Ang ẹjẹẹ ji nyori iJisọsị ri oligbeju okiliya ụka ọlẹ kọ hụ enyi Ohe la ẹka nya 29 C.E. Ịyẹ a tị́ ri ang ẹjẹẹ ị-ịwa? Nyọlẹ ká iJisọsị hụ enyi Ohe, ọ ya ịlọmwụ nọ nyọka kịla iya ụ-ụwa ogidi ọlẹ ko pwoku “irya nya Ohe Oluhye.” (Gal. 1:4; Hib. 10:5-10) Nyọlẹ ká ogidi nya olegu ọwẹ ji bwu ụka ọlẹ ká iJisọsị hụ enyi Ohe kịlahị wẹẹ, ube ịgọgọ ọtụka nya olegu, ọlẹ kọ ku ọmwakpa nya iwe ọlẹ kahị jẹ́ wẹẹ gbịgba ọlam ha iJihova bwula iya ọkịlaa-kịla nya iJisọsị, tịng tị ka ji bwu ụka ọwẹ ịnyịnyị lẹ. Ogidi ri ụpa ọkpọnchị ọhẹ ẹ-ẹpwu nya ube ịgọgọ nya olegu ọọwa—Mat. 3:16, 17; Hib. 5:4-6.

Nyọlẹ ká ube ịgọgọ ọtụka nya olegu yeji wẹẹ, ọ baba nya ọngọkiliya kọ ka họ ụkụrwọ ụ-ụwa. Ịnyị à dudu lẹ ká iJihova chụ iJisọsị bwula “olegu ịgọgọ nyamwụ bala ọngịrị nyamwụ” nyọka họ ụkụrwọ ụ-ụwa lẹlẹ. (Ụkụr. 10:37, 38; Mak. 1:9-11) Ma ányị ahị tị́ ka bwu jẹ́ myịmyị nyori iJihova chụ iJisọsị nyọka ri ọngọkiliya ene nya igu nyamwụ? Ọgụ-ẹpẹtẹ nya Ẹrọn bala angịkiliya ịkịla ịlẹ kị ku ẹkpẹ nyamwụ e-ekpeleji nya ehile nya iMosisi ka dahị ụbwọ wẹ ịtọ ẹla ọwẹ.

Jaabwọ ka ehile ya, ọngọkiliya kem à la ọngịrị nyọka jụ́ ka ẹpwụ nya Ẹga ọ-La Ịgọgọ Gụ Wuu nya ọdụ lẹ, ịnyịnyị ọ tị la ẹ-ẹga nya ube ịgọgọ lẹ. Ị ya apwụ chị Ẹga ọ-La Ịgọgọ Gụ Wuu ebwo hi Ẹga ọ-La Ịgọgọ. Ọngọkiliya kaa jụ kpoye nya apwụ ọọwa la ahyẹẹnụ nya iya ọkịla-kịla kem. (Hib. 9:1-3, 6, 7) Jaabwọ kị chụ Ẹrọn bala angị ku ẹkpẹ nyamwụ ene kị jẹ́-ẹ jụ́ ka ẹpwụ nya “apwụ okeke” ọlam olube nya ọdụ wẹẹ, ịnyịnyị ị chụ iJisọsị nya ọngọ ka ri olegbeju okiliya nya ube ịgọgọ ọtụka nya olegu nya iJihova ene kọọ gbu lẹ. Ku ẹkpẹ nya ọwa ọ jụ́ kpọye nya apwụ okeke ọọwa, ọlẹ kọ ku ọmwakpa nya ugbinyịrọ nyamwụ, rụ ka epwoohe lẹlẹ. (Hib. 10:20) Chajị nyọọwa, ọlẹrụ ịPọlụ ya ẹla rụ́ iJisọsị nyori nyị warị lala “olegbeju ọgbahị nya angịkiliya” nyị tị ‘bwu ube ịgọgọ ọlẹ kọ lụmẹ gụ bala ọ-la kpẹẹkpẹẹ gụ ịnya angịkiliya inyogo, ọlẹ ká angịnyị ehe kpa ụbwọ nwụ́ ka,’ ju ka ‘epwoohe ayịdang kpangga.’—Hib. 9:11, 24.

Ọdatị ọhẹ-ẹ́ ji ẹ-ẹga nya ụka ọlẹ ká iro ọnwanwa onyeewe yeji bala ụka ọlẹ kọ dọmwụ nyọka họ ụkụrwọ ka. Ịyẹ tị́ du kọ lịnyị ka? Ụka ọlẹ ká iJisọsị rụ ka epwoohe kọ kpa apyobwuna nya ọhịhị ọkpẹẹkpẹẹ nyamwụ kịla Ohe Oluhye, ọ wụrụ ụgbẹyị da chajị ká iro ọnwanwa onyeewe ọọwa ka jẹ́-ẹ yeji lee ọ-dọmwụ lẹ. Bwula ọgụ-ẹpẹtẹ ọwọwa iro ọnwanwa ọwẹ à dọmwụ nyọka họ ụkụrwọ lẹ. Ịyẹ à tị́ ri ọgụ-ẹpẹtẹ ịịwa?

Họhẹ, iJisọsị ka ijata nya iJihova; ba ọọwa ba, iJisọsị ya apyobwuna nya iya ọkịlaakịla nyamwụ ha iJihova; ohyẹẹkpẹ-ẹkpẹ lẹ, iJihova à ye apyobwuna nya ịwọ nya iJisọsị ọọwa myị lẹlẹ. Iro ọnwanwa ọwẹ á họ ụkụrwọ ka gbee ka ọgụ ẹpẹtẹ ịwẹ lẹẹ chị ọnụ.

ỊBayịbụụ á ya kpangga ụka ọlẹ ka iJihova ye apyobwuna nya iya ọkịlaakịla nya iJisọsị myị ka. Lẹ áhị ka jé-ẹ ya ụka ọlẹ ka iro ọnwanwa onyeewe ọwẹ yeji bala ọ dọmwụ nyọka họ ụkụrwọ kpangga ka ịnyịnyị. Ọ́ tị la abwọ myị abwọ, ahị jẹ́ nyori iJisọsị rụ ka epwoohe la ahyẹẹnụ iwo ene nya iPentikọsị. (Ụkụr. 1:3) Ụka ọhẹ ẹ-ẹpwụ nya ụka okpii ọwẹ, ọ ya apyobwuna nya iya ọkịlaa-kịla nyamwụ mẹjẹ iJihova lẹ. Ọ tị ye myị. (Hib. 9:12) Ang ẹjẹẹ nya ẹla ọwẹ chị ehe gede-gede i-iPentikọsị. (Ụkụr. 2:1-4, 32, 33) Iro ọnwanwa onyewe ọwẹ yeji bala ọ dọmwụ nyọka họ ụkụrwọ ụka ọwẹ lẹ.

Ẹla ọlẹ kahị wẹẹ ya ri, iro ọnwanwa onyeewe ọwẹ wẹ ka yeji bala ọ-dọmwụ nyọka họ ụkụrwọ nyọle ká iJihova ye apyobwuna nya ịwọ nya iJisọsị ọlẹ kọ chị cheji kpa. Iro ọnwanwa ọọwa dọmwụ nya ụkụrwọ ọhọhọ bwụla olegbeju okiliya, iJisọsị ọlẹ kọ ri ọngọ jị apewa nyahị bala Ohe Oluhye.—Hib. 7:25; 8:1-3, 6; 9:13-15.