ANG ỌJẸ́JẸ 41
Jaabwọ Kahị ka Bwu Mẹ ỊBayịbụụ Jẹ Ọngịnyị Kọ ka Nwà ka Hu Enyi Ohe—Ụpa Ọhọhẹ
“Anụ kpangga à ri ileta ọlẹ ká ịKịrayịsị da ya duhi ẹrụ lẹlẹ.”—2 KỌR. 3:3.
EJE 78 “Teaching the Word of God”
ẸHỊ NYA ẸLA *
Ịyẹ à tị́ ka kpụ alọjịra-jịra lẹpwụ-lẹpwụ ịpyọ gụ ọ-ka yẹ ọngịnyị ọlẹ kị mẹ ịBayịbuụ jẹ nwà ka hu enyi Ohe? (Yẹ ọgba 1)
1. Ányị 2 Ala ịKọrịntị 3:1-3 à tị́ dahị ụbwọ nyọka jẹ́ nyori o ri ahị ọtụka-ọtụka bwu ẹga nya iJihova nyọka jẹ́ ịBayịbụụ ta ọngịnyị kọ ka hu enyi Ohe? (Yẹ ifoto ọla ẹbẹ nya ọgbanyẹ.)
ÁNYỊ ọ tị́ kaa lang ụka ka yẹ ọngọlẹ ká ọngọhẹ bwu ọjịra-jịra nyang kaa jẹ́ ang ta kọ hu enyi Ohe? Ịnyịlẹhị a kaa chị ọkẹkẹnị yẹẹyẹẹ! (Mat. 28:19) Kori kọ tị ring ahụ ka jẹ́ ang ta ọngọọwa, a ka chị ọkẹkẹnị nyịlẹhị-ịlẹhị ụka kọ hu enyi Ohe! (1 Tẹs. 2:19, 20) Angị inyeewe ịlẹ kị hu enyi Ohe lala “ileta ọ-da ịlọhị wụlẹ” nya ọjịra-jịra, ọ́ ba ẹ-ẹga nya ọngọ jẹ́ ang balọọ kem ka.—Wa 2 Ala ịKọrịntị 3:1-3.
2. (a) Ịtọ ẹla ọkpọnchị oyina ahị tị́ baba nyọka kụ irya ju? Ịyẹ tị́ du? (b) Ịyẹ à tị́ ri ịBayịbụụ ọjẹ́jẹ? (Yẹ ẹla ọlekpeleji.)
2 Ọ kpịpyọ lụmẹ nyọka jẹ́ nyori ẹ-ẹpwụ nya ẹka ine kẹkpẹ, ahị kaa jẹ́ ịBayịbụụ * ta angịnyị lala angị uku iwo (10,000,000) ọya ọnyị myị́ ọnyị odehe wuu. Ẹ-ẹpwụ nya ọnyọnyọọnyị nya ẹka ine ịwẹ, angịnyị lala ụnọ ohu imiiye da ụnọ iwo ineku (280,000) kaa hu enyi Ohe. Ányị ahị tị́ ka bwu da uku-uku nya angịkịla ịlẹ kị wẹẹ jẹ́ ịBayịbụụ ụbwọ nyọka hu enyi Ohe? Jaabwọ ká iJihova wẹẹ ju ugbodu, ya ụka bala iwe ha angịnyị nyọka wẹ ka ri angịjụgbẹyị nya ịKịrayịsị wẹẹ, ahị tịtọ kahị ka họ jaabwọ kahị ka họ ba myị́ nyọka daa ụbwọ kị ka nwà ka hu enyi Ohe i-ijata. Ụka ja rụnyẹ la agaga lẹ!—1 Kọr. 7:29; 1 Pit. 4:7.
3. Ẹlịyẹ ahị tị́ wẹẹ ka kụ́ ẹhị yẹ ẹ-ẹpwụ nya ang ọjẹ́jẹ ọlẹ u-uhye nya ịBayịbụụ ọjẹ́jẹ?
3 Chajị nyọlẹ kọ baba yẹẹyẹẹ nyọka họ ká angịkịla ka ri angịjụgbẹyị lẹẹlẹẹ, Angị Kpẹhị Rịrị Ogu tọ ala egbeju-ẹpwa wo u-uhye nya ang ọlẹ kị ka họ chajị ká angịnyị lụmẹ-lụmẹ ka jẹ́-ẹ nwà ka hu enyi Ohe. Ẹ-ẹpwụ nya ang ọjẹ́jẹ ọlẹ bala ọkịla ọbọọba, ahị ka yẹ ang ọlẹ kahị ka jẹ́ bwu ẹga nya angị ye ịlahị nya ụgbẹyị, angị kpa ẹrụ ọnyịịla pyẹ ẹ-ẹpwụma ọkịla, bala angị kpẹhị rịrị iSekut ịlẹ kị jẹ́ ijẹẹhị nya ụkụrwọ ọwẹ. * (Etu 11:14; 15:22) I ya ang ọlẹ ká angị mẹ ịBayịbụụ jẹ bala angị wẹẹ jẹ́jẹ ka họ chajị ká ịBayịbụụ ọjẹ́jẹ nyaa ka há yẹẹyẹẹ. Ẹ-ẹpwụ nya ang ọjẹ́jẹ ọlẹ, ahị ka kụ́ ẹhị yẹ ang ịrụ ịlẹ ká ọng myị́ ọng ọlẹ kọ wẹẹ jẹ́ ịBayịbụụ baba nyọka họ chajị kọ ka jẹ́-ẹ nwà ka hu enyi Ohe.
JẸ́ ANG EPWIHI ỌNYỊ MYỊ́ ỌNYỊ
Ta ọngọlẹ á kaa mẹ ịBayịbụụ jẹ wo kori kanụ ka jẹ́-ẹ hụhụ lawụlẹ jẹ́ ang (Yẹ ọgba 4-6)
4. Ẹlịyẹ ahị tị́ ka jẹ́ u-uhye nya ịBayịbụụ ọ-jẹ́ ta ọngịnyị bwula oja okpii-kpii?
4 Aanahị alẹng bala anyang lụmẹ-lụmẹ á kaa hụhụ abwọhẹ ene kị kaa jẹ́ ịBayịbụụ bala ọngịnyị ka. Ịlẹhị lẹ, ọwẹ ri ụgbẹyị ọhẹ ọlẹ kahị ka jẹ́-ẹ họ ká ọngịnyị ka nwụlanọ nyọka jẹ́ ịBayịbụụ, ma ẹla oyaya ọlịnyị á tị kaa la gbọng ka. Ị́ tị kaa họọ epwihi ọnyị myị́ ọnyị ka ịnyịnyị. Chajị nyọka họ ká ịBayịbụụ ọjẹ́jẹ ka kpụ ọngịnyị ịpyọ gụ ọwọwa, aanahị ịhyẹ kaa ye ịnọmba nya ọngọ lịnyị lẹ ị kaa wụrọọ bwu ifon lee ọ-da ụpwụ du tọọ ọ-ọhụ bala o-joo oja bwu ẹpwụ nya ịBayịbụụ ụka ọhẹ bala ụka ọkịla lẹlẹ. Oja o-ja bwu ịBayịbụụ ọlịnyị ka kịnyaa ẹ-ẹpwụ nya ọya ịmanyị-manyị la ọ-yẹ ka ri ịBayịbụụ ọjẹ́jẹ ọlam-ọlam ka myị́. Ọngịnyị ọlịnyị ka jẹ́-ẹ nwà ka hu ịlọmwụ ju Ohe Oluhye ụ-ụbwọ bala ọ-ka hu enyi Ohe kori kọ ba o-oja okpii-kpii ọlịịwẹ kem? Ọlịnyị ka lujwo.
5. Ẹlịyẹ iJisọsị à tị́ ya i-iLuku 14:27-33, ọlẹ kahị ka jẹ́-ẹ kpa da angịlẹ kahị wẹẹ jẹ́ ịBayịbụụ ta ụbwọ?
5 Ụka ọhẹ, iJisọsị joja ọ-chụ pwokwita u-uhye nya ang ọlẹ ká ọngịnyị ka họ nyọka jẹ́-ẹ ri ọngọjụgbẹyị nyamwụ. O ya ẹla u-uhye nya ọngọhẹ ọlẹ kọ tịtọ nyọka nwụ ube oluhye bala adịrahụ ọlẹ kọ wẹẹ tịtọ nyọka ka ọlẹwụ. IJisọsị ya nyori ọngọ nwụ́ ube ọọwa nyị ka “hụhụ kụ okpoko nyamwụ achụ” nyọka jẹ́ kori kọ ka jụ ube ọọwa nwụ́ myị́ bala o-ri adịrahụ ọọwa nyị ka hụhụ “me irya yẹẹyẹẹ” nyọka jẹ́ kori ká alẹwụ nyamwụ-ụ́ ka jụ ẹla ọlẹ kị la i-irya wẹ họ myị́. (Wa iLuku 14:27-33.) Ịnyịnyị, iJisọsị jẹ́ nyori ọng myị́ ọng ọlẹ kọ tịtọ nyọka ri ọngọjụgbẹyị nyamwụ baba nyọka jẹ́ ụkụrwọ ọlẹ kọ ji ẹpwụ nyọka bọọ jẹ kpẹẹkpẹẹ. Chajị nyọọwa, ahị baba nyọka ju angịlẹ kị wẹẹ ka ri angịjụgbẹyị ọhụ nyọka jẹ́ ang epwihi ọnyị myị́ ọnyị. Ányị ahị tị́ ka bwu họ ịnyị?
6. Ẹlịyẹ ahị tị́ ka họ myị́ nyọka jẹ́-ẹ mẹ ịBayịbụụ jẹ ọngịnyị kịlahị-ịlahị?
6 Dọmwụ bwula ọ-kpa ẹla oyaya nyanụ gbọng gụ olene. Ọhẹka, à ka jẹ́-ẹ nwụlanọ nya ẹhị nya ẹla lala imiiye kpa kaka jwoo ụga myị́. Ụka ká ọ-hụ tata nyang á ja kpọọ ịpyọ lẹ, a ka jẹ́-ẹ tọọ wo kori ká ẹgẹhẹ-ẹ́ ji kanụ ka jẹ́-ẹ hụhụ jẹ́ ang lawụlẹ. Ẹla ọlẹ kọ wẹ, ka họ a ka jẹ́ jaabwọ ká ịBayịbụụ ọjẹ́jẹ ju apyobwuna họọ kaka ba. Nyọka họ kọ ka jẹ́-ẹ jẹ́ ang hya-hya, ọ nọ chẹẹ a dọmwụ ka tọọ wo myị́ kori kọ họ́ọ nyọka jẹ́ ang ụka imiiye ẹ-ẹpwụ nya epwihi. Ma, ọ́ tị́ ba ọ-ka jẹ́ ang ụka okpokpo lee ụka imiiye ẹ-ẹpwụ nya epwihi kem ka.
NWỤLANỌ GBE ỊBAYỊBỤỤ ỌMẸJẸ ỌNYỊ MYỊ́ ỌNYỊ
Nwụlanọ yẹẹyẹẹ gbe ịBayịbụụ ọmẹjẹ, ka mẹjẹ ọngọlẹ á wẹẹ mẹ ang jẹ jaabwọ kọ ka bwu nwụlanọ (Yẹ ọgba 7-9)
7. Ányị ọngọ mẹ ang jẹ à tị́ ka jẹ́-ẹ nwụlanọ gbe ịBayịbụụ ọmẹjẹ?
7 Lala ọngọ mẹ ịBayịbụụ jẹ, a baba nyọka nwụlanọ yẹẹyẹẹ gbe ịBayịbụụ ọmẹjẹ ọnyị myị́ ọnyị. À ka dọmwụ bwula ọ-wa ẹgẹlẹ kanụ wẹẹ ka jẹ́ myị́ bala ọ-kụ ẹhị yẹ ụpwụ ịgọgọ ịlẹ kị juwa. Kpa ẹhị nya ẹla ịkpọnchị ịlụwa ọ-ọkịlẹtụ, kụ irya u-uhye nya egbeju nya ẹla, ụbẹẹtụ nya ẹla ịlụwa bala ịtọ ẹla ịlẹ kị baa ẹ-ẹgọ, ụpwụ ịgọgọ ịlẹ kị da ba nyị “wa,” arụrụ ịlẹ kị ji ụ-ụwa bala ifim ịlẹ kị ka jẹ́-ẹ da ẹla ọọwa wụlẹ myị́. Lẹ, a kụ irya nya abwọlẹ á ka bwu kpa ẹla ọọwa da ọngọlẹ ka wẹẹ mẹ ang jẹ ụbwọ, ụ-ụgbẹyị ọlẹ kọ la pwee bala ọ-la gede-gede chajị ká ọngọlẹ ka wẹẹ mẹ ang jẹ ka wo i-ijata bala ọ-ka kpa họ ụkụrwọ lẹlẹ.—Neh. 8:8; Etu 15:28.
8. Ẹlịyẹ omyi ẹla nya ọlẹrụ ịPọlụ ọlụpwụ nya Ala iKolosi 1:9, 10 à tị́ mẹjẹ́ẹhị u-uhye nya ọ-raabwọ chajị nya ọngọlẹ kahị kaa mẹ ịBayịbụụ jẹ?
8 Ụka ka ja nwụlanọ, raabwọ ha iJihova u-uhye nya ang ịlẹ kị ri ịbaba nya ọngọlẹ ka wẹẹ mẹ ang jẹ. Bịlẹ iJihova kọ ka dang ụbwọ nyọka mẹ ang jẹ bwu ẹpwụ nya ịBayịbụụ ụ-ụgbẹyị ọlẹ kọ ka jẹ́-ẹ wu ọngọọwa ọyị ọ-ọkịlẹtụ. (Wa Ala iKolosi 1:9, 10.) Maga ka jẹ́ ang ịlẹ kị ka lọọ ujwo la ọ-ka wo etu nyaa bala ọ-ka ye myị. Kpịtịya nyori a wẹẹ maga chajị kọ ka nwà ka hu enyi Ohe ịnyị.
9. Ányị ọngọ mẹ ang jẹ à tị́ ka da ọngọ wẹẹ jẹ́ ang ụbwọ nyọka nwụlanọ gbe ang ọjẹ́jẹ? Dọọ wụlẹ wẹẹ.
9 Ahị dahịhile nyori, bwula ịBayịbụụ ọjẹ́jẹ ụka myị́ ụka, ang ịlẹ ká iJihova bala iJisọsị họ ka myị ọngọlẹ kahị wẹẹ jẹ́ ịBayịbụụ ta lẹhị du kọ ka tịtọ nyọka jẹ́ gụ ọọwa. (Mat. 5:3, 6) Nyọka ye apyobwuna yẹẹyẹẹ bwu ang ọjẹ́jẹ, ọngọlẹ kọ wẹẹ jẹ́ ang ka yẹhị ku ang ọjẹ́jẹ. Nyọka jẹ́-ẹ họ ịnyị, họ kọ jẹ́ ọbaba nyọka nwụlanọ gbe ang ọjẹ́jẹ ọnyị myị́ ọnyị bwula ọ-wọọ ene bala ọ-kụ irya u-uhye nya abwọlẹ ká ang ọjẹ́jẹ ọọwa gwoo. Ányị a tị́ ka bwu dọọ ụbwọ kọ ka nwụlanọ? Nwụlanọ nya ụpa nya ang ọjẹ́jẹ ọhẹ balọọ kọ ka yẹ abwọlẹ kị kaa bwu họ ịnyị. * Ya joo abwọlẹ kọ ka ye ọwẹwẹ nya ịtọ ẹla ịlẹ kị tọ bala abwọlẹ ká o-ju omyi ẹla ịkpọnchị ẹjẹẹ ka jẹ́-ẹ kpọọ ịtịya nya ọwẹwẹ ịịwa. Byoo kọ wẹ ẹla la omyi ẹla nyịlọmwụ. Ụka kọ họ ịnyị, à ka jẹ́ jaabwọ kọ wo ẹla ọọwa kaka ba. Ang ọkịla tị juwa ọlẹ ká ka jwoo ọhụ nyọka họ myịmyị wẹẹ.
MẸJỌ́Ọ NYỌKA YA ẸLA BALA IJIHOVA ẸNỤ MYỊ́ ẸNỤ
Mẹjẹ ọngọlẹ á kaa jẹ́ ịBayịbụụ ta jaabwọ kọ ka bwu ya ẹla bala iJihova (Yẹ ọgba 10-11)
10. Ịyẹ tị du kọ baba nyọka wa ịBayịbụụ ẹnụ myị́ ẹnụ? Ịyẹ ọngọlẹ kọ wẹẹ jẹ́ ịBayịbụụ a tị́ baba nyọka họ kọ ka ye apyobwuna bwu ụwa?
10 Datị hi ọ-ka jẹ́ ang bala ọngọ kaa mẹ ang jọ́ọ epwihi ọnyị myị́ ọnyị, ang ọkịla ọhẹ ji ká ọngọ wẹẹ jẹ́ ịBayịbụụ baba nyọka họ lịlọmwụ ẹnụ myị́ ẹnụ nyọka ye apyobwuna. Ọ baba nyọka ya ẹla bala iJihova. Ányị ọ tị́ ka bwu họ ịnyị? Bwula ọ-ke ụrụ wo la iJihova bala o-ya ẹla balọọ. Ọ ka jẹ́-ẹ ke ụrụ wo la Ohe bwula ịBayịbụụ ọwawa ẹnụ myị́ ẹnụ. (Joch. 1:8; Eje. 1:1-3) Mẹjọ́ọ nyọka ba ịBayịbụụ ọwawa ọlẹ kị nwụlanọ ụbẹẹtụ-ụbẹẹtụ ịị jw.org * jẹ. Ọ dọmwụ ka jẹ́-ẹ dọọ kpehe myị́. Nyọka ye apyobwuna yẹẹyẹẹ bwu ẹpwụ nya ịBayịbụụ ọwawa, jwoo ọhụ kọ ka kụ irya ju ang ọlẹ ká ịBayịbụụ wẹẹ mẹjọ́ọ u-uhye nya iJihova bala abwọlẹ kọ ka kpa ang ọlẹ kọ wẹẹ jẹ́ họ ụkụrwọ ọ-ọhịhị nyamwụ.—Ụkụr. 17:11; Jem. 1:25.
11. Ányị ọngọlẹ kahị wẹẹ mẹ ịBayịbụụ jẹ à tị́ ka bwu raabwọ ụ-ụgbẹyị ọlam? Ịyẹ tị́ du kọ baba kọ ka raabwọ ha iJihova ụka myị́ ụka?
11 Ju ọngọlẹ ka kaa mẹ ịBayịbụụ jẹ ọhụ nyọka ya ẹla bala iJihova bwula ọ-ka raabwọ ahyẹẹnụ ọnyị myị́ ọnyị. Raabwọ bwu ẹpwụ ọkịlẹtụ nyang bwu ọmwụ ọdada bala ocheju nya ang ọjẹ́jẹ nyanụ, ka gu ẹnyị nya ọngọlẹ ka wẹẹ mẹ ang jẹ ẹ-ẹpwụ nya abwọ ọrịrị ịnyịnyị. Jaabwọ kọ wẹẹ ke ụrụ wo abwọ ọrịrị nyang, ọ ka jẹ́ abwọlẹ kọ ka raabwọ bwu ẹpwụ nya ọkịlẹtụ nyamwụ bala ọ-ka raabwọ ha iJihova la ẹnyị nya iJisọsị ịKịrayịsị. (Mat. 6:9; Jọn. 15:16) Kụ irya nya abwọlẹ ká ịBayịbụụ ọwawa ẹnụ myị́ ẹnụ (ko ri o-ke ụrụ wọ la iJihova) bala ọ-raabwọ ụka myị́ ụka (ko ri o-ya ẹla bala iJihova) ka da ọngọlẹ ka wẹẹ mẹ ịBayịbụụ jẹ ụbwọ nyọka tụ́ ju iJihova chwẹẹ gụ ọwọwa wẹẹ! (Jem. 4:8) Kori kọ họ ịnyị ẹnụ myị́ ẹnụ, ọọwa ka dọọ ụbwọ nyọka nwà ka hu ịlọmwụ ju Ohe ụ-ụbwọ bala ọ-ka hu enyi Ohe. Ang ọkịla oyina à tị́ ka jẹ́-ẹ dọọ ụbwọ myịmyị?
DỌỌ ỤBWỌ NYỌKA RI OLIGU BALA IJIHOVA
12. Ányị ọngọ mẹ ang jẹ à tị́ ka da ọngọ wẹẹ jẹ́ ịBayịbụụ ụbwọ nyọka ri oligu bala iJihova?
12 Ahị tịtọ ká ọngọlẹ kahị wẹẹ mẹ ịBayịbụụ jẹ ka jẹ́ ang u-uhye nya iJihova. Ma, ang ọlẹ kọ wẹẹ jẹ́ baba nyọka gwoo ọ-ọkịlẹtụ chajị kọ ka nwụlanọ nyọka kpa ẹla ọọwa họ ụkụrwọ. IJisọsị kaa mẹ ang lụmẹ-lụmẹ jẹ angịnyị, ọ tị kaa há angịnyị la ọ-ka jẹ́ ang bwu ẹga nyamwụ. Ma, angịnyị kaa bọọ jẹ chajị nyori ang ọmẹjẹ nyamwụ waa oyi ọ-ọkịlẹtụ ịnyị. (Luk. 24:15, 27, 32) Ọngọlẹ ka wẹẹ mẹ ịBayịbụụ jẹ baba kọ ka yẹ iJihova lala ọngịnyị ọlẹ kọ juwa ịnyịlẹhị, ọngịnyị ọlẹ kọ ka jẹ́-ẹ ri oligu ta, bala ọ-ka yọọ lala Adamwụ, Ohe nyamwụ bala Oligu nyamwụ. (Eje. 25:4, 5) Ụka kanụ ja jẹ́ ang, họ kọ jẹ́ ụma nya ọngịnyị ọlẹ ká iJihova ri. (Ehe. 34:5, 6; 1 Pit. 5:6, 7) Egbeju nya ẹla ọnyị myị́ ọnyị kanụ ja jẹ́ ang bwu, họ kọ yẹ abwẹla ịnyịịla nya Ohe Oluhye. Da ọngọlẹ kaa mẹ ịBayịbụụ jẹ ụbwọ nyọka yẹ ọháha, ọnahị bala ahyẹẹrwẹrwa nya iJihova. IJisọsị ya nyori ehile ọlẹ ko ri “ehile ọ-kụ ịlahị wuu bala ehile ọlẹ kọ baba kpá gụ ehile nya Ohe Oluhye ịkịla wuu” ri, iJihova “Ohe Oluhye nyang ka háng.” (Mat. 22:37, 38) Dọọ ụbwọ kọ ka la ọháha ẹ-ẹga nya iJihova.
13. Ya jaabwọ kahị ka jẹ́-ẹ da angịlẹ kahị wẹẹ jẹ́ ịBayịbụụ ta ụbwọ nyọka jẹ́ ang u-uhye nya abwụma ịnyịịla nya iJihova wẹẹ.
13 Ụka ka ja ya ẹla bala ọngọlẹ a kaa mẹ ịBayịbụụ jẹ, ya joo ang odudu ká iJihova háng. Ọọwa ka dọọ ụbwọ kọ ka ri oligu bala iJihova ịnyịnyị bala ọ-la ọháha ẹ-ẹga nyamwụ. (Eje. 73:28) Ọ-chụ pwokwita, omyi ẹla ọhẹ juwa ẹ-ẹpwụ nya ụpwụ ọlẹ kanụ kaa kpa jẹ́ ang lee ịBayịbụụ kọ ya ẹla u-uhye nya ọháha, ẹla ọjẹ́jẹ, ọkpẹẹkpẹẹ bala ọngịrị nya iJihova kọ tị gung ọ-ọkịlẹtụ? Ya ju ọngọlẹ ka wẹẹ mẹ ịBayịbụụ jẹ, ka họ kọ jẹ́ nyori ọwẹ ri ọhẹ lẹpwụ nya ang lụmẹ-lụmẹ ịlẹ kị dudu ká Adahị olepwoohe háng. Ang ọkịla ji ká angịlẹ kahị kaa jẹ́ ịBayịbụụ ta wuu baba nyọka họ ene kị ka hu enyi Ohe.
JWOO ỌHỤ NYỌKA WẸ ỌJỊRA-JỊRA
Ju ọngọlẹ á kaa mẹ ịBayịbụụ jẹ ọhụ kọ ka wẹ ọjịra-jịra ahyaahị! (Yẹ ọgba 14-15)
14. Ẹlịyẹ ụpwụ nya Ala iHiburu 10:24, 25 à tị́ ya u-uhye nya ọjịra-jịra kọ ka jẹ́-ẹ da ọngọlẹ kọ wẹẹ jẹ́ ịBayịbụụ ụbwọ nyọka nwà kịlahị?
14 Ahị wuu tịtọ ká angịlẹ kahị kaa mẹ ịBayịbụụ jẹ ka nwà nyọka hu enyi Ohe. Ụgbẹyị ọkpọnchị ọhẹ ọlẹ kahị ka jẹ́-ẹ daa ụbwọ ri ọ-ka jwaa ọhụ nyọka wẹ ọjịra-jịra. Aanahị ịlẹ kị jẹ́-ẹ mẹ ịBayịbụụ jẹ yẹẹyẹẹ ya nyori, angịlẹ kị wẹ ọjịra-jịra ahyaahị nyị kaa nwà mị́la-mị́la ẹ-ẹpwụ nya ang nya olegu. (Eje. 111:1) Angịhyẹ kaa byi angịlẹ kị kaa mẹ ịBayịbụụ jẹ nyori, kori kị nyị́ ka jẹ́ ịBayịbụụ yẹẹyẹẹ aalẹ nyị ka wẹ ọjịra-jịra. Wa ụpwụ nya Ala iHiburu 10:24, 25 ju ọngọlẹ á kaa mẹ ịBayịbụụ jẹ, ka ya apyobwuna ọlẹ kọ ka ye kori kọ wẹ ọjịra-jịra joo. Mẹ ifim ọlẹ kọ ri, Ịyẹ Ị Tị-ị Họ u-Ube nya Ịpyị-Adịrahụ? * jọ́ọ. Da ọngọlẹ á kaa mẹ ịBayịbụụ jẹ ụbwọ kọ cheje nyọka chị ọjịra-jịra ọlẹlẹhẹ da ka.
15. Ịyẹ ahị tị́ ka jẹ́-ẹ họ nyọka ju angịlẹ kahị kaa mẹ ịBayịbụụ jẹ ọhụ kị ka wẹ ọjịra-jịra ụka myị́ ụka?
15 Ányị a tị́ ka họ kori ká ọngọlẹ á kaa jẹ́ ịBayịbụụ ta, á dọmwụ nya ọ-wẹ ọjịra-jịra lẹka lee ọ kaa chịchịịchị wẹ kem? Ya ẹlẹhẹ ọlẹ ka jẹ́ bwu ọjịra-jịra kpangjẹ joo la ọkẹkẹnị. Ọwẹ ka gwoo gbịla nyọka wẹ gụ ọ-ka diroo-diro ịịwẹ kem. Ya Ẹpwang ọ-Kụ Gbeji lee Ụpwụ ọ-Kpa Jẹ́ Ang nya Ọjịra-Jịra nya Ọhịhị Bala Ụkụrwọ ọlẹ kị wẹẹ kpa jẹ́ ụka ọwẹ họọ. Mẹ ang ọlẹ kị wẹẹ ka jẹ́ ọọjịra-jịra ọkịla jọ́ọ ka too wo nya ụpa nyamwụ ọlẹ kọ kpọọ ọwa ịpyọ gụ. Ẹla ọlẹ kọ yẹ bala o-wo ọọjịra-jịra ọhọhẹ ọlẹ kọ ka, ka há gụ ang myị́ ang ọlẹ kọ yẹ ọ-ọtụguru nya ịgba ọgbagba ọkịla ọlẹlẹhẹ. (1 Kọr. 14:24, 25) Ọ ka ta angịkịla ịlẹ kọ ka jẹ́-ẹ gbịla ọgụ-ẹpẹtẹ ọnyịịla nyaa, kị ka jẹ́-ẹ dọọ ụbwọ nwà ka hu enyi Ohe.
16. Ịyẹ ahị tị́ baba nyọka họ nyọka mẹ ang jẹ ọngịnyị kọ ka nwà ka hu enyi Ohe? Ẹlịyẹ ahị tị́ ka kụ ẹhị yẹ a-ang ọjẹ́jẹ ọkịla?
16 Ányị ahị tị́ ka bwu mẹ ịBayịbụụ jẹ angịnyị kị ka nwà ka hu enyi Ohe? Ahị ka jẹ́-ẹ da ọng myị́ ọng ọlẹ kahị kaa jẹ́ ịBayịbụụ ta ụbwọ nyọka yẹ jaabwọ ká ang ọjẹ́jẹ ju apyobwuna kaka ba bwula ọ-jwoo ọhụ nyọka jẹ́ ang epwihi ọnyị myị́ ọnyị bala ọ-nwụlanọ gbe ang ọjẹ́jẹ. Ahị ka jwoo ọhụ nyọka ya ẹla bala iJihova ẹnụ myị́ ẹnụ bala ọ-ka ri oligu balọọ. Ahị ka jwoo ọhụ ịnyịnyị nyọka wẹ ọjịra-jịra. (Yẹ akpa ọla ẹbẹ 12 ọlẹ kọ ri, “ Ang Ọlẹ ká Ọngọ Wẹẹ Jẹ́ ịBayịbụụ Baba Kọ ka Họ Nyọka Nwà ka Hu Enyi Ohe.”) Ma, jaabwọ ká ang ọjẹ́jẹ ọkịla ka da wụlẹ, ang ịrụ ịkịla ịhyẹ juwa ịlẹ ká ọngọ wẹẹ mẹ ịBayịbụụ jẹ ka họ nyọka da angịnyị ụbwọ nwà ka hu enyi Ohe.
EJE 76 Ányị Ọ Tị́ Lang i-Irya?
^ par. 5 Ọ-mẹ ang jẹ ọngịnyị ri ọ-ka dọọ ụbwọ kọ ka kụ irya, yẹ ẹla bala ọ-họ ẹla ụ-ụgbẹyị onyeewe lee ụgbẹyị ọdatị. Egbeju nya ẹla ọla ẹka nya 2020 bwu ịMatiyu 28:19, kpụhị ịtịya nya ọbaba nyọka jẹ́ ịBayịbụụ ta angịnyị bala ọ-mẹ jáa abwọlẹ kị ka bwu wẹ ka ri angịjụgbẹyị nya ịKịrayịsị ịlẹ kị hu enyi Ohe. Ẹ-ẹpwụ nya ang ọjẹ́jẹ ọlẹ bala ọkịla ọbọọba, ahị ka yẹ abwọlẹ kahị ka jẹ́-ẹ họ ụkụrwọ o-ju apyobwuna ọwẹ gụ olene.
^ par. 2 OMYI ẸLA ỌDAWỤLẸ: Kori ka kaa joja bwu ịBayịbụụ bala ọngịnyị hya-hya, à tị kaa họọ ụbẹtụ-ụbẹtụ, aalẹ ịBayịbụụ ọjẹ́jẹ a wẹẹ. A ka jẹ́-ẹ dọọ ju myị́ kori ka mẹjọ́ọ ụka imiiye ku ẹkpẹ nyọlẹ ka họ mẹjẹ jaabwọ ọlẹ kahị kaa mẹ ịBayịbụụ jẹ ọngịnyị, à tị la ahị ọdahile nyori ịBayịbụụ ọjẹ́jẹ ọọwa ka kịnyaa.
^ par. 3 Ang ọjẹ́jẹ imiiye ịlẹ gba ẹla kpehe bwu ụpa ọlẹ ko ri, “Conducting Progressive Bible Studies” ụ-ụpwụ nya Our Kingdom Ministry nya Ọya Ọharwiye 2004 kele ka Ọya Ọharụ nya 2005.
^ par. 9 Yẹ ifim ọ-la iminiti ine ọlẹ ko ri, Teaching Our Students to Prepare. Ịị JW Library®, ka ẹga ọlẹ ko ri, MEDIA > OUR MEETINGS AND MINISTRY > IMPROVING OUR SKILLS.
^ par. 10 Ka ẹga ọlẹ ko ri, BIBLE TEACHINGS > BIBLE STUDY TOOLS.
^ par. 14 Ịị JW Library®, ka ẹga ọlẹ ko ri, MEDIA > OUR MEETINGS AND MINISTRY > TOOLS FOR THE MINISTRY.
