1. Ịyẹ iJihova à tị́ ya ha ọnchẹ nyamwụ ọnyị myị́ ọnyị?

CHAJỊ nya ọháha, iJihova ya iwe da ha ọnchẹ nyamwụ ọnyị myị́ ọnyị ọọjịra-jịra. Nanana nyori ang ọlẹ kahị jẹ́-ẹ họ ọọjịra-jịra datị-datị hi awụlẹ, ahị wuu ju apyobwuna, ahị tị baba nya awụlẹ. Ọlẹrụ ịPọlụ dahị ụbwọ nyọka jẹ́ ẹla ọkpọnchị ọwẹ. Ányị ọ tị́ bwu họ ịnyị?

2. Jaabwọ ká ụpwụ nya Ala Efesọsị 4:16 ya, ịyẹ tị́ du kahị baba nyọka ju awụlẹ ihi bala ọ-họ ụkụrwọ lawụlẹ?

² Ẹ-ẹpwụ nya Ụpwụ Ịgọgọ ọlẹ ká ang ọjẹ́jẹ ọlẹ kpehe bwu, ịPọlụ mẹjẹ gede-gede nyori ọngọngọhẹ nyahị á ka jẹ́-ẹ byi ọnchẹ nya iJihova ọkịla yẹkẹẹ: “Á ju apyobwuna ham kpong-kpong ka,” lẹ ka. (1 Kọr. 12:21) Kori kahị tịtọ ká okpunyi ka ji ọjịra-jịra, ahị ka ju ihi nya awụlẹ pyii bala ọ-họ ụkụrwọ lawụlẹ. (Wa Ala Efesọsị 4:16.) Kori kahị yẹjula awụlẹ họ ụkụrwọ, ọjịra-jịra kaa nwà kịlahị, ọng myị́ ọng tị kaa ye ọháha ụ-ụwa.

3. Ẹlịyẹ ahị tị́ wẹẹ ka kụ ẹhị yẹ a-ang ọjẹ́jẹ ọlẹ?

³ Ẹ-ẹpwụ nya iwe-ahụrụ iyina ahị tị́ baba nyọka mẹjẹ nyori ahị ju aanahị ịkịla ịla ọjịra-jịra ihi? A-ang ọjẹ́jẹ ọlẹ, ahị ka yẹ jaabwọ ká angịgbahị nya ọjịra-jịra ka mẹjẹ nyori ị ju ihi nya awụlẹ. Ahị ka myịmyị-ị̀ ya ẹla u-uhye nya abwọlẹ kahị ka bwu mẹjẹ nyori ahị ju ihi nya aanahi ịlẹ kị ye ahụ lee ọ-rwọ ọrụ ka. Ohyẹẹkpẹ-ẹkpẹ, ahị ka jẹ́ jaabwọ kahị ka bwu mẹ ọháha jẹ ẹ-ẹga nya angịlẹ kị wo òja nyahị yẹẹyẹẹ ka.

4. Ẹla oyina ịPọlụ à tị́ ya ụ-ụpwụ nya Ala iRom 12:10 ká angịgbahị nya ọjịra-jịra ka bajẹ?

⁴ Olegu ịgọgọ nya iJihova à chụ angịgbahị nya ọjịra-jịra wuu lẹ. Ọ tị lịnyị odu lẹ, ọngọngọọngụ nyaa la āhị ịdatị-datị. (1 Kọr. 12:17, 18) Angịhyẹ nyaa ri angịgbahị kpangjẹ, lẹ ị́ ka jẹ́ jaabwọ kị ka bwu họ ang nwà lala angịkịla lẹka. Angịkịla á ka jụ ụkụrwọ họ lụmẹ ka chajị nya okwirichi ọchịchị bala ịnyịrọ ọ-la gogo-ka. Ma, ọngọgbahị nya ọjịra-jịra ọhẹ-lọhẹ á ka yẹ ọngọkịla nyamwụ lala o-ri nyị́ ju apyobwuna ka lẹ ka. Ọkọkọ nyọọwa lẹ, ọngọgbahị nya ọjịra-jịra ọnyị myị́ ọnyị ka kpa ẹla ọlẹ ká ịPọlụ ya ụ-ụpwụ nya Ala iRom 12:10 họ ụkụrwọ.​—Wọọ.

5. Ányị angịgbahị nya ọjịra-jịra à tị́ ka bwu mẹjẹ nyori ị ju angịkịla nyaa ihi? Ịyẹ tị́ du kị baba nyọka họ ịnyị?

⁵ Angịgbahị nya ọjịra-jịra ka mẹjẹ nyori ị ju angịkịla nyaa ihi bwula o-ke ụrụ wo laa. Ẹla ọwẹ baba gụgụụgụ ụka ká angịgbahị nya ọjịra-jịra á tọ awụlẹ nyọka me ẹla ọkpọnchị ọhẹ. Ịyẹ tị́ du? Wo ẹla ọlẹ ká Ẹpwang ọ-Kụ Gbeji nya ahyẹẹnụ 1 nya Ọya Okiriwo nya 1988 ya lẹẹ: “Angịgbahị nya ọjịra-jịra ka jẹ́ nyori iJisọsị ka jẹ́-ẹ kpa olegu ịgọgọ da ọngọgbahị ọnyị myị́ ọnyị ụbwọ nyọka kụ irya nya itiwe nya ehile ọlẹpwụ nya ịBayịbụụ ọlẹ kọ ka daa ụbwọ jẹ́ ang ọlẹ kị ka họ ẹ-ẹpwụ nya iwe-ahụrụ ọnyị myị́ ọnyị lee ọ-ka cheje ọkpọnchị myị́. (Ụkụr. 15:6-15) Olegu ịgọgọ kaa da angịgbahị nya ọjịra-jịra ụbwọ wuu, ọ-ọngọ ookpokpo nyaa kem ka.”

6. (a) Ányị angịgbahị nya ọjịra-jịra à tị́ ka bwu yẹjula awụlẹ họ ụkụrwọ? (b) Ányị ọjịra-jịra à tị́ ka ye apyobwuna kori kị họ ịnyị?

⁶ Ọngọgbahị nya ọjịra-jịra ọlẹ kọọ ju ihi nya angịkịla nyamwụ á kaa tịtọ nyọka ya ẹla jene ụka myị́ ụka kị tawụlẹ ka. Ọ́ kaa ye ẹla ọnyị myị́ ọnyị ya hị angịkịla ka, ọ́ tị kaa me nyori irya nyọwa nya-à há gụ wuu lẹ ka. Ọkọkọ nyọọwa, ọ kaa gba irya nyamwụ kpehe la ọdụmwọ. Ọ kaa ke ụrụ kpẹnẹẹ wo ẹla ọlẹ ká angịkịla la ka ya. Ọlẹ kọ tị baba gụ wuu ri, ọ kaa nwụlanọ nyọka gba itiwe nya ehile ịla ịBayịbụụ kpehe bala ọ-ka ke ụrụ wo ẹla ọmẹjẹ bwu ẹga nya “ọnchẹ ọ-chịla o-hu ọkịlẹtụ ha bala ọngọ jẹ́ ẹla.” (Mat. 24:45-47) Ụka ká angịgbahị nya  ọjịra-jịra á me ẹla ẹ-ẹpwụ nya ọháha bala ihi ojuju, olegu ịgọgọ nya Ohe Oluhye kaa juwa balaa, ọ tị ka kpaa ụgbẹyị kị ka cheje ọnyịịla ọlẹ kọ ka ju ọjịra-jịra ọngịrị.​—Jem. 3:17, 18.

7. Ányị iJisọsị à tị́ yẹ angịlẹ kị ye ahụ lee ọ-rwọ ọrụ ka?

⁷ Ẹ-ẹpwụ nya ọjịra-jịra alẹ, ahị la ahụ bala ọrụ bala ugbiyegu lụmẹ-lụmẹ. Angịlẹ kị ye ahụ lee ọ-rwọ ọrụ ka tị ju iru ịnyịnyị. Ányị ahị tị́ ka yẹ angịlẹ kị ye ahụ lee ọ-rwọ ọrụ ka? Ahị ka gbịla ụgbẹyị ọlẹ ká iJisọsị yẹ angị lịnyị. Ụka ká iJisọsị jam odehe, ọ́ ye ahụ ka. Ọ họ ịnyị chajị kọ ka jẹ́-ẹ ya ụka bala irya nyamwụ nọ u-uhye nya ụkụrwọ ọlẹ ká Ohe ya jwoo ụ-ụbwọ. IJisọsị á mẹjẹ nyori o-ri opyii ká ọngịnyị ka ye ahụ bala ọ-rwọ ọrụ lee ọ-họ ịnyị ka lẹ ka. Ma, ọ tị ya nyori angịnyị nya ịKịrayịsị ịhyẹ nyị ka chụ nyọka rwọ ọrụ lee o-ye ahụ ka. (Mat. 19:11, 12) IJisọsị ju angịlẹ kị ye ahụ lee ọ-rwọ ọrụ ka ihi. Ọ́ yaa lala angịlẹ kị ju apyobwuna ka lẹ ka, lee lala o-ri ịngịhyẹ nyị juwa nyáa ka.

8. Jaabwọ ká ụpwụ nya 1 Ala ịKọrịntị 7:7-9 mẹjẹ, ịyẹ ịPọlụ à tị́ ju Angịnyị nya ịKịrayịsị ọhụ nyọka kụ irya ju?

⁸ Jaabwọ ọlẹ ká iJisọsị họ, ịPọlụ á ye ahụ ụka ọlẹ kọ wẹẹ kpa ẹrụ ọnyịịla pyẹ ka. ỊPọlụ á tị mẹjẹ ẹnẹnẹhẹ nyori o ri ang ọtịpyọ ká ọngịnyị nya ịKịrayịsị ka ye ahụ lee ọ-rwọ ọrụ ka. Ọ jẹ́ nyori ẹla ọlẹ ká ọng myị́ ọng ka cheje lịlọmwụ o ri lẹ. Ọ lịnyị odu lẹ, ịPọlụ ju angịnyị nya ịKịrayịsị ọhụ nyọka kụ irya jwoo kori kị ka gbịgba ha iJihova myị́ la ọ-ka ye ahụ lee ọ-rwọ ọrụ ka. (Wa 1 Ala ịKọrịntị 7:7-9.) ỊPọlụ á yẹhị da angịnyị nya ịKịrayịsị ịlẹ kị ye ahụ lee ọ-rwọ ọrụ ka bwee ka. Ọ dọmwụ chụ iTimoti ko ye ahụ ka nyọka họ akụrwọ ịtụka-ịtụka. * (Filip. 2:19-22) Ọ la gbagbịla nyori, a-ahụ oyeye lee ọrụ ọrwọrwọ à kaa du ká ọọnahị ka chịla nyọka họ ụkụrwọ ọhẹ lee ọ-chịla ka lẹ ka. Lẹ, ọ́ há nyọka la irya ọlịnyị ka.​—1 Kọr. 7:32-35, 38.

9. Ẹlịyẹ ahị tị́ ka ya u-uhye nya ọngịnyị o-ye ahụ bala ọ-rwọ ọrụ lee ọ-họ ịnyị ka?

⁹ IJisọsị lee ịPọlụ á mẹjẹ nyori Angịnyị nya ịKịrayịsị nyị ka ye ahụ pyii lee nyị ka ji ụbwaa pyii ka. Lẹ, ẹlịyẹ ahị tị́ la ka ya u-uhye nya ahụ oyeye bala ọrụ ọrwọrwọ lee ọngịnyị o-ji ụbwọọmwụ? Ẹpwang ọ-Kụ Gbeji nya ahyẹẹnụ 1 nya Ọya Okiriwo, 2012 wẹ ịtọ ẹla ọwẹ kpẹẹkpẹẹ. Ọ dọọ wụlẹ yẹkẹẹ: “Ẹlịlẹhị ri, ahị ka jẹ́-ẹ chabwọ nyaa ịwa imimiiye [ọngịnyị o-ye ahụ  lee ọ-rwọ ọrụ bala ọngịnyị o-ji ụbwọọmwụ] lala āhị o-bwu ẹga nya Ohe Oluhye. . . . IJihova á yẹ [ọngịnyị o-ji ụbwọọmwụ] lala ang ọ-la oyoyi lee ang ọ-ka ju ọmwụ nya ọkịlẹtụ o-kpenyi ka.” Chajị nyọọwa lẹ, ahị baba nyọka ju ihi nya aanahị ịlẹ kị ye ahụ lee ọ-rwọ ọrụ ka ọọjịra-jịra.

10. Ányị ahị tị́ ka chị ihi ju aanahị ịlẹ kị ji ụbwaa?

¹⁰ Ányị ahị tị́ ka mẹ ihi jẹ ẹ-ẹga nya irya bala iwe-ahụrụ nya aanahị alẹng bala anyang ịlẹ kị ye ahụ lee ọ-rwọ ọrụ ka? Ahị ka kpịtịya nyori angịnyị nya ịKịrayịsị ịhyẹ cheje la ịlaa nyọka ye ahụ lee ọ-rwọ ọrụ ka. Angịkịla tị ji kị tịtọ nyọka ye ahụ bala ọ-rwọ ọrụ, ma ọngịnyị ọlẹ kọ pwokwaa ị ye lẹka lẹ. Ịnya angịkịla tị ri ọrwaa lee ahụ nyaa ko gbu hyaa. Jaabwọ myị́ abwọ kọ la, ọ ka pwoku ká ala ọjịra-jịra ka tọ angị lịnyị wo ang odudu ọlẹ kị ye ahụ lee ọ-rwọ ọrụ ka lee ọ-ka byaa nyori ọwa nyị ka mwahị nya ọngịnyị haa lẹ? Ịnyịlẹhị lẹ, angịhyẹ ka ya ẹla ọlịịwẹ tọ angịkịla kị ka mwahị nya ọngịnyị haa myị́. Ma, kori ká ọngịnyị á bịlẹ ụbwọ ọdada ọlịnyị ka, ányị ọ tị́ ka la ọọnahị ọlẹng lee ọnyang kori ká jene juwa mwahị nya ọngịnyị họọ? (1 Tẹs. 4:11; 1 Tim. 5:13) Ahị kụ ẹhị yẹ ẹla ọlẹ ká aanahị ịhyẹ ịlẹ kị ji ụbwaa ya wẹẹ.

11-12. Ányị ahị tị́ ka bwu ju ọmwụ nya ọkịlẹtụ o-kpenyi ha angị ji ụbwaa myị́?

¹¹ Ọngọ kpẹhị rịrị isekut ọhẹ ọlẹ kọ jẹ́-ẹ họ ụkụrwọ yẹẹyẹẹ yẹ nyori apyobwuna lụmẹ-lụmẹ nyị ji ẹpwụ nya ọngịnyị o-ji ụbwọọmwụ. Ọ tị ya nyori nyị kaa kpụ ọkịlẹtụ enyi kori ká aanahị alẹng bala anyang ịlẹ kị la irya nyọka dụbwọ nyị́ tọwa wo yẹkẹẹ: “Ịyẹ tị́ du ká ye ahụ ka?” Ọọnahị ọlẹng ọhẹ kọ ji ụbwọọmwụ kọ kaa họ ụkụrwọ e-egbeju ẹpwa yẹ nyori: “Ụka ọhẹ aanahị alẹng bala anyang kaa họ kọ ka lam lala o-ri angị ji ụbwaa nyị la ahyẹẹrwẹrwa. Ọọwa du kọ lala o-ri o-ji ụbwọọng nyị ri akama ọkọkọ nya āhị.”

¹² Ọọnahị ọnyang ọhẹ kọ kaa họ ụkụrwọ ị-ịBẹtẹlụ yẹkẹẹ: “Aanahị ịhyẹ me nyori angịlẹ kị ji ụbwaa wuu nyị wẹẹ mwahị nya ọngịnyị lee angịlẹ kị ji ụbwaa wuu nyị kaa yẹ ọhụhụ ọnyị myị́ ọnyị lala ẹga ọlẹ kị ka ye ọngịnyị bwu. Ẹnẹhẹ ká ụkụrwọ kpam ka ụpa ọkịla nya ẹpwụma nyahị, m̀ pwụ ụwa la ahyẹẹnụ nya ọjịra-jịra. Ọọnahị ọnyang ọlẹ kam kụ ẹpwa nyamwụ byim nyori aanahị alẹng imiiye ịhyẹ nyị juwa ọọjịra-jịra nyịwa kịị nyị ri alịkpa nyam. O byim nyori, ọ-ọrụ ọwa nya-à wẹẹ tịtọ nyọka mwahị ham ka. Ma, Jaabwọ kahị ju ka Ube nya Ịpyị-Adịrahụ bwaa, ọ yụbwọ chịm kpa ka ẹga nya aanahị alẹng imiiye ịịwa. Ẹla ọọwa lam am bala aanahị alẹng imiiye ịịwa oyoyi yẹẹyẹẹ.”

13. Ọgụ-ẹpẹtẹ iyina à tị́ ju ọọnahị ọnyang ọhẹ ọlẹ kọ rwọ ọrụ ka ọhụ?

¹³ Ọọnahị ọnyang ọkịla kọ ji ụbwọọmwụ kọ tị kaa họ ụkụrwọ ị-ịBẹtẹlụ ya nyori: “M̀ jẹ́ angị ye ịlahị nya ụgbẹyị lụmẹ-lụmẹ ịlẹ kị ji ụbwaa, kị kaa họ ẹla meme labwọ, ya irya nọ ẹ-ẹga ookpokpo, bala ọ-nwụlanọ nyọka da angịkịla ụbwọ, kị tị kaa chị ọkẹkẹnị. Ị kaa da ọjịra-jịra ụbwọ yẹẹyẹẹ. Ị la irya ọnyịịla u-uhye nya o-ji lụbwaa. Ị́ kaa me irya nyori ịwa nyị há gụ angịkịla chajị ị ji ụbwaa lee o-me irya nyori ịwa nyị́ ka jẹ́-ẹ ye ọkẹkẹnị ka chajị ị́ ye ahụ, rwọ ọrụ lee ọ-ma anyị ka lẹ ka.” Ang odudu kọ há nyọka juwa ọọjịra-jịra ọlẹ ká ọng myị́ ọng ju awụlẹ ihi bala o-ju awụlẹ apyobwuna à wẹ ẹẹ. À kaa jẹ́ nyori á kaa la aanang ịla ọjịra-jịra ahyẹẹrwẹrwa chajị à ji ụbwọọng lee ịwa ọ-yẹ ijiiji nyang ka, ị́ kaa deeri hịng ka, ị́ tị kaa me irya nyori à há gwaa ka ịnyịnyị. À kaa jẹ́ nyori á háa yẹẹyẹẹ.

14. Ányị ahị tị́ ka bwu mẹjẹ nyori ahị ju angịlẹ kị ji ụbwaa ihi?

¹⁴ Ọ ka myị̀ aanahị alẹng bala nyang ịlẹ kị ji ụbwaa lẹhị kori kị háahị chajị nya abwẹla ịnyịịla nyaa, ọkọkọ nyọka lahị ahyẹẹrwẹrwa chajị  nyọlẹ kị ji ụbwaa. Ọkọkọ kị ka lahị ahyẹẹrwẹrwa, ọ ka há gụ kori ká ẹla nyaa á myịhị lẹhị chajị nya ọmyịmyị ọlala nyaa. Kori kahị họ ịnyị, ọ́ ka la aanahị ịlẹ kị ji ụbwaa lala o-ri ahị nyị juwa byi ịwa nyori nyị́ ‘ju apyobwuna ọhẹ-lọhẹ hahị ka’ lẹ ka. (1 Kọr. 12:21) Ọkọkọ nyọọwa lẹ, ị ka jẹ́ nyori ahị jwaa ihi bala o-ri ahị chị ọkẹkẹnị nyọlẹ kị juwa ọọjịra-jịra nyahị.

15. Ịyẹ angịhyẹ à tị́ yẹda ọ-ọhịhị nyaa nyọka jẹ́-ẹ họ ụkụrwọ nya iJihova gụ ọwọwa?

¹⁵ La ẹka ịkpangjẹ, aanahị lụmẹ-lụmẹ cheje nyọka jẹ́ òja ọkịla chajị nyọka jẹ́-ẹ họ ụkụrwọ nya iJihova gụ ọwọwa. Ị yẹ ang da lụmẹ-lụmẹ ọ-ọhịhị nyaa chajị kị ka jẹ́-ẹ họ ịnyị. Aanahị ịwẹ rụ hi ọjịra-jịra ọlẹ kị kaa ya òja nyaa chajị kị ka jẹ́-ẹ dụbwọ ọọjịra-jịra ọlẹ kị kaa ya òja ọkịla, kị tị baba nya angị kpa ẹrụ ọnyịịla pyẹ gụ. (Ụkụr. 16:9) Aanahị ịwẹ à cheje ọwẹ lịlaa chajị kị ka jẹ́-ẹ họ ụkụrwọ nya iJihova gụ ọwọwa lẹ. Nanana nyori ọ ka la ẹka lụmẹ-lụmẹ ene kị ka jẹ́-ẹ ya òja onyeewe ọwẹ hịlẹ-hịlẹ, ị kaa da ọjịra-jịra ụbwọ a-agbẹyị lụmẹ-lụmẹ. Abwẹla ịnyịịla nyaa bala ang ọjẹ́jẹ nyaa ka jẹ́-ẹ ju ọjịra-jịra ọngịrị. Ẹla nya aanahị ị-chị ịlaa imyi kpẹpwụ ịwẹ myịhị lẹhị!

16. Ẹlịyẹ angịgbahị nya ọjịra-jịra à tị́ ka kpa wụla ọngịnyị yẹ kori ká ọngọọwa á pwoku nyọka ri ọngọgbahị nya ọjịra-jịra lee ọngọmyẹrụ?

¹⁶ Angịgbahị nya ọjịra-jịra á ka ya nyori ọọnahị ọlẹng ọhẹ nyị́ ka jẹ́-ẹ ri ọngọgbahị lee ọngọmyẹrụ ka, chajị nyọlẹ kọ jẹ́ ya òja nya ọjịra-jịra hịlẹ-hịlẹ ka lẹ ka. Angịgbahị ka wụla ọọnahị yẹ bwula abwọlẹ ká ịBayịbụụ ya nyori angịgbahị nya ọjịra-jịra bala angịmyẹrụ nyị ka la ịnyị, a-abwọlẹ ká ọọnahị ọọwa jẹ́ ya òja nya ọjịra-jịra kaka ba ka.​—1 Tim. 3:1-10, 12, 13; Tay. 1:5-9.

17. Eje nya ẹlịyẹ ugbiyegu à tị́ ka chị ụka kị mwụ rụ ka ẹpwụma ọkịla?

¹⁷ Ugbiyegu ịhyẹ ji kị mwụ rụ ka ẹpwụma ọkịla chajị nyọka ye ewu ọ-chị ke lee ọ-ka ye ụkụrwọ. Ụka ọlịnyị, anjwo nyaa ka ka ube-ụpwụ la òja ọlẹ kị kaa ya ẹ-ẹpwụma onyeewe ọọwa. Adịda bala ịnịna ịnyịnyị ka maga nyọka jẹ́ òja ọwẹ chajị kị ka jẹ́-ẹ ye ụkụrwọ ụ-ụwa myị́. Ọ́ tị ri ká ọjịra-jịra ọlẹ kọ kaa ya òja nyaa ịwa á juwa bẹẹ? Ọjịra-jịra oyina ugbiyegu ọwẹ à tị́ ka ka? Ọlẹ kị kaa ya òja nya ugbiyegu ọwẹ ị tị́ ka ka lee, ọlẹ kị kaa ya òja nya alẹpwụma ọwẹ tị́?

18. Jaabwọ ká ụpwụ nya ịGaletiya 6:5 mẹjẹ, ányị ahị tị́ ka mẹjẹ nyori ahị ju ihi nya eje ọlẹ ká olegbeju nya ugbiyegu chị?

¹⁸ Olegbeju nya ugbiyegu à ka chụ ọjịra-jịra ọlẹ ká ugbiyegu nyamwụ ka ka lẹ. Chajị nyọlẹ ká ẹla ọwẹ ri olo nyịlaa wẹẹ, ọwa à ka me irya ju ẹla ọlẹ kọ ka há ha ugbiyegu nyamwụ gụ lẹ. (Wa Ala ịGaletiya 6:5.) Ọ baba kahị ka ju ihi nya eje ọchịchị nya olegbeju nya ugbiyegu ọwẹ. Ẹla ọnyị myị́ ọnyị kọ chụ nyọka họ, ahị ye eje ọchịchị nyamwụ myị, kahị da alugbiyegu nyamwụ ọwụraba lala ụpa  nya ọjịra-jịra ọlẹ kọ ju apyobwuna.​—Rom. 15:7.

19. Ẹlịyẹ olegbeju nya ugbiyegu à tị́ ka kụ irya ju kpori-kpori bala ọ-raabwọ chajị nyamwụ?

¹⁹ Iiwe-ahụrụ ọkịla, ugbiyegu ịhyẹ ka juwa ọọjịra-jịra ọlẹ kị kaa ya òja nya adịda bala ịnịna, ma anyị nyaa á tị wo òja ọọwa nwà ka. Kori ká ọjịra-jịra ọọwa á ji ka ụpa nya ẹga ọlẹ kị kaa ya òja nya alẹpwụma ọọwa, ọ chịkpẹẹ myị́ kọ ka la anjwo ịwẹ ujwo la ọ-wo ẹla ọlẹ kị kaa ya ọọjịra-jịra du kị ka nwà kịlahị ẹ-ẹpwụ nya ang nya olegu ka. Ịyẹ à tị́ du? Ang odudu ri anjwo ịwẹ kaa ka ube-ụpwụ ọlẹ kị kaa mẹ ang jáa la òja nya alẹpwụma ọlẹ kị ji wẹ, ma o-òja nya adaa bala ịnaa anyị ka. Ụka kọ lịịwẹ, olegbeju nya ugbiyegu baba kọ ka kụ irya yẹẹyẹẹ bala ọ-raabwọ bịlẹ ẹla ọjẹ́jẹ u-uhye nya ang ọlẹ kọ ka họ nyọka da anyị nyamwụ ụbwọ kị ka jẹ́-ẹ tụ́ ju iJihova bala angịnyị nyamwụ chwẹẹ. Jaabwo myị́ abwọ ká olegbeju nya ugbiyegu á cheje nyọka họ, alọjịra-jịra ọnyị kọ chụ nyọka ji, baba nyọka chihi jwoo ọwa bala ugbiyegu nyamwụ lala ụpa nya ọjịra-jịra ọlẹ kọ ju apyobwuna.

20. Ányị ahị tị́ ka bwu mẹjẹ nyori ahị ju ihi nya aanahị alẹng bala anyang ịlẹ kị juwa jẹ́ òja onyeewe?

²⁰ Chajị nya ẹla ịlẹ kahị kụ ẹhị yẹ-ẹ̀ wẹẹ, aanahị alẹng bala anyang ka juwa ọọjịra-jịra lụmẹ-lụmẹ lẹẹlẹẹ ịlẹ kọ kaa laa nyaa-nyaa nyọka jẹ́ òja onyeewe. Ọ ka laa ujwo nyọka ya ẹla ọlọkịlẹtụ nyaa myị́. Ma, kori kahị kụ irya u-uhye nya abwọlẹ kị kaa bwu ya òja onyeewe ọwẹ kem ka, ahị ka yẹ nyori ị la ọháha ẹ-ẹga nya iJihova bala ọ-tịtọ nyọka gbịgba họọ. Kori kahị yẹ abwẹla ịnyịịla ịwẹ, ẹla nyaa ka myịhị lẹhị, ahị tị ka jwaa ihi ịnyịnyị. Áhị ka ya nyori nyị́ ‘ju apyobwuna ọhẹ-lọhẹ hahị ka’ chajị nyọlẹ kị jẹ́ ya òja nyahị hịlẹ-hịlẹ ka lẹ ka.

21-22. Iwe ọtụka-ọtụka oyina ahị tị́ la?

²¹ IJihova ya iwe ọtụka-ọtụka hahị bwula ọ-ya ụkụrwọ hahị ọọjịra-jịra nyamwụ. Kori kahị ri ọnyang lee ọlẹng, ye ahụ bala ọ-rwọ ọrụ lee o-ji ụbwọọhị, ri onjwo lee ọngọgbahị, áhị jẹ́ ya òja ọhẹ hịlẹ-hịlẹ lee ọ-jẹ́ yoo nwà ka wẹwẹ, ahị há iJihova bala angịnyị nyamwụ yẹẹyẹẹ.​—Rom. 12:4, 5; Kol. 3:10, 11.

²² Ahị kịnyaa la ọ-kpa ẹla ịlẹ kahị jẹ́ bwu ẹla ọ-chụ pwokwita nya ịPọlụ u-uhye nya ugbinyịrọ nya ọngịnyị ehe họ ụkụrwọ mẹ. Ọọwa ka dahị ụbwọ nyọka jẹ́ ang ọlẹ kahị ka họ nyọka ju aanahị alẹng bala anyang ọhụ. Ọ ka myịmỵi-ị̀ du kahị ka la ọháha ẹ-ẹga nyaa bala o-jwaa ihi.