1. Ịyẹ iJihova à tịị yẹ ẹ-ẹga nya anchẹ nyamwụ?

IJIHOVA kaa “chị ọkẹkẹnị ta angịnyị nyamwụ.” (Eje. 149:4) Ọọwa du kahị chị ọkẹkẹnị yẹẹyẹẹ! IJihova yẹ abwẹla ịnyịịla nyahị; ọ jẹ́ ụma nya ọngịnyị ọnyịịla ọlẹ kahị ka jẹ́-ẹ ri myị́ wẹẹ, ọ tị́ kaa tụ́ụhị bịlọmwụ ịnyịnyị. Kori kahị kpa ọmyịmyị nyahị kpọọ ẹ-ẹga nyamwụ, ọ ka ri oligu nyahị gboyi myị́ oyi ịnyịnyị!​—Jọn. 6:44.

2. Ịyẹ à tị́ du kọ kaa la angịhyẹ ujwo nyọka myị nyori iJihova la ọháha ẹ-ẹga nyaa?

² Angịhyẹ ka ya myí nyori, ‘M̀ jẹ́ nyori iJihova la ọháha ẹ-ẹga nya angịnyị nyamwụ logu-logu, ma ányị m tị́ ka bwu jẹ́ nyori am kpangga họ́ọ?’ Ịyẹ à tị́ ka du ká ọngịnyị ka tịtọ ẹla ọwẹ myị́? Oksana * yẹ akama yẹẹyẹẹ ụka kọ ri onjwo. O yẹkẹẹ: “M̀ chị ọkẹkẹnị yẹẹyẹẹ ụka kam hu enyi Ohe kpụ m dọmwụ nyọka ye ịlahị nya ụgbẹyị. Ma ẹka iwo kụrụ ịrụ ị-ịlahị nya ọọwa, ịtịya ọkpụkpụ nya akama ịịwa bịrịm ọkịlẹtụ kaka kpoye. M̀ dọmwụ nyọka kụ irya nyori iJihova á yem myị kaka bala o-ri ḿ há nwà kpụ ọ ka la ọháha ẹ-ẹga nyam kaka.” Yua ri ọọnahị ọnyang ọhẹ kọ kaa ye ịlahị nya ụgbẹyị, kọ tị la akama lụmẹ-lụmẹ ụka kọ ri onjwo ịnyịnyị. O yẹkẹẹ: “M̀ hu ịlọm ju iJihova ụ-ụbwọ chajị m̀ tịtọ kọ ka chị ọkẹkẹnị. Ma m̀ tị kaa byi ịlọm nyori ḿ ka jẹ́-ẹ há iJihova ẹnẹnẹhẹ ka.”

3. Ẹlịyẹ ahị tị́ wẹẹ ka kụ ẹhị ye ẹ-ẹpwụ nya ang ọjẹ́jẹ ọlẹ?

³ Lala aanahị imiiye ịlẹ kahị gu ẹnyị wẹ, iJihova háng kpori-kpori ma à tị ka da ịwẹẹ kori ká họ́ọ myị́. Ịyẹ à tị́ du ká baba nyọka jẹ́ myịmyị nyori ọ kaa kpahị jung ịlẹhị? Ịyẹ à tị́ ka dang ụbwọ ụka ká me nyori ọwa nyị́ há iJihova ka? Ahị kụ ẹhị yẹ ọwẹwẹ nyaa wẹẹ.

4. Ịyẹ à tị́ du kọ tịpyọ nyọka da ọháha nya iJihova ẹ-ẹga nyahị ịwẹẹ?

⁴ Ọháha ri ọngịrị ọtụka ọlẹ kọ kaa gu ọngịnyị gbịla. Kori kahị jẹ́ myị̀myị̀ nyori ahị há iJihova bala o-ri ọ kaa dahị ụbwọ, ọọwa ka guhi gbịla nyọka gbịgba họọ la ọkịlẹtụ nyahị wuu nanana nyori ahị ka juwa yẹ akama ọ-ọhịhị myị́. Ma kori kahi da ịwẹẹ nyori iJihova á kaa kpahị juhi ka aalẹ, “ọngịrị [nyahị ka] la pyịnyẹng.” (Etu 24:10) Ụka ká ọkịlẹtụ á tị kpụhị enyi kahị dọmwụ nyọka kụ irya nyori Ohe-é la ọháha ẹ-ẹga nyahị kaka lẹ aalẹ, ọ ka chị Olegu Onyobyi kpẹẹ nyọka gba mịlaahị i-ijata.​—Efe. 6:16.

5. Ịyẹ ọ-da ọháha nya iJihova ịwẹẹ à tị́ họ ẹ-ẹga nya angịhyẹ?

⁵ Aanahị alẹng bala anyang ịhyẹ dọmwụ nyọka kụ irya nyori iJihova nyị́ la ọháha ẹ-ẹga nyaa bala ọ-kpahị jwaa ka, du ká ọmyịmyị nyaa la dẹwụ-dẹwụ. Ọngọgbahị nya ọjịra-jịra ọhẹ ká ẹnyị nyamwụ ri James yẹkẹẹ: “Nanana nyori m̀ kaa họ ụkụrwọ ị-ịBẹtẹlụ bala o-ri ọ kaa kpụm ịpyọ nyọka kpa ẹrụ ọnyịịla pyẹ bala alọjịra-jịra nyam ụ-ụwa ẹpwụma ọkịla, ḿ jẹ́ myị̀myị̀ kori ká iJihova á chị ọkẹkẹnị balam chajị nya ụkụrwọ ọlẹ kam wẹẹ họ họọ ka. Ụka ọhẹ, m̀ dọmwụ kaa tịlọm wo kori ká iJihova á kaa ke ụrụ wo abwọ ọrịrị nyam.” Eva, kọ kaa kpa ụka nyamwụ wuu họ ụkụrwọ ha iJihova ịnyịnyị yẹkẹẹ: “M̀ wẹ ka jẹ́ nyori ọ la uhihi nyọka kụ irya nyori iJihova á la ọháha ẹ-ẹga nyahị ka chajị ọọwa kaa gu ang myị́ ang ọlẹ kahị kaa họ ha iJihova. Ọwẹ kaa gu abwọlẹ ká imyi nya ang nya olegu kaa nwụng kaka ba bala ọ-nung ọkẹkẹnị ọlẹ á ka ye bwula ọ-gbịgba ha iJihova.” Michael, kọ ri ọng ọ ye ịlahị nya ụgbẹyị bala ọngọgbahị nya ọjịra-jịra yẹkẹẹ: “Kori ká myị nyori Ohe Oluhye kaa kpahị jung ka aalẹ, à ka gbile ẹta ẹkpẹ bwu ẹga nyamwụ wẹẹ.”

6. Ịyẹ ahị tị́ ka họ pyii ụka kahị dọmwụ nyọka kụ irya nyori áhị há iJihova ka?

⁶ Oja ịwẹ mẹjẹ jaabwọ ká ọ-da ọháha nya iJihova ịwẹẹ kaa họ ká ọmyịmyị nyahị ka la dẹwụ-dẹwụ kaka ba. Ma ịyẹ ahị tị́ ka họ ụka kahị dọmwụ nyọka kụ irya nyori iJihova á la ọháha ẹ-ẹga nyahị ka? Ahị ka hwabwọ hi irya ọlịnyị i-ijata! Bịlẹ iJihova kọ dang ụbwọ nyọka ya ‘okpunyi nya Ohe Oluhye ọlẹ kọ ka wu ọkịlẹtụ nyang bala irya ọlẹpwụ nyang wuu kpa’ ku ọmwakpa nya “irya ịlọkịlẹtụ” ịlịịwẹ. (Eje. 139:23; Filip. 4:​6, 7) Kpịtịya nyori á la ụbwọọng ka. Aanahị alẹng bala anyang ịkịla ịlẹ kị la ọmyịmyị yẹẹyẹẹ kaa me irya ọlịịwẹ ịnyịnyị. Anchẹ nya  iJihova ịlụka onyogo dọmwụ la irya ịlịịwẹ ịnyịnyi. Kụ irya nya ẹla ọlẹ kahị ka jẹ́ bwu ọ-chụ pwokwita nya ọlẹrụ ịPọlụ wẹẹ.

7. Akama iyina ịPọlụ à tị́ la?

⁷ Ọ kaa lang ụka ọhẹ lala o-ri ụkụrwọ nyang nyị ju iru kaka kpoye bala o-kaa lujwo hang nyọka họ ang myị́ ang ịlẹ ká baba nyọka họ wuu? Ó ri ịnyị aalẹ, à ka wo etu nya ẹla ọlẹ ká ịPọlụ ya. Ọ me imahị u-uhye “nya ọjịra-jịra ịlẹga la datị-datị,” ọọjịra-jịra ookpokpo kem ka. (2 Kọr. 11:​23-28) À la akama nya ẹdụrụ ọhẹ ọlẹ kọ kaa nung ọkẹkẹnị nyang? ỊPọlụ la akama ịlẹ kị yẹ rịrọọ nyịlẹhị-lẹhị. Ọ ka ri ẹdụrụ ọhẹ kọ jwọọ myị́. Ọ tịtọ ká ẹdụrụ ọọwa ka myị́ hyoo. (2 Kọr. 12:​7-10) Ọkịlẹtụ kaa kpụng enyi ụka ọhẹ ọọlajị nya ọ-la kpẹẹkpẹẹ-ka nya ịlọng? Ọ kaa la ịPọlụ ịnyị ụka ọhẹ. Ọ wụrụ ịlọmwụ “ọlịnyịribyi” ọọlajị nyọlẹ kọ kaa cheri nyịlẹhị-lẹhị ene kọ ka jẹ́-ẹ họ ang ọnyịịla.​—Rom. 7:​21-24.

8. Ịyẹ à tị́ da ịPọlụ ụbwọ nyọka bọhụ ẹ-ẹpwụ nya akama nyamwụ?

⁸ Nanana nyori ịPọlụ chịpwụrụ bwu ẹpwụ nya ịmayẹ ịdatị-datị bala iwe-ahụrụ ị-kpụ ọkịlẹtụ enyi, ọ kịnyaa la ọ-gbịgba ha iJihova. Ịyẹ à tị́ ya ọngịrị họọ? Ịlẹhị lẹ ọ jẹ́ yẹẹyẹẹ jaabwọ kọ la kpẹẹkpẹẹ ka kaka ba, ọ tị la ọmyịmyị ọnyọọngịrị u-uhye nya iya ọkịlaakịla nya iJisọsị. Ọ jẹ́ ká iJisọsị myị ọnụ nyori “ọng myị́ ọng ọlẹ kọ myị [la iJisọsị]. . . ka la ọhịhị ọmyịmyị-ka.” (Jọn. 3:16; Rom. 6:23) Ee, ịPọlụ la ọmyịmyị u-uhye nya iya ọkịlaakịla nya iJisọsị. Ọ jẹ́ myị̀myị̀ nyori iJihova nwụlanọ nyọka hịnyọhi ha angịlẹ kị dọmwụ họ ọhọbịrị ọtụka-ọtụka, kị tị yẹ irya da.​—Eje. 86:5.

9. Ẹlịyẹ ahị tị́ jẹ́ bwu omyi ẹla nya ịPọlụ ọlụpwụ nya Ala ịGaletiya 2:20?

⁹ ỊPọlụ la ọmyịmyị nyori ọwa nyị há Ohe yẹẹyẹẹ chajị ọ jẹ́ nyori Ohe nyị du iJisọsị warị ka gbu chajị nyamwụ. (Wa Ala ịGaletiya 2:20.) Wo ẹla o-ju ọngịnyị ọhụ ọla ocheju nya ọgba ọwẹ wẹẹ. ỊPọlụ yẹkẹẹ: ‘M há Ọnyẹwẹ nya Ohe Oluhye gbee kọ hu ịlọmwụ kpa kaka kịla iya chajị nyam.’ Ọ́ la ịPọlụ lala o-ri ọwa nyị tịpyọ kpoye nya Ohe ọ-ka la ọháha ẹ-ẹga nyamwụ kạ. Ọ́ ya nyori, ‘M̀ yẹ ang odudu ọlẹ ká aanam há iJihova, ma ọ́ chịkpẹẹ nyori m̀ ka họ́ọ ka’ lẹ ka. ỊPọlụ kpụ Ala iRom ịtịya yẹkẹẹ: “Ụka ọlẹ kahị juwa jiji ẹ-ẹpwụ nya ịhọbịrị ọhọhọ wẹẹ lẹ, Ohe Oluhye du ịKịrayịsị ẹrụ warị kaka gbu wọnụ nyahị ju. (Rom. 5:8) Ọháha nya Ohe Oluhye á jẹ́ oyi datị ka!

10. Ẹlịyẹ ahị tị́ jẹ́ bwu ẹpwụ nya ụpwụ nya Ala iRom 8:​38, 39?

¹⁰ Wa Ala iRom 8:​38, 39. ỊPọlụ jẹ́ abwọlẹ ká ọháha nya Ohe Oluhye la ọngịrị kaka ba. Ọ da nyori ịngịngịhyẹ nyị́ “ka jẹ́-ẹ la ọngịrị chịhị  ebwo hi ọháha ọlẹ [ká Ohe Oluhye la ẹ-ẹga nyahị] . . . kpá myị́ ẹnẹnẹhẹ kaka.” ỊPọlụ jẹ́ nyori iJihova kaa dọhụ pịlẹ yẹẹyẹẹ bala ala Isirẹlụ. Ọ jẹ́ ịnyịnyị jaabwọ ká iJihova mẹ ahyẹẹrwẹrwa jẹ ẹ-ẹga nyamwụ. Nyọka yoo abwọ ọkịla, ẹla ọlẹ ká ịPọlụ wẹẹ ya ri yẹkẹẹ: ‘Nyọlẹ ká iJihova du Ọnyị nyamwụ warị kaka gbu chajị nyam wẹẹ, ḿ ka da ịwẹẹ nyori ḿ họ́ọ ka lẹ kaka.’​—Rom. 8:32.

11. Nanana nyori ịPọlụ họ ịhọbịrị ụma nya ịlẹ kị gu ẹnyị ụ-ụpwụ nya 1 iTimoti 1:​12-15, ịyẹ tị́ du kọ jẹ́ myị̀myị̀ nyori Ohe la ọháha ẹ-ẹga nyamwụ?

¹¹ Wa 1 iTimoti 1:​12-15. Ọ chịkpẹẹ myị́ nyori olegu ka la ịPọlụ eje ụka ọhẹ kori kọ kpịtịya nya ang ịlẹ kọ kaa họ ene kọọ wẹ ka ri ọngịnyị nya ịKịrayịsị. Ọ wụrụ ịlọmwụ nya “olegbeju” nya alọhọbịrị, ọ́ tị la ẹbyẹbyị ka! Ene ká ịPọlụ wẹ ka jẹ́ ẹlịlẹhị, ọ kaa tụ́ angịnyị nya ịKịrayịsị pyịpyị bwu epweji ọhẹ ka ọkịla, juwa wu angịhyẹ ju agba bala ọ-ya iwe da nyọka nwụ angịkịla. (Ụkụr. 26:​10, 11) Kụ irya jaabwọ kọ ka la ịPọlụ kori kọ tọ onjwo ọhẹ ẹ-ẹpwụ nya angịnyị nya ịKịrayịsị ọlẹ ká ọwa à ju ọmwụ igu nya adamwụ wẹẹ. Ọ ta ịPọlụ olujwo nya ọ-jẹ́ họ ka nyamwụ ịwẹ, ma ọ tị jẹ́ nyori ọwa nyị́ ka jẹ́-ẹ yẹ ang ọlẹ kọ kam kpá lẹ da kaka. Ọ la ọmyịmyị nyori ịKịrayịsị nyị gbu chajị nyamwụ, lẹ ọ da ụpwụ yẹkẹẹ: “Bwula ọnahị nya Ohe Oluhye ayịdang, a du kam ri ụma nya ọngọlẹ kam ri lẹẹ” le. (1 Kọr. 15:​3, 10) Ẹlịyẹ ahị tị́ jẹ́ bwu ẹga ọwẹ? À baba nyọka jẹ́ myị̀myị̀ nyori iJisọsị gbu chajị nyang bala ọ-họ chịkpẹẹ nya ahụ ọ-ka ri igu bala iJihova la apatabwọ kiwa ka. (Ụkụr. 3:19) Ang ọlẹ kọ baba ha Ohe ri ang ọlẹ kahị wẹẹ họ lẹẹlẹẹ bala ọlẹ kahị ka họ ị-ịlahị, ị-ịlẹ kahị jẹ́ họ ka la ụka ọkẹkpẹ kaka, kori kahị dọmwụ ri ọngọhẹ nya Alibeenu nya iJihova ụka ọọwa lee áhị riri ka wẹwẹ.​—Ayị. 1:18.

12. Ányị ẹla ọlụpwụ nya 1 ịJọn 3:​19, 20 à tị́ ka dahị ụbwọ ụka kọ lahị lala o-ri ahị nyị́ kpụ ịngịhyẹ lee ọ-há nwà ka?

¹² Ụka ká kụ irya nyori iJisọsị gbu chajị nya ịhọbịrị nyang, à ka ya myị́ nyori ‘Ọ lam lala o-ri  am nyị́ há nwà kpụ nyọka ye āhị ọnyịịla ọwẹ ka.’ Ịyẹ à tị́ du kọ ka lang ịnyị myị́? Ọkịlẹtụ ọ-la kpẹẹkpẹẹ-ka nyahị ka dahị lụgbaa myị́, du kọ ka lahị lala o-ri ahi nyị́ ju apyobwuna lee ọ-há ọngọhẹ ka. (Wa 1 ịJọn 3:​19, 20.) Ụka ọlịịwẹ, ahị baba nyọka kpịtịya nyori “Ohe Oluhye a lụmẹ gụ ọkịlẹtụ nyahị lẹ.” Kori kọ dọmwụ lahị lala o-ri ahị nyị́ há Ohe ka lee nyị́ ka hịnyọhi hahị ka wẹwẹ, Adahị olepwoohe kaa la ọháha ẹ-ẹga nyahị bala ọ-kaa hịnyọhi hahị kpọpkọọkpọ. Ahị baba nyọka ya ọ-jẹ́ myị̀myị̀ ha ịlọhị nyori a há iJihova. Nyọka họ ịnyị, ụka myị́ ụka wuu, ahị baba nyọka jẹ́ ang bwu ẹpwụ nya omyi ẹla nyamwụ, raabwọ họọ, bala ọ-yẹ jula angịlẹ kị kaa gbịgba họọ. Ịyẹ tị́ du kọ baba nyọka họ ang ịwẹ?

13. Ányị ịBayịbụụ ọjẹ́jẹ à tị́ ka dahị ụbwọ? (Yẹ akpa ọlẹ ko ri “ Abwọlẹ ká Omyi Ẹla nya Ohe Daa Ụbwọ.”)

¹³ Jẹ́ ịBayịbụụ ẹnụ myị́ ẹnụ, abwụma ịnyịịla-ịnyịịla nya iJihova ka lang gede-gede gụ ọwọwa. À ka yẹ jaabwọ ká họ́ọ kaka ba. Ọ-kpa Omyi ẹla nya Ohe me irya ju ẹnụ myị́ ẹnụ ka dang ụbwọ nyọka kụ irya u-uhye nya ẹla gede-gede bala ọ-dang ụbwọ ‘nwụ irya rịrị.’ (2 Tim. 3:16) Ọngọgbahị nya ọjịra-jịra ọhẹ ká ẹnyị nyamwụ ri Kevin la akama nya ọ-yẹ ịlọmwụ lala ọngọ kpụ ịngịhyẹ ka. Ọ yẹkẹẹ: “Ọ-wa ụpwụ nya Eje Ọnyịịla 103 bala ọ-kụ irya jwoo kpori-kpori dam ụbwọ nyọka yẹ irya nyam da bala ọ-ka jẹ́ irya ọlẹ ká iJihova la ẹ-ẹga nyam ịnyịlẹhị.” Eva, ọlẹ kahị gu ẹnyị lalẹ ene, yẹkẹẹ: “La ocheju nya ahyẹẹnụ ọnyị myị́ ọnyị, m̀ kaa kpa ụka ọhẹ kụ irya u-uhye nya ang ịlẹ kị ri irya nya iJihova. Ọọwa ya okpunyi nya ọkịlẹtụ ham bala o-ju ọmyịmyị nyam ọngịrị.”

14. Ányị abwọ ọrịrị à tị́ ka jẹ́-ẹ dahị ụbwọ?

¹⁴ Raabwọ ụka myị́ ụka. (1 Tẹs. 5:17) Kori ká tịtọ nyọka ri oligu bala ọngịnyị, o-ri o-pyii ká ka ya ẹla bala ọngọọwa ụka myị́ ụka bala o-ya irya nyang joo. Ịnyịnyị ọ la ẹ-ẹga nya igu oriri bala iJihova lẹ. Ụka kahị ya ẹla ọlọkịlẹtụ nyahị, irya nyahị bala ẹla ịlẹ kị ri uko ọchịchị nyahị joo ẹ-ẹpwụ nya abwọ ọrịrị aalẹ, ahị wẹẹ mẹjẹ nyori ahị dahịhiloo bala o-ri ahị jẹ́ kahị họ́ọ. (Eje. 94:​17-19; 1 Jọn. 5:​14, 15) Yua, ọlẹ kahị ya ẹla nyamwụ lalẹ, yẹkẹẹ: “Ụka kam ja raabwọ, ẹ-ẹla ọlẹ kọ họ la ahyẹẹnụ ọwẹ kem m kaa ya je iJihova ka. M̀ kaa ya irya nyam joo bala abwọlẹ ká ẹla lam ọ-ọkịlẹtụ kpangga. Dụmwọ-dụmwọ, m̀ wẹ ka yẹ nyori iJihova á lala olegbeju nya ẹga ká ọngịnyị kaa họ ụkụrwọ ka, ma ọ lala Adịda ọlẹ kọ la ọháha ẹ-ẹga nya anyị nyamwụ ịnyị.”​—Yẹ akpa ọlẹ kọ ri “ À Wọọ Lẹ?”

15. Ányị iJihova à tị́ mẹjẹ nyori ọ kpahị juhị?

¹⁵ Yẹ jula aligu ị-chịla o-hu ọkịlẹtụ ha; ị rị āhị bwu ẹga nya iJihova. (Jem. 1:17) Adahị olepwoohe mẹjẹ nyori ọ kpahị juhị bwula ọ-ya aanịna alẹng bala anyang ịlẹpwụ nya ọjịra-jịra hahị. Ị “kaa há awụlẹ ụka wuu.” (Etu 17:17) Ẹ-ẹpwụ nya ileta ọlẹ ká ịPọlụ da kịla Ala iKolosi, o gu ẹnyị nya Angịnyị nya ịKịrayịsị ịhyẹ ịlẹ kị  dọọ ụbwọ, kpụ ọ dọmwụ ya nyori ‘ọhọhọ nyaa wuu nyị kaa hu ẹjẹ ọkpụ́kpụ ha ọwa lụmẹ.’ (Kol. 4:​10, 11) ỊKịrayịsị iJisọsị ịnyịnyị dọmwụ baba nya ụbwọ ọdada bwu ẹga nya aligu nyamwụ, angịnyị ehe tụ́ alegu-ẹrụ, ọ tị mẹjẹ nyori ụbwọ ọdada ọlẹ ko ye bwu ẹga nyaa myọọ lẹhị.​—Luk. 22:​28, 43.

16. Ányị aligu ị-chịla o-hu ọkịlẹtụ à tị́ ka jẹ́-ẹ dahị ụbwọ nyọka tụ́ ju iJihova chwẹẹ gụ ọwọwa?

¹⁶ A kaa ya ẹhị rịrị ka ẹga nya aligu nyang ịlẹpwụ nya ọjịra-jịra bala o-ye ụbwọ ọdada nyaa myị? Ọ-ya ẹla u-uhyẹ akama ọlẹ kahị la bala ọọnahị ọlẹ kọ la gbẹgbịlẹ ẹ-ẹpwụ nya ẹlịlẹhị á mẹjẹ nyori ọmyịmyị nyahị la dẹwụ-dẹwụ ka. Ọkọkọ nya ọọwa, ewu ọ-chị ke o ri hahị lẹ. Wo ẹla ọlẹ ká James ọlẹ kahị ya ẹla nyamwụ ụka ọhẹ lalẹ ya lẹẹ wẹẹ: “Igu ọlam oriri bala angịlẹ kị la gbẹgbịlẹ ẹ-ẹpwụ nya ẹlịlẹhị dam ụbwọ yẹẹyẹẹ. Ụka ká irya ọtịpyọ á ja ka yem la, aligu ịnyịịla ịwẹ kaa ke ụrụ wo lam bala ọ-kpụm ịtịya nyori m̀ háa. Ụka kị họ ịnyị, m̀ kaa yẹ nyori m̀ há iJihova lịlọmwụ bala o-ri ọ kaa kpahi jum.” Ọ baba kahi ka ri aligu yẹẹyẹẹ bala aanahị ịlẹpwụ nya ọjịra-jịra!

17-18. Owo ahị tị́ ka ke ụru wo la pyii? Ịyẹ à tị́ du?

¹⁷ Olegu Onyobyi tịtọ kahị ka hwabwọ la ọ-ma uya nyọka họ ang ọnyịịla. Ọ tịtọ kahị ka me nyori iJihova á la ọháha ẹ-ẹga nyahị ka, nyori áhị ju apyobwuna kpụ Ọ ka chịhị da ka. Ma jaabwọ kahị yẹ-ẹ̀ wẹ, ọọwa á ri ẹlịlẹhị ka.

¹⁸ À há iJihova. À ri ọngọ chọọ ẹhị gbọgbọ. Kori ká ju ihi nyamwụ, à ka juwa “ẹ-ẹpwụ nya ọháha ọlala nyamwụ pyịyọọ.” (Jọn. 15:10) Lẹ a myị ju Olegu Onyobyi lee ọkịlẹtụ nyang ụka kọ lang lala o-ri ahụ nyị́ há nwà kpụ iJihova nyị ka la ọháha ẹ-ẹga nyang ka lẹ ka. Ọkọkọ nya ọọwa, ke ụrụ wo la iJihova, kọ kaa yẹ ang ọnyịịla ọ-la ẹga nya ọng myị́ ọng nyahị. Jẹ́ myị̀myị̀ nyori ọ “chị ọkẹkẹnị ta angịnyị nyamwụ,” tụng ahụ!