Ẹla ọlụpwụ nya Ehile Ọmada 22:25-27 á ri ọ-ka jẹ́ kori ká ọlẹng ọọwa á la abyị lee kori kọ la abyị ka lẹ ka, chajị ị jẹ́ nyori ọ la abyị ene-ene lẹ. Ehile ọwẹ ka dụbwọ kị ka jẹ́ myị̀myị̀ nyori ọnyang ọọwa á la abyị ka. Kụ irya nya ẹla ọlẹ kọ dagaga jwoo wẹẹ.

Ịgba ịlẹ kị jene nya ọọwa ya ẹla u-uhye nya ọlẹng ọlẹ kọ nọ ta ọnyang ọlẹ kị chị rịrị, “e-epweji.” Nyọlẹ kọ họ ịnyị, ọ labyị nya ụya ọhọhọ, chajị ị yẹ ọnyang ọlẹ kị chị rịrị lala ọngọlẹ kọ rwọ ọrụ lẹ. Ọnyang ọọwa tị bẹẹ? “Ọ́ chị eko wụrụ angịnyị . . . ka.” Kori kọ họ ịnyị ịnọ, angịkịla ka wo la eko nyamwụ kpụ ị ka kele kaka dọọ ụbwọ. Ma, ọ́ chị eko ka. Ọ myị ọnụ ju ụya ọhọhọ ọọwa, lẹ eje waa ịwa angị imimiiye.—Ehile. 22:23, 24.

Ehile myịmyị ya ẹla u-uhye nya iwe-ahụrụ ọkịla ọlẹ kọ datị: “Ọ́ tị ri ẹrụ lee ẹgẹhẹ hwẹẹẹ hi epweji ká ọlẹng ọọwa-á chị onjwo ịyang ọwẹ beji aalẹ, ọlẹng ọọwa ụbwọọmwụ kem ị ka nwụ lẹ. Ānụ họ ọnyang ọwẹ ịngịngịhyẹ koo, chajị ọ́ họ ang onyobyi ọhẹ ọlẹ kọ ka kpa igu họọ ka. Ẹlẹwẹ la jaabwọ ká ọngọhẹ ka kụ ịnya gbe ọngọkịla, gba mịlọọ nmoo, nwọọ ju ka ịpyị. Ẹ-ẹpwamẹ ọlẹng ọọwa-à chị ọnyang ọwẹ beji lẹ. Ịnọ ọ chị eko chị kpá, ọngọngọhẹ-ẹ́ ji ọnaabwọ ri olewe nyamwụ kaka.”—Ehile. 22:25-27.

Ẹ-ẹpwụ nya iwe-ahụrụ ọwẹ, angịleje ka hwoo nyori ọnyang ọọwa “chị eko chị kpá, ọngọngọhẹ-ẹ́ ji ọnaabwọ ri olewe nyamwụ kaka.” Lẹ, ó ri ụya kọ họ ka. Ma, ọlẹng ọọwa tị la abyị nya ọnyang ọ-chị beji bala ụya ọhọhọ, chajị ọ kụrụ ọnyang ọọwa ọlẹ kị chị rịrị, lẹ ọ chọọ beji lagbụrụ lẹlẹ.

Lẹ, nanana nyori ehile ọwẹ ya ẹla u-uhye nya abyị ọlala-ka nya ọnyang, o ya kpụrụrụ nyori ọlẹng nyị la abyị nya ọngịnyị ọ-chị beji bala ụya ọhọhọ. Ahị ka jẹ́-ẹ dahịhile nyori angịleje ka “dịrẹ ẹlẹwẹ kpẹẹkpẹẹ” bala ọ-ka cheje ọlẹ kọ ka pwoku ẹla ọlẹ ká Ohe Oluhye byaa gbagbịla bala ọ-ma ya ụka lụmẹ-lụmẹ.—Ehile. 13:14; 17:4; Ehe. 20:14.