UKỌCHẸ 38
Du Ña Kaki Iñmi K’Ọjọ Du Ñwẹ Che W’ẹ Eju
I che n’amẹñwu ẹnyọ wewe ki def’ilẹ-i ki neke jẹñwu ilẹ-i nyọ ñwu wa edodo. Dagba k’a dejudo am’ihianyi, i n’amẹñwu k’a neke jidadi efu ọlai wa. Abu a neke du ña kaki iñmi k’Ọjọ du ñwu wa che w’uwa eju? Ẹñwu la chẹñwu ogbogaga ki jẹñwu wa ch’abalẹ?
1. Ẹñwu chi ki dukpẹ k’a du ña kaki iñmi k’Ọjọ du ñwu wa che w’uwa eju?
I dukpẹ k’iñmi ki w’uwa eju todu ki chẹñwu ele ki kwugbo Jihofa, Ata wa. Ugbo-wñ “ẹbi omi iñmi” dẹ, e-lẹ che kakini owñ nyi ẹñwu duu. (Eli Ekọ D’Ọjọ 36:9) “Owñ onugo adu iñmi kp’afu kp’ẹñwu du ñwu amẹñwu du.” (Ẹwñ 17:25, 28) Jihofa d’amẹñwu ki neke jẹñwu wa deju ñwu wa. I la jẹñwu ki lọla ñwu wa k’a jura ọlai wa.—Gba Ẹwñ 14:17.
2. Abu a neke du ña kaki iñmi ki Jihofa du ñwu wa che w’uwa eju?
Kw’iko k’ẹ defu iye wẹ, owñ Jihofa dọmọ adejut’ẹ. Afu Ọjọ nẹ Defid le ki kakini: “Eju-wẹ che li ẹñwu ku ma nẹ che mi.” (Eli Ekọ D’Ọjọ 139:16) Iñmi wẹ che wu Jihofa eju. (Gba Matiu 10:29-31.) I chẹñwu iwọ ñwu Jihofa nyọnyọ ichẹñwu k’onẹ gbejugede f’ẹnẹ omunẹ kpa abẹki ichẹñwu k’onẹ kp’ọla-wñ. a (Akwodufu 20:13) I la ñọ chẹñwu iwọ ñwu Jihofa nyọnyọ ichẹñwu k’onẹ ad’oji ọla-wñ t’ukwu abẹki ichẹñwu k’ọnẹ ad’ọlai amonẹ t’ukwu. Ichẹñwu k’a dejutẹ ọlai wa kpai e-amonẹ, e-lẹ adu ña kakini ele iñmi k’Ọjọ du ñwu wa che w’uwa eju.
N’UMA NYỌGBA
G’amọna ka k’ẹ neke du ña kaki ele iñmi k’Ọjọ du ñwu wa che w’ẹ eju.
3. Deju t’añọla wẹ
Todu k’a f’ọlai wa datẹ ñwu Jihofa, k’a la kaki a chẹñwu duu k’i tene, a d’ọlai wa chaka r’ọ. I dabẹnẹ kaki a m’ọla wa du ch’ẹñwu ichẹbọ ñw’Ọjọ. Gba Abo Rom 12:1, 2, ubilẹ mẹ ch’oluka oji am’ene-i:
-
Ẹñwu dukpẹ ki d’ẹ ẹdọ kwanẹ k’ẹ dejut’ọla wẹ?
-
Ẹñwu ch’amọna k’ẹ neke ch’e-lẹ?
4. Dejut’ẹñwu duu k’ẹ che k’onẹ ki we ch’agbe abẹki ekwu lefu-wñ
Baibul d’ibe ñwu wa k’a f’ọla wa de b’amuche ki neke d’ọlai wa t’ukwu tẹ. G’IFIDIO-i k’ẹ neke kọchẹ ẹñwu k’ẹ neke che k’ẹ we d’ọla wẹ t’ukwu.
Gba Ita Ita 22:3, ubilẹ mẹ ch’oluka alu k’uwẹ kpai abomunẹ neke f’ọla mẹ de . . .
-
efu unyi wẹ.
-
ugbo k’ẹ ch’ukọlọ.
-
iko ku mẹ ch’ispọtu.
-
ichẹñwu k’a n’imoto ej’ọna abẹki ẹñwu omunẹ kpai ichẹñwu ku ma nẹ d’uwa.
5. Ẹ ki chẹñwu ki ad’ọlai ọma ki defu t’ukwu n
Defid kakini ẹñwu duu ki akẹrẹ b’ọma ki defu iye-wñ chẹñwu ogbogaga eju Jihofa. Gba Eli Ekọ D’Ọjọ 139:13-17, ubilẹ mẹ ch’oluka oji ene-i:
-
Ẹgba iñmi chanẹ kwo eju Jihofa, iko ku ma bi ọma abẹki iko ku ma ny’efu-wñ?
Ọda ki Jihofa du ñwu abo Israẹl dide abobulẹ ki defu. Gba Akwodufu 21:22, 23, ubilẹ mẹ ch’oluka oji am’ene-i:
-
Abu Jihofa ali ẹnẹ ki kp’ọma ki defu ki ma muda gbejugede che n?
-
Abu i ana dẹ eju Jihofa ichẹñwu k’onẹ gbejugede che? b
-
Ẹñwu chibe wẹ lugbo ọwọ ki Jihofa du gwọnyu ọda-i?
Onobulẹ k’iñmi che w’ọ eju nyọnyọ neke kpibe iko ka kakini efu ekpabiẹ ch’ọna kate ki nẹ todu akanya ki w’ọgba-wñ. Gba Aizaya 41:10, ubilẹ mẹ ch’oluka oji am’ene-i:
-
Ichẹñwu k’onobulẹ ka n’akanya ku ma la ak’ọ ẹchẹ ki kp’efubiẹ, ẹnẹ i dukpẹ ki ra gbẹrẹ ki ch’atẹko-wñ? Ẹñwu chi k’ẹ kabalẹ?
ABO KA KAKINI: “Onobulẹ duu neke kpibe kaki i akp’efubiẹ abẹki i kp’efubiẹ n todu owñ n’ọla-wñ.”
-
Ẹñwu jẹñwu ẹ ma jali kaki ọlai iye ki defu kpai ọma ki defu-wñ che wu Jihofa eju?
ẸY’ỌLA UKỌ-I
Baibul kọ wa k’a fẹdọ iñmi ki Jihofa du ñwu wa, k’a dide-wñ, ki la w’uwa eju. E-lẹ ch’iñmi e-wa kpai iñmi abomunẹ gẹ.
Ẹñwu ẹ kọchẹ?
-
Ẹñwu chi k’iñmi onẹ wu Jihofa eju?
-
Abu i adẹ ñwu Jihofa ichẹñwu k’onẹ gbejugede kp’onẹ?
-
Ẹñwu chi ki iñmi ki Jihofa du ñwu wa w’ẹ eju?
KỌCHẸ MANYU
Abu a neke d’ugwa ñwu Jihofa todu iñmi ki du ñwu wa?
Tejanẹ ohi ene-i, Ọjọ neke duba ñwu ẹnẹ ki kp’efu biẹ mama mẹ?
Kọchẹ ẹñwu ki chi ki dukpẹ k’ọna k’Ọjọ ago ọlai ki na nẹ wa le efu ẹñwu duu k’a che.
“I Dukpẹ K’a Ch’ispọtu Duu Ki Ad’ọlai Wa T’ukwu?” (Awake!, October 8, 2000)
Ichẹñwu k’onẹ akpibe ki kp’ọla-wñ, kọchẹ alu ki Baibul neke ch’atẹko-wñ.
“Baibul Neke Ch’atẹko Mi Ichẹñwu Ku Na Kpibe Ku Kp’ọla Mi?” (I dẹ jw.org)
a Jihofa akwula nyọnyọ ñwu abo k’ẹdọ ma chẹ kpabiẹ. (Eli Ekọ D’Ọjọ 34:18) I m’iwọ ki neke jẹñwu amonẹ kpibe kaki ma kp’ọlama, i la añeju ki ch’atẹko ma. K’ẹ neke li ọna k’e-lẹ neke ch’atẹko abo ki akpibe abalẹ, gba oji-ọla-i “Baibul Neke Ch’atẹko Mi Ichẹñwu Ku Na Kpibe Ku Kp’ọla Mi?” ki dẹ Kọchẹ Manyu efu ukọchẹ-i.
b Ichẹñwu k’onẹ kp’efu biẹ kwobi, ki la m’ibe rida mẹ, i ki ch’ẹdọ dudu ololo n todu Jihofa neke duba ñwu. Ichẹñwu k’ẹ tene ma manyu, g’oji-ọla ki dẹ “Ẹñwu Baibul Ka Lugbo Efu Ekpabiẹ?” ki dẹ Kọchẹ Manyu efu ukọchẹ-i.
