Ọgba ọwẹ gu ẹnyị nya abwụma nya Angịnyị nya ịKịrayịsị ihikichu. Ụwa yẹkẹẹ: “Ugbe nya Olegu Ịgọgọ nya Ohe Oluhye ri, ọháha nya ịlẹhị-ịlẹhị ọlala, ọkẹkẹnị ọlẹ kọ kaa gbu enyi-ka ọlala, okpunyi ọlala ọ-ọkịlẹtụ, ugbodu ojuju onyudiyo ọlala ẹ-ẹga nya angịkịla, ọnahị ọlala ẹ-ẹga ká angị ịkịla ji, ọngịnyị ọnyịịla oriri, ọngọ chịla o-hu ọkịlẹtụ ha oriri, ọdụmwọ ọlala bala ang ọ-họ ba o-oyi.” Ma, a-abwụma ịnyịịla ịwẹ kem olegu nya Ohe Oluhye à kaa dahị ụbwọ nyọka la ka.

Ahị tị́ họ ányị kahị jẹ́? Ene ká ịPọlụ ya ẹla u-uhye nya ugbe nya olegu ịgọgọ, ọ da yẹkẹẹ: “Ang ịlẹ ká imyi nya ugbinyịrọ kaa kpa ọngịnyị ehe kaka họ . . . a lẹẹ lẹ: Ụya ọhọhọ, owuru ọlala ka a-abwẹla, ọhịhị nya uhila ọlala ẹ-ẹpwụ nya ang onyobyi ọhọhọ, ihye ijiga ọkpụkpụ wuu, ụhwa ojuju wuu, uji myị́ uji ojuju wuu, ẹla ọmwọmwọ wuu, ijiiji onyobyi ọlala wuu, agbama ojuju wuu, ang nya ịlọng ịlọng ọ-háng há kem, ọngịnyị ọngọkịla ọmyịmyị-ka wuu, olegu nya ebwo ọchịchị ọlala wuu, imajẹ nya ang nya ọngịnyị ọkịla ọlala wuu, ere ọnwanwa juwa ya, ọjịra-jịra nya ụya ọyaya onyobyi juwa ri ang oriri okomba wuu bala ụma nya ang inyibyi ịkịla ịhọhọ ịlịịwẹ wuu.” (Gal. 5:19-21) ỊPọlụ chọọ eju la ang “ịlịịwẹ wuu” chajị ang ịkịla juwa “ịlẹ ká imyi nya ugbinyịrọ kaa kpa ọngịnyị ehe kaka họ” datị hi ịlẹ kọ gu ẹnyị wẹ lala ịlẹ kị ju ụ-ụpwụ nya Ala iKolosi 3:5. Ịnyịnyị, nyọlẹ kọ gu ẹnyị nya abwụma ịnyịịla ihikichu kpá, ọ yẹkẹẹ: ‘Ehile ọhẹ-lọhẹ á kaa tụ ụma nya ịngịngịhyẹ ọlịịwẹ pyịpyị kpong-kpong kaka.’ Lẹ, a-abwụma ịlẹ ká olegu ịgọgọ kaa dahị ụbwọ nyọka la wuu ịPọlụ à gu ẹnyị ka.

Ọ ka lahị gbagbịla gụ ọọwa kori kahị chụ ugbe nya olegu ịgọgọ kaka pwoku ugbe nya ahịgboo ọlẹ ká ịPọlụ da ụpwụ u-uhye nyamwụ du ta ọjịra-jịra ọla Efesọsị. Ọ yẹkẹẹ: “Ọngịnyị ọnyịịla oriri bala abwẹla ọnyịịla ọlala bala ẹla nya ịlẹhị nya Ohe Oluhye ọlala jịra wuu a ri ugbe ọnwụnwụ nya ahịgboo nya Ohe Oluhye lẹ.” (Efe. 5: 8, 9) Ee, “ọngịnyị ọnyịịla oriri” tụ́ abwẹla ocheri-cheri bala ẹlịlẹhị ri ụpa nya “ugbe nya olegu ịgọgọ,” ọ tị myịmyị kụ ụwụwa ri ‘ugbe nya ahịgboo.’

Ụ-ụgbẹyị ọwọwa, ịPọlụ byi iTimoti nyị maga nyọka la abwụma ịrwọnyẹ ịhyẹ. I ri “abwẹla ọnyịịla nya Ohe Oluhye ọlala bala ọngịnyị nya Ohe Oluhye oriri nya ịlẹhị-ịlẹhị bala ọmyịmyị ọlala bala ọháha nya Ohe Oluhye ọlala bala ugbodu ojuju bala ọ-la dụmwọ a-abwẹla ọhọhọ.” (1 Tim. 6:11) Bwu ẹpwụ nya abwụma ịwẹ, ịta kem (ọmyịmyị, ọháha, bala ọdụmwọ) ịPọlụ à gu ẹnyị ẹ-ẹpwụ nya “ugbe nya Olegu Ịgọgọ” lẹ. Ma, a-abwụma ịta ịwẹ kem iTimoti à baba ka. Ọ baba nya olegu ịgọgọ nyọka la abwẹla ọnyịịla, ri ọngịnyị nya Ohe nya ịlẹhị-ịlẹhị, bala ọ-ka bọhụ.—Kụ ẹhị yẹ Ala iKolosi 3:12; 2 iPita 1:5-7.

Lẹ, ụpwụ nya Ala ịGaletiya 5:22, 23 á gu ẹnyị nya abwụma ịnyịịla ịlẹ ká Angịnyị nya ịKịrayịsị ka la wuu ka. Olegu nya Ohe Oluhye ka jẹ́-ẹ dahị ụbwọ nyọka la abwụma ịlẹ kị gu ẹnyị ẹ-ẹpwụ nya “ugbe nya Olegu Ịgọgọ.” Ma, abwụma ịkịla juwa kahị baba nyọka la chajị kahị ka jẹ́-ẹ ri adam ọlẹng ẹ-ẹpwụ nya ẹla nya Ohe Oluhye bala ọ-ka “hu ọhịhị onyeewe nya Ohe Oluhye dakụrụ . . . chajị [kahị] ka jẹ́-ẹ la abwụma nya abwẹla ọnyịịla bala ịgọgọ ọlala nyamwụ ọlẹ kọ ri nya ịlẹhị.”—Efe. 4:24.