1-2. Jaabwọ ká ụpwụ nya 1 iTimoti 6:20 mẹjẹ, ịyẹ ị tị ya ju iTimoti ụ-ụbwọ?

ỤKA lụmẹ-lụmẹ ahị kaa ya ang ịlẹ kị juhi apyobwuna ha angịkịla kpa. Ọ-chụ pwokwita, ahị kaa ya okpoko nyahị juwa ị-ịBankị. Kori kahị họ ịnyị, ahị kaa yẹhị rịrị nyori ị ka kpẹhị rịrị okpoko nyahị chaji kọ ka gwaa byi lee ọngọngọhẹ ọ-ka hwoo yoyi ka. Lẹ, ahị jẹ́ etu nyọka ya ang o-ju apyobwuna ha ọngịnyị kpa.

² Wa 1 iTimoti 6:20. Ọlẹrụ ịPọlụ kpa iTimoti ịtịya nyori Ohe nyị ya ịngịhyẹ o-ju apyobwuna jwoo ụ-ụbwọ​—ọ-jẹ́ ẹla u-uhye nya irya ọlẹ ká iJihova la ẹ-ẹga nya angịnyị ehe kpẹẹkpẹẹ. IJihova myịmyị ya iwe ha iTimoti nyọka kpa ẹrụ ọnyịịla pyẹ bala ọ-ka họ “ụkụrwọ nya ọngọ ya ẹrụ ọnyịịla nya Ohe Oluhye tụ́ ẹga myị́ ẹga da.” (2 Tim. 4:2, 5) ỊPọlụ byi iTimoti nyị wu ang ọlẹ kị́ ya jwoo ụ-ụbwọ kpa gogo. Lala iTimoti, iJihova ya ang i-ju apyobwuna juhi ụ-ụbwọ. Ịyẹ à tị́ ri ang ịịwa? Ịyẹ tị́ du kahị baba nyọka kpahị ju ang i-ju apyobwuna ịlẹ ká iJihova ya juhi ụ-ụbwọ?

3-4. Ịyẹ tị́ du ká ẹlịlẹhị ịlẹpwụ nya ịBayịbụụ ri ang ịnyịịla-ịnyịịla?

³ IJihova dahị ụbwọ nyọka jẹ́ ẹlịlẹhị ịnyịịla-ịnyịịla ịlẹpwụ nya ịBayịbụụ weji-weji. Ẹlịlẹhị ịwẹ ri ang ịnyịịla-ịnyịịla chajị ị mẹjẹ́ẹhị jaabwọ kahị bwu ri igu ta iJihova bala o-ya jehi ang ọlẹ kọ ka kpa ọkẹkẹnị ọlam wahị ẹ-ẹpwụ nya ọhịhị. Ụka kahị ye ẹlịlẹhị ịwẹ myị bala ọ-hịhị baa jẹ, ahị kaa lịlọhị bwu ọnyọhị oriri nya ịmẹjẹ nya ịnịịkịla bala abwẹla ịchịrị.​—1 Kọr. 6:9-11.

⁴ Ang odudu ọkịla ọlẹ ká ẹlịlẹhị ịlẹpwụ nya omyi ẹla nya Ohe Oluhye ri ang ịnyịịla ri iJihova kaa chaa ehe mẹjẹ angị  kpa ịlaa keji ịlẹ kị “chịla-chịla nyọka la ọhịhị ọmyịmyị-ka.” (Ụkụr. 13:48, NW.) Angị kpịlaa keji kaa myị nyori ọnchẹ ọ-chịla o-hu ọkịlẹtụ ha bala ọngọ jẹ́ ẹla à kaa mẹ ang jẹ́ẹhị wuu bwu ẹpwụ nya ịBayịbụụ alẹ lẹ. (Mat. 11:25; 24:45) Áhị ka jẹ́-ẹ jẹ́ ẹlịlẹhị ịwe ụbwọọhị ka, ịngịngịhyẹ-ẹ́ tị ju apyobwuna lala ọ-ka wo etu nyaa kaka.​—Etu 3:13, 15.

5. Ang ọkịla oyina iJihova à tị́ ya juhi ụ-ụbwọ?

⁵ IJihova myịmyị ya iwe da hahị nyọka mẹ ẹlịlẹhị u-uhye nyamwụ bala irya nyamwụ jẹ angịkịla (Mat. 24:14) Ẹrụ ọnyịịla ọlẹ kahị kaa kpa pyẹ ju apyobwuna yẹẹyẹẹ chajị ọ kaa da angịnyị ụbwọ nyọka ri ụpa nya ugbiyegu nya iJihova bala ọ-ya iwe haa nyọka la ọhịhị ọmyịmyị-ka. (1 Tim. 4:16) Jaabwọ myị́ abwọ kahị jụ họ ẹ-ẹpwụ nya ẹrụ ọnyịịla ọ-kpa pyẹ, ahị wẹẹ dụbwọ ẹ-ẹpwụ nya ụkụrwọ ọlẹ kọ baba gụ wuu nyọka họ lẹẹlẹẹ. (1 Tim. 2:3, 4) O ri ihi ọtụka nyọka ri angị họ ụkụrwọ bala Ohe Oluhye!​—1 Kọr. 3:9.

6. Ịyẹ à tị́ họ tọ angịhyẹ ịlẹ kị gbeji giri-giri ka?

⁶ Ụka nya iTimoti, iwe ọlẹ ká angịnyị nya ịKịrayịsị ịhyẹ la nyọka họ ụkụrwọ bala Ohe Oluhye á myaa lẹhị ka. Chajị nyọlẹ ká odehe há ịDẹmasị lụmẹ, ọ tụụbwọ hi iwe ọlẹ kọ la nyọka họ ụkụrwọ bala ịPọlụ ha iJihova (2 Tim. 4:10) Ọ lala o-ri iFigelosi bala ịHamọgẹnẹsị ba la ọ-kpa ẹrụ ọnyịịla pyẹ, chajị i juhi nyọka la ọtụpyịpyị ụma ọlẹ ká ịPọlụ la. (2 Tim. 1:15) ỊHayịmẹnịyọsị, Alẹkịsanda bala iFiletọsị ịwa ji ẹkpẹ da ẹlịlẹhị lẹ, ị hwabwọ la ọ-gbịgba ha iJihova ẹẹ. (1 Tim. 1:19, 20; 2 Tim. 2:16-18) IJihova há angịwẹ wuu ene-ene ịnọ, ma ị yẹ ang ịlẹ ká iJihova ya jwaa ụ-ụbwọ lala ang i-ju apyobwuna kaka.

7. Ijẹẹhị iyina Olegu Onyobyị à tị́ kaa kpa mahị yẹ?

⁷ Ányị Olegu Onyobyi à tị́ kaa maga nyọka họ chajị kahị kà jị ẹkpẹ da ang i-ju apyobwuna ịlẹ ká iJihova ya juhi ụ-ụbwọ? Ijẹẹhị ịhyẹ ịlẹ kọ kaa kpa lẹẹ: Ọ kaa kpa ụya ọyaya bala ẹga ọlẹ kahị kaa yẹ ifim bala o-wo oja bwu, họ chajị kahị ka kụ irya bala ọ-họ ẹla ụ-ụgbẹyị ọlẹ kahị ka tụụbwọ hi ẹlịlẹhị dụmwọ-dụmwọ. Ọ kaa maga nyọka chị uhi juhi bwula ẹla ọlẹ ká angịnyị kaa ya bala ọtụpyịpyị, chajị kahị ka hwabwọ la ọ-kpa ẹrụ ọnyịịla pyẹ. Ọ kaa maga nyọka pịrịịhị la “abala nya ang ọjẹ́jẹ” nya angịlẹ kị ji ẹkpẹ da ogu chajị kahị ka tụụbwọ hi ẹlịlẹhị.​—1 Tim. 6:20, 21.

8. Ẹlịyẹ a tị́ jẹ́ bwu ẹpwụ nya ẹla ọlẹ kọ họ ta ọọnahị ịDanẹlụ?

⁸ Kori kahị dụmwọ-dụmwọ ka, ahị ka ja tụụbwọ hi ẹlịlẹhị pyịnyẹng-pyịnyẹng. Kụ irya  nya ẹla ọlẹ kọ họ ta ọọnahị ịDanẹlụ * wẹẹ. Ayịlọ ọlẹ kị kaa kpa ịKọmpụta bala ifon kọ kaa kpọọ ịpyọ yẹẹyẹẹ. Ọ yẹkẹẹ: “M̀ dọmwụ nyọka kọ ayịlọ ịlịnyị ụka kam lala ẹka iwo. Ụka nya ọgbanyẹ, ḿ kaa kọ ayịlọ ịlẹ kị tịpyọ abwọhẹ ka. Dụmwọ-dụmwọ lẹ, m dọmwụ nyọka da ịlẹ kị ju ọkwọ ogugu bala ang nya alegu inyibyi ẹ-ẹpwụ lẹlẹ. Ọ ka nọ chẹẹ, ọ kaa bịrị awa lala iwo kụrụ ịrụ ahyẹẹnụ ọnyị myị́ ọnyị ẹ-ẹpwụ nya ayịlọ ọkọkọ ọọwa. ỊDanẹlụ yẹkẹẹ: “M̀ jẹ́ nyori ụma nya ayịlọ ịlẹ kam kaa kọ bala ụka ọlẹ kam kaa bịrị jwaa wẹẹ gbilem rụ hi iJihova. M̀ myị i-irya nya ịlọm nyori ḿ baba nyọka ba ẹla ọlẹ ká ịBayịbụụ ya jẹ ka.” Kori kahị dụmwọ-dụmwọ ka, ụya ọyaya ka jẹ́-ẹ hịhị ụbwọ hi ẹlịlẹhị i-ijata myị́. Kori kọ lịnyị, ang i-ju apyobwuna ịlẹ ká iJihova ya hahị ka gụhị byi myị́.

9. Owo ịPọlụ à tị́ chụ iTimoti ka pwoku ụ-ụpwụ nya 1 iTimoti 1:18, 19?

⁹ Wa 1 iTimoti 1:18, 19. ỊPọlụ chụ iTimoti ka pwoku isoja, ọ tị byoo nyị ‘kịnyaa la ọ-ma uya nya abwẹla ọnyịịla.’ Uya ọọwa á ri uya ọlahịchịng ka, ị-nya olegu ịnyị. Ụgbẹyị oyina Angịnyị nya ịKịrayịsị à tị́ lala isoja ịla ọgbẹwụ? Abwẹla iyina ahị isoja nya ịKịrayịsị à tị́ baba nyọka la? Ahị kụ ẹhị yẹ ang ịrụ ịlẹ kahị ka jẹ́ bwu ẹla ọ-chụ pwokwita nya ịPọlụ wẹẹ. Ang ịwẹ ka dahị ụbwọ nyọka yụbwọ chị ẹlịlẹhị gogo.

10. Ịyẹ à tị́ ri ọngịnyị nya Ohe Oluhye oriri? Ịyẹ tị́ du kahị baba nyamwụ?

¹⁰ La abwẹla nya ọngịnyị nya Ohe Oluhye oriri. Isoja ọnyịịla kaa ju ọ-dahịhile. Ọ kaa ma uya nyịlẹhị-ịlẹhị nyọka chewu ke ọngịnyị lee ang myị́ ang ọlẹ kọ jwoo apyobwuna. ỊPọlụ ju iTimoti ọhụ nyọka la abwẹla nya ọngịnyị nya Ohe Oluhye oriri. Ọọwa ri ọ-ka yụbwọ chị Ohe Oluhye giri-giri. (1 Tim. 4:7) Jaabwọ kahị wẹẹ la ọháha ẹ-ẹga nya Ohe Oluhye gụ ọwọwa, ịnyịnyị ahị kaa tịtọ nyọka yụbwọ chị ẹlịlẹhị gogo gụ ọwọwa lẹ.​—1 Tim. 4:8-10; 6:6.

11. Ịyẹ tị́ du kahị baba nyịlọhị o-wu kpa?

¹¹ Mẹjẹ ịlọng nyọka họ ang ọnyịịla. Isoja ka maga yẹẹyẹẹ nyọka nwụlanọ gbe ẹwụ ọdada ụka myị́ ụka pyii. ITimoti jẹ́ ma uya tụ́ Olegu Onyobyi pyịpyị chajị ọ ba ẹla ọmẹjẹ nya ịPọlụ jẹ bala ọ-maga yẹẹyẹẹ nyọka ma uya ta irya ịtịpyọ, la abwẹla ịnyịịla bala ọ-bịrị ụka bala aanamwụ alẹng bala anyang. (2 Tim. 2:22) Ọ baba nyịlọmwụ o-wu kpa nyọka jẹ́-ẹ họ ịnyị. Ahị baba nya ịlọhị o-wukpa nyọka jẹ́-ẹ kụrụ uya ọlẹ kahị wẹẹ ma ta imyi nya ugbinyịrọ. (Rom. 7:21-25) Datị hi ọọwa, ahị baba nya ịlọhị o-wu kpa nyọka kịnyaa la ọ-pwọ abwẹla nyahị onyogo deeji bala o-hu onyeewe kụrụ. (Efe. 4:22, 24) Ụka ká ụkụrwọ nya ahyẹẹnụ á yẹ myịhị lụmẹ, ahị kaa kpa ocheri ka ọjịra-jịra.​—Hib. 10:24, 25.

12. Agbẹyị iyina ahị tị́ ka jẹ́-ẹ bwu kpa ịBayịbụụ họ ụkụrwọ gụ olene?

¹² Isoja baba nyọka ma họ jaabwọ ọ́ ka bwu kpa ang-abwọ nyamwụ dẹwụ. Kori ọ́ tịtọ nyọka jẹ́-ẹ kpa ang-abwọ nyamwụ dẹwụ aalẹ, ọ ka ma họ yẹẹyẹẹ. Ahị ịnyịnyị baba nyọka jẹ́-ẹ kpa omyi ẹla nya Ohe Oluhye họ ụkụrwọ yẹẹyẹẹ. (2 Tim. 2:15) Ahị ka jẹ́-ẹ jẹ́ agbẹyị ịhyẹ ịlẹ kahị ka bwu họ ịnyị bwu ọjịra-jịra nyahị. Ma, kori kahị tịtọ nyọka da angịkịla ụbwọ nyọka jẹ́ nyori ẹlịlẹhị ịlẹpwụ nya ịBayịbụụ ju apyobwuna aalẹ, ahị baba nya ịBayịbụụ ọjẹ́jẹ nyịlọhị ụka myị́ ụka. Ahị baba nyọka kpa omyi ẹla nya Ohe Oluhye ju ọmyịmyị nyahị ọngịrị. Ọọwa ri, áhị ka wa ịBayịbụụ ịịwẹ kem ka. Ahị baba nyọka  kụ irya kpori-kpori u-uhye nya ẹla ọlẹ kahị wa, bala ọ-wụla ang-abwọ ị-da ịBayịbụụ wụlẹ nyahị yẹ chajị kahị ka jẹ́ etu nya ẹla ọlẹpwụ nya ịBayịbụụ yẹẹyẹẹ bala ọ-kpa họ ụkụrwọ. (1 Tim. 4:13-15) Ọọwa lẹ, ahị ka jẹ́-ẹ kpa omyi ẹla nya Ohe Oluhye mẹ ang jẹ́ angịkịla ẹẹ. Ọọwa á tị ba ị-ịBayịbụụ ọwawa jwaa kem ka ịnyịnyị. Ahị baba nyọka da angịlẹ kị wẹẹ ke ụrụ wo lahị ụbwọ nyọka jẹ́ etu nya ẹla ọọwa, bala abwọ kị ka jẹ́-ẹ kpa họ ụkụrwọ. Kori kahị kaa jẹ́ ịBayịbụụ ụka myị́ ụka, ahị ka jẹ́-ẹ mẹ ịBayịbụụ jẹ gụ olene.​—2 Tim. 3:16, 17.

13. Jaabwọ ká ụpwụ nya Ala iHiburu 5:14 ya, ịyẹ tị́ du kahị baba nyọka kụ irya ka ịlahị?

¹³ Kụ irya ka ịlahị. Ọngọ dẹwụ kaa kụ irya nya ang ọ-la uhi-uhi ọlẹ kọ ka họ myị́ bala ọ-yẹ abwọ hyoo. Ahị ịnyịnyị baba nyọka jẹ́ iwe-ahụrụ ịlẹ kị ka họhị ang myị́ bala ọ-chị eji baa. (Etu 22:3; wa Ala iHiburu 5:14.) Ọ-chụ pwokwita, ahị baba nyọka kpa ẹla ọjẹ́jẹ chụ ayịlọ bala ụya ọyaya nyahị. Ifim ụma ịdatị-datị kaa mẹ ụya ọhọhọ jẹ. Abwẹla ịlịnyị kaa wụ Ohe Oluhye ẹjẹ, ọ tị kaa bịrị igu oriri nyahị balọọ. Chajị nyọọwa lẹ, ahị cheji ba hi ụya ọyaya ọlẹ kọ ka họ ká ọháha ọlẹ kahị la ẹ-ẹga nya Ohe Oluhye ka nyiri dụmwọ-dụmwọ.​—Efe. 5:5, 6.

14. Ányị irya ọ-kụ ju ẹla à tị́ da ịDanẹlụ ụbwọ?

¹⁴ ỊDanẹlụ ọlẹ kahị ya ẹla rụ lalẹ ene wẹ ka yẹ nyori ọ-kọ ayịlọ ụma ịlẹ kị ju ọkwọ ogugu bala ang nya alegu inyibyi ẹ-ẹpwụ tịpyọ. Ọ ka Watchtower Library nyọka ye ang ịlẹ kị ka dọọ ụbwọ ẹ-ẹpwụ nya ẹla ọwẹ. Ányị ọọwa à tị́ gwoo? O ba la ọ-kọ ayịlọ ịlẹ kị tịpyọ. O ba la ọ-kọ ayịlọ ịịwa ta angịkịla ẹ-ẹpwụ nya intanẹtị. ỊDanẹlụ yẹkẹẹ: “Ọkọkọ nyọka kọ ayịlọ, m̀ dọmwụ nyọka kpa ụka nyam họ ang ịkịla odehe bala ọ-yẹjula aligu nyam ịlọjịra-jịra.” Ọlẹẹlẹẹ, ịDanẹlụ ri ọngọ ye ịlahị nya ụgbẹyị bala ọngọgbahị nya ọjịra-jịra lẹ.

15. Ịyẹ tị́ du ká oja nya ịnịịkịla tịpyọ lụmẹ?

¹⁵ Lala iTimoti, ahị baba nyọka jé ang ọlẹ ká ọnọọkịla nya angị ji ẹkpẹ da ogu ka họ ẹ-ẹga nyahị myị́. (1 Tim. 4:1, 7; 2 Tim. 2:16) Ọ-chụ pwokwita, ị ka maga nyọka kpa ịnịịkịla pyẹ u-uhye nya aanahị myị́ lee ọ-họ kahị ka dahịhile ogu nya iJihova ka. Ịnịịkịla ịlịnyị ka du ká ọmyịmyị nyahị ka la dẹwụ-dẹwụ myị́. Ahị ka hwabwọ la ọ-myị ju ịnịkịla ịlịnyị. Ịyẹ tị́ du? Chajị angị kpa oja ịlịịwẹ pyẹ ri ‘angịlẹ ká irya onyobyi omeme kem à  juwa ẹ-ẹpwụ ọkịlẹtụ nyaa ká ẹla nya ịlẹhị nya Ohe Oluhye á tị hi juwa ẹ-ẹpwụ ọkịlẹtụ nyaa kpong-kpong ka.’ Irya nyaa ri ọ-ka dọmwụ nya “arụ ọrụrụ bala ịwẹẹ ọdada.” (1 Tim. 6:4, 5) Ị tịtọ kahị ka myị ju ịnịịkịla nyaa, kahị ka ba la ọ-dahịhile aanahị.

16. Ang ị-chị ọngịnyị ochuchuu iyina ahị tị́ ka cheji ba hi?

¹⁶ Yahị ju ụkụrwọ. ITimoti kọ́ ri ọngọ dẹwụ ọ-chịla o-hu ọkịlẹtụ ha nya ịKịrayịsị, kaa yahị ju ụkụrwọ nya Ohe Oluhye ọhọhọ ọkọkọ ká ụkụrwọ ọkịla lee okpoko ka chọọ ochuchuu. (2 Tim. 2:3, 4) Lala iTimoti, áhị ka ya ẹga da irya nyọka la ang ụdụ gụ ọọwa ka chịhị ochucuu ka. Ọháha ọ-lala u-uhye nya ang-ụdụ ka du ká ọháha nyahị ẹ-ẹga nya iJihova ka gụhị byi, ká omyi ẹla nya Ohe Oluhye ka myịhị lẹhị lee ahị ọ-tịtọ nyọka mọọ jẹ angịkịla kaka. (Mat. 13:22) Ahị baba nyọka hu ọhịhị nyahị hukee bala o-juwa kpa ụka bala ọngịrị nyahị “tịtọ . . . nya ịpyị-adịrahụ nya Ohe Oluhye.”​—Mat. 6:22-25, 33.

17-18. Ịyẹ ahị tị́ ka jẹ́-ẹ họ nyọka chị ewu ke igu oriri nyahị bala iJihova?

¹⁷ Nwụlanọ nyọka họ ẹla i-ijata. Isoja baba nyọka nwụla ang ọlẹ kọ ka họ neeji nyọka chị ewu ke ịlọmwụ. Nyọka chị ewu ke ang ọlẹ ká iJihova ya juhi ụ-ụbwọ, ahị baba nyọka họ ẹla i-ijata ụka kahị yẹ ang ọlẹ kọ ka bịrị igu nyahị balọọ. Ịyẹ tị́ ka dahị ụbwọ nyọka họ ịnyị? Ahị baba nyọka nwụlanọ nya ẹla ọlẹ kahị ka họ ụka ọlịnyị neeji.

¹⁸ Ọ-chụ pwokwita, kori kị ja họ ọhụhụ ọhẹ u-ube, ị kaa mẹ ụgbẹyị ọlẹ ká angịnyị ka bwu kpehe jáa ene ká ọhụhụ ka dọmwụ. Ịyẹ à tị́ du? Chajị kị ka jẹ́-ẹ kpehe ahyaahị kori ká ẹla ọkpịraka ọhẹ á họ. Ụ-ụgbẹyị ọwọwa, ahị ka jẹ́-ẹ nwụlanọ nya ang ọlẹ kahị ka họ kori kahị gba chị ụrụrụ nya ụya ọhọhọ, ọkwọ ọhọhọ, bala ang nya angị ji ẹkpẹ da ogu ụ-ụwa intanẹtị, lee ụka kahị juwa yẹ ifim. Kori kahị nwụlanọ gbe ang ọlẹ kọ ka họ myị́, ahị ka jẹ́-ẹ họ ẹla ahyaahị nyọka chị ewu ke igu nyahị bala iJihova, bala ọ-ka la cheri-cheri ị-ịlahị nyamwụ.​—Eje. 101:3; 1 Tim. 4:12.

19. Ahị ọwawa iyina ahị tị́ ka ye kori kahị kpahị ju ang i-ju apyobwuna ịlẹ ká iJihova ya juhi ụ-ụbwọ?

¹⁹ O ri opyii kahị ka wu ang i-ju apyobwuna ịlẹ ká iJihova ya hahị kpa gogo lẹ. Ang ịịwa ri, ẹlịlẹhị ịnyịịla ịlẹpwụ nya ịBayịbụụ bala iwe ọlẹ kahị la nyọka maa jẹ angịkịla. Kori kahị họ ịnyị, ahị ka la irya oleje ocheri-cheri, ọhịhị ọlẹ kọ la etu bala ọ-chị ọkẹkẹnị nya ọ-da angịkịla ụbwọ nyọka wẹ ka jẹ́ iJihova. Bwula ụbwọ ọdada nyamwụ, ahị ka jẹ́-ẹ wu ang ọlẹ kọ ya juhi ụ-ụbwọ kpa gogo.​—1 Tim. 6:12, 19.