ỊBayịbụụ ọjẹ́jẹ epwihi ọnyị myị́ ọnyị kaa lang ujwo bala ọ-kpụng ịpyọ ka? Ọọ lahị wuu ịnyị ụka ọhẹ. Ma kụ irya u-uhye nya ang ịkịla ịlẹ kaahị họ ụka myị́ ụka wẹẹ, lala enyi ohyohyo. Enyi ohyohyo kaa ye ụka bala ọngịrị nyahị, ma ụka kahị tị hyo kpá, ọọ kpụhị ịpyọ lee ahị kaa la ịlọhị! Ịnyịnyị-ịnyịnyị, ịBayịbụụ ka họ ahị ka la ịlọhị. (Efe. 5:26) Kụ ẹhị yẹ irya ịhyẹ ịlẹ kị gba kpehe kị ka jẹ́-ẹ dụbwọ lẹẹ wẹẹ:

• Chị ụka nọ. ỊBayịbụụ ọjẹ́jẹ nyịlọhị ri ang ọhẹ lẹpwụ nya ‘ang ịlẹ kị chịla-chịla gụgụ wuu’ ká Angịnyị nya ịKịrayịsị ka họ pyii. (Filip. 1:10) Nyọka dang ụbwọ ká ka deeri hi ụka ọlẹ ka chị nọ ha ịlọng ka, à ka jẹ́-ẹ da ahyẹẹnụ bala ụka ọọwa ba ang ẹ-ẹga ọlẹ ká ka yọọ ụka myị́ ụka myị́. Lee ọ-ya ifon nyang ju ụ-ụgbẹyị ọlẹ kọ ka jẹ́-ẹ kpụng ịtịya ene nya ụka nya ang ọjẹ́jẹ nyang myị́.

• Chụ ụgbẹyị ọlẹ kọ pwoku iwe-ahụrụ nyang. Ụgbẹyị oyina à tịị chịkpẹẹ hang nyọka kpa jẹ́ ang? Ọ-chụ pwokwita, ọọ chịng kpẹẹ nyọka ya irya nọ ẹga okpokpo kori á ka jẹ́ ang lala awa? Lee ọ tịị háng gụ nyọka chị ụka nọ pyịnyẹng-pyịnyẹng ha ịlọng ma ka tị ka jẹ́ hyaa-hyaa? Ahụ à jẹ́ iwe-ahụrụ nyịlọng gụ́ lẹ. Lẹ, à ka jẹ́-ẹ nwụ ụka ọlẹ á ka kpa jẹ́ ang họ pwoku iwe-ahụrụ nyang. Kori ká ụka nya ang ọjẹ́jẹ nyang á họ ká ịnyịrọ-ọ́ tị hung nyọka jẹ́ ang ka bẹ? À ka chụ nyọka jẹ́ pyịnyẹng lala iminiti iwo myị́. À ka jẹ́-ẹ yé apyobwuna bwu ang ọjẹ́jẹ ụma ọlịnyị. Ọ dọmwụ chịkpẹẹ myị kori ka jẹ́ pwụ iminiti iwo ọwẹ, ọ ka kpụng ịpyọ kpụ a ka tịtọ nyọka jẹ́ gụ́ ọọwa myị́.—Filip. 2:13.

• Chụ ang ọlẹ á ka jẹ́ ene nya ụka. Kori ká ụka-á họ ene á ka kụ irya nya ang ọlẹ ka wẹẹ ka jẹ́, ọ chịkpẹẹ á ka kpa ụka ọwẹ “họ ụkụrwọ ọnyịịla” ọhẹ ka myị́. (Efe. 5:16) Maga ka da ahị́ nya ẹla ịhyẹ ịlẹ ka tịtọ á ka jẹ́ ang u-uhye nyaa ju ang. Ọ-chụ pwokwita, kori ká ịtọ ẹla u-uhye nya ịngịhyẹ ọlẹ ka wo etu nyamwụ yẹẹyẹẹ ka á wẹ irya nyang, à ka jẹ́-ẹ dọọ ju ang. Lụka ocheju nya ang ọjẹ́jẹ ọnyị myị́ ọnyị, à ka jẹ́-ẹ da ahị́ nya ala ịkịla ịlẹ ka tịtọ nyọka jẹ́ ang u-uhye nyaa ju ang myị́.

• Nwụhọ ụka kọ baba. Maga nyọka nwụ ang ịhyẹ ịlẹ ka chị nọ họ. Ang lala awa ịmányị tị́ ịlẹ á ka kpa jẹ́ ang lee egbeju nya ẹla ịlẹ ka chụ nyọka jẹ́. Ang ọlẹ kọ baba gụgụụgụ á ri ahyẹẹnụ, awa ịmányị tị́, lee ang ọlẹ ka chụ nyọka jẹ́ ka, ma abwọlẹ ka jẹ́ ang hyaa-hyaa kaka ba ịnyị.

Ahị kaa yé apyobwuna kori kahị jẹ́ ang epwihi ọnyị myị́ ọnyị. Ọọ juhi ọngịrị, ahị kaa tụ́ ju iJihova chwẹẹ, ahị tị jẹ́-ẹ cheje nya ẹla la ẹla ọjẹ́jẹ ọ-ọhịhị nyahị ịnyịnyị.—Joch. 1:8.