UKỌCHẸ 06
Abu Iñmi Chanẹ Le?
“Ugbo [Ọjọ] oñ ẹbi omi iñmi dẹ.” (Eli Ekọ D’Ọjọ 36:9) Ẹ che jẹ abalẹ? Abo ka akpibe kakini i ch’enyi ma nyi iñmi n. Ichẹñwu k’ọla-i ch’ọgẹcha i che, e-lẹ adu ña kaki iñmi ch’achigili i wa. Ichẹñwu ki muda ch’Ọjọ nyi iñmi, e-lẹ adu ña kaki i che n’ẹtẹ ogbogaga ki jẹñwu nyi iñmi, abẹk i ch’abalẹ n? a Kpibe ẹñwu ki Baibul ka lugbo ọna k’efojale kpai anẹ ilẹ-i chanẹ le kpai ẹñwu ki ajẹñwu wa kẹdọno kaki ẹñwu ki Baibul ka ch’ọgẹcha i che.
1. Abu ojale manyu anẹ ilẹ-i chanẹ le?
Baibul kakini: “Ẹgba abakwanẹ ejodudu Ọjọ nyi efojale kpai anẹ-ilẹ.” (Abakwanẹ 1:1) Abo sayẹnsi wewe jẹ kaki ojale manyu anẹ ilẹ-i che n’uchanẹ. Abu Ọjọ ch’ọna ma le? Afu kiafọ-wñ, abẹki ukpahiu-wñ, i du nyi amẹñwu du gbaa dabu am’ilawo kpai anẹ ilẹ-i kpai am’ẹñwu omunẹ ku ma dọ planẹti.—Abakwanẹ 1:2.
2. Ẹñwu chi k’Ọjọ nyi anẹ ilẹ-i?
Jihofa ‘nyi [ilẹ-i] ki dẹ jugu tẹ n, i f’u bọ k’i n’abo ku ma adodo oji-wñ.’ (Aizaya 45:18) I nyi ilẹ-i ki nyọ, todu k’awa ki neke n’amẹñwu ki ajẹñwu wa dodo efu-wñ ogbegbelẹ. (Gba Aizaya 40:28; 42:5.) Abo sayẹnsi du ña kaki anẹ-ilẹ-i ch’ojoji ñwu am’iplanẹti e-ki bọ todu owñ kate n’amẹñwu ki ajẹñwu amonẹ n’iñmi.
3. Ẹñwu jẹñwu amonẹ ch’ojoji ñwu am’ẹla?
Ubi ki Jihofa nyi ilẹ, i ch’ọna amẹñwu iñmi ki defu-wñ. Ejodudu, i f’ilẹ kpẹkọ ñwu am’oli kpai am’ẹla. Ubilẹ, “Ọjọ f’onẹ nyi ojibo-wñ onugo.” (Gba Abakwanẹ 1:27.) Ẹñwu jẹñwu am’onẹ ch’ojoji? Alu k’Ọjọ f’uwa nyi r’ojibo ọla-wñ, a neke n’amali-wñ, dabu ufẹdọ kpai ajọ ọkpakpa eka. Jihofa ñọ nyi wa ọna k’a neke kọchẹ am’ichi omunẹ, a neke m’amẹñwu ki achutọ, kpai ejidadi am’ọda ojoji-ojoji. Ẹñwu omunẹ k’a neke che k’amẹla ma neke che n che kakini a neke r’Ọjọ wa.
N’UMA NYỌGBA
K’a g’ẹñwu ki du tejugede kaki i n’ẹnẹ ki ch’ọna iñmi kpai ẹñwu ki jẹñwu wa ma kaki ẹñwu ki Baibul ka lugbo alu k’Ọjọ ch’ọna ojale kpai anẹ ilẹ ch’ọgẹcha. Kọchẹ ẹñwu k’amali k’amonẹ nẹ neke kọ wa lugbo ọla ẹnẹ k’Ọjọ che.
4. Ọjọ ch’ọna iñmi
Amonẹ an’ojima kwefu amẹñwu ki chẹ che tanẹ ku ma ch’awọli-wñ. Ichẹñwu ki dabalẹ, ẹnẹ dukpẹ ki n’ojima ẹñwu ki chẹ che tanẹ lẹ? G’IFIDIO-i, ubile mẹ ch’oluka oji ene-i.
-
Ẹñwu am’achọna-ẹñwu ch’awọli-wñ kwefu amẹñwu k’Ọjọ nyi?
Unyi duu che n’ẹnẹ ki kọ. I dabalẹ, ẹnẹ ch’ọna am’ẹñwu duu k’ali? Gba Abo Hibru 3:4, ubilẹ mẹ ch’oluka oji am’ene-i:
-
Efu am’ẹñwu k’Ọjọ nyi, ẹñwu che e-k’ẹ ñeju tule?
-
A neke kẹdọno kaki ilẹ-i kpai ẹñwu duu ki defu-wñ che n’ẹnẹ ki ch’ọna-wñ? Ẹñwu chi?
Ẹ che ma?
Ẹ neke li am’ẹñwu omunẹ manyu am’ifidio ki kọla lugbo oji ọla-i efu jw.org. Ẹ neke li ugbo meji-i: “Enyi Ma Nyi-i?” kpai ““Ibe Amonẹ Lugbo Alu K’iñmi Chanẹ Le.”
“Todu unyi duu che n’ẹnẹ ki kọ; ama ẹnẹ ki kọ ẹñwu duu ch’Ọjọ”
5. I che n’amẹñwu ọmẹmẹlẹ ki jẹñwu wa kẹdọno kaki ẹñwu ki Baibul ka lugbo ọna k’Ọjọ nyi am’ẹñwu ch’ochochi
Efu Abakwanẹ Oji 1, Baibul che ka ñwu wa uchanẹ ilẹ kpai alu ki iñmi le ki w’efu ilẹ. Ẹ neke kẹdọno ọla-i, abẹki ọlemi i che? G’IFIDIO-i, ubilẹ mẹ ch’oluka oji amene-i.
-
Ọjọ mẹfa ki Baibul kaki Ọjọ du nyi ojale kpai anẹ ilẹ-i ch’ọjọ mẹfa ofofo i che?
-
Ẹ neju kaki ẹñwu ki Baibul ka lugbo alu k’Ọjọ ch’ọna ilẹ-i ch’eju-wñ? Ẹñwu chi k’ẹ k’abalẹ?
Gba Abakwanẹ 1:1, ubilẹ mẹ ch’oluka oji ene-i:
-
Abo sayẹnsi kaki ilẹ-i che n’uchanẹ. Abu ẹñwu ku ma ka-i jẹ kpai ẹñwu k’ẹ gba kwefu Baibul?
Abo ka akpibe kaki Ọjọ nyi ẹñwu kate efu ilẹ-i, tak i chanẹ erida t’amẹñwu ojoji ojoji. Gba Abakwanẹ 1:21, 25, 27, ubilẹ mẹ ch’oluka oji amene-i:
-
Baibul che kọ wa kak’Ọjọ nyi ẹñwu kate efu ilẹ-i, tak i chanẹ erida t’amẹja, am’ẹla kpai am’onẹ? Abẹk Ọjọ nyi amẹñwu iñmi duu “uchẹ uchẹ” ma? b
6. Onẹ ch’ojoji efu am’ẹñwu k’Ọjọ ch’ọna
Jihofa ch’ọna wa ojoji ñwu alu ki ch’ọna am’ẹla. Gba Abakwanẹ 1:26, ubilẹ mẹ ch’oluka oji ene-i:
-
Alu k’Ọjọ nyi wa r’ojibo ọla-wñ, ẹñwu ufẹdọ kpai ejumomi k’a nẹ du tejugede lugbo ọla ẹnẹ k’Ọjọ che?
ABO KA KAKINI: “Ẹñwu ki Baibul ka lugbo alu k’Ọjọ nyi ojale kpai anẹ ilẹ-i ch’ọhiala ọlemi.”
-
Ẹñwu ch’ibe wẹ? Ẹñwu chi k’ẹ kabalẹ?
ẸY’ỌLA UKỌ-I
Jihofa nyi ojale kpai anẹ ilẹ-i manyu am’ẹñwu iñmi duu.
Ẹñwu ẹ kọchẹ?
-
Ẹñwu Baibul kọ wa lugbo uchanẹ ojale kpai anẹ ilẹ?
-
Ọjọ nyi ẹñwu ka efu ilẹ-i, tak i chanẹ erida t’amẹñwu ojoji ojoji, abẹk i nyi uchẹ uchẹ ma chakaa?
-
Ẹñwu jẹñwu amonẹ ch’ojoji ñwu amẹñwu omunẹ k’Ọjọ ch’ọna ma?
KỌCHẸ MANYU
G’ujiwe amẹñwu ki d’ilẹ ki du ña kak’Ọjọ ch’ọna amẹñwu.
“Ẹñwu Amẹñwu K’Ọjọ Nyi Ef’ilẹ-i Akọ Wa?” (Awake!, September 2006)
G’alu k’ata neke d’ọla ki defu Baibul lugbo alu k’Ọjọ ch’ọna amẹñwu nẹr’ọma-wñ kekele eju.
Go ichẹñwu ki Baibul jẹ kpai ẹñwu k’amonẹ aka kaki amẹñwu ef’ilẹ-i wa jọ kp’ọla-ma.
“Ọjọ Ch’ọna Ẹñwu Iñmi Ka Efu Ilẹ-i, Tak I Chanẹ Erida T’amẹñwu Iñmi Ojoji Ojoji?” (I dẹ jw.org)
Go ich’ẹñwu k’amachikwu k’abo sayẹnsi gwa kwefu anẹ manyu am’ẹñwu omunẹ ku ma che adu ña kaki enyi ma nyi amẹñwu iñmi-i abẹki ma wa jọ kp’ọla-ma.
