1. Ịyẹ à tị́ ri ang ọhẹ ọlẹ kọ du ká iJisọsị chụ angịjụgbẹyị nyamwụ kaka pwoku ịkpịlọ?

 IJISỌSỊ chu ọ-yẹjula awụlẹ nyamwụ ọwa bala angịjụgbẹyị nyamwụ kaka pwoku ịnya ọngọgbikpịlọ bala ịkpịlọ nyamwụ. (Jọn. 10:14) Ọ-chụ pwokwita ọwẹ pwoku. Ịkpịlọ jẹ́ ọngọlẹ kọ laa datị bala ọ-kaa ke ụru wo omyi nyamwụ. Ọlẹng ọhẹ wẹ ka jẹ́ nyori ẹla ọwẹ ri ẹlịlẹhị. Ọ yẹkẹẹ: “Ahị tịtọ nyọka hwo ogu nya ịkpịlọ ịhyẹ ifoto, lẹ ahị maga nyọka pịraa kị ka jẹ tụ́ juhi chwẹẹ. Ma, ị pwa la o-ka wẹ ẹga nyahị chajị ị́ jẹ́ omyi nyahị ka. Ọọwa lẹ, ọngọgbikpịlọ, onjwo ochiche ọhẹ à pwụ eji ẹẹ; ọ be ẹkọ la omyi ookpokpo bwaa lẹ, ị dọmwụ nyọka dịrọọ ahyaahị lẹlẹ.”

2-3. (a) Ányị angịjụgbẹyị nya iJisọsị à tị́ ka mẹjẹ nyori ị ke ụrụ wo omyi nyamwụ? (b) Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ bala ọ-bọọ ba?

² Oja nya ọlẹng ọwẹ kpụhị ịtịya nya omyi ẹla nya iJisọsị ọlẹ kọ ya rụ́ ịkpịlọ, kị ri angịjụgbẹyị nyamwụ. Ọ yẹkẹẹ: “Ịkpịlọ ịịwa . . . ka wo omyi nyam.” (Jọn. 10:16) Ma iJisọsị tị juwa e-epwoohe. Lẹ, ányị ahị tị́ ka bwu ke ụrụ wo omyi nyamwụ? Ahị kaa ke ụrụ wo omyi nyamwụ ụka kahị kpa ang ọmẹjẹ nyamwụ họ ụkụrwọ ọ-ọhịhị nyahị.​—Mat. 7:24, 25.

³ Ẹ-ẹpwụ nya ang ọjẹ́jẹ ọlẹ bala ọ-ba ọlẹ ba, ahị ka kụ ẹhị yẹ ang ọmẹjẹ nya iJisọsị ịhyẹ. Jaabwọ kahị wẹẹ ka yẹ, ang ịhyẹ ji ká iJisọsị mẹjẹ́ẹhị nyori ahi nyị hwabwọ la ọhọhọ,  ang ịkịla tị ji kọ ya ahị nyị họ. Họhẹ-họhẹ, ahị ka kụ ẹhị yẹ ang imiiye ịlẹ ká iJisọsị ya ahị nyị hwabwo la ọhọhọ wẹẹ.

4. Jaabwọ ka ụpwụ nya iLuku 12:29 ya, ịyẹ à tị́ ka du myị́ kahị ka “nwụ ịlọhị la uko ọchịchị”?

⁴ Wa iLuku 12:29. IJisọsị gbile angịjụgbẹyị nyamwụ ụbwọ ụ-ụrụ nyọka hwabwo la ‘ọ-nwụ ịlaa la uko ọchịchị’ u-uhye nya ang ịlẹ kị ri ịbaba nyaa. Ahị jẹ́ nyori ẹla ọmẹjẹ nya iJisọsị hiigu bala ọ-la kpakpa ụka wuu. Ahị kaa tịtọ nyọka kpa họ ụkụrwọ, ma ụka ọhẹ, ọ kaa lahị ujwo. Ịyẹ tị́ du?

5. Ịyẹ à tị́ ka du myị́ ká angịhyẹ ka la uko ọchịchị u-uhye nya ang ịlẹ kị baba?

 ⁵ Angịhyẹ ka juwa nwụ ịlaa la uko ọchịchị u-uhye nya ang ịlẹ kị baba, lala ang oriri, ang ọkụrụ-kụrụ bala ẹga onune. Ọhẹka, ị kụ ẹpwụma ọlẹ ká iru nya angịnyị ri alẹbyahị bala ọ-kaa lujwo nyọka yé ụkụrwọ. Lẹ, ọ ka lujwo haa nya ịlẹhị-ịlẹhị nyọka yé okpoko ọlẹ kị ka kpa kpẹhị rịrị ugbiyegu nyaa. Lee ọhẹka, ọngọ kaa kpa ugbiyegu la okpoko gbu, du kọ lujwo ha ugbiyegu ọọwa nyọka yé okpoko kpa ra ang ịlẹ kị baba. Ịnyịnyị, ị hu angịnyị lụmẹ-lụmẹ abwọ la ụkụrwọ ọhọhọ ọọlajị nya ẹdụrụ nya COVID-19 ọlẹ kọ kpeji. (Ọngọ. 9:11) Kori ká ọhẹ-lọhẹ lẹpwụ nya ẹla ịwẹ lee ịkịla á họ tahị, ányị ahị tị́ ka bwu ba ẹla ọlẹ ká iJisọsị ya jẹ nyọka hwabwọ la ọ-nwụ ịlọhị la uko ọchịchị?

6. Chabwọ nya ẹla ọlẹ kọ họ ta iPita ụka ọhẹ wẹẹ.

⁶ Ụka ọhẹ, ọlẹrụ iPita bala alẹrụ ịkịla juwa ẹ-ẹpwụ nya ụmwụ nya enyi ụ-ụwa ihu nya ịGalili ụka ká igbachịwụ ọtụka-ọtụka juwa da. Ụka kị chẹhị kaka yẹ iJisọsị kọ juwa jẹdịyẹ u-uhye nya ugbenyi, iPita yẹkẹẹ: “Ọngọlahị, ó-ri ahụ ayịdang kaa wẹ ịnyịlẹhị lẹ aalẹ, à dam ehile, byim yẹkẹẹ, am nyị jẹdịyẹ u-uhye nya ugbenyi ọwẹ kaka tọng mẹ.” Nyọlẹ ká iJisọsị byoo nyị “kẹwẹ” mẹ lẹ, iPita à gba kpehe bwu ẹpwụ nya ụmwụ nya enyi juwa “jẹdịyẹ u-uhye  nya ugbenyi kele ka ẹga nya iJisọsị ịnyịlẹhị lẹlẹ.” Ịyẹ à tị́ họ ba ọọwa ba mẹ? “Ụka ká iPita chẹhị kele kaka yẹ igbachịwụ ọtụka ọ-gu ihu gbaagbaagbaa ọwẹ lẹ, uhi ojuju a ju ka ẹpwụ nyamwụ lẹ, o juwa dọmwụ nya ọkpụkpụ keji ẹ-ẹpwụ nya enyi ọọwa lẹlẹ. Ọọwa lẹ, iPita a cheko gboo yẹkẹẹ: ‘Ọngọlam, chuchuu, chịm da mẹ!’ ” Ịnyị iJisọsị a nịra ụbwọ nyamwụ kpaa kaka chị iPita lẹ, ọ chọọ da lẹlẹ. Ahị baba kahị ka kpịtịya nyori iPita jẹ́ jẹdịyẹ u-uhye nya ugbenyi myị́ nyọlẹ ká ẹhị nyamwụ ji ẹga nya iJisọsị. Ma, ụka ká iPita chẹhị ka ẹga nya igbachịwụ, ọ dọmwụ nyọka ju uhi bala o-la ịwẹẹ ọdada, ọọwa lẹ, ọ dọmwụ nyọka byi enyi lẹlẹ.​—Mat. 14:24-31.

7. Ẹlịyẹ ahị tị́ ka jẹ́ bwu oja nya iPita?

⁷ Ahị ka jẹ́-ẹ jé ang bwu ọgụ-ẹpẹtẹ nya iPita. Ụka ká iPita gba kpehe bwu ẹpwụ nya ụmwụ ju ka ẹpwụ nya ihu, ọ́ yahị guru nyori ọ ka juhi nya igbachịwụ bala ọ-ka dọmwụ nya o-byi enyi ka. Ọ tịtọ nyọka jẹdịyẹ u-uhye nya ugbenyi gbee kọ ka pwụ ẹga nya iJisọsị. Ma, ọkọkọ nya ẹhị nyamwụ ọ-ka ji ẹga nya iJisọsị kpụrụrụ, ọ dọmwụ nyọka ju uhi nya igbachịwụ. O ri nyịlẹhị, áhị ka jẹ́-ẹ jẹdịyẹ u-uhye nya ugbenyi alẹ ka, ma ahị baba nya ọmyịmyị nyọka jẹ́-ẹ bọhụ ẹ-ẹpwụ nya ịmayẹ jaabwọ ká iPita baba nya ọmyịmyị nyọka jẹ́-ẹ jẹdịye u-uhye nya ugbenyi. Kori kahị hwabwọ la ọ-ka dahịhile iJihova bala ọnụ ọmyịmyị nyamwụ, ọmyịmyị nyahị ka la dẹwụ-dẹwụ, lala o-ri ahị nyị juwa byi enyi myị́. Lẹ, kori kahị dọmwụ la akama ịtụka ịhyẹ wẹwẹ, ori o-pyii kahị ka ya irya nyahị nọ ẹ-ẹga nya iJihova bala ọngịrị nyamwụ nyọka dahị ụbwọ. Ányị ahị tị́ ka bwu họ ịnyị?

8. Ịyẹ à tị́ ka dahị ụbwọ du kahị ka nwụ ịlọhị la uko ọchịchị u-uhye nya ịbaba nya ugbinyịrọ nyahị ka?

⁸ Ọkọkọ nyọka juwa nwụ ịlọhị la uko ọchịchị u-uhye nya akama nyahị, ahị baba nyọka dahịhile iJihova. Kpịtịya nyori, iJihova Adịda nya ọháha, myị ọnụ nyọka họ ịbaba nyahị hahị kori kahị hu ang nya olegu kụ ịlahị. (Mat. 6:32, 33) Ọ kaa họ ọnụ ọmyịmyị nyamwụ jịra ụka wuu. (Ehile. 8:4, 15, 16; Eje. 37:25) Kori ká iJihova-á kaa họ ịbaba nya ịchịnụ bala apwụ̀ nya ekeji haa aalẹ, áhị baba nyọka chị uko u-uhye nya ang ọlẹ kahị ka ri bala ọkụrụ-kụrụ ka! (Mat. 6:26-30; Filip. 4:6, 7) Jaabwọ ká ọháha kaa gu adịda bala ịnịna gbịla nyọka họ ịbaba nya anjwo nyaa haa, ọháha kaa gu Adahị olepwoohe gbịla nyọka họ ịbaba nya ugbinyịrọ nya angịnyị nyamwụ haa ịnyịnyị. Ee, ahị ka jẹ́-ẹ la ahị ọdahile nyori iJihova ka kpẹhị rịrịịhị!

9. Ẹlịyẹ a tị́ ka jẹ́ bwu oja nya ahụ bala ọrụ ọwẹ?

⁹ Kụ ẹhị yẹ ọ-chụ pwokwita ọhẹ ọlẹ kọ mẹjẹ jaabwọ ká iJihova kaa họ ịbaba nyahị hahị lẹẹ. Ahụ bala ọrụ ọhẹ ọlẹ kị kaa kpa ọhịhị nyaa wuu họ ụkụrwọ ha Ohe Oluhye pá omoto nyaa ọlẹ kọ hogo lẹ, ka ẹga ọlẹ ká angị rụnyẹ rụ hi ẹwụ kụ, nyọka go aanahị anyang ịhyẹ kpa ka ọjịra-jịra. Ọrụ yẹkẹẹ: “Nyọle ká ọjịra-jịra kpehe kpá, ahị wụrụ aanahị anyang ịwẹ ẹpwa nyọka wẹ ka ri ang tahị, ọọwa lẹ, ahị wẹ ka jẹ́ nyori áhị la ang oriri ọhẹ-lọhẹ juwa nyọka ya haa kaka lẹlẹ.” Ányị ahụ bala ọrụ ịwẹ à tị́ ka họ? Ọrụ myịmyị yẹkẹẹ: “Nyọlẹ kahị pwụ ẹpwa, ahị yẹ ịbang nya ang oriri imiiye ịtụka-ịtụka ị-ịlahị nya ẹpwa nyahị. Áhị jẹ́ ọngọlẹ kọ kpa ka guwa datị ka. IJihova kpahị juhi.” Ị-ịlahị nyọọwa, omoto nyaa bịrị. Ị baba nyamwụ nyọka kpa kpehe nya ẹla Ohe, ma ị́ la okpoko ka ya nwụlọọ ka. Ahụ bala ọrụ ọwẹ kpa omoto nyaa ọwẹ ka ẹga nya angị nwụla-nwụla nyọka jẹ́ okpoko ịmanyị tị́ ọlẹ kị ka nwụlọọ. Ọọwa ọlẹng ọhẹ à warị lẹ, o towo yẹkẹẹ: “Oowo tị́ la omoto ọlanyị?” Ọọnahị ọlẹng ọwẹ ya nyori ọwa nya-à la lẹ, nyị tị baba nya ọnwụla-nwụla. Ọlẹng ọọwa yẹkẹẹ:  “Ọọwa-á baba ka. Ahụ nyam tịtọ nya omoto ọlịịwẹ, ụma nya ido ọlịịwẹ kpangga. Ányị a tị́ ka ya ra?” Ọọnahị ọlẹng ọwẹ pẹhi omoto ọwẹ ra ha ọlẹng ọwẹ lịnya ọlam-ọlam ọlẹ kọ ka jẹ́-ẹ ya okpoko nyamwụ ra ọkịla. Ọ yẹkẹẹ: “Ahị chị ọkẹkẹnị yẹẹyẹẹ la ocheju nya ahyẹẹnụ ọwẹ. Ahị jẹ́ nyori ẹ-ẹla ọ-họ pwoku awụlẹ à wẹ ka. IJihova à dahị ụbwo wẹ lẹ.

10. Ányị Eje Ọnyịịla 37:5 à tị́ juhi ọhụ nyọka hwabwọ la ọ-nwụ ịlọhị la uko ọchịchị u-uhye nya ịbaba nya ugbinyịrọ nyahị?

¹⁰ Kori kahị ke ụrụ la iJisọsị, ọngọgbikpịlọ ọnyịịla bala ọ-hwabwọ la ọ-nwụ ịlọhị la uko ọchịchị u-uhye nya ang ịlẹ kị ri baba nya ugbinyịrọ, ahị ka jẹ́-ẹ la ọ-jẹ́ myị̀myị̀ nyori iJihova ka họ ịbaba nyahị hahị. (Wa Eje Ọnyịịla 37:5; 1 Pit. 5:7) Kụ irya nya iwe-ahụrụ olujwo ọlẹ kahị ya ẹla rụ́  ọgba 5 wẹẹ. Gbee da wẹ alẹ ọlẹ, ọhẹka iJihova kaa kpa olegbeju nya ugbiyegu lee ọngọlẹ kahị kaa họ ụkụrwọ ha dahị ụbwọ la ịbaba nyahị. Kori ká olegbeju nya ugbiyegu á jẹ́ họ ịbaba nyahị hahị myị́ kaka, lee ị huhi abwọ la ụkụrwọ, iJihova ka kpẹhị rịrịịhị bwula ụgbẹyị ọkịla. Ahị la ahị ọdahile nyọọwa. Lẹẹlẹẹ, ahị kụ ẹhị yẹ ang ọkịla ọhẹ ọlẹ ká iJisọsị, ọngọgbikpịlọ ọnyịịla byihi nyị hwabwọ la ọhọhọ wẹẹ.

11. Jaabwọ ká ịMatiyu 7:1, 2 ya, ịyẹ iJisọsị à tị́ byihi nyị hwabwọ la ọhọhọ? Ịyẹ tị́ du kọ ka lujwo hahị myị́?

¹¹ Wa ịMatiyu 7:1, 2. IJisọsị jẹ́ nyori angịnyị ehe á la kpẹẹkpẹẹ ka bala o-ri ị kaa yẹhị rịrị ọ-jẹ́ họ ka nya angịkịla ụka lụmẹ-lụmẹ. Ịnyị à du kọ ya ahị nyị ‘Hwabwọ la o-ya eje wu angịkịla’ lẹ. Ahị ka maga nya ịlẹhị-ịlẹhị chajị kahị ka la aanahị ịkịla eje ka myị́. Ma áhị la kpẹẹkpẹẹ ka, lẹ ọ́ kaa chịkpẹẹ ụka myị́ ụka ka. Kori kahị yẹ nyori, ụka ọhẹ ahị kaa kpụ angịkịla abyị, ányị ahị tị́ ka họ? Ke ụrụ la iJisọsị, ká hwabwọ la ọ-la angịkịla eje.

12-13. Ányị o-me irya ju abwọlẹ ká iJihova yẹ iDevidi à tị́ ka dahị ụbwọ nyọka la angịkịla eje ka?

¹² Ahị ka yé apyobwuna bwula ọ-kụ irya ju ọgụ-ẹpẹtẹ nya iJihova. Ọ kaa yẹhị rịrị ẹ-ẹga ọlẹ ká angịnyị jẹ́ họ hiigu. Kụ irya nya ẹla ọlẹ ká iJihova họ ụka ká Adịrahụ iDevidi họ ịhọbịrị ịtụka-ịtụka wẹẹ. Ọ-chụ pwokwita, iDevidi họ ụya bala ịBatịchẹba, ọọwa á nwọọ ka, ọ myịmyị nwụ ọrụmwụ. (2 Sam. 11:2-4, 14, 15, 24) Chajị nyọọwa, iDevidi bala ugbiyegu nyamwụ yẹ akama, dọmwụ tụ́ ịhụ ịkịla nyamwụ. (2 Sam. 12:10, 11) Ụka ọkịla, iDevidi mẹjẹ nyori ọ́ dahịhile iJihova la ọkịlẹtụ nyamwụ wuu ka. Ọ wa alẹng nya ala Isirẹlụ ịlẹ kị ri alẹwụ la iJihova o-byoo ịnyị ene ka. Ọhẹka, ọbọọchẹ ohihi nya iDevidi bala ahị ọ-dahile iru ojuju nya alẹwụ nyamwụ nyọka chewu koo à du kọ họ ịnyị lẹ. Ịyẹ à tị́ ri ocheju nyọọwa? Angịnyị lala 70,000 nya ala Isirẹlụ gbu bwu ẹdụrụ onyobyi-obyi!​—2 Sam. 24:1-4, 10-15.

¹³ Kori ká juwa Isirẹlụ lụka ọọwa, ányị a tị́ ka yẹ iDevidi? À ka kụ irya nyori ọ́ chịla ká iJihova ka hịnyọhi họọ ka? IJihova-á kụ irya ịnyị ka. Ọ yẹhị rịrị a-abwọlẹ ká iDevidi dayị kpẹẹkpẹẹ họọ ọ-ọhịhị nyamwụ wuu bala ọlẹ kọ yẹda bwu ọkịlẹtụ. Chajị nyọọwa, iJihova hịnyọhi ha iDevidi nya ịhọbịrị ịtụka ịlẹ kọ họ. IJihova jẹ́ nyori iDevidi la ọháha ẹ-ẹga nyamwụ yẹẹyẹẹ bala ọ-tịtọ nyọka họ ang ọnyịịla. Ọ́ myịhị lẹhị yẹẹyẹẹ nyọlẹ ká iJihova kaa yẹhị rịrị a-abwẹla ịnyịịla nyahị ka?​—1 Ịdị. 9:4; 1 Ego. 29:10, 17.

14. Ịyẹ à tị́ ka da Angịnyị nya ịKịrayịsị ụbwọ nyọka hwabwọ la ọ-ka la angịkịla eje?

¹⁴ Chajị nyọlẹ ká iJihova tịtọ nya ọkpẹẹkpẹẹ bwu ẹga nyahị ka lẹ, áhị ka tịtọ nya ọkpẹẹkpẹẹ bwu ẹga nya angịkịla ka ịnyịnyị. Ahị yẹhị rịrị a-abwẹla ịnyịịla nya angịkịla. Ọ kaa chịkpẹẹ nyọka yẹ ọ-jẹ́ họ ka nya angịkịla ahyaahị bala ọ-ka kpaa abyị. Ma, ọngọlẹ kọ  kaa gbịla iJihova jẹ́-ẹ họ ụkụrwọ bala angịkịla yẹẹyẹẹ, kori kọ dọmwụ yẹ abyị nyaa wẹwẹ. Ẹjwọ ọnyịịla ọlẹ kị pwo lẹka á kaa há ụhị ẹ-ẹhị ka, ma ọngọ jẹ́ ang chajị nyamwụ kaa jẹ́ nyori ụka kị pwọọ kpá, ọ ka há ụhị bala o-ju apyobwuna. Ọ-la kpẹẹkpẹẹ-ka nya angịkịla ka du kị ka lala ẹjwọ ọlẹ kị pwo ka myị́. Ma, lala iJihova bala iJisọsị, áhị ka yẹhị rịrị a-abwẹla ịtịpyọ nya angịnyị ka, ọkọkọ nyọọwa, ahị ka yẹhị rịrị a-abwẹla ịnyịịla nyaa.

15. Ányị irya ọ-me ju iwe-ahụrụ nya angịkịla à tị́ ka dahị ụbwọ hwabwọ la ọ-ka laa eje?

¹⁵ Datị hi ọ-yẹhị rịrị a-abwẹla ịnyịịla nya angịkịla, ang ọkịla oyina à tị́ ka dahị ụbwọ nyọka hwabwọ la ọ-ka la angịkịla eje? Maga ká kụ irya nya abwọle ká ọhịhị la haa. Kụ ẹhị yẹ ọ-chụ pwokwita ọlẹ wẹẹ. Ẹnẹhẹ u-ube ịgọgọ, iJisọsị yẹ ahụ-ogu ọhẹ ọlẹ kọ hu ohiri imiiye ịlẹ kọ la wuu ha ọhaha. IJisọsị-ị́ tọ wo nya ang odudu kọ hu ha gụ ọwẹ ka lẹ ka. Ọkọkọ nyọka ya irya nyamwụ nọ ẹ-ẹga nya okpoko ịmanyị ọlẹ ká ahụ-ogu ọwẹ hu ha, iJisọsi kụ irya u-uhye nya ang odudu ọlẹ kọ họ ịnyị bala abwọlẹ ká ọhịhị la họọ. Ọ tị mịla oja họọ nyọlẹ kọ hu ọhaha ọọwa ha bwu ọkịlẹtụ nyamwụ wuu.​—Luk. 21:1-4.

16. Ẹlịyẹ a tị́ ka jẹ́ bwu ẹga nya ọọnahị Veronica?

¹⁶ Oja nya ọọnahị ọnyang Veronica mẹ ang odudu ọlẹ kọ baba nyọka kụ irya u-uhye nya iwe-ahụrụ nya angịkịla jẹ́ẹhị. Ọọjịra-jịra ọlẹ kọ ji, ọọnahị ọnyang ọhẹ juwa ká ọwa bala ọnyị nyamwụ kem à kụ ẹpwa. Veronica yẹkẹẹ: “Ọ lam lala o-ri ị́ kaa ka ọjịra-jịra bala ọ-kpehe nya ẹla Ohe jaabwọ kọ chịla ka. M̀ kaa kpa ẹhị  ọtịpyọ yaa ọọlajị nyọọwa. Ọọwa lẹ, m kpehe nya ẹla Ohe bala ịnamwụ ẹẹ. O ya jem nyori ọnyị nyọwa ọlẹng nyị la ẹdụrụ nya ịmachị. Ọwa nyị tị kaa maga nya ịlẹhị-ịlẹhị nyọka họ kị ka yé ang ịlẹ kị baba bala ọ-họ ká igu oriri nyaa bala iJihova ka la ọngịrị. Chajị nya ẹdụrụ nya ọnyị nyamwụ, ọ kaa ka ọjịra-jịra ọkịla ụka ọhẹ hi ịnyamwụ da.” Veronica ya ụka ohyẹẹkpẹ yẹkẹẹ: “Ḿ jẹ́ nyori ọhịhị lujwo họọ ị-ịwẹ ka. Lẹẹlẹẹ, ẹla nya ọọnahị ọnyang ọwẹ kaa myịm lẹhị, m̀ tị kaa jwoo ihi nya ang ọlẹ kọ kaa họ nyọka gbịgba ha iJihova.”

17. Ẹlịyẹ ụpwụ nya iJemsi 2:8 à tị́ byihi nyị họ? Ányị ahị tị́ ka bwu họ ịnyị?

¹⁷ Ányị ahị tị́ ka họ kori kahị yẹ nyori ahị kaa la aanahị eje? O-ri o-pyii kahị ka kpịtịya nyori ahị baba nyọka la ọháha ẹ-ẹga nya aanahị. (Wa iJemsi 2:8.) Ịnyịnyị, ahị raabwọ ọgwọgwụ ha iJihova, bịlọọ nyọka dahị ụbwọ kahị ka la angịkịla eje ka. Ahị ka jẹ́-ẹ họ ụkụrwọ ba abwọ ọrịrị nyahị jẹ bwula ọ-bịrị ụka bala ọọnahị ọlẹ kahị kaa yẹ abyị-abyị nyamwụ kem. Ọọwa ka ya iwe hahị nyọka jọ́ọ. Ahị ka jẹ́-ẹ wụrọọ nyọka họ ụkụrwọ bala ahị ẹ-ẹrụ ọnyịịla ọ-kpa pyẹ lee ọ-wẹ ka yẹ julahị ri ang oriri. Jaabwọ kahị wẹẹ jẹ́ ọọnahị gụ ọọwa, ahị ka jẹ́-ẹ maga nyọka gbịla ọgụ-ẹpẹtẹ nya iJihova bala iJisọsị bwula ọ-ka yẹ abwẹla ịnyịịla nyamwụ. Kori kahị họ ịnyị, ahị wẹẹ mẹjẹ nyori ahị ke ụrụ la ẹla ọlẹ ká iJisọsị, ọngọgbikpịlọ ọnyịịla ya nyọka hwabwọ la ọ-la angịkịla eje.

18. Ányị ahị tị́ ka mẹjẹ nyori ahị wẹẹ ke ụrụ wo omyi nya iJisọsị, ọngọgbikpịlọ ọnyịịla?

¹⁸ Jaabwọ ká ịkpịlọ ịlam-ịlam kaa ke ụrụ wo omyi nya ọngọ kpaa kpa, angịlẹ kịị ba iJisọsị jẹ kaa ke ụrụ wo omyi nyamwụ ịnyịnyị. Kori kahị maga nya ịlẹhị-ịlẹhị nyọka hwabwọ la uko ọchịchị u-uhye nya ang ịlẹ kị ri ịbaba nya ugbinyịrọ nyahị bala angịkịla ọ-la eje, iJihova bala iJisọsị ka wahị kụrụ aga ọmama nyahị. Kori kahị ri ogu “ịkpịlọ ichiche” lee “ịkpịlọ . . . ịkịla” wẹwẹ, ahị kịnyaa la o-ke ụrụ bala o-ju ihi nya omyi nya iJisọsi, ọngọgbikpịlọ ọnyịịla. (Luk. 12:32; Jọn. 10:11, 14, 16) Ẹ-ẹpwụ nya ang ọjẹ́jẹ ọkịla, ahị ka kụ ẹhị yẹ ang imiiye ịlẹ ká iJisọsị byi angịjụgbẹyị nyamwụ nyị họ.