1-2. (a) Ẹlịyẹ olegu-ẹrụ à tị́ byi anyang ịlẹ kị ka iworu nya iJisọsị? (b) Elịyẹ iJisọsị lịlọmwụ à tị́ byaa nyị họ?

ALỤTỤRỤ nya ahyẹẹnụ 16 nya Ọya Nisan la ẹka iwo ịta kụrụ ịta nyọlẹ kị ma ịKịrayịsị kpá, anyang ịhyẹ ịlẹ ká ọkịlẹtụ nyaa myị la ọjụjụ, kị tị la ọháha ha Ohe Oluhye kele ka ẹga nya iworu nya Ọngọlahị iJisọsị. Ọ gụ́ awa iwo ịta kụrụ ịrwọnyẹ nyọlẹ kị jwoo eji ẹ-ẹga ọwẹ lẹ. Ụka kị pwụ ụwa la irya nyọka ya ida ichoru kwọkwọ wụ ogu nyamwụ, ọ laa ẹbyẹbyị nyọlẹ kị ya iworu dụwa luhwo-luhwo. Olegu-ẹrụ byi anyang ịwẹ nyori, iJisosi nyị wuleji bwula igu lẹ. Ọ myịmyị byaa yẹkẹẹ: “Ọ juwa rụ jene nyanụ kele ka iGalili lẹ. Ụ-ụwa, anụ ka yọọ lẹlẹ.”—Mat. 28:1-7; Luk. 23:56; 24:10.

² Nyọlẹ ká anyang ịwẹ rụ bwu iworu kpá, iJisosi mẹ ịlọmwụ jaa bala ọ-byaa yẹkẹẹ: “Anụ kele kaka ya je anyadam ịlanyị yẹkẹẹ, nyị kele ka iGalili mẹ. Ụ-ụwa, nyaa ka yẹm lẹlẹ.” (Mat. 28:10) IJisọsị ka la ẹla ọkpọngchị ọlẹ kọ ka ya je angịjụgbẹyị nyamwụ, chajị ọtụguru ọwẹ à ri ang ọhọhẹ-ọhọhẹ ọlẹ kọ nwụlanọ nyọlẹ kọ wuleji bwula igu kpá lẹ!

3-4. Ịyẹ tị́ du kahị jẹ́ nyori ehile ọlụpwụ nya ịMatiyu 28:19, 20 á ri ịnya alẹrụ kem ka? (Yẹ ifoto ọla ẹbẹ nya ọgbanyẹ.)

³ Wa ịMatiyu 28:16-20. Ọọjịra-jịra ọlẹ ká iJisọsị nwụlanọ kọọwa bala angịjụgbẹyị nyamwụ ka la, ọ ya ẹla jaa u-uhye nya ụkụrwọ o-ju apyobwuna ọhẹ ọlẹ kị ka họ ụka nya oyi ọhọhẹ wuu. Ụkụrwọ ọwọwa ahị jam họ alẹ ịnyịnyị lẹ. IJisọsị yẹkẹẹ: “Anụ kpa ẹrụ ọnyịịla nyam ọlẹ kele kaka ya je angịnyị ilepwoja myị́ epwoja nya odehe ọlẹ wuu mẹ. Kanụ họ kịịwa ayịdang a ri angịjụgbẹyị nyam . . . Kanụ juwa mẹ ang myị́ ang ọlẹ wuu kam  danụ ehile wẹ jaa, chajị kị ka juwa kpa ehile nyam ịịwa họ ụkụrwọ mẹ.”

⁴ IJisọsị tịtọ ká angịjụgbẹyị nyamwụ wuu ka kpa ẹrụ ọnyịịla pyẹ. A-alẹrụ nyamwụ iwo kụrụ okpokpo kem ọ da ehile nyị kpa ẹrụ ọnyịịla pyẹ ka. Ahị tị́ họ ányị kahị jẹ́? Alẹrụ kem à juwa u-uhye nya ogbodo ị-ịGalili ụka ọlẹ ká iJisọsị da ehile nyị họ ká angịnyị nyị ri angịjụgbẹyị nyọwa lẹ? Kpịtịya nyori olegu-ẹrụ byi anyang ịlaanyị yẹkẹẹ: “Ụ-ụwa [ị-ịGalili], anụ ka yọọ lẹlẹ.” Lẹ anyang ị-chịla o-hu ọkịlẹtụ ha ka juwa ọọjịra-jịra ọwẹ. Ọlẹrụ ịPọlụ myịmyị ya nyori iJisọsị nyị “chị ịlọmwụ ehe mẹjẹ iru nya angịnyị ịlẹ kị lụmẹ gụ angịnyị [angị ohu ịrụ] chiriri” lụka ookpokpo. (1 Kọr. 15:6) Ale angịwẹ à tị́ tụguru?

5. Ẹlịyẹ ahị tị́ jẹ́ bwu ụpwụ nya 1 Ala ịKọrịntị 15:6?

⁵ Ahị la ang ịkpọnchị ịhyẹ ịlẹ kị du kahị myị nyori ọjịra-jịra ọla ịGalili ọlẹ kọ juwa ụ-ụpwụ nya ịMatiyu egbeju 28, ịPọlụ à wẹẹ ya ẹla rụ́ lẹ. Ang ịịwa tị́ ri ịyẹ? Ọhọhẹ, iru nya angịjụgbẹyị nya iJisọsị ri ala ịGalili ịnyị. Lẹ, ọ ka chịkpẹẹ gụ́ nyọka tụguru bala iru nya angịnyị ịwẹ u-uhye nya ọgbọdọ ọhẹ ị-ịGalili, ọkọkọ nyọka họọ ẹ-ẹpwa nya ọngịnyị i-iJerusalẹm. Oheeye, ụka ká iJisọsị wuleji bwula igu kpá, ọ ta alẹrụ iwo kụrụ okpokpo nyamwụ ẹ-ẹpwa nya ọngọhẹ i-iJerusalẹm ene lẹ. Kori ká iJisọsị á tịtọ nyọka byi alẹrụ nyamwụ kem nyị kpa ẹrụ ọnyịịla pyẹ bala ọ-họ ká angịkịla ka ri angịjụgbẹyị nyamwụ ịnọ, ọ ka byaa ịnyị i-iJerusalẹm lẹ. Ọ́ ka myịmyị-ị̀ wụraa, anyang ịwẹ bala angịkịla wuu ka ịGalili ene kọ ka họ ịnyị kaka.—Luk. 24:33, 36.

6. (a) Ányị ẹla ọlụpwụ nya ịMatiyu 28:20 à tị́ mẹjẹ nyori ehile nyọka họ ká angịnyị ka ri angịjụgbẹyị guhi alẹ? (b) Ányị angịnyị à tị́ wẹẹ ju ihi nya ehile ọọwa lẹẹlẹẹ?

⁶ Kụ ẹhị yẹ ang ọkpọnchị ọhata lẹẹ wẹẹ. A-Angịnyị nya ịKịrayịsị ịlẹ kị hịhị ụka nya oyi ọhọhẹ kem à ka ju ihi nya ehile nyọka họ ká angịkịla ka ri angịjụgbẹyị ka. Ányị ahị tị́ bwu jẹ́? IJisọsị chị ẹla nyamwụ eju ịịlẹ: “Anụ wo mẹ! M ka juwa tanụ ẹ-ẹga myị́ ẹga ụka wuu gbee pwụ ọbaba nya odehe ọlẹ.” (Mat. 28:20) Jaabwọ ká iJisọsị ya, iru nya angịnyị wẹẹ họ ká angịkịla ka ri angịjụgbẹyị ịnyịlẹhị. Kụ irya jwoo wẹẹ! Ẹka ọnyọnyọọnyị, angịlẹ kị kaa hu enyi Ohe nyọka ri Alibeenu nya iJihova bala angịjụgbẹyị nya ịKịrayịsị hi pyịnyẹng kị ka lala angị ụnọ ohu ịta!

7. Ẹlịyẹ ahị tị́ ka kụ ẹhị yẹ lẹẹlẹẹ? Ịyẹ tị́ du?

⁷ Iru nya angịlẹ kịị jẹ́ ịBayịbụụ kaa nwà kaka hu enyi Ohe. Ma, angịhyẹ ịlẹ kị kaa jẹ́ ịBayịbụụ balahị ụka myị́ ụka kaa juhi nyọka ri angịjụgbẹyị. Ang ọjẹ́jẹ kaa kpaa ịpyọ, ma ị́ kaa nwà kịlahị nyọka hu enyi Ohe ka. Kori á kaa mẹ ịBayịbụụ jẹ ọngịnyị, ahị jẹ́ myị̀myị̀ nyori à tịtọ nyọka da ọngọọwa ụbwọ kpa ẹla ọlẹ kọ wẹẹ jẹ́ họ ụkụrwọ bala ọ-ka ri ọngọjụgbẹyị nya ịKịrayịsị. Ang ọjẹ́jẹ ọlẹ ka ya ẹla u-uhye nya ụgbẹyị ọlẹ kahị ka bwu da angịlẹ kahị-ị̀ mẹ ịBayịbụụ jẹ ụbwọ nyọka la ọháha ha iJihova bala ọnwànwà ẹ-ẹpwụ nya ang nya olegu. Ịyẹ tị́ du kahị baba nyọka ya ẹlẹwẹ? Chajị, kori kọ pwụ ẹgẹhẹ, ahị ka baba nyọka cheje kori ká ang ọjẹ́jẹ ọọwa á ka kịnyaa lee kori kọ ka kịnyaa ka.

8. Ịyẹ tị́ du kọ kaa lujwo nyọka da angịlẹ kahị-ị̀ mẹ ịBayịbụụ jẹ ụbwọ nyọka la ọháha ha iJihova?

⁸ IJihova tịtọ ká angịnyị ka gbịgba họọ chajị nya ọháha ọlẹ kị la họọ. Lẹ, irya nyahị ri ọ-ka da angịlẹ kahị-ị̀ mẹ ịBayịbụụ jẹ ụbwọ nyọka jẹ́ nyori iJihova kpahị jwaa yẹẹyẹẹ bala o-ri ọ la ọháha haa nyịlẹhị-ịlẹhị. Ahị tịtọ nyọka daa ụbwọ yẹ iJihova lala “adịda nya anyị-egu” bala “ọngọ kaa chẹwụ ke ịhụ-egu.” (Eje. 68:5) Ụka kị jẹ́ jaabwọ ká Ohe Oluhye la ọháha haa kaka ba, ọháha nyaa ẹ-ẹga nya Ohe Oluhye ka juwa nwà kịlahị-ịlahị. Ọ ka la angịhyẹ nyaa ujwo nyọka yẹ iJihova lala adịda  ọ-la ọháha chajị adaa ịwa á mẹ ọháha jẹ ẹ-ẹga nyaa ka. (2 Tim. 3:1, 3) Chajị nya ọọwa lẹ, jaabwọ ká wẹẹ jẹ́ ang balaa, maga nyọka gba abwụma nya Ohe Oluhye ịnyịịla-ịnyịịla gbehe mẹjáa gede-gede. Da angịlẹ ká kaa mẹ ang jẹ ụbwọ nyọka jẹ́ nyori Ohe Oluhye nyahị ọlẹ kọ la ọháha tịtọ kị ka la ọhịhị ọmyịmyị-ka bala o-ri ọ nwụlanọ nyọka daa ụbwọ la ọhịhị ọmyịmyị-ka ịnyịlẹhị. Ịyẹ ahị tị́ ka jẹ́-ẹ họ myịmyị?

9-10. Apwụ iyina ahị tị́ ka kpa jẹ́ ịBayịbụụ ta angịnyị? Ịyẹ tị́ du?

⁹ Kpa apwụ nya “What Can the Bible Teach Us?” bala “How to Remain in God’s Love mẹ ang jẹ.” Ị da apwụ ịwẹ nyọka dahị ụbwọ wu angịlẹ kahị kaa mẹ ang jẹ ọyị ọ-ọkịlẹtụ. Ọ-chụ pwokwita, egbeju ọhọhẹ nya ụpwụ nya Teach Us wẹ ịtọ ẹla ịlẹ: Ohe kaa kpahị juhi lee ọ tị́ ri olimajẹ? Ányị ọ tị́ kaa la Ohe Oluhye ụka ká angịnyị á juwa yẹ akama? À ka jẹ́-ẹ ri oligu nya iJihova? Ụpwụ nya Remain in God’s Love tị bẹẹ? Ụpwụ ọwẹ ka da ọngọlẹ á kaa mẹ ịBayịbụụ jẹ ụbwọ nyọka jẹ́ jaabwọ ká ọ-kpa ẹla ọla ịBayịbụụ họ ụkụrwọ ka dọọ ụbwọ ọ-ọhịhị bala ọ-tọọ ju iJihova chwẹẹ.  Kori ká dọmwụ jẹ́ ụpwụ ọwẹ bala angịkịla ene wẹwẹ, nwụlaṇo yẹẹyẹẹ gbe an ang ọjẹ́jẹ ọnyọnyọọnyị, chajị ká ka jẹ́-ẹ kpa ịbaba nya ọngọngọọngụ i-irya.

¹⁰ Kori ká ẹlẹhẹ ụ-ụpwụ ọlẹ kahị kaa kpa mẹ ang jẹ ka, á tị kpụ ọngọọwa ịpyọ bẹẹ? À ka jẹ́-ẹ byoo nyị wa ụpwụ ọọwa lịlọmwụ myị́, chajị kanụ ka kịnyaa juwa jẹ́ ang bwu ụpwụ ọhẹ bwu ẹpwụ nya ịlẹ kahị gu ẹnyị-ị̀ wẹ.

11. (a) Ụka oyina ahị tị́ ka dọmwụ nyọka raabwọ a-ang ọjẹ́jẹ? (b) Ányị ahị tị́ ka bwu gba ẹla ọọwa kpehe myị́?

¹¹ Dọmwụ nya ang ọjẹ́jẹ la abwọ ọrịrị. Ụka lụmẹ-lụmẹ, ọ kaa há gụ nyọka dọmwụ nya ang ọjẹ́jẹ bala ọ-tọọ ku la abwọ ọrịrị ahyaahị ụka ká ang ọjẹ́jẹ ọọwa á yeji kpá ẹ-ẹpwụ nya epwihi ịmanyị-ịmanyị. Ahị ka họ ká ọngọlẹ kahị kaa jẹ́ ang ta ka jẹ́ pyii nyori, ahị ka jẹ́-ẹ jẹ́ etu nya Omyi Ẹla nya Ohe Oluhye kẹnẹ-kẹnẹ kori ká olegu nyamwụ á dahị ụbwọ ịnyị. Angị mẹ ịBayịbụụ jẹ ịhyẹ kaa gba ẹla nya abwọ oriri kpehe bwula ọ-wa ụpwụ nya iJemsi 1:5, kọ yẹkẹẹ: “Ó ri ká ọngọngọhẹ nyanụ á juwa kọ jẹ́ yẹkẹẹ, ọwa nyị́ la ẹla ọjẹ́jẹ lẹka lẹ aalẹ, ọngọọwa a bịlẹ Ohe Oluhye ẹla ọjẹ́jẹ mẹ.” Ọọwa ọngọ mẹ ang jẹ à kaa tọọ wo yẹkẹẹ: “Ányị ahị tị́ ka bwu bịlẹ ẹla ọjẹ́jẹ bwu ẹga nya Ohe Oluhye?” Ọngọọwa ka myị nyori ịwa nyị ka raabwọ myị́.

12. Ányị a tị́ ka kpa ụpwụ nya Eje Ọnyịịla 139:2-4 da ọngọlẹ á kaa mẹ ịBayịbụụ jẹ ụbwọ nyọka raabwọ ha iJihova bwu ọkịlẹtụ nyamwụ?

¹² Mẹjẹ angịlẹ kaa jẹ́ ịBayịbụụ ta jaabwọ kị ka bwu raabwọ. Ya joo nyori iJihova tịtọ nyọka wo abwọ oriri o-bwu ọkịlẹtụ nyamwụ. Ya joo nyori ahị nyị ka jẹ́-ẹ ya ẹla ọlọkịlẹtụ nyahị ju iJihova ẹ-ẹpwụ nya abwọ ọrịrị, ẹla ịlẹ kahị ka dọmwụ myị ya je angịnyị ehe ịkịla ka. Kpịtịya nyori iJihova jẹ́ irya okpori-kpori nyahị ene lẹ. (Eje Ọnyịịla 139:2-4.) Ahị ka jẹ́-ẹ byi angịlẹ kahị-ị̀ mẹ ang jẹ nyị bịlẹ ụbwọ ọdada nya Ohe Oluhye nyọka kụrụ irya ọkụkụ bala abwẹla ọtịpyọ. Ọ-chụ pwokwita, ọhẹka ọhọhọ ọhẹ ọlẹ kọ la ang ka họ bala ojiga kaa kpụ ọngọhẹ ọlẹ kahị kaa jẹ́ ịBayịbụụ ta, ịpyọ yẹẹyẹẹ. Ọ jẹ́ nyori ọ há ka, ma ịngịhyẹ juwa ẹ-ẹpwụ nyamwụ ọlẹ kọ kaa kpọọ ịpyọ yẹẹyẹẹ. Jwoo ọhụ nyọka ya je iJihova jaabwọ ká ẹla ọọwa lọọ ọ-ọkịlẹtụ kpangga, bala ọ-ka bịlẹ iJihova kọ ka dọọ ụbwọ la ọháha u-uhye nya ang ọlẹ kọ họ́ọ kem.—Eje. 97:10.

13. (a) Ịyẹ tị́ du kahị ka wụrụ angịlẹ kahị-ị̀ jẹ́ ịBayịbụụ ta wẹ ọjịra-jịra ahyaahị? (b) Ányị ahị tị́ ka họ chajị ká ọngọlẹ kahị-ị̀ jẹ́ ịBayịbụụ ta ka la ọhụ obeji u-Ube nya Ịpyị-Adịrahụ?

¹³ Wụrụ ọngọlẹ á kaa mẹ ịBayịbụụ jẹ wẹ ọjịra-jịra ahyaahị. Ẹla ọlẹ ká ọngịnyị á wo lee ọ-yẹ ọọjịra-jịra ka gwoo ọ-ọkịlẹtụ bala ọ-dọọ ụbwọ nwànwà myị́. Mẹ ifim ọlẹ kọ ri, Ịyẹ ị Tị-ị Họ u-Ube nya Ịpyị-Adịrahụ? jọ́ọ, ká byoo nyori anụ nyị bajẹ wẹ ọjịra-jịra lawụlẹ. Kori kọ chịkpẹẹ, à byoo nyori ahụ nyị ka dọọ ụbwọ pwụ ọjịra-jịra. Ọ ka há yẹẹyẹẹ kori ká ahụ bala aanahị ịdatị-datị á bajẹ ka jẹ́ ang balọọ. Kori ká họ ịnyị, ọngọọwa ka jẹ́ angịkịla ọọjịra-jịra, lẹ ọ ka la ọhụ obeji ụka kọ wẹ ọjịra-jịra.

14. Ịyẹ à tị́ ka gu ọngọlẹ kahị-ị̀ jẹ́ ịBayịbụụ ta gbịla nyọka nwànwà ẹ-ẹpwụ nya ang nya olegu myị́?

¹⁴ Ang ọlẹ kahị wẹẹ ku ri ọ-ka da ọngọlẹ kahị-ị̀ jẹ́ ịBayịbụụ ta ụbwọ nyọka nwànwà ẹ-ẹpwụ nya ang nya olegu. (Efe. 4:13) Ụka ká ọngịnyị á myị ọnụ nyọka jẹ́ ịBayịbụụ, irya nyamwụ ka ri ọ-ka yẹ jaabwọ ká ịBayịbụụ ka dọọ ọwa ụbwọ myị́. Ma jaabwọ ká ọháha nyamwụ wẹẹ nwà ẹ-ẹga nya iJihova, ọ ka dọmwụ nyọka kụ irya jaabwọ kọ ka bwu da angịkịla ụbwọ, tụ́ angịlẹ kị juwa ọọjịra-jịra ene-ene lẹ. (Mat. 22:37-39) Ụka kọ pwoku, a dayi la o-ya joo nyori iwe ji nyọka da ụkụrwọ nya Ịpyị-Adịrahụ ụbwọ la okpoko ka.

15. Ányị ahị tị́ ka jẹ́-ẹ bwu da ọngọlẹ kahị kaa jẹ́ ịBayịbụụ ta ụbwọ nyọka họ ang ọlẹ kọ chịla ụka ká akama á ji?

 ¹⁵ Mẹ ẹla ọlẹ kọ ka họ ụka ká akama á ji jọ́ọ. Ọ-chụ pwokwita, ọhẹka ọngọlẹ á kaa mẹ ịBayịbụụ jẹ ri ọngọ kpa ẹrụ ọnyịịla pyẹ ọlẹ kọ hu enyi Ohe lẹka. Kori kọ ya jeng nyori ọngọhẹ ọọjịra-jịra nyị họ ẹla wụ́ ọwa ẹjẹ, ọkọkọ nyọka chẹkpẹ ju ọngọhẹ lee ọngọkịla, ya ẹla ọlẹ ká ịBayịbụụ ya nyị họ joo. Ọ ka jẹ́-ẹ hịnyọhi ọọnahị ọọwa bala o-deeri hi ẹla ọọwa myị́. Kori kọ tị ka jẹ́-ẹ họ ịnyị ka aalẹ, ọ ka ya ẹla ta ọngọwa kpẹnẹẹ ẹ-ẹpwụ nya ọháha chajị nyọka ye ‘ọnyadamwụ tịrẹkpẹ.’ (Yẹ ịMatiyu 18:15 ịnyịnyị.) Dọọ ụbwọ nwụla ẹla ọlẹ kọ ka ya nọ. Mẹjọ́ọ jaabwọ kọ ka kpa JW Library^®, Research Guide for Jehovah’s Witnesses bala jw.org^® jẹ́ ang u-uhye nya ụgbẹyị ọlẹ kọ ka bwu myị́ akama ọwẹ. Kori kọ jẹ́ jaabwọ kọ ka bwu myị́ ẹla ọlẹ kọ la bala angịkịla ene kọ ka hu enyi Ohe, ọ ka chọọ kpẹẹ nyọka yẹjulaa yẹẹyẹẹ ụka kọ hu enyi Ohe kpá.

16. Ịyẹ tị́ du kọ há nyọka wụrụ angịkịla wẹ ang ọjẹ́jẹ nyang?

¹⁶ Wụrụ angịkịla ọọjịra-jịra bala ọngọ kpẹhị rịrị isekut ụka kọ wẹ, nyọka juwa balanụ ụka nya ang ọjẹ́jẹ. Ịyẹ tị́ du? Datị hi ang ịlẹ kahị gu ẹnyị lalẹ, aanahị ịkịla ka jẹ́-ẹ dọọ ụbwọ a-agbẹyị ịlẹ á ka jẹ́-ẹ dọọ ụbwọ ka. Ọhẹka, ọngọọwa maga ụka lụmẹ-lụmẹ nyọka hwabwọ hi ẹchụ ọnwànwà, ọ́ tị jwọọ họ ka. Wụrụ ọọnahị ọlẹ kọ jẹ́ kụrụ abwẹla ọwẹ nanana nyori ọ chị mịleji ụka lụmẹ-lụmẹ, wẹ ang ọjẹ́je ọwẹ. Ọọnang ọkịla ọwẹ ka jẹ́-ẹ ju ọngọlẹ á kaa mẹ ịBayịbụụ jẹ irya ọlẹ kọ ka dọọ ụbwọ. Kori kọ lang ujwo nyọka mẹ ang jẹ ị-ịlahị nya ọọnahị ọlẹ kọ la ẹla ọjẹ́jẹ ọlịnyị, byoo kọ dang ụbwọ mẹ ang jẹ ụka ọwẹ. Kori ká wụrụ angịkịla wẹ ang ọjẹ́jẹ nyang, angịlẹ á kaa mẹ ang jẹ ka ye apybwuna bwu ẹla ọlẹ kọ họ ẹ-ẹga nya angịịwa. Kpịtịya nyori ang ọlẹ kahị tịtọ ri ọ-ka da angịlẹ kahị kaa mẹ ang jẹ ụbwọ nyọka nwànwà ẹ-ẹpwụ nya ang nya olegu.

17-18. Ẹlịyẹ a tị́ ka kụ irya ju ene nyọka cheje kori á ka hwabwọ la ọ-mẹ ang jẹ ọngịnyị?

¹⁷ Kori ká ọngọlẹ á kaa mẹ ịBayịbụụ jẹ á nwụ ọhịhị nyamwụ rịrị ka gbee pwụ ụka ọhẹ, à ka tịlọng wo, ‘M hwabwọ la ọ-mẹ ang jọ́ọ mẹ?’ Ene á ka cheje ọwẹ, à baba nyọka kụ irya nya ang ọlẹ ká ọngọọwa ka jụ họ myị́. Angịhyẹ kaa nwà hyaahyaa gụ angịkịla. Tịlọng wo: ‘Jaabwọ ọlẹ ká ọngịnyị nyam wẹẹ nwà lẹ, o pwoku iwe-ahụrụ nyamwụ?’ ‘Ọ dọmwụ nyọka kpa ẹla ọlẹ kọ wẹẹ jẹ́ “họ ụkụrwọ” lẹ?’ (Mat. 28:20) Ọ ka tata ene ká ọngọlẹ ká wẹẹ mẹ ang jẹ ka ri ọngọjụgbẹyị myị́. Ma, ọ baba nyọka yẹ ọhịhị nyamwụ da dụmwọ-dụmwọ.

¹⁸ Ma, ányị ahị tị́ ka họ kori kahị mẹ ang jẹ ọngịnyị lụka ọtata lẹ, kọ tị mẹjẹ nyori ang ọjẹ́jẹ ọọwa nyị́ jwoo apyobwuna ka? Kụ irya ju ọ-chụ pwokwita ọlẹ wẹẹ: À jẹ́ ụpwụ nya Teach Us kpá bala ọngịnyị lẹ. Ọhẹka à dọmwụ nyọka jẹ́ ụpwụ nya Remain in God’s Love balọọ ịnyịnyị lẹ. Ọ́ tị wẹ ọjịra-jịra ọlẹlẹhẹ ẹnẹnẹhẹ lẹka. Ọ́  dọmwụ wẹ ọ-Họ Kpa Kpịtịya nya Igu nya iJisọsị ẹnẹnẹhẹ lẹka. Ọ tị kaa da ang ọjẹ́jẹ yị chajị nya ang ịkịla ịlẹ kị ju apyobwuna ka. Kori kọ lịnyị, à baba nyọka ya ẹla ọlẹ kọ juwa joo gbagbịla. *

19. Kori ká yẹ nyori ịBayịbụụ ọjẹ́jẹ á myị ọngịnyị lẹhị ka, ẹlịyẹ a tị́ ka byoo myị́? Ẹlịyẹ a tị́ baba nyọka kpa i-irya?

¹⁹ À ka dọmwụ myị́ bwula ọ-tọọ wo nyori, ‘Ịyẹ à tị́ ri ịngịhyẹ ọlẹ kọ lang ujwo gụgụgụ nyọka họ chajị á ka ri Olibeenu nya iJihova?’ Ọngọọwa ka wẹng myị́, ‘ỊBayịbụụ ọjẹ́jẹ á wụm eje koo, ma am lẹ, ḿ ka jẹ́-ẹ ri Olibeenu nya iJihova ẹnẹnẹhẹ kaka!’ Ó ri ịịwẹ kọ yọọ nanana nyori à jẹ́ ang balọọ lụka ọtata lẹ, ọ baba nyọka kịnyaa la ang ọjẹ́jẹ ọọwa wẹẹ? Ma, ọ tị chịkpẹẹ myị́ ká ụka ọwẹ ọngọọwa à ka ya ang ọlẹ kọ wẹẹ woo kpa jung họhẹ-họhẹ. Ọ-chụ pwokwita, ọ ka me irya nyori ọwa nyị́ ka jẹ́-ẹ kpa ẹrụ ọnyịịla pyẹ bwu ẹpwa ka ẹpwa myị́ ẹnẹnẹhẹ ka. Ụka ká jẹ́ jaabwọ kọ lọọ ọ-ọkịlẹtụ lẹ, à ka jẹ́-ẹ dọọ ụbwọ myị́ lẹlẹ.

20. Ányị ụpwụ nya Ụkụrwọ nya Alẹrụ 13:48 à tị́ dahị ụbwọ nyọka jẹ́ kori kahị ka kịnyaa juwa mẹ ịBayịbụụ jẹ́ ọngịnyị lee kori kahị ka hwabwọ?

²⁰ Ọ tolujwo lụmẹ nyori angịhyẹ ịlẹ kahị kaa jẹ́ ịBayịbụụ ta, lala ala Isirẹlụ ịla ụka nya Isikẹlụ. Yẹ ẹla ọlẹ ká iJihova ya u-uhye nyaa ju Isikẹlụ: “Ịnyaa lẹ, a ri ọngọ mwu eje rụ angịnyị ọ-há awụlẹ kem ọlẹ kọ juwa du ogum̀ jwoo. Ịị wo ẹla oyaya nyang woowo, ị́ tịị kpa họ ụkụrwọ ka.” (Isi. 33:32) Ọ ka lahị ujwo nyọka byi ọngịnyị nyori ahị nyị ka hwabwọ la ọ-mẹ ịBayịbụụ jọ́ọ myị́, ma “ụka hi kpii lụmẹ” lẹ. (1 Kọr. 7:29) Ọkọkọ nyọka bịrị ụka juwa mẹ ịBayịbụụ jẹ ọngọlẹ kọ nwụlanọ nyọka yẹda ka lẹ, ahị mwahị nya ọngọlẹ kọ mẹjẹ nyori ọ “chịla-chịla nyọka la ọhịhị ọmyịmyị-ka.”—Ụkụr. 13:48 NW.

21. Ịyẹ à tị́ ri egbeju ẹla nya ẹka 2020? Ịyẹ tị́ du kọ pwoku?

²¹ La ẹka nya 2020, egbeju nya ẹla nyahị ka dahị ụbwọ nyọka yẹ jaabwọ kahị ka bwu nwànwà ẹ-ẹpwụ nya ọ-da angịnyị ụbwọ wẹ ka ri angịjụgbẹyị. Ọ bwu omyi ẹla ịhyẹ ịlẹ ká iJisọsị ya ọọjịra-jịra ọla uhye nya ogbodo ị-ịGalili: ‘Anụ kele kaka họ ká angịnyị á ri angịjụgbẹyị nyam, kanụ hwaa enyi Ohe.’—Mat. 28:19.