1-2. Ányị ehe ọchịchị ọlẹpwụ nya Ayịsaya 65:16, 17 à tị́ ka jẹ́-ẹ juhị ọhụ chajị ká abwọ ka chị́ịhị pyẹpyẹ ka?

“ABWỌ A CHỊNG PYẸPYẸ KA!” à ri egbeju nya ọjịra-jịra ọtụka ọkpịpyọ-kpịpyọ ọlẹ kahị họ la ẹka nya 2017 lẹ. Ọjịra-jịra ọtụka ọọwa mẹjẹ́ẹhị jaabwọ ọlẹ kahị ka bwu bọhụ ẹ-ẹpwụ nya akama ịlẹ kị wẹ chịhị ọgụ. Ẹka ine chịpwụrụ kam ẹ-ẹkpẹ nya ọọwa lẹ, ahị tị jam bọhụ ẹ-ẹpwụ nya akama ịla odehe ọlẹ wẹẹ.

² Akama oyina a tị́ la lụka ọkpangjẹ? Ọngọhẹ ugbiyegu nyang lee oligu ọlịkẹjẹ nyang byi hing? Ẹdụrụ ọnyọọngịrị ọhẹ jụng? Ọhịhị ja lujwo hang chajị nyori à ja ri ọngọgbahị gụ́ olene? Ayịreji o-bwagaga, ẹla ọmwọmwọ, lee ọtụpyịpyị họ tang? Lee à tị́ ja yẹ akama ọọlajị nya ẹdụrụ nya COVID-19 bala ẹla ịkịla ụma ịlịịwẹ? Ahị wẹẹ ya ẹhị rịrị gbe ụka ọlẹ ká ang ịlịịwẹ wuu ka chịpwụrụ kam kẹkpẹ, kahị ka deeri hyaa, kị tị ka ma họ myị́myị́ kaka!​—Wa Ayịsaya 65:16, 17.

3. Ịyẹ ahị tị́ ka họ lẹẹlẹẹ pyii? Ányị à tị́ du?

³ Ọhịhị ọla odehe ọlẹ lujwo, ahị tị ka la akama ị-gụ ịwẹ gụ ị-ịlahị myị́ wẹẹ. (Mat. 24:21) Lẹ ahị baba nyọka kịnyaa la o-ju ọhụ ọbaba nyahị ọngịrị. Ịyẹ tị́ du? Chajị iJisọsị yẹkẹẹ: “U-uhye nya ugbodu ojuju nyanụ ọ-kpa pwụ ọbaba, ọchịda nyanụ ọ-ka wu ọyị myị́, a do pịlẹ lẹlẹ.” (Luk. 21:19) Ọ-kụ irya u-uhye nya abwọlẹ ká angịkịla bwu bọhụ ẹ-ẹpwụ nya akama ịlala ịnyahị ka juhi ọngịrị nyọka bọhụ.

4. Ịyẹ tị́ du kahị ka jẹ́-ẹ ya nyori iJihova à ri ọgụ-ẹpẹtẹ ọnyịịla nya ọhụ ọbaba gụ wuu lẹ?

⁴ Owo à tị́ ri ọgụ-ẹpẹtẹ ọnyịịla gụ wuu ẹ-ẹpwụ nya ọhụ ọbaba? IJihova Ohe Oluhye ịnyị. Ọhẹka ọwẹwẹ ọwẹ ka lang ẹbyẹbyị myị́. Ma kori ká kụ irya jwọọ, ọ́ ka lang ịnyị ka. Odehe ọlẹ ji ẹpwụtụbwọ nya Olegu Onyobyi, ịnyị à dudu ká akama lụmẹ pwụ ọlịịwẹ lẹ. IJihova la ọngịrị nyọka myị́ akama ịwe i-ijata, ma ọ tị wẹẹ dayị gbe ụka ọhẹ ị-ịlahị nyọka họ ịnyị. (Rom. 9:22) Ohe Oluhye nyahị  tị wẹẹ kịnyaa la ọ-bọhụ gbee ká ụka ọlẹ kọ hu nọ ka pweeji. Ahị kụ ẹhị yẹ ang ihikichu ịlẹ ká iJihova chụ nyọka bọhụ ẹ-ẹpwụ nyaa wẹẹ.

5. Ányị ị tị́ bwu ya ido ba ẹnyị nya Ohe? Ányị ọọwa à tị́ lang?

⁵ Ido ọlẹ kị ya ba ẹnyị nyamwụ. Ẹnyị nya iJihova họ́ọ, ọ tị tịtọ ká ọng myị́ ọng ka chị ihi ju ẹnyị ọwẹ ịnyịnyị. (Ayị. 42:8) Ma ẹ-ẹpwụ nya ẹka ụnọ ịrwọnyẹ ịlẹ kị chịpwụrụ wẹẹ, ị ya ido ba ẹnyị ọnyịịla nyamwụ ọwẹ. (Eje. 74:10, 18, 23) Ẹla ọọwa dọmwụ ẹ-ẹpwụ nya iku nya Idẹn ụka ká Olegu Onyobyi, kọ ri Ọngọ bịrị ọngịnyị ẹnyị, chị ẹla ba Ohe nyori nyị wẹẹ ya ang ọlẹ ká Adam bala Iivu baba nyọka chị ọkẹkẹnị kpịbaa hyaa. (Ọmwụ. 3:1-5) Bwu ụka ọwẹ pyịyọọ, angịnyị kịnyaa la ọ-chị ala ba iJihova nyori nyị kaa wu angịnyị ehe kpa hi ang ịlẹ kị ri ịbaba nyaa ọlam-ọlam. Ọnọọkịla ọwẹ ri iJisọsị ẹla yẹẹyẹẹ, chajị ido ị go guru ẹnyị nya Adamwụ wẹ lẹ. Chajị nya ọọwa, ọ byi angịjụgbẹyị nyamwụ nyị raabwọ yẹkẹẹ: “Adahị ọlẹ ká juwa e-epwoohe, kahị chị ịgọgọ ju ẹnyị nyang.”​—Mat. 6:9.

6. Ịyẹ tị́ du ká iJihova ya ụka ọ-pwọọ da nyọka chịpwụrụ ene kọ ka mẹjẹ nyori ọwa à chịla nyọka kpeji e-epwoohe bala odehe lẹ?

⁶ Egbeju ọngịrị ọ-la ta eji ọkpakpa nyamwụ. IJihova kem à la ọngịrị nyọka kpeji e-epwoohe bala odehe wuu lẹ, ụgbẹyị nya eji ọkpakpa nyamwụ à tị ri ọlẹ kọ há gụ wuu ịnyịnyị lẹ. (Ọwụ. 4:11) Ma Olegu Onyobyi tị maga kpụ ọ pịrị alegu-ẹrụ bala angịnyị ehe ju nyọka kụ irya nyori Ohe nyị́ chịla nya ọọwa ka. Ẹla nyori iJihova à chịla nyọka kpeji lẹ á ri ẹla ọlẹ kị ka jẹ́-ẹ chị eju lodu gbe ụtụrụ ka. Ịnyị à du lẹ ká Ohe Oluhye kpa ẹla ọjẹ́jẹ ya ụka ọ-pwọọ da ha angịnyị nyọka kpeji, chajị kị ka jẹ́-ẹ yẹ nyori angịnyị ehe á ka jẹ́-ẹ ji ẹkpẹ da Ọngọlẹ kọ haa, eji ọkpakpa nyaa ka há myị́ kaka lẹlẹ. (Jer. 10:23) Nyọlẹ ká Ohe Oluhye ju ugbodu wẹẹ, ọngọngọhẹ á ka jẹ́-ẹ da ịwẹẹ nyori Ohe à chịla nyọka kpeji e-epwoohe bala odehe lẹ kaka. Ọng myị́ ọng ka jẹ́ nyori ụgbẹyị ọlẹ ká iJihova kaa bwu kpeji à há gụ lẹ bala o-ri Ịpyị-Adịrahụ nyamwụ kem à ka jẹ́-ẹ kpa okpunyi bala ewu ọ-chị ke ọlam-ọlam wẹ odehe ọlẹ myị́ lẹ.

7. Owo anyị à tị́ la egbeju-ọngịrị ta iJihova? Ịyẹ ọ tị́ ka họ u-uhye nya angịịwa?

⁷ Egbeju ọngịrị ọlala nya anyị nyamwụ ịhyẹ. IJihova họ anyị nyamwụ kpẹẹkpẹẹ, alegu-ẹrụ tụ́ angịnyị ehe. Ma Ohe Onyobyi ko ri olegu-ẹrụ ọlẹ kọ la egbeju ọngịrị ta iJihova, pịrị angịnyị ehe ị-kpẹẹkpeẹ, kị ri Adam bala Iivu, ju nyọka ji ẹkpẹ da iJihova ịnyịnyị. Ọọwa dudu kọ ri oluji. Alegu-ẹrụ bala angịnyị ehe ịkịla la egbeju ọngịrị ịnyịnyị. (Jud. 6) Ụka ọkịla ịnyịnyị, alẹpwụma nya Isirẹlụ kị dọmwụ ri angịnyị ịlẹ ká Ohe chụ, nyẹẹkpẹ dọọ kpụ ị dọmwụ nyọka gbịgba ha ịhyẹ nya ịnịịkịla. (Ayị. 63:8, 10) Ọ la iJihova jaabwọ kị kaa pwa ọngịnyị arwarụ. Ma, ọ tị kịnyaa la ọ-bọhụ gbee ká ụka nyọka ta angị la egbeju-ọngịrị ịwẹ wuu ayịreji ka pweeji. Ụka ọọwa, iJihova bala angịlẹ wuu kị godayị giri-giri họọ ka chị ọkẹkẹnị nyori ị́ ka kịnyaa la ọ-bọhụ ẹ-ẹpwụ nya ang ịtịpyọ ịlẹpwụ nya odehe ọlẹ kaka!

8-9. Ịnịịkịla iyina ị tị́ wẹẹ me ba iJihova? Ányị ahị tị́ ka họ u-uhye nya ọọwa?

⁸ Ịnịịkịla nya Olegu Onyobyi. Olegu Onyobyi chị ẹla ba iJobu, hi ta angịkịla ịlẹ wuu kị kaa gbịgba ha iJihova kpẹẹkpẹẹ, nyori nyị kaa họ ịnyị chajị nya ang ịlẹ kị kaa yé bwu ẹga nyamwụ ịnyị. (Job. 1:8-11; 2:3-5) Olegu Onyobyi kịnyaa la ọ-chị ẹla ba angịnyị ehe daalẹ wẹẹ. (Ọwụ. 12:10) Ahị ka jẹ́-ẹ họ ụpa ọlẹ kahị la nyọka mẹjẹ nyori ẹlịlẹhị ọhẹ-ẹ́ ji ẹ-ẹpwụ nya ẹla ọlẹ ká Olegu Onyobyi ya wẹ ka, bwula ọ-bọhụ ẹ-ẹpwụ nya ịmayẹ bala ọ-kịnyaa la o-godayị giri-giri ha iJihova chajị nya ọháha ọlẹ kahị la ẹ-ẹga nyamwụ. IJihova wahị kụrụ iJobu, ọ ka wahị kụrụụhị ịnyịnyị kori kahị bọhụ.​—Jem. 5:11.

⁹ Olegu Onyobyi kaa kpa alegbeju nya ịgba  ọgbagba nya ịnịịkịla ya nyori iJihova nyị la ọkwọ bala o-ri ọwa nyaa kaa ju ọmwụ nya akama nya ọngịnyị ehe lẹ. Angịhyẹ dọmwụ kaa ya ụka ká anjwo-ó gbu nyori Ohe Oluhye nyị hwaa kpa rụ chajị nyị baba nya alegu-ẹrụ gụ ọọwa e-epwoohe ịnyị. Ẹpẹpẹ ọtụka à wẹ kị wẹẹ hu ju Ohe lẹ! Ahị jẹ́ nyori iJihova ri Adịda ọ-la ọháha. Ụka ká ẹdụrụ ọnyọọngịrị ọhẹ-ẹ́ wuhi beji lee ụka ká ọngịnyị ọlẹ kọ háahị yẹẹyẹẹ á gbu, áhị kaa kpụ Ohe abyị ẹnẹnẹhẹ ka. Ọkọkọ nya ọọwa, ahị la ọmyịmyị nyori ahyẹẹnụ ọhẹ ja wẹ kọ ka họ alẹdụrụ uda bala o-wule angịlẹ kị gbu eji bwula igu wẹẹ. Ahị ka jẹ́-ẹ ya je ọng myị́ ọng ọlẹ kọ ka myị-ị ke ụrụ nyori iJihova ri Ohe nya ọháha. Ọọwa lẹ iJihova à ka jẹ́-ẹ wẹ ọngọlẹ kọ wẹẹ hu ọnụ dọọ ẹla lẹlẹ.​—Etu 27:11.

10. Ẹlịyẹ ụpwụ nya Eje Ọnyịịla 22:23, 24 à tị́ mẹjẹ́ẹhị u-uhye nya iJihova?

¹⁰ Akama ọyẹyẹ nya anchẹ ịlịkẹjẹ nyamwụ. IJihova ri Ohe nya ahyẹẹrwẹrwa. Ọ kaa tọọ olujwo ụka kahị ja jida u-uhye nya akama ịlẹ kahị kaa la ọọlajị nya ọtụpyịpyị, ẹdụrụ, lee ọ-la kpẹẹkpẹẹ ka nyahị. (Wa Eje Ọnyịịla 22:23, 24.) IJihova jẹ́ ọjụjụ nyahị, ọ tịtọ nyọka myaa, ọ tị ka họ ịnyị. (Kụ ẹhị yẹ Ehe Ọkpụkpụ 3:7, 8; Ayịsaya 63:9.) Ahyẹẹnụ wẹẹ wẹ kọ ka “yịlẹ egbejida hi egbahị [nyahị] wuu. Igu ogbugbu ọhẹ-lọhẹ á ka ji kaka. Lee, ida ọbaba bala ida ojeje ọhẹ-lọhẹ ọ-ka jiji kaka. Lee, ang ọjụjụ ọhẹ-lọhẹ, ọ ka ji kaka ịnyịnyị.”​—Ọwụ. 21:4.

11. Iwoo nya ẹlịyẹ à tị́ wẹẹ wu iJihova u-uhye nya anchẹ nyamwụ ị-godayị giri-giri ịlẹ kị gbu lẹ?

¹¹ Ebwo ọchịchị hi aligu nyamwụ ịlẹ kị gbu lẹ. Ányị ọ tị́ kaa la iJihova u-uhye nya alẹng bala anyang ị-la ọmyịmyị ịlẹ kị gbu lẹ? Ọ họ́ọ yẹẹyẹẹ nyọka yaa myị́myị́ wẹẹ! (Job. 14:15) À ka jẹ́-ẹ kụ irya jaabwọ ká iwoo nya Ebiraham oligu nya iJihova woo kaka ba? (Jem. 2:23) Lee iMosisi, ko ri ọngọlẹ kọ kaa ya ẹla bala “a-ahịchịng”? (Ehe. 33:11) Ọ wẹẹ ya ẹhị rịrị gbe ụka ọlẹ ká iDevidi bala angịkịla ịlẹ kị da eje ọnyịịla ka mwu  eje ịnyịịla-ịnyịịla iḷẹ kị kaa ya ogbo họọ! (Eje. 104:33) Ịlẹhị lẹ aligu nya Ohe Oluhye ịwẹ gbu lẹ, ma iJihova á tị deeri nyaa ka. (Ayị. 49:15) Ọ kpịtịya nya ẹla myị́ ẹla oluhye nya abwẹla nyaa. ỊBayịbụụ ya nyori nyị “yaa lala angịlẹ kị juwa hịhị.” (Luk. 20:38, NW ) Ahyẹẹnụ ookpokpo ja wẹ kọ ka tịraa ẹkpẹ wẹ ọhịhị, ọ ka myịmyị-ị wo abwọ ọrịrị o-bwu ọkịlẹtụ nyaa bala o-ye ịgba ọgbagba nyaa myị wẹẹ. Kori ká ọngọhẹ ọlẹ kọ háng yẹẹyẹẹ á gbu aalẹ, ẹla ịwẹ a kpụng ẹjẹ mẹ.

12. Ẹlịyẹ à tị́ kaa jụ iJihova gụ wuu la ahyẹẹnụ ịtịpyọ ihyẹẹkpẹ ịlẹ?

¹² Ẹla ọlẹ ká angị ịtịpyọ kaa họ angịkịla. Ụka ọlẹ ká egbeju ọngịrị ọlala dọmwụ ẹ-ẹpwụ nya iku nya Idẹn, iJihova jẹ́ nyori ang nyị ka bịrị ene kọ ka jẹ́-ẹ há gụ ọọwa. Ọkwọ ogugu, ẹla ọkịrọrọ, bala abwẹga ọhọhọ ịlẹ kị jam odehe alẹ wụ iJihova ẹjẹ. Ọ kaa kpahị ju angịlẹ ká iwe-ahụrụ nyaa tịpyọ gụ wuu, lala anyị-egu bala ịhụ-egu ịlẹ kị la ọngịrị ka chewu ke ịlaa ka. (Sẹk. 7:9, 10) Ọ tị kaa jụ iJihova gụgụụgụ ụka kọ yẹ kị ja yẹ anchẹ nyamwụ ịlẹ kị la ọmyịmyị akama lee o-waa ju agba. Jẹ́ myị̀myị̀ nyori ọ la ọháha ẹ-ẹga nyanụ anụ angịlẹ wuu kanụ wẹẹ bọhụ lala ọwa.

13. Abwẹla oloyoyi oyina Ohe à tị́ wẹẹ yẹ ẹ-ẹga nya angịnyị? Ịyẹ ọ tị́ ka họ u-uhye nya ọọwa?

¹³ Ụya ọlẹ ká angịnyị ehe wẹẹ họ gụ olene. Ohe Oluhye họ angịnyị kị ka yọọ gbịla, ma Olegu Onyobyi tị tịtọ ká angịnyị ka họ ang ọtịpyọ lala ụya. Ụka ká Ohe Oluhye yẹ nyori “angịnyị ehe la egbeju ọnyọọngịrị lụmẹ kaka kpoye” lụka nya iNuwa, ọ yẹkẹẹ: “Ó-ri kam dọmwụ họ ọngịnyị ehe ọhẹ-lọhẹ odehe ọlẹ ka, ịnọ ọ ka hám gụ ọlẹ lẹ. Chajị abwẹla onyobyi ọhọhọ nyaa tọm olujwo lụmẹ lẹ.” (Ọmwụ. 6:5, 6, 11.) Odehe há gụ ụka ọọwa lẹẹlẹẹ lẹẹ? Ehe! Olegu Onyobyi ka chị ọkẹkẹnị yẹẹyẹẹ nyọlẹ ká ụya ọhọhọ bene ẹ-ẹga myị́ ẹga alẹ, tụ́ ọlẹ ká alẹng bala anyang kaa họ tọ awụlẹ bala ọlẹ ká alẹng-alẹng bala anyang-anyang kaa họ tọ awụlẹ ịnyịnyị! (Efe. 4:18, 19) Olegu Onyobyi kaa chị ọkẹkẹnị gụgụụgụ ụka kọ jẹ́ họ kpụ ká angịlẹ kị kaa gbịgba ha iJihova á kpẹpwụ nya ọhọbịrị. Ụka ká iJihova á ju ugbodu gbee kọ ya nyị nwa lẹ, ọ ka mẹjẹ nyori ụya ọhọhọ wọọ ẹjẹ bwula ọ-ta angịlẹ wuu kị myị yẹda ka ayịreji lẹlẹ.

14. Ịyẹ angịnyị à tị́ wẹẹ họ ta odehe bala iyo ịlẹpwụ nyamwụ?

¹⁴ Angịnyị wẹẹ bịrị odehe ọlẹ ká Ohe họ. Ọ́ ba ọ-ọlẹ ká “angịnyị kpa ọngịrị nyaa yẹ angịnyị ehe aanaa ilekpeleji nyaa ụhị kem ka,” ma ị́ myị kpẹhị rịrị odehe bala iyo ịlẹpwụ nyamwụ jaabwọ ká iJihova ya nyị họ ka. (Ọngọ. 8:9; Ọmwụ. 1:28) Angị jẹ́ ang ịhyẹ da ọna eji nyori ọhọhọ nya angịnyị ehe nyị ka du ká ụma nya iyo bala ekeji ịhyẹ lala ụnọ ookpokpo nyị ka tụ́ byi ẹ-ẹpwụ nya ẹka ịmanyị-ịmanyị kịlahị myị́. Ọ la gede-gede nyọka yẹ ang odudu ká angịnyị wẹẹ chuko u-uhyẹ nya ẹla ịlịịwẹ! Ọ kpịpyọ nyọlẹ ká iJihova myị ọnụ nyori ‘angịlẹ wuu kị jam ta ụkụrwọ nyamwụ ayịreji odehe ọlẹ wuu lẹ, ụka ọlẹ kọ ka kpa taa ayịreji kwiwa pwụ eji ịnyịnyị lẹ.’ Ọ tị ka yẹ odehe ọlẹ kpata kaka ri ịparadayịsị wuu ịnyịnyị.​—Ọwụ. 11:18; Ayị. 35:1.

15-16. Ịyẹ à tị́ ka guhi gbịla nyọka bọhụ lala iJihova? Ya ọ-chụ pwokwita ọhẹ wẹẹ.

¹⁵ Kụ irya u-uhye nya ang ịjụjụ ịlẹ wuu ká iJihova wẹẹ bọhụ ẹ-ẹpwụ nyaa lala ẹka ụnọ ịmanyị tị́ lẹ wẹẹ. (Yẹ akpa ọlẹ ko ri, “ Ang Ịlẹ ká IJihova Wẹẹ Bọhụ ẹ-Ẹpwụ Nyaa.”) IJihova ka jẹ́-ẹ ta odehe onyobyi ọlẹ ayịreji ụka ọhẹ-lọhẹ kọ họ́ọ myị́. Ma ugbodu ojuju nyamwụ tị ri ahị ọwawa hahị yẹẹyẹẹ! Ahị ka jẹ́-ẹ kụ irya jwoo ụ-ụgbẹyị ọlẹ myị́. Ọhẹka oluda byi ọlẹng ọhẹ bala ahụ nyamwụ nyori ọnyị ọlẹ ká ahụ nyị kpa ẹ-ẹpwụ nyị la ẹdụrụ nya ịnyịrọ ọhẹ juwa. Ẹdụrụ ọọwa tị ka dudu ká ọhịhị ka lujwo ha ọnyị ọọwa bala o-ri nyị́ ka hị tata ene kọ ka gbu ka. Ma adịda bala ịnịna nya ọnyị ọọwa chị ọkẹkẹnị nyọlẹ kị mọọ, nanana nyori ọ ka ri akama haa  nyọka kpẹhị rịrọọ myị́. Ọháha ọlẹ kị la ẹ-ẹga nya ọnyị ọwẹ gwaa gbịla nyọka bọhụ ẹ-ẹpwụ nya akama ọhẹ-lọhẹ jaabwọ kị wẹẹ maga nyọka kpẹhị jwọọ abwọlẹ kị ka họ ba myị́.

¹⁶ Ụ-ụgbẹyị ọlịnyịnyị, anyị nya Adam bala Iivu wuu á la kpẹẹkpẹẹ ụka ọlẹ kị maa ka. Kpọkpọọkpọ, iJihova tị la ọháha ẹ-ẹga nyaa bala ọ-kaa kpahị jwaa. (1 Jọn. 4:19) Ma iJihova ọwa tị datị hi adịda ọlẹpwụ nya ẹla ọ-chụ pwokwita ọwẹ, chajị ọwa ka jẹ́-ẹ myị́ akama nya anjwo nyamwụ myị́. O hu ụka nọ juwa nyọka myị́ akama nya angịnyị ehe wuu lẹ. (Mat. 24:36) Ọháha ọlẹ ká iJihova la ẹ-ẹga nyahị á ka guhi gbịla nyọka bọhụ lala ọwọwa jaabwọ myị́ abwọ ká ọbaba nya ọọwa ka ji ka?

17. Ányị abwọlẹ ká ụpwụ nya Ala iHiburu 12:2, 3 chabwọ nya iJisọsị à tị́ ka juhi ọngịrị nyọka bọhụ kịnyaa?

¹⁷ IJihova ya ọgụ-ẹpẹtẹ ọkpẹẹkpẹẹ da hahị ẹ-ẹga nya ọhụ ọbaba. IJisọsị gbịla ọhụ ọbaba nya Adamwụ yẹẹyẹẹ. Ụka ká iJisọsị jam odehe ọlẹ, ọ bọhụ ẹ-ẹpwụ nya ido ọlẹ kị doo, oyoyi ọ-chị jwọọ, bala iloo ọlẹ kị gwoo ba okoji ọọlajị nyahị. (Wa Ala iHiburu 12:2, 3.) Ọgụ-ẹpẹtẹ nya ọhụ ọbaba nya iJihova ya ọngịrị ha iJisọsị nyọka bọhụ ịnyịnyị ịlẹhị. Ọ ka jẹ́-ẹ juhi ọngịrị ịnyịnyị.

18. Ányị ụpwụ nya 2 iPita 3:9 à tị́ ka dahị ụbwọ nyọka jẹ́ ang ọlẹ ká ugbodu ojuju nya iJihova wẹẹ họ hahị?

¹⁸ Wa 2 iPita 3:9. IJihova jẹ́ ụka ọlẹ kọ há gụ wuu nyọka kpa odehe onyobyi ọlẹ wẹ ocheju. Ugbodu ojuju nyamwụ ya iwe da ha ụmụmẹ nya angịnyị nyọka wẹ ka jọ́ọ. Angịịwa tị ju iru lala uku ịmanyị tị́ kị wẹẹ gbịgba họọ lẹ. Ịwa wuu tị chị ọkẹkẹnị nyọlẹ ká iJihova bọhụ tata ịịwẹ kpụ kị maa, kị wẹ ka la ọháha e-ẹga nyamwụ, bala ọ-hu ịlaa jwoo ụ-ụbwọ. Ang odudu ká iJihova chụ nyọka bọhụ pwụ ọlịịwẹ ka la gede-gede ụka kọ ka nwụ uku ịmanyị tị́ nya angịlẹ kị bọhụ pwụ ọbaba lẹpwụ nyahị uri!

19. Ịyẹ ahị tị́ ka cheje nyọka họ? Ịyẹ à tị́ ka ri uri nyahị?

¹⁹ Ahị jẹ́ abwọlẹ kahị ka bwu bọhụ la ọkẹkẹnị bwu ẹga nya iJihova. Nanana nyori Olegu Onyobyi gu ajụjụ bala akama reeji, iJihova kịnyaa la o-ri Ohe nya “ahị ọwawa,” lee Ohe nya ọkẹkẹnị. (1 Tim. 1:11) Ahị ịnyịnyị ka jẹ́-ẹ chị ọkẹkẹnị jaabwọ kahị wẹẹ dayị la ugbodu ojuju gbe iJihova nyọka chị ịgọgọ ju ẹnyị nyamwụ, nyọka chị ọngịrị nya eji ọkpakpa nyamwụ ehe, nyọka myị́ ọkwọ ogugu ọla odehe ọlẹ, bala ọ-ka kpa akama ịlẹ kahị la lẹẹlẹẹ wuu wẹ ocheju. Ahị cheje nyọka bọhụ bala ọ-ka lẹ ẹjẹ ọkpụkpụ nyọlẹ kahị jẹ́ nyori Adahị olepwoohe wẹẹ bọhụ ịnyịnyị mẹ. Kori kahị họ ịnyị, ọng myị́ ọng nyahị ka ye uri nya ọhịhị ọmyịmyị-ka ọlẹ kị ya ẹla rụ ẹ-ẹpwụ nya ụpwụ ịgọgọ yẹkẹẹ: “Ahị ọwawa ka juwa ha ọng myị́ ọng ọlẹ kọ ju ugbodu ẹ-ẹpwụ nya ịmayẹ ịlẹ kị kaa wẹ ẹga nyamwụ wuu. Ụka kọ be bwu ẹwụ nya ịmayẹ ịịwa kpá wuu, Ohe Oluhye ka hu okpo nya ọhịhị ọmyịmyị-ka nyamwụ ha ọngọọwa, jaabwọ ká Ohe Oluhye ayịdang myị ọnụ ene-ene nọ gbe angịlẹ wuu kị ka la ọháha ẹ-ẹga nyamwụ.”​—Jem. 1:12.