Ukọchẹ 12

Edojima ñw Iñmi Kpai Ẹbiẹ

Ẹwñ ch’ibe wa ugbo iñmi? (1) Efu ekpabiẹ? (1)

Ab’aboKraist du ña kak uma f’ọla mu nyọnyọ? (2)

Ekpa amẹla biẹnẹ? (3)

Amuche nya du ña amadojima ñw iñmi n? (4)

Ẹwñ ch’ọda Ọjọ lugbo ẹbiẹ? (5)

Ẹbiẹ egba many’u? (6)

1. Jihofa ch’Ẹtẹ iñmi. Amẹwñ iñmi chakaa jẹ Ọjọ ọmẹ iñmi ma. (Eli Ekọ d’Ọjọ 36:9) Iñmi afọ ñw Ọjọ. Ichaka ch’iñmi ọma ki defu iye-wñ ku ma ma bi ta n ch’ẹwñ akoko ñwu Jihofa. E kpa ọmekpa ki agba abalẹ tod ẹwñ du che biẹnẹ eju Ọjọ.—Akwodufu 21:22, 23; Eli Ekọ d’Ọjọ 127:3.

2. AboKraist ochochi m’ọla tanẹ nyọnyọ. Ma li kakini umoto ma kpai unyi ma chẹ futanẹ. (Ọlọda Ekeji 22:8) Amadu Ọjọ d’iñmi ma t’ef ẹwñ bibi ki ma chejuwñ n todu ku ma nẹd’ẹbọ abẹk iwọ n. Todulẹ ma nukpẹ efu iya bibi ku ma gwejugede ch’ẹnẹmunẹ agbe n. Ma def iyachi ki ad’ugbẹdọ ñw alachi eche n.—Eli Ekọ d’Ọjọ 11:5; Jọn 13:35.

 3. Iñmi ẹla onugo ñọ ch’ẹwñ kiafọ ñw Any’ẹwñ. ẸnẹKraist neke kpa amẹla ki che ujẹwñ kpai ukpo abẹk egb’ọla-wñ tanẹ kw’ef ọga kpai ẹwñ ẹbiẹnẹ. (Abakwanẹ 3:21; 9:3; Akwodufu 21:28) Ama inyọ k’a ch’amẹla alachi abẹk ekpa ma k’adu ch’iya abẹk alu ki ruwa ẹdọ ofo n.—Ita, Ita 12:10.

4. Utaba eñmọ, ẹyọ bẹtẹl elọ, kpai ogwu eñmọ k’a nẹd’ẹbọ ch’e-aboKraist n. Amẹwñ-i du nyọ n todu (1) ma akowa ch’adu ma, (2) ma ach’añọla-wa ẹbiẹnẹ, kpai (3) ma fẹ n. (Abo Rom 6:19; 12:1; 2 Abo Kọrint 7:1) I agbiti gbali tak onẹ ki t’ali aba-i nọ. Ama ichotila ka ch’abalẹ todu k’a bọ Jihofa ẹdọ.

5. Ẹbiẹ onugo añọ fọ eju Ọjọ gẹ. Ọjọ kakini onugo onẹ, abẹk iñmi-wñ, d’ef ẹbiẹ. Todulẹ inyọ k’onẹ ki j’ẹbiẹ n. I la ñọ nyọ k’a jẹ ẹla ku ma ma kpa nyọnyọ n. I chẹwñ ku ma f’ẹla kpa okwutulu abẹk ilekwu oj’okwu, idukpẹ k’a jẹ n. Ichẹwñ ku ma r’ọkwọ d’o abẹk egbe ma ta ñwu, ẹf’u kpa nyọnyọ tak ẹjẹ.—Abakwanẹ 9:3, 4; Abo Lifai 17:13, 14; Ẹwñ 15:28, 29.

6. Ibiẹnẹ k’onẹ ki gb’ẹbiẹ? Erewa, Jihofa tene k’a himama ẹbiẹ kakini aki d’ẹbiẹ ẹnẹmunẹ abẹk i chaka che ẹbiẹ e-wa ku ma kọjọ ugbo omunẹ nyọla wa n. (Ẹwñ 21:25) Todulẹ aboKraist ochochi neke gba ẹbiẹ n. Ma neke gba ọla ogwu omunẹ, dabu egba ẹwñ k’ẹbiẹ ma d’ọ n. Ma tene ku ma deju, ama ma tene ku ma gb’ọlai ma tanẹ lef ekpọda Ọjọ biẹ n.—Matiu 16:25.

[Amifoto ki joji ẹpa 25]

Tak ab’Ọjọ ẹdọ, i dukpẹ k’a kw’ọna ẹbiẹ ẹgba, ali ki ma fẹ n, kpai amẹwñ bibi du