1-2. Ányị ụpwụ nya ịMatiyu 5:11 à tị́ ya kahị ka bwu yẹ ịmayẹ?

IJISỌSỊ myị ọnụ ha angịjụgbẹyị nyamwụ nyori nyị ka ye ọkẹkẹnị nyịlẹhị. Ọ tị myịmyị byi angịlẹ kị la ọháha ẹ-ẹga nyamwụ nyori ịmayẹ nyị ka wẹ chaa ọgụ. (Mat. 10:22, 23; Luk. 6:20-23) Ahị chị ọkẹkẹnị nyọka ri angịjụgbẹyị nya ịKịrayịsị. Ma, ányị ọ tị́ kaa lahị kori ká alugbiyegu nyahị-ị́ juwa maga nyọka huhi abwọ la ọ-gbịgba ha iJihova, kori ká ala igomenti á juwa tụ́ụhị pyịpyị, lee kori ká ala ọlụkụrwọ lee ala ube-ụpwụ nyahị-ị́ juwa tịto kahị ka họ ang ọtịpyọ? Ahị ka la uko ọchịchị ụka kahị kụ irya u-uhye nya ang ịlịịwẹ myị́.

² Iru nya angịnyị-ị́ kaa kụ irya nyori ọtụpyịpyị ka du ká ọngịnyị ka chị ọkẹkẹnị ka. Ịnyị kpangga Omyi Ẹla nya Ohe Oluhye à tị byihi nyị họ lẹ. Ọ-chụ pwokwita, iJemsi ọngọjụgbẹyị nya ịKịrayịsị da ụpwụ nyori ọkọkọ ká abwọ nyị ka pwọọhị pwọọ ẹ-ẹpwụ nya ịmayẹ lẹ, ahị nyị chị ọkẹkẹnị. (Jem. 1:2, 12) IJisọsị myị́myị́ ya nyori ahị nyị chị ọkẹkẹnị ụka kị dọmwụ juwa tụ́ụhị pyịpyị. (Wa ịMatiyu 5:11.) Ányị ahị tị́ ka bwu kịnyaa la ọ-chị ọkẹkẹnị ẹ-ẹpwụ nya ịmayẹ? Ahị ka jẹ́-ẹ jẹ́ ang yẹẹyẹẹ bwula ọ-kụ ẹhị yẹ ẹla ịhyẹ bwu ileta ọlẹ ká iJemsi da du kịla angịnyị nya ịKịrayịsị ịla oyi ọhọhẹ. Ahị ka dọmwụ bwula ọ-jẹ́ ang u-uhye nya akama ịlẹ kị wẹ ẹga nya angịnyị nya ịKịrayịsị ịịwa.

3. Ẹlịyẹ à tị́ họ ahyaahị nyọlẹ ká iJemsi wẹ ka ri ọngọjụgbẹyị nya iJisọsị?

³ Ahyaahị nyọlẹ ká iJemsi ọnyadịda nya iJisọsị wẹ ka ri ọngọjụgbẹyị, ọtụpyịpyị wẹ chị angịnyị nya ịKịrayịsị ịla iJerusalẹm ọgụ. (Ụkụr. 1:14; 5:17, 18) Ụka ọlẹ kị myị́myị́ nwụ iSitivin ọngọjụgbẹyị kpá, angịnyị nya ịKịrayịsị lụmẹ-lụmẹ rụnyẹ rụ “nyi epepe hi awụlẹ wuu, bwu iJerusalẹm rụ kele ka ịkịka nya ọpyị nya ala iJudiya wuu  bala ọpyị nya ala ịSameriya.” Ị dọmwụ jẹ gbee pwụ ẹga ịlụrụ-lụrụ lala ịSayịpịrọsị bala Antiyọkọ. (Ụkụr. 7:58–8:1; 11:19) Angịjụgbẹyị ịwẹ yẹ akama nyịlẹhị-ịlẹhị. Ma, ị kịnyaa la ọ-kpa ẹrụ ọnyịịla pyẹ la ila ọchịchị ẹ-ẹga myị́ ẹga ọlẹ kị ka bala ọ-dụbwọ nyọka ya ọjịra-jịra lụmẹ-lụmẹ yeji ẹ-ẹga ịlịnyị. (1 Pit. 1:1) Nyọlẹ kọ lịnyị kpá, ị myị́myị́ la akama ịkịla lụmẹ-lụmẹ wẹẹ.

4. Akama ịkịla iyina angịnyị nya ịKịrayịsị ịla oyi ọhọhẹ à tị́ chịpwụrụ bwu?

⁴ Ịmayẹ lụmẹ-lụmẹ chị angịnyị nya ịKịrayịsị ịla oyi ọhọhẹ ọgụ. Ọ-chụ pwokwita, lala ụka nya ẹka iwo ịrụ Nyọlẹ kị Ma ịKịrayịsị Kpá (50 C.E.), Adịrahụ nya ala iRom ọhẹ ká ẹnyị nyamwụ ri iKilodiyọsị ku ala iJuu wuu rụ bwu iRom. Lẹ, ala iJuu ịlẹ kị ri angịnyị nya ịKịrayịsị rụ hi epweji ọwẹ kaka kụ ẹga ịkịla la ọ-nwụlanọ nyọọwa ene ka. (Ụkụr. 18:1-3) Lala ụka nya ẹka iwo ịrwọnyẹ kụrụ okpokpo Nyọlẹ kị Ma ịKịrayịsị Kpá (61 C.E.), iPọlụ da ụpwụ nyori angịnyị nyị kaa do alọjịra-jịra ị-ịlahị nya aluche, waa ju agba bala o-go ang ịlala nyaa kpa rụ lagbụrụ. (Hib. 10:32-34) Angịnyị nya ịKịrayịsị ịhyẹ tịị jụ́ ẹdụrụ bala o-ri alẹbyahị lala angịkịla ịnyịnyị.​—Rom. 15:26; Filip. 2:25-27.

5. Ịtọ ẹla iyina ahị tị́ ka wẹ?

⁵ Ụka ọlẹ ká iJemsi da ileta nyamwụ ene nya ẹka iwo ịrwọnyẹ kụrụ imiiye Nyọlẹ kị Ma ịKịrayịsị Kpá (62 C.E.) lẹ, ọ jẹ́ ụma nya ịmayẹ ịlẹ kị wẹ chị alọjịra-jịra ọgụ yẹẹyẹẹ. IJihova kpa iJemsi da ụpwụ du kịlaa nyọka mẹjáa jaabwọ kị ka bwu kịnyaa la ọ-chị ọkẹkẹnị ụka kị dọmwụ juwa ẹ-ẹpwụ nya ịmayẹ. Ahị kụ ẹhị yẹ ileta nya iJemsi ọọwa bala ọ-wẹ ịtọ ẹla ịlẹ wẹẹ: Ụma nya ọkẹkẹnị oyina iJemsi à tị́ da ụpwụ u-uhye nyamwụ? Ịyẹ tị́ ka du ká ọkẹkẹnị ọọwa ka gụ ọngịnyị nya ịKịrayịsị byi myị́? Ányị ẹla ọjẹ́jẹ, ọmyịmyị bala ugbodu ojuju à tị́ ka dahị ụbwọ nyọka kịnyaa la ọ-chị ọkẹkẹnị jaabwọ myị́ abwọ ká ịmayẹ à wẹ ẹga nyahị kaka ba?

6. Ịyẹ tị́ du ká ọngịnyị nya ịKịrayịsị ka jẹ́-ẹ chị ọkẹkẹnị ụka kọ juwa ẹ-ẹpwụ nya ịmayẹ jaabwọ ká ụpwụ nya iLuku 6:22, 23 mẹjẹ?

⁶ Angịnyị ka kụ irya myị́ nyori ịnyịrọ ọ-la gogo, okpoko ọ-la lụmẹ bala okpunyi o-ji ugbiyegu nya-à ka du kị ka jẹ́-ẹ chị ọkẹkẹnị lẹ. Ma, ụma nya ọkẹkẹnị ọlẹ ká iJemsi da ụpwụ u-uhye nyamwụ ri ụpa nya ugbe nya olegu ịgọgọ nya Ohe Oluhye, ọ́ tị kpụnịrọ iwe-ahụrụ nya ọngịnyị ka. (Gal. 5:22) Ọngịnyị nya ịKịrayịsị kaa ye ọkẹkẹnị, lee ọ-chị ọkẹkẹnị nyịlẹhị kori kọ jẹ́ nyori ọ juwa họ ẹla kpụ iJihova ịpyọ bala ọ-dịrẹ ọgụ-ẹpẹtẹ nya iJisọsị. (Wa iLuku 6:22, 23; Kol. 1:10, 11) Ahị ka jẹ́-ẹ chụ ọkẹkẹnị nyahị kaka pwoku ẹlẹlẹ-ila ọlẹ kọ juwa wuru ẹ-ẹpwụ nya otinika myị́. Otinika ọọwa kaa chewu kọọ hi igbachịwụ lee enyi chajị kọ ka kịnyaa la o-wuru. Ahị ịnyịnyị ka jẹ́-ẹ kịnyaa la ọ-chị ọkẹkẹnị jaabwọ myị́ abwọ ká iwe-ahụrụ nya ọhịhị nyahị-ị́ la. Ọkẹkẹnị nyahị-ị́ gụ́ụhị myị́ ụka ká ẹdụrụ á jụ́ụhị lee ụka kahị la okpoko gbuu ka lẹ ka. Ọtụpyịpyị lee ọ-kpa họ o-bwu ẹga nya alugbiyegu nyahị bala angịkịla-á tị ka jẹ́-ẹ myọọ myị́ ka ịnyịnyị. Ọkọkọ ká ọkẹkẹnị nyahị tị ka myịrị dẹyị-dẹyị lẹ, ọ kaa juwa wuru kpowu-kpowu lala ẹlẹlẹ-ila ụka myị́ ụka ká angị tụ́ụhị pyịpyị á maga nyọka mịrọọ. Ịmayẹ ịlẹ kị kaa wẹ chịhị ọgụ ọọlajị nya ọmyịmyị nyahị mẹjẹ gede-gede nyori ahị ri angịjụgbẹyị nya ịKịrayịsị nyịlẹhị. (Mat. 10:22; 24:9; Jọn. 15:20) Ịnyị à dudu ká iJemsi jẹ́ da ụpwụ yẹkẹẹ: “Anụ anyandam ẹ-ẹpwụ nya ịKịrayịsị, anụ hwoo nya ang nya ọkẹkẹnị ọtụka ụka ká ịmayẹ la datị-datị á wẹ ẹga nyanụ.”​—Jem. 1:2.

7-8. Ịyẹ tị́ du ká ọmyịmyị nyahị kaa la ọngịrị ụka ká ịmayẹ á chịhị ọgụ?

⁷ IJemsi myị́myị́ ya ang ọkịla ọlẹ kọ du ká angịnyị nya ịKịrayịsị kaa nwụlanọ nyọka bọhụ ẹ-ẹpwụ nya ịmayẹ ịtụka-ịtụka. O yẹkẹẹ: “Ụka ká ịmayẹ ịwẹ á wẹ ka da ọmyịmyị ọlala nyanụ uya, kanụ kpoye nyaa myị́ lẹ aalẹ, ọọwa a ka họ kanụ ka ri angị godayị kpakpakpa ẹ-ẹpwụ nya ugbodu ojuju myị́ lẹlẹ.” (Jem. 1:3) Ahị ka jẹ́-ẹ chụ ịmayẹ ka pwoku ila ọlẹ kị kaa kpa hya ang oloje-oje lala ẹma. Ụka kị hyọọ kpá kọ nyiri, oje ọọwa kaa la ọngịrị gụ olene. Ịnyịnyị, ụka kahị bọhụ ẹ-ẹpwụ nya ịmayẹ, ọmyịmyị nyahị kaa la ọngịrị gụ ọwọwa. Ịnyị à du ká iJemsi da ụpwụ yẹkẹẹ: ‘Anụ myị ká ugbodu ojuju a họ ụkụrwọ nyamwụ pwụ ọbaba ẹ-ẹpwụ nyanụ chajị kanụ ka ri adam ọlẹng ẹ-ẹpwụ nya ọngịnyị nya Ohe Oluhye oriri nyanụ mẹ.’ (Jem. 1:4) Ụka kahị yẹ nyori ịmayẹ nyahị kaa ju ọmyịmyị nyahị ọngịrị, ahị ka jẹ́-ẹ bọhụ ẹ-ẹpwụ nyaa la ọkẹkẹnị.

⁸ Ẹ-ẹpwụ nya ileta nyamwụ, iJemsi gu ẹnyị nya ang ịhyẹ ịlẹ kị ka du ká ọkẹkẹnị nyahị ka gụ́ụhị byi myị́. Ịyẹ à tị́ ri akama ịịwa? Ányị ahị tị́ ka bwu kụrwaa myị́?

9. Ịyẹ tị́ du kahị baba nya ẹla ọjẹ́jẹ?

⁹ Ang ọlẹ ko ri akama: Ụka kahị jẹ́ abwọlẹ kahị ka họ ka. Ụka kahị ji ẹpwụ nya akama, ahị tịtọ  nyọka yọyị ka ẹga nya iJihova nyọka dahị ụbwọ cheje nya ẹla ịlẹ kị ka kpọọ ịpyọ, ju apyobwuna ha aanahị, bala ọ-dahị ụbwọ nyọka godayị giri-giri ha iJihova. (Jer. 10:23) Ahị baba nya ẹla ọjẹ́jẹ nyọka jẹ́ ang ọlẹ kahị baba nyọka họ bala ẹla ọlẹ kahị ka byi angịlẹ kị ja tụụhị pyịpyị. Kori kahị jẹ́ ẹla ọlẹ kahị ka họ ka, ọkịlẹtụ ka kpụhị enyi myị́, du ká ọkẹkẹnị nyahị ka gụ́ụhị byi i-ijata.

10. Ẹlịyẹ ụpwụ nya iJemsi 1:5 à tị́ ya kọ baba kahị ka họ nyọka la ẹla ọjẹ́jẹ?

¹⁰ Ang ọlẹ kahị ka jẹ́-ẹ họ: Bịlẹ ẹla ọjẹ́jẹ bwu ẹga nya iJihova. Kori kahị ka jẹ́-ẹ bọhụ ẹ-ẹpwụ nya akama nyahị la ọkẹkẹnị aalẹ, o ri opyii kahị ka jene bịlẹ ẹla ọjẹ́jẹ ọlẹ kahị baba nyọka kpa cheje ọnyịịla bwu ẹga nya iJihova ẹ-ẹpwụ nya abwọ ọrịrị. (Wa iJemsi 1:5.) Ịyẹ ahị tị́ ka họ kori kọ lala o-ri iJihova nyị́ wẹ abwọ ọrịrị nyahị hyaa ka? IJemsi ya nyori ahị nyị juwa “bịlẹ Ohe Oluhye.” IJihova-á kaa wụ ẹjẹ kori kahị kịnyaa la ọ-bịlọọ ẹla ọjẹ́jẹ ka. Ọ́ ka ju agbama tahị ka. Adahị olepwoohe ka ya ẹla ọjẹ́jẹ ọlẹ kahị ka kpa bọhụ hahị ụka kahị raabwọ họọ chajị o ri ọngọlẹ kọ “kaa hu ang ha angịnyị ehe la alibyi oyaya taa-ka.” (Eje. 25:12, 13) Ọ kaa yẹ akama nyahị, ọ jẹ́ ahyẹẹrwẹrwa nyahị, ọ tị nwụlanọ nyọka dahị ụbwọ ịnyịnyị. Ọwẹ dudu kahị ka chị ọkẹkẹnị! Ma, ányị iJihova à tịị bwu ya ẹla ọjẹ́jẹ hahị?

11. Ẹla ọkịla oyina ahị tị́ ka họ pyii nyọka la ẹla ọjẹ́jẹ?

¹¹ IJihova kaa ya ẹla ọjẹ́jẹ hahị bwula Omyi Ẹla nyamwụ. (Etu 2:6) Nyọka la ẹla ọjẹ́jẹ ọọwa, o-ri opyii kahị ka jẹ́ ang bwu ẹpwụ nya Omyi Ẹla nya Ohe bala apwụ ị-da ịBayịbụụ wụlẹ nyahị. Ma, ọ́ tị ka ba ẹ-ẹla ọ-jẹ́ myị egbeju kem ka. Ahị ka kpa ẹla ọjẹ́jẹ o-bwu ẹga nya Ohe Oluhye họ ụkụrwọ bwula ọ-ba ẹla ọmẹjẹ nyamwụ jẹ pyii. IJemsi da ụpwụ yẹkẹẹ: “Anụ cheri kanụ ri angị wo ẹrụ ọnyịịla nya Ohe Oluhye wowo kem ka.” (Jem. 1:22) Kori kahị kpa ẹla ọlẹ ká Ohe mẹjẹ́ẹhị họ ụkụrwọ, ahị ka jẹ́-ẹ ri angịnyị nya okpunyi, ri angị yẹ ẹla ẹkpẹ imiiye, bala ọ-myị̀ la ahyẹẹrwẹrwa gụ olene. (Jem. 3:17) Abwụma ịwẹ ka dahị ụbwọ nyọka bọhụ ẹ-ẹpwụ nya akama ọhẹ-lọhẹ la ọkẹkẹnị nyahị ọ-ka gụ́ụhị byi ka.

12. Ịyẹ tị́ du kọ baba kahị ka jẹ́ ịBayịbụụ yẹẹyẹẹ?

 ¹² Omyi Ẹla nya Ohe lala ịnyọ. Ọ kaa dahị ụbwọ nyọka yẹ ang ọlẹ kahị baba nyọka nwụ họ bala abwọlẹ kahị ka bwu họ ịnyị. (Jem. 1:23-25) Ọ-chụ pwokwita, ụka kahị jẹ́ ang bwu ẹpwụ nya Ụpwụ Ịgọgọ kpá, ahị ka yẹ myị́ nyori ahị baba nyọka wu agbama nyahị kpa. Bwula ụbwọ ọdada nya iJihova, ahị ka jẹ́ jaabwọ kahị ka tọọtụ pịlẹ họ ẹla ụka ká angịnyị lee akama ọhẹ á du agbama juhi. Chajị nyọlẹ kahị la dụmwọ, ahị jẹ́-ẹ bọhụ gụ ọọwa ụka ká akama á chịhị ọgụ. Ahị jẹ́-ẹ kụ irya nya ẹla rige-rige bala ọ-cheje nya ẹla ịnyịịla. (Jem. 3:13) Ọ baba kahị ka jẹ́ ịBayịbụụ yẹẹyẹẹ ịnyịlẹhị!

13. Ịyẹ tị́ du kahị ka jẹ́ ang bwu ọgụ-ẹpẹtẹ nya angị ịlẹpwụ nya ịBayịbụụ?

¹³ Ụka ọhẹ ahị kaa chị ụchụụ kpa wuu ene kahị ka jẹ́ nyori áhị chịla nyọka họ ang ọọwa ka. Ma, ọ́ kaa kpịpyọ nyọka jẹ́ ang bwu ụgbẹyị ọlịịwẹ ka. Ụgbẹyị ọlẹ kọ há nyọka la ẹla ọjẹ́jẹ ri ọ-ka jẹ́ ang bwu ẹga nya ọ-jẹ́ họ bala ọ-jẹ́ họ-ka nya angịkịla. Ịnyị à dudu ká Ọlẹrụ iJemsi juhi ọhụ nyori ahị nyị kụ ẹhị yẹ ọgụ-ẹpẹtẹ nya angịnyị lala Ebiraham, iRehabụ, iJobu, bala Ịlayịja, ịlẹ ká oja nyaa ji ẹpwụ nya ịBayịbụụ lẹ. (Jem. 2:21-26; 5:10, 11, 17, 18) Anchẹ nya iJihova i-godayị giri-giri ịwẹ jẹ́ bọhụ ẹ-ẹpwụ nya akama ịlẹ ịnọ kị ka naa ọkẹkẹnị nyaa myị́. Ọ-chụ pwokwita nya ọhụ ọbaba nyaa mẹjẹ nyori, bwula ụbwọ ọdada nya iJihova ahị ka jẹ́-ẹ bọhụ ịnyịnyị.

14-15. Ịyẹ tị́ du kahị ka hwabwọ la ịwẹẹ ọdada?

¹⁴ Ang ọlẹ ko ri akama: Ịwẹẹ ọdada u-uhye nya ọmyịmyị nyahị. Ụka ọhẹ bala ụka ọkịla, ọ ka lahị nyaa-nyaa la ọ-ka wo etu nya ẹlẹhẹ ọlẹ ká ịBayịbụụ ya myị́. Lee iJihova-á ka wẹ abwọ ọrịrị nyahị ụ-ụgbẹyị ọlẹ kahị yahị mẹ ka myị́. Ọwẹ ka dudu kahị ka la ịwẹẹ ọdada myị́. Kori kahị yẹ ịwẹẹ ịlẹ kahị la dòdóó, ị ka họ ọmyịmyi nyahị ka la dẹwụ-dẹwụ bala ọ-ka bịrị igu oriri nyahị bala iJihova. (Jem. 1:7, 8) Ị dọmwụ ka du ká ẹhị ọrịrịị-rịrị nya ijuju ọnyịịla ọlẹ kahị la ka gụ́ụhị byi myị́.

¹⁵ Ọlẹrụ ịPọlụ chụ ẹhị ọrịrịị-rịrị nya ijuju ọnyịịla ọlẹ kahị la kaka pwokwu ang o-wu ụgbọ nya enyi kpa. (Hib. 6:19) Ang ọọwa dudu ká ụgbọ nya enyi jẹ́-ẹ dayị kpọọ ụka nya igbachịwụ ọnyọọngịrị bala o-woo kpa la ọ-yẹ kpata ka ẹga ká ajwo ji. Ma, ang o-wu ụgbọ nya enyi kpa ọọwa kaa ju apyobwuna kene-kene kori ká agba ọlẹ kị ya bwọọ á cheku ka. Jaabwọ ká ega ọchịchị kaa dudu ká agba nyamwụ kaa la dẹwụ-dẹwụ, ịwẹẹ ọdada kaa họ ká ọmyịmyị nyahị ka la dẹwụ-dẹwụ ịnyịnyị. Ụka kahị la akama, ahị ka da ịwẹẹ nyori iJihova ka họ ọnụ ọmyịmyị nyamwụ wuu jịra myị́. Kori ká ọmyịmyị nyahị á gụ́ụhị byi lẹ aalẹ, ẹhị ọrịrịị-rịrị nyahị à gụ́ụhị byi wẹ ịnyịnyị lẹlẹ. Jaabwọ ká iJemsi ya, ọngọ da ịwẹẹ “lala enyi ọlẹpwụ nya ihu ọtụka ọlẹ ká igbachịwụ ọtụka-ọtụka kaa kpọọ gu agbụ ịnyịnyịịnyị.” (Jem. 1:6) Ọngịnyị ọlẹ kọ la irya ọlịịwẹ á ka jẹ́-ẹ chị ọkẹkẹnị myị kpongkpong ka!

16. Ẹlịyẹ ahị tị́ ka họ kori kahị la ịwẹẹ ọdada?

¹⁶ Ang ọlẹ kahị ka jẹ́-ẹ họ: Họ ang ọlẹ kọ ka myị́ ịwẹẹ ọdada nyang; ka ju ọmyịmyị nyang ọngịrị. Họ ẹla ahyaahị. La ahyẹẹnụ nya ọlọmwụ Ịlayịja, angịnyị nya iJihova á myị cheje nya ẹla kpịrang ka. Ịlayịja byaa yẹkẹẹ: “Anụ tị́ ka chị ọkịlẹtụ agiye tata ka ba anyị? O-ri [iJihova] ko ri Ohe Oluhye nya ịlẹhị lẹ, anụ bọọ jẹ mẹ! Ọ́ tị ri ịBaalụ ko ri Ohe Oluhye lẹ, anụ bọọ jẹ mẹ-ẹ̀!” (1 Ịdị. 18:21) Ahị baba nyọka cheje nya ẹla kpịrang alẹ ịnyịnyị. Ahị baba nyọka mwahị nya ẹla ịlẹ kị ka ya ọ-jẹ́ myị̀myị̀ hahị nyori iJihova à ri Ohe lẹ, ịBayịbụụ ri Omyi Ẹla nyamwụ, bala o-ri Alibeenu nya iJihova à ri angịnyị nyamwụ lẹ. (1 Tẹs. 5:21) Ọ-họ ịnyị ka myị́ ịwẹẹ ọnyị myị́ ọnyị ọlẹ kahị la bala o-ju ọmyịmyị nyahị ọngịrị. Kori kahị baba nya ụbwọ ọdada u-uhye nya ang ịlẹ ko du kahị la ịwẹẹ ọdada, ahị ka tọ angịgbahị nya ọjịra-jịra wo myị́. Kori kahị ka jẹ́-ẹ kịnyaa la ọ-chị ọkẹkẹnị ẹ-ẹpwụ nya ịgba ọgbagba nya iJihova aalẹ, o ri opyii kahị ka cheje nya ẹla kpịrang!

17. Ịyẹ à tị́ ka họ kori ká ugbodu ojuju nyahị á gụ́ụhị myị́?

¹⁷ Ang ọlẹ ko ri akama: Ọkịlẹtụ o-kpenyi. Omyi Ẹla nya Ohe yẹkẹẹ: “Á kpụ ịbwọ ẹnụ nya akama aalẹ, ọngịrị nyang [ka] la pyịnyẹng.” (Etu 24:10)  Etu nya omyi ẹla nya iHiburu ọlẹ kị yẹda ka ri “kpụ ịbwọ” wẹ ka jẹ́-ẹ ri “ugbodu ojuju ọ-gụ ọngịnyị myị́.” Kori ká ugbodu ojuju nyang á gụng myị́, ọkẹkẹnị nyang ka gụng byi i-ijata.

18. Ịyẹ à tị́ ri etu nyọka bọhụ?

¹⁸ Ang ọlẹ kahị ka jẹ́-ẹ họ: Kpụnịrọ iJihova nyọka ya ugbodu ojuju hang ká ka jẹ́-ẹ bọhụ. Ahị baba nya ugbodu ojuju kori kahị ka bọhụ myị ẹ-ẹpwụ nya ịmayẹ. (Jem. 5:11) Omyi ẹla ọlẹ ká iJemsi kpa ya ẹla kị yẹda kaka ri “ugbodu ojuju” wẹ kpahị irya ka ẹga nya ọngịnyị ọlẹ kọ godayị giri-giri ẹ-ẹga ọlẹ ko ji. Ahị ka kụ irya nya iSoja ọlẹ kọ godayị la ugbodu ojuju ẹ-ẹga nyamwụ, pwa la ọ-ka rụnyẹ rụ nanana nyori aluji wẹẹ jahị dọọ la ọngịrị-ọngịrị.

19. Ẹlịyẹ ahị tị́ ka jẹ́ bwu ọgụ-ẹpẹtẹ ọlẹ ká ọlẹrụ ịPọlụ ya deeji?

¹⁹ Ọlẹrụ ịPọlụ ya ọgụ-ẹpẹtẹ ọnyịịla-ọnyịịla deeji u-uhye nya ugbodu ojuju bala ọhụ ọbaba. Ụka ọhẹ, ọ kaa lịlọmwụ dẹwụ-dẹwụ. Ma, ọ tị jẹ́ bọhụ myị́ chajị ọ kpụnịrọ iJihova nyọka ya ọngịrị ọlẹ kọ baba họọ. (2 Kọr. 12:8-10; Filip. 4:13) Ahị ka jẹ́-ẹ la ọngịrị bala ugbodu ojuju ọlịnyị kori kahị kpịlọhị keji, jẹ́ nyori ahị baba nya ụbwọ ọdada nya iJihova.​—Jem. 4:10.

20-21. Ẹlịyẹ ahị tị́ ka jẹ́ myị̀myị̀?

²⁰ Ahị ka jẹ́ myị̀myị̀ nyori akama ịlẹ kahị wẹẹ yẹ á ri ịmayẹ bwu ẹga nya Ohe Oluhye ka. IJemsi ya ahị ọdahile hahị yẹkẹẹ: “Ụka ká ọmayẹ á wẹ chị ọngịnyị . . . ọgụ aalẹ, ọngọọwa á yẹkẹẹ, Ohe Oluhye nyaa wẹẹ ma ọwa yẹ lẹ kpong-kpong ka. Chajị ọngọngọhẹ á ka jẹ́-ẹ ma Ohe Oluhye yẹ, juwa tọ́ọ ọnụ nya ang onyobyi ọhọhọ kpá myị́ ẹnẹnẹhẹ kaka. Lee, Ohe Oluhye ayịdang ọ-ka jẹ́-ẹ kpa ịngịngịhyẹ onyobyi ọhọhọ kaka ma ọngọngọhẹ yẹ kpá ẹnẹnẹhẹ kaka ịnyịnyị.” (Jem. 1:13) Ụka kahị jẹ́ nyori ẹla ọwẹ ri ịnyịlẹhị, ahị kaa tụ́ ju Adahị olepwoohe ọlẹ kọ la ọháha chwẹẹ gụ olene.​—Jem. 4:8.

²¹ IJihova “á kaa yẹda kpong-kpong ka.” (Jem. 1:17) Ọ da angịnyị nya ịKịrayịsị ịla oyi ọhọhẹ ụbwọ ẹ-ẹpwụ nya ịmayẹ nyaa, ọ tị ka da ọng myị́ ọng nyahị ụbwọ alẹ ịnyịnyị. Bịlẹ iJihova nyịlẹhị-ịlẹhị nyọka dang ụbwọ la ẹla ọjẹ́jẹ, ọmyịmyị, bala ugbodu ojuju. Ọ ka wẹ abwọ ọrịrị nyang. Ọọwa lẹ, a ka jẹ́ myị̀myị̀ nyori ọ ka dang ụbwọ nyọka kịnyaa la ọ-chị ọkẹkẹnị jaabwọ ka wẹẹ bọhụ ẹ-ẹpwụ nya ịmayẹ lẹlẹ!