ ọọwa, ang lala irya ọ-la eje ocheri-cheri bala igu oriri ọlam-ọlam balọọ.​—1 Pit. 3:21.

5. Agbẹyị iyina ahị tị́ị̀ yẹ abwẹla ịnyịịla nya iJihova ẹ-ẹpwụ nya ẹrụ ọnyịịla ọ-kpa pyẹ?

⁵ Ahị kaa yẹ abwẹla ịnyịịla nya iJihova kịlahị-ịlahị jaabwọ kahị wẹẹ họ ụkụrwọ nya ẹrụ ọnyịịla ọ-kpa pyẹ. À ri ọngọ kaa ju oyi? Anchẹ nya iJihova lụmẹ-lụmẹ kaa ju oyi. Ọhẹka ene ká-à wẹ ka ri ọngọhẹ nya Alibeenu nya iJihova, á ka kụ irya nyori ọwa nyị ka jẹ́-ẹ kaka ya ụbwọ kpụ ụgbẹyị nya ọngịnyị ọlẹ ká jẹ́ ẹnẹhẹ lẹka nyọka ya ẹla bwu ịBayịbụụ joo ka. Ma, à tị jẹ́ wẹẹ họ ịnyị ụka myị́ ụka alẹ lẹ. Ọ́ ba ọ-ọwẹ ka, bwula ụbwọ ọdada nya iJihova, à jẹ́ wẹẹ jẹ́ ịpyọ ọkpụkpụ nya ụkụrwọ nya ẹrụ ọnyịịla ọ-kpa pyẹ lẹ! IJihova tị dang ụbwọ a-agbẹyị ịkịla lụmẹ-lụmẹ ịnyịnyị. Ọ dang ụbwọ nyọka kụ kem ụka ká ọngịnyị á myị́ hang ka, ẹ-ẹrụ ọnyịịla ọ-kpa pyẹ. Ọ dang ụbwọ ịnyịnyị nyọka kpịtịya nya ụpwụ ịgọgọ ọlẹ kọ pwoku ọngịnyị ọlẹ kọ myị ke ụrụ. Ọ tị jung ọngịrị nyọka kịnyaa la ọ-kpa ẹrụ ọnyịịla pyẹ tụ́ ụka ká angịnyị á dọmwụ myị ke ụrụ ka.​—Jer. 20:7-9.

6. Ányị ang ọlẹ ká iJihova kaa mẹjẹ́ẹhị à tị́ mẹjẹ nyori ọ ri Ohe ọnyịịla?

⁶ IJihova myịmyị họ kahị jẹ́ nyori o ri Ohe ọnyịịla bwula ọ-kaa mẹ ang jẹ́ẹhị nyọka jẹ́-ẹ kpa ẹrụ ọnyịịla pyẹ. (Jọn. 6:45) Ụka nya ọjịra-jịra nyahị ọlẹpwarịrị nya epwihi, ahị kaa yé irya ọ-gba kpehe ịnyịịla-ịnyịịla u-uhye nya abwọlẹ kahị ka bwu ya ẹla, ị tị kaa juhị ọhụ nyọka kpa ẹla ịịwa họ ụkụrwọ ẹ-ẹrụ ọnyịịla ọ-kpa pyẹ ịnyịnyị. Ahị ka juhi pyịnyẹng ụka nya ọgbanyẹ nyọka ma ụgbẹyị onyeewe yẹ myị́, ma kori kahị họ ịnyị, ahị ka yẹ nyori ụgbẹyị onyeewe ọwẹ kaa kpa angịnyị ịla oye nyahị ịpyọ. Ị kaa juhị ọhụ ọọjịra-jịra nya epwihi bala ọjịra-jịra ọtụka nyọka ma agbẹyị nya ẹrụ ọnyịịla ọ-kpa pyẹ ịdatị-datị yẹ kori kahị dọmwụ maa yẹ ẹnẹhẹ lẹka wẹwẹ. Ọwẹ ịnyịnyị ka kpa uhi ojuju wẹpwụ nyahị myị́, ma kori kahị họ ịnyị aalẹ, ahị wẹẹ ya iwe da ha iJihova nyọka wahị kụrụụhị. Ahị ka ya ẹla u-uhye nya ahị ọwawa ịhyẹ ịlẹ kahị ka yé kori kahị ma agbẹyị inyeewe ịwẹ yẹ nyọka jẹ́-ẹ họ ụkụrwọ ha iJihova yẹẹyẹẹ jaabwọ myị́ abwọ ká iwe-ahụrụ nyahị á la. Ọọwa lẹ, ahị ka myịmyị-ị̀ ya ẹla u-uhye nya agbẹyị ịlẹ kahị ka bwu họọ myị́ lẹlẹ.

7. Ahị ọwawa oyina ahị tị́ ka yé kori kahị maga nyọka họ ụkụrwọ ha iJihova gụ olene?

⁷ Ahị kaa tụ́ ju iJihova chwẹẹ gụ ọọwa. Kụ irya nya ọ-chụ pwokwita nya ọngọgbahị nya ọjịra-jịra ọhẹ ká ẹnyị nyamwụ ri Samuel wẹẹ. * Ọwa bala ahụ nyamwụ kaa dụbwọ ịị Colombia. Ọ kaa kpụ ahụ bala ọrụ ọwẹ ịpyọ nyọka ye ịlahị nya ụgbẹyị ọọjịra-jịra nyaa, ma ị tị tịtọ nyọka họ ụkụrwọ ha iJihova gụ olene bwula ọ-dụbwọ ọọjịra-jịra ọhẹ ọlẹ ká ọbaba ji gụ. Nyọka họ ịnyị myị́, ị dọmwụ nyọka chị ịlaa imyi kpẹpwụ. Samuel yẹkẹẹ: “Ahị ba ẹla ọlụpwụ nya ịMatiyu 6:33 jẹ, lẹ ahị hwabwọ la ọ-ra ang ịhyẹ ịlẹ kị baba hahị kaka lẹlẹ. Ma ẹta-ẹdịyẹ ọlẹ kọ tị lahị ujwo nyọka hu gụ wuu ri ọ-ka rụ hi ẹpwa nyahị. Ị nwụ ube ọwa jaabwọ kahị tịtọ, áhị tị kpa uri nya ẹpwa ọọwa kaka.” Ụka kị mwụ́ ka ọjịra-jịra  onyeewe ọọwa, ị yẹ nyori ị́ baba nya okpoko lala abwọlẹ kị kaa la ene-ene nyọka hịhị ẹ-ẹga ọọwa ka. Samuel yẹkẹẹ: “Ahị yẹ abwọlẹ ká iJihova kpahị ụgbẹyị bala ọ-wẹ abwọ ọrịrị nyahị. Ahị yẹ jẹ́ nyori iJihova chị ọkẹkẹnị tahị, ahị tị yẹ ọháha nyamwụ a-agbẹyị ịlẹ kahị yẹ ẹnẹnẹhẹ lẹka ịnyịnyị.” À ka jẹ́-ẹ họ ụkụrwọ ha iJihova gụ olene ụ-ụgbẹyị ọhẹ lee ọkịla myị́? Ó ri ịnyị aalẹ, jẹ́ myị̀myị̀ nyori à ka tụ́ ju iJihova chwẹẹ gụ ọọwa, ọ tị ka ya ang ịlẹ kị ri ịbaba nyang hang ịnyịnyị.​—Eje. 18:25.

8. Ẹlịyẹ a tị́ jẹ́ bwu ẹpwụ nya ẹla ọlẹ ká Ivan bala Viktoria ya?

⁸ Ahị kaa yé ọkẹkẹnị ẹ-ẹpwụ nya ụkụrwọ nyahị. Wo ẹla ọlẹ ká Ivan bala Viktoria, kị ri ahụ bala ọrụ ịhyẹ ịlẹ kị kaa ye ịlahị nya ụgbẹyị ịị Kyrgyzstan ya lẹẹ wẹẹ. Ị hu ọhịhị nyaa hukee chajị kị ka ya ụbwọ kpụ ịlaa nya ụkụrwọ ọnyị myị́ ọnyị kọ ji, tụ́ ịnya ebe ị-kpa gbịgba ọnwụ́nwụ́. Ivan yẹkẹẹ: “Ahị kaa kpa ọngịrị nyahị wuu họ ụkụrwọ ọnyị myị́ ọnyị kị ya hahị. Ịlẹhị lẹ ịnyịrọ kaa chị́ịhị pyẹpyẹ la ocheju nya ahyẹẹnụ, ahị tị kaa chị ọkẹkẹnị chajị ahị jẹ́ nyori ụkụrwọ nya ẹla nya Ịpyị-Adịrahụ ahị wẹẹ kpa ọngịrị nyahị họ lẹ. Ahị tị chị ọkẹkẹnị ịnyịnyị chajị nya aligu inyeewe ịlẹ kahị yé bala ụka ịnyịịla ịlẹ kahị la lawụlẹ.”​—Mak. 10:29, 30.

9. Ịyẹ ọọnahị ọnyang ọhẹ ọlẹ kọ ji ẹpwụ nya iwe-ahụrụ olujwo à tị́ họ nyọka jẹ́-ẹ họ ụkụrwọ nya iJihova gụ ọọwa? Ịyẹ à tị́ ri ocheju nyamwụ?

⁹ Ahị kaa yé ọkẹkẹnị ẹ-ẹpwụ nya ụkụrwọ nya iJihova kori kahị dọmwụ ji ẹpwụ nya iwe-ahụrụ olujwo wẹwẹ. Ọ-chụ pwokwita, Mirreh, bwu West Africa ri ahụ-ogu bala ọ-chị okwirichi lẹ. Ọ dọmwụ nyọka ye ịlahị nya ụgbẹyị ụka ọlẹ kọ mwịịnyọ hi ụkụrwọ nya ube-utoji ọhọhọ. Mirreh la ẹdụrụ nya àdị́yẹ́ ọ-jụ ọngịnyị, ọọwa dudu kọ jẹ́-ẹ hụ kpoye nya awa ookpokpo ẹ-ẹpwụ nya ẹrụ ọnyịịla ọ-kpa pyẹ bwu ẹpwa ka ẹpwa kaka. Ma ọ tị jẹ́-ẹ́ bịrị ụka gụ olene ẹ-ẹga nya ẹrụ ọnyịịla ọ-kpa pyẹ ẹ-ẹpwụ nya alụma. Ọ la ọmwẹẹkpẹ ka bala ịBayịbụụ ọjẹ́jẹ yẹẹyẹẹ, ifon ọ tị jẹ́-ẹ kpa jẹ́ ang ta angịhyẹ nyaa lẹ. Ịyẹ à tị́ du ká Mirreh tịtọ nyọka họ ụkụrwọ gụ ọọwa ha iJihova? Ọ yẹkẹẹ: “Ọkịlẹtụ nyam myị̀ la ọháha ẹ-ẹga nya iJihova bala ịKịrayịsị iJisọsị. M̀ tị kaa raabwọ ụka myị́ ụka nyori iJihova a dam ụbwọ nyọka họ jaabwọ kam ka jụ họ myị́ ẹ-ẹpwụ nya ụkụrwọ nyamwụ.”​—Mat. 22:36, 37.

10. Jaabwọ ká ụpwụ nya 1 iPita 5:10 ya, ịyẹ iJihova à tị́ kaa họ ha angịlẹ kị myị ọnụ nyọka họ ụkụrwọ nyamwụ?

¹⁰ IJihova kaa mẹ ang jẹ́ẹhị gụ ọọwa. Kenny, kọ kaa ye ịlahị nya ụgbẹyị ịị Mauritius, yẹ nyori ẹlẹwẹ ri ịnyịlẹhị. Nyọlẹ kọ wẹ ka jẹ́ ẹlịlẹhị, ọ hwabwọ hi ube-ụpwụ ọgbẹgbịlẹ, ọ hụ enyi Ohe lẹ, ọ dọmwụ nyọka họ ụkụrwọ nya iJihova la ụka nyamwụ wuu lẹlẹ. Ọ yẹkẹẹ: “M̀ kaa maga nyọka hịhị ba ẹla ọlẹ ká ọlọmwụ Ayịsaya ya nyori: ‘Am lẹẹ lẹ, dum mẹ.’ ” (Ayị. 6:8) Kenny dụbwọ ẹ-ẹpwụ nya akụrwọ nya ebe ịnwụ́nwụ́ lụmẹ-lụmẹ bala ọ-dụbwọ yẹ apwụ ị-da ịBayịbụụ wụlẹ nyahị da ka òja nyamwụ. Kenny yẹkẹẹ: “M̀ jẹ́ ang u-uhye nya ijẹẹhị ọlẹ kam baba nyọka kpa họ ụkụrwọ ọlẹ kị ya ham.” Ma, ang ọlẹ kị mẹjọ́ọ á ba u-uhye nya abwọlẹ ká ọngịnyị ka bwu họ ụkụrwọ kem ka. Ọ myịmyị ya nyori, “M̀ jẹ́ ang u-uhye nya ang ịlẹ kam ka jẹ́-ẹ họ myị́ ka bala abwẹla ịlẹ kam baba nyọka la chajị kam ka ri ọnchẹ nya iJihova ọnyịịla gụ ọọwa.” (Wa 1 iPita 5:10.) À ka wụla iwe-ahụrụ nyang yẹ myị́ nyọka jẹ́ kori ká ka jẹ́-ẹ hu ịlọng ha ká iJihova ka mẹ ang jẹ́ng gụ ọọwa?

11. Ịyẹ aanahị ịhyẹ ịị South Korea à tị́ họ nyọka jẹ́-ẹ kpa ẹrụ ọnyịịla pyẹ? Ịyẹ à tị́ ri ocheju nya ọọwa? (Yẹ ifoto ọla ẹbẹ nya ọgbanyẹ.)

¹¹ Angịlẹ kị dọmwụ ri Alibeenu lụka ọtata lẹ kaa yé apyobwuna bwu ẹpwụ nya ang ọmẹjẹ ụka kị ja họ ụkụrwọ ha iJihova ụ-ụgbẹyị onyeewe. Nyọlẹ ká ẹdụrụ nya COVID-19 bene, angịgbahị nya ọjịra-jịra ọhẹ ịị South Korea da ụpwụ yẹkẹẹ: “Angịhyẹ ịlẹ kị me ene-ene nyori ịwa nyị́ ka jẹ́-ẹ kpa ẹrụ ọnyịịla pyẹ kaka ọọlajị  nya ịnyịrọ ọ-la gogo ka, jẹ́-ẹ họ ịnyị lẹẹlẹẹ bwula ọ-wụrụ ọngịnyị la ang-abwọ nya ichẹnẹ ịlẹ kị jẹ́-ẹ yẹ awụlẹ bwu lẹ. Aanahị anyang ịta ịhyẹ kị gu ẹka 80 da uhye myị́ lẹ, jẹ́ ang u-uhye nya ịkọmputa lẹ, ị dọmwụ nyọka kpa ẹrụ ọnyịịla pyẹ ụka wuu lala o-ri nyị́ ka chị ahyẹẹnụ ọhẹ-lọhẹ da kaka lẹlẹ.” (Eje. 92:14, 15) Ọ ka háng ká ka kpa ẹrụ ọnyịịla pyẹ gụ olene nyọka yẹ gụ ọọwa nyori iJihova ri Ohe ọnyịịla? Ẹta-ẹdịyẹ ịhyẹ ịlẹ á ka hu nyọka jẹ́-ẹ wu ang ịịwa ọyị myị́ lẹẹ.

12. Ịyẹ iJihova à tị́ myị ọnụ ha angịlẹ kị dahịhiloo?

¹² Dahịhile iJihova. Ọ myị ọnụ nyọka wahị kụrụụhị yẹẹyẹẹ kori kahị dahịhiloo bala ọ-họ ụkụrwọ nyamwụ la ọngịrị nyahị wuu. (Mal. 3:10) Ọọnahị ọnyang ọhẹ ịị Colombia ká ẹnyị nyamwụ ri Fabiola yẹ jaabwọ ká iJihova họ ọnụ ọmyịmyị ọwẹ jịra ẹ-ẹga nyamwụ. Ọ tịtọ nyọka ye ịlahị nya ụgbẹyị kpụrụrụ nyọlẹ kọ hu enyi Ohe kpá. Ma, ọ tị baba nyọka họ ụkụrwọ chajị kọ ka jẹ́-ẹ da alugbiyegu nyamwụ ụbwọ. Lẹ nyọlẹ ká ụka nyamwụ pwụ nyọka ya ọkwụta beji la ụkụrwọ, ọ raabwọ nyịlẹhị-ịlẹhị ha iJihova nyọka dọọ ụbwọ. Ọ yẹkẹẹ: “Ọ kaa ye ụka chẹẹ ịnọ nyọka wụla apwụ nya ọngịnyị yẹ ene nyọka nwọọ uri ọọwa, ma ị tị ye ịnyam myị́ ẹ-ẹpwụ nya ọya ookpokpo nyọlẹ kam da ụpwụ nyọọwa. Ọ lala ụkụrwọ ẹbyẹbyị!” Ọya imiiye ị-ịlahị nyọọwa, ọ dọmwụ nyọka ye ịlahị nya ụgbẹyị lẹlẹ. Ọ gu ẹka 70 lẹẹlẹẹ lẹ, ọ tị ye ịlahị nya ụgbẹyị kpoye nya ẹka 20 myị́ lẹ. Ẹ-ẹpwụ nya ẹka ịwẹ, ọ jẹ́ da angịnyị angị ineku ụbwọ kpụ ị hu enyi Ohe lẹ. Ọ yẹkẹẹ: “Ịlẹhị lẹ ịnyịrọ kaa chịm pyẹpyẹ ụka ọhẹ, iJihova tị kaa dam ụbwọ ẹnụ myị́ ẹnụ nyọka kịnyaa la o-ye ịlahị nya ụgbẹyị.”

13-14. Ọ-chụ pwokwita iyina à tị́ ka dahị ụbwọ nyọka dahịhile iJihova bala ọ-họ ụkụrwọ nyamwụ gụ ọọwa?

 ¹³ Jẹ́ ang bwu ẹga nya angịlẹ kị dahịhile iJihova. Ọ-chụ pwokwita nya angịlẹ kị gba ọngịrị nyaa kpehe yẹẹyẹẹ ẹ-ẹpwụ nya ụkụrwọ nya iJihova myị ang ẹ-ẹpwụ nya ịBayịbụụ. Ụka lụmẹ-lụmẹ, anchẹ nya iJihova ịịwa à kaa hu ẹta-ẹdịyẹ ene kị kaa yé ahị ọwawa ọlẹ kị ya ahị me ka bwu ẹga nya iJihova lẹ. Ọ-chụ pwokwita, ụka ọlẹ ká Ebiraham rụ hi ẹpwa nyamwụ kpá​—“la ọ-jẹ́ ẹga ọlẹ kọ juwa jẹ ka datị [ka]”​—iJihova à wahị kụrwọọ wẹẹ lẹ. (Hib. 11:8) Ọlẹ ká iJekobu ma uya ta olegu-ẹrụ kpá ọ lẹẹ yé ahị ọwawa ọnyịịla-ọnyịịla wẹẹ lẹ. (Ọmwụ. 32:24-30) Ụka ọlẹ ká ẹpwụma nya ala Isirẹlụ wẹẹ ka ju ka Ọpyị ọ-Myị Ọnụ Ha lẹ, angịkiliya hu ẹta-ẹdịyẹ ju ka ẹpwụ nya Ihu iJodan ọlẹ kọ wẹẹ yẹ ọhụ́ụ la ọngịrị-ọngịrị ene ká alụma jẹ́-ẹ kpoye nyamwụ ka oye ọkịla.​—Joch. 3:14-16.

¹⁴ À ka jẹ́-ẹ jẹ́ ang bwu ẹga nya anchẹ nya iJihova ịlụka nyahị ịlẹ kị dahịhile iJihova bala ọ-họ ụkụrwọ họọ ịnyịnyị. Ọ-chụ pwokwita, ọọnahị ọhẹ ká ẹnyị nyamwụ ri Payton bala Diana ahụ nyamwụ, kaa wa oja nya aanahị alẹng bala anyang ịlẹ kị kaa họ ụkụrwọ nya iJihova gụ ọọwa, lala ịlẹ kị kaa da kpehe e-egbeju nya ẹla ọlẹ ko ri, “They Offered Themselves Willingly.” * Ọ tị kaa kpaa ịpyọ. Payton yẹkẹẹ: “Ụka kahị ja wa oja nyaa, ọ kaa lahị lala ahị nyị wẹẹ mwụụrụ yẹ ọngịnyị ọlẹ kọ wẹẹ ri ang oriri ọnyịịla-ọnyịịla. Jaabwọ kahị wẹẹ mwụụrụ yọọ tata ka ba, ịnyịnyị ọ kaa háahị nyọka ‘wụlayẹ la ịlọhị nyọka yẹ jaabwọ ká iJihova há ka ba’ lẹ.” Ọ ka nọ chẹẹ lẹ, Payton bala Diana à mwụ́ ka ẹga ọlẹ ká ọbaba ji gụ lụka ọọwa lẹlẹ. À kaa wa oja ịwẹ? À yẹ ifim ịlẹ kị ri, Witnessing in Isolated Territory​—Australia bala Witnessing in Isolated Territory​—Ireland ịlẹ kị juwa ịị jw.org? Ẹla ịlẹpwụ nyaa ka dang ụbwọ nyọka yẹ agbẹyị ịlẹ ká ka jẹ́-ẹ họ ụkụrwọ nya iJihova gụ ọọwa.

15. Ányị aligu ịnyịịla à tị́ ka dahị ụbwọ?

¹⁵ Chụ aligu ịnyịịla. Ọ kaa chịhị kpẹẹ nyọka ri ang ọlẹ kahị kpa kọnụ ẹnẹhẹ lẹka kori kahị juwa bala angịlẹ kọ kaa háa la o-riri. Ịnyịnyị-ịnyịnyị, kori kahị kaa bịrị ụka bala angịlẹ kị hu iJihova kụ ịlahị ẹ-ẹpwụ nya ọhịhị nyaa, ọ kaa chịhị kpẹẹ gụ nyọka họ gụ ọọwa ẹ-ẹpwụ nya ụkụrwọ nya Ohe. Kent bala Veronica kị ri ahụ bala ọrụ, yẹ nyori ẹlẹwẹ ri ịnyịlẹhị. Kent yẹkẹẹ: “Aligu bala alugbiyegu nyahị juhi ọhụ nyọka ma ụgbẹyị nya ụkụrwọ nya iJihova ịhyẹ bala ịkịla yẹ. Ahị yẹ nyori ọ-yẹ jula angịlẹ kị kaa hu Ịpyị-Adịrahụ kụ ịlahị dudu kahị la ọhụ ọ-da pịlẹẹ nyọka ma ụgbẹyị onyeewe yẹ.” Kent bala Veronica ri angị kpa ụka nyaa wuu ya ẹrụ ọnyịịla ịị Serbia lẹẹlẹẹ lẹ.

16. Jaabwọ ká oja ọkpịta nya iJisọsị ọlụpwụ nya iLuku 12:16-21 ya, ịyẹ tị́ du kahị ka nwụlanọ nyọka tụụbwọ hi ang ịhyẹ?

¹⁶ Nwụlanọ nyọka yụbwọ la ang beji chajị nya iJihova. Ó ri o-pyii nyọka tụụbwọ hi ang myị́ ang ịlẹ wuu kị kaa kpụhị ịpyọ ene ká ẹla nyahị ka kpụ iJihova ịpyọ ka. (Ọngọ. 5:19, 20) Ma, ó ri kahị wu ịlọhị kpa la ọ-họ ụkụrwọ nya iJihova gụ ọọwa ọọlajị nyori ahị-ị́ tịtọ nyọka tụụbwọ hi ang ịhyẹ ịlẹ kị kaa háahị ka aalẹ, ahị ka lala ọlẹng ọlẹpwụ nya oja ọkpịta nya iJisọsị ọlẹ kọ maga nya ọhịhị ọkpịpyọ ha ịlọmwụ, kọ tị deeri nya Ohe Oluhye. (Wa iLuku 12:16-21.) Ọọnahị ọlẹng ọhẹ ká enyị nyamwụ ri Christian ịị France, yẹkẹẹ: “Ḿ kaa ya ụka bala ọngịrị nyam ha iJihova bala alugbiyegu nyam jaabwọ kọ chịla ka.” Ọwa bala ahụ nyamwụ cheje nyọka ye ịlahị nya ụgbẹyị. Ma nyọka jẹ́-ẹ họ ịnyị myị́, ị baba nyọka tụụbwọ hi ụkụrwọ nyaa. Nyọka jẹ́-ẹ da ịlaa ụbwọ myị, ị dọmwụ nya ọhị ochiche ọhẹ, kọ ri ọ-ka kpa ẹga cheri-cheri, okpoko ọ-pyịnyẹng ọlẹ kị tị kaa ye kaa myaa lẹhị. Ị chị  ọkẹkẹnị nyọlẹ kị pẹhi ang ịhyẹ nyọka jẹ́-ẹ ye ịlahị nya ụgbẹyị? Christian ya yẹkẹẹ, “Ẹrụ ọnyịịla ọ-kpa pyẹ kaa kpụhị ịpyọ gụ olene lẹẹlẹẹ, ahị tị kaa chị ọkẹkẹnị gụ ọọwa nyọka yẹ jaabwọ ká angịlẹ kahị kaa mẹ ịBayịbụụ jẹ bala ọ-kaa tịrẹkpẹ ka ẹga nyaa wẹẹ jẹ́ ang u-uhye nya iJihova.”

17. Ịyẹ à tị́ ka wuhi kpa la ọ-ma ụgbẹyị onyeewe yẹ ẹ-ẹpwụ nya ẹrụ ọnyịịla ọ-kpa pyẹ myị́?

¹⁷ Nwụlanọ nyọka ma ụkụrwọ nya Ohe yẹ a-agbẹyị inyeewe. (Ụkụr. 17:16, 17; 20:20, 21) Shirley, kọ ri ọngọ ye ịlahị nya ụgbẹyị ịị United States, baba nyọka nwụhọ ẹ-ẹga nya abwọlẹ kọ kaa bwu kpa ẹrụ ọnyịịla pyẹ lụka ọlẹ ká ẹdụrụ nya COVID-19 bene. Ụka nya ọgbanyẹ, ọ họ atịmẹ la ọ-ma ẹrụ ọnyịịla ọ-kpa pyẹ bwu ifon yẹ. Nyọlẹ kị tị mẹjọ́ọ ụka ọlẹ ká ọngọ kpẹhị rịrị isekut wẹ ọjịra-jịra nyaa lẹ, ọ dọmwụ nya ọ-kpa ẹrụ ọnyịịla pyẹ bwu ifon ụka myị́ ụka lẹlẹ. Ọ yẹkẹẹ: “Ụka nya ọgbanyẹ, ọ la uhi-uhi ịnọ, ma ọ tị kpụm ịpyọ yẹẹyẹẹ lẹẹlẹẹ lẹ. Ahị kaa yé angịnyị ya ẹla tọ gụ ụka kahị kaa jẹ bwu ẹpwa ka ẹpwa dọmwụ!”

18. Ịyẹ à tị́ ka dahị ụbwọ kori ká ịngịhyẹ á ja wuhi kpa la ọ-kpa ẹrụ ọnyịịla pyẹ gụ ọọwa?

¹⁸ Chụ ang ọlẹ á ka họ nọ, ká maga nyọka wọọ ọyị. Ụka kahị ju ka ẹpwụ nya akama, ahị kaa raabwọ nya ụbwọ ọdada bwu ẹga nya iJihova bala ọ-kaa kụ irya rige-rige u-uhye nya ang ọlẹ kahị ka jẹ́-ẹ họ u-uhye nyamwụ. (Etu 3:21) Sonia juwa e-ebwo nya ọọjịra-jịra ọlẹ kịị ya òja nya Romani ụ-ụwa ịị Europe. Ọ kaa ye ịlahị nya ụgbẹyị. Ọ yẹkẹẹ: “M̀ kaa da ang ịlẹ kam tịtọ nyọka họ ju ụ-ụpwụ ya nọ ẹ-ẹga ọlẹ kọ ka chịm kpẹẹ la ọ-yẹyẹ. M̀ ya ifoto nya ụgbẹyị ọchapiye nọ u-uhye nya ịtẹbụrụ nyam. Ụka kam ja ka cheje nya ẹla, m̀ kaa mwụụrụ yẹ ifoto ọọwa lẹ, m kaa kụ irya u-uhye nya ẹga ọlẹ ká eje ọchịchị nyam ka kpam ka lẹlẹ.” Sonia kaa maga nyọka la irya ọnyịịla u-uhye nya akama ịlẹ kọ kaa chịpwụrụ bwu. Ọ yẹkẹẹ: “Am à ka chụ kori kam ka yẹ iwe-ahụrụ ọyẹda nyam ọlẹlẹhẹ lala ugulọ ọlẹ kọ ka wum kpa lee akwa ọlẹ kọ ka dam ụbwọ chịpwụrụ lẹ.”

19. Ányị ahị tị́ ka bwu mẹjẹ nyori ang ịnyịịla ịlẹ ká iJihova ya hahị myịhị lẹhị?

¹⁹ IJihova kaa wahị kụrụụhị a-agbẹyị lụmẹ-lụmẹ. Ahị ka jẹ́-ẹ mẹjẹ jaabwọ ká ahị ọwawa ịịwa myịhị lẹhị kaka ba bwula ọ-ya ogbo ha Ohe Oluhye jaabwọ kahị ka họ ba myị́. (Hib. 13:15) Ang datị-datị ji kahị ka jẹ́-ẹ họ ẹ-ẹpwụ nya ịgba ọgbagba nya iJihova myị́. IJihova tị ka wahị kụrụụhị gụ ọọwa ịnyịnyị. Ahyẹẹnụ ọnyị myị́ ọnyị, ahị mwahị nya agbẹyị ịlẹ kahị ka jẹ́-ẹ ‘wụlayẹ la ịlọhị nyọka yẹ jaabwọ ká iJihova há ka ba.’ Ọọwa lẹ, ahị ka lala iJisọsị lẹlẹ. O yẹkẹẹ: “Am ayịdang, ọ-ka họ irya nya Ohe Oluhye jịra bala ọ-ka họ ụkụrwọ ọlẹ ká Ohe Oluhye dum ẹrụ warị nyọka họhọ wuu jịra gbanggbang, a ri ang orirri nyam” lẹ.​—Jọn. 4:34.